𝐌𝐎𝐏 𝐎𝐑𝐈𝐄𝐍𝐓𝐀 𝐃𝐉𝐄𝐏𝐊𝐒 𝐀𝐒𝐄𝐋𝐄𝐑𝐀 𝐃𝐄𝐙𝐄Ñ𝐔 𝐁𝐀 𝐄𝐒𝐓𝐑𝐀𝐃𝐀 𝐍𝐎 𝐏𝐎𝐍𝐓𝐄 SIRA, INKLUI 𝐊𝐎𝐍𝐓𝐈𝐍𝐔𝐀 AKOMPANA 𝐏𝐑𝐎𝐆𝐑𝐄𝐒𝐔 𝐊𝐎𝐍𝐒𝐓𝐑𝐔𝐒𝐀𝐔𝐍 𝐁𝐀 𝐄𝐒𝐓𝐑𝐀𝐃𝐀 𝐋𝐀𝐆𝐀-𝐁𝐀𝐆𝐔𝐈𝐀 𝐍𝐎 𝐔𝐀𝐈𝐀𝐊𝐀-𝐊𝐄𝐋𝐈𝐊𝐀𝐈-𝐎𝐒𝐒𝐔

𝘿𝙞𝙡𝙞, 09 Janeiru 2023: Ministru Obras Públikas (MOP), Eng. Abel Pires da Silva, iha reuniaun regulár kontinua orienta Diretór Jerál Estrada, Ponte no Kontrolu i Seias (DJEPKS), Sr. Rui Hernani, ho nia Diretór Nasionál sira hodi aselera dezeñu ba estrada munisipál, urbana inklui ba ponte sira ne’ebé daudauk ne’e la’o hela. Kontinua mós akompaña progresu konstrusaun ba estrada munisipál Laga-Baguia iha munisípiu Baukau no Uaiaka-Kelikai-Ossu entre munisípiu Baukau no Vikeke nian.

Sr. Ministru orienta bainhira hala’o enkontru ho Diretór Jerál no Nasionál sira iha salaun enkontru Gabinete MOP, Kaikoli, Dili.

Ba estrada nasionál, munisipál no urbana ne’ebé daudauk ne’e konstrusaun la’o hela, Sr. Ministru orienta ekipa tékniku sira kontinua akompaña hodi aselera prosesu konstrusaun ba estrada sira. Orienta mós hodi aselera dezeñu ba estrada no ponte hirak ne'ebé daudauk ne’e prosesu la’o ona, inklui servisu emerjénsia sira ne'ebé seidauk finaliza.

Sr. Ministru kontinua orienta ekipa tékniku DJEPKS no Unidade Manajementu Projetu (PMU, sígla Inglés) estrada atu kontinua akompaña progresu rehabilitasaun ba estrada munisipál husi postu administrativu Laga ba Baguia iha munisípiu Baukau no husi Uaiaka ba postu administrativu Kelikai, munisípiu Baukau nian ba postu administrativu Ossu, munisípiu Vikeke nian ne'ebé antes ne'e lansa ona iha loron 09 fulan-Dezembru tinan 2022 liubá.

Iha reuniaun regulár ne'e mós Sr. Ministru Obras Públikas husu ba DJEPKS liuhosi Diresaun Nasionál sira atualiza progresu ba estrada sira hanesan, estrada postu administrativu Maliana ba munisípiu Bobonaro liga postu administrativu Atsabe, estrada Lautem - Watukarbau, munisípiu Vikeke nian to'o postu Natarbora, husi munisípiu Ainaro (Sarae) - Suku Hare-Kain, postu administrativu Zumalai, Aituto-Letefoho, Gleno-Letefoho no Hatulia, Laklubar-Turiskain, Seloi-Gleno inklui estrada sira seluk.

Ikus liu, Diresaun Jerál Habitasaun no Urbanízmu aprezenta mós progresu sira kona-ba progresu konstrusaun ba Jardín sira ne'ebé mak tama ona iha planu sira no update mós kona-ba progresu sira ba habitasaun iha suku Halidolar postu administrativu Kristu-Rei nian ne'ebé prosesu daudaun ne'e la'ohela.

Partisipa iha reuniaun regulár ne'e, Diretór Jerál Obras Públikas (DJOP), Eng. Rui Hernani Guterres ho nia Diretór Nasionál sira no PMU, Diretór Nasionál Aprovizionamentu (DNA), Sr. Deonisio Guterres inklui tékniku sira husi diresaun sira no tékniku Gabinete MOP.

#Media_MOP