𝐌𝐎𝐏 𝐀𝐒𝐈𝐒𝐓𝐈 𝐒𝐄𝐑𝐈𝐌Ó𝐍𝐈𝐀 𝐀𝐍𝐔𝐍𝐒𝐈𝐀 𝐏𝐀𝐑𝐒𝐄𝐑𝐈𝐀 𝐅𝐎𝐔𝐍 𝐓𝐈𝐌𝐎𝐑-𝐋𝐄𝐒𝐓𝐄 𝐍𝐎 𝐀𝐔𝐒𝐓𝐑Á𝐋𝐈𝐀 𝐇𝐎 𝐏𝐀𝐊𝐎𝐓𝐄 𝐅𝐈𝐍𝐀𝐍𝐒É𝐈𝐑𝐔 𝐌𝐈𝐋𝐋𝐀𝐔𝐍 $68.4

𝘿𝙞𝙡𝙞, 15 Dezembru 2022: Ministru Obras Públikas (MOP), Eng. Abel Pires da Silva, asisti serimónia anunsiasaun parseria foun entre Governu Timor-Leste no Austrália liuhosi programa Fasilidade Finansiamentu Infraestrutura husi Austrália ba Pasífiku (Australian Infrastructure Financing Facility for the Pacific - AIFFP), ho pakote finanseiru ho millaun 68.4 USD konsesionál ba rehabilitasaun Aeroportu Internasionál Prezidenti Nicolau Lobato, Kumoro, Dili, ne’ebé serimónia ne’e realiza iha salaun Ministériu Nagósiu Estranjéiru no Kooperasaun (MNEK), Pantai Kelapa, Dili.

Pakote finanséiru ida-ne'e inklui impréstimu millaun $40USD no kontribuisaun millaun $28.4USD liuhosi AIFFP no programa bilaterál Department of Foreign Affairs and Trade. Ida-ne'e empréstimu ba nasaun dahuluk husi Austrália fó ba Timor-Leste.

Governu Austrália nia kontribuisaun inklui mós apoiu husi nia programa Parséiru ba Infraestrutura ne'ebé fó fundu ba atividade preparasaun sira ba projetu refere.

Investimentu Austrália nian ne'e sei kompleta servisu adisionál ne'ebé realiza daudaun ona iha aeroportu, hanesan harii pista foun ne'ebé hetan apoiu husi Banku Dezenvolvimentu Aziátiku (ADB, sígla Inglés) no harii terminál foun ne'ebé hetan apoiu husi Ajénsia Japaun ba Kooperasaun Internasionál (JICA, sígla Inglés) nian.

Austrália nia investimentu ne'e sei kontribui ba komponente krítika sanulu-resin-tolu iha área infraestrutura nian. Ida-ne'e inklui hadi'ak kapasidade komérsiu liuhosi harii edifísiu foun ba terminál kargu, no mós instalasaun fasilidade karantina ba animál no ai-horis sira. Iha ne'ebá sei iha asesu di'ak liu ba terminál aeroportu nian liuhosi hadi'ak asesu ba estrada no la'o fatin, no mós renovasaun karreta sira-nia para fatin no fatin tula/hatún pasajeiru sira iha aeroportu.

Ba pasajeiru no funsionáriu aeroportu sira-nia asesu ba saúde no seguransa sei hadi'ak tan liuhosi konstrusaun edifísiu ba ekipa bombeirus iha aeroportu, fasilidade saúde primária no hadi'ak moru ne'ebé seguru liután. Iha área besik aeroportu sira mós sei halo mudansa di'ak liu hanesan harii ponte foun iha mota Kumoro no eskola primária foun iha Beto Tasi.

Ikus liu, projetu ida-ne'e sei suporta operasaun no manutensaun aeroportu nian liuhosi instalasaun fasilidade manutensaun aeroportu foun, hadi'ak fatin depózitu kombustível nian, servisu eletrisidade no liga ahi foun, bee-moos no bee-dalan.

#Media_MOP