𝐌𝐎𝐏 𝐎𝐁𝐒𝐄𝐑𝐕𝐀 𝐅𝐀𝐓𝐈𝐍 𝐁𝐀 𝐈𝐌𝐏𝐋𝐄𝐌𝐄𝐍𝐓𝐀𝐒𝐀𝐔𝐍 𝐏𝐑𝐎𝐉𝐄𝐓𝐔 𝐋𝐈Ñ𝐀 𝐁𝐈𝐒𝐈𝐊𝐋𝐄𝐓𝐀 𝐈𝐇𝐀 Á𝐑𝐄𝐀 𝐌𝐄𝐓𝐈𝐀𝐔𝐓 𝐓𝐎’𝐎 𝐊𝐑𝐈𝐒𝐓𝐔 𝐑𝐄𝐈

𝘿𝙞𝙡𝙞, 10 Janéiru 2023: Ministru Obras Públikas (MOP), Eng. Abel Pires da Silva, akompaña husi Diresaun Nasionál Konstrusaun Rodoviárias (DNKR), asumi husi Sr. Milton Ramanata de Castro Monteiro, Diretór Nasionál Urbanízmu (DNE), Eng. Manuel da Costa Xavier, no tékniku sira hala’o observasaun ba topugrafia no kontekstualizasaun dezeñu ba projetu liña bisikleta iha área tasi-ibun Metiaut to’o Kristu Rei, Munisípiu Dili nian.

Iha observasaun ne’e Sr. Ministru orienta tékniku sira atu aselera no kompleta dokumentu sira ba dezeñu liña bisikleta nian liuliu foti dadus topugrafia iha área refere. Nune’e ekipa tékniku sei halo esforsu atualiza dezeñu tuir topugrafia husi parte Metiaut to’o Kristu Rei nian.

Bainhira kompleta ona dadus hirak ne’e sei presiza hetan verifikasaun husi Ajénsia Dezenvolvimentu Nasionál (AND) no aprovasaun iha Konsellu Administrasaun Fundu Infraestrutura (KAFI) antes ba implementasaun.

Objetivu no inisiativu husi implementasaun projetu liña bisikleta ne’e mosu hanesan vizaun ida hodi embelezamentu (hafurak) sidade kapitál Dili.

Projetu ne’e sei kompletu ho extensaun no manutensaun ba trotoar tuir estratéjiku planu urbanu nian ne’ebé enkaixa aspeitu complete streets no sistema multi-modal transportasaun hodi bele akomoda siklista no ema la’o-ain sira inklui ba ema ho kondisaun defisiénsia.

Konstrusaun fasilidade urbana foun ida-ne’e bele fornese seguransa ba utilizadór sira bainhira uza estrada no aumenta asesibilidade área turístiku ba ema hotu.

Investimentu ba projetu liña bisikleta ne’e sei tau konsiderasaun ba ema ho defisiénsia sira-nia asesibilidade no nesedidade - haktuir iha despaixu Nu. 07/MOP/VIII/2020, ne’ebé públika ona iha Jornál da Repúblika.

Kontrusaun ba asesu liña bisikleta ne’e ho distânsia 5 kilómetru (KM) no nia luan 1.5 metrus husi área Metiaut - Kristu Rei.

#Media_MOP