𝐌𝐎𝐏 𝐏𝐑𝐎𝐍𝐓𝐔 𝐀𝐏𝐎𝐈𝐔 𝐌𝐏𝐌 𝐀𝐒𝐄𝐋𝐄𝐑𝐀 𝐏𝐑𝐎𝐉𝐄𝐓𝐔 𝐓𝐀𝐒𝐈-𝐌𝐀𝐍𝐄

𝘿𝙞𝙡𝙞, 10 Janeiru 2023; Ministru Obras Públikas (MOP), Eng. Abel Pires da Silva, iha reuniaun ho Ministru Petróleu Minerais (MPM), Sr. Victór da Conceição Soares, iha salaun reuniaun Gabinete MPM, Fomentu Dili, hatete prontu koordenasaun servisu ho MPM hodi fasilita aselera projetu sira iha Tasi-Mane.

Sr. Ministru Obras Públikas hala’o reuniaun direita ho Sr. Ministru MPM relasiona ona pedidu husi MPM oinsá mak halo kooperasaun di’ak iha área servisu tékniku sira liga ho infraestrutura bázika iha munisípiu Kovalima ne’ebé prejudika prosesu perfurasaun mina iha parte Tasi-Mane liuliu prejudika atividade Timor Gap nian.

Sr. Ministru iha intervensaun hatete "Priméiru agradese ba ita-boot sira-nia aproximasaun, Ministériu ida-ne’e Ministériu tekníku ne’ebé atu serví Ministériu sira hotu no mós ita-nia povu sira liuhosi fornesimentu fasilidade báziku hanesan estrada, ponte, eletrisidade, bee-moos, edifikasaun no ba ida-ne’e ha’u hanoin, ita tuur hamutuk para tekníku sira tau iha meja ita foti desizaun depois sai ba bele rezolve ona situasaun ne'ebé maka dada tempu, ha’u-nia hanoin mak ne’e de’it, purtantu imi (tékniku sira) tuur hamutuk ba tau hamutuk situasaun ne’e iha meja, depois Sr. Ministru ita disidi, depois tekníku sira sai husi ne’e ba kontinua servisu hamutuk, agora iha ne’e ita-boot sira ko’alia ba, nai ulun sira iha ne’e koalia ba problema saida, ita disidi para rezolve, importante maka hanesan Sr. Ministru ohin ko’alia ne’e, projetu ne’e projetu ba ita hotu involve ita-nia populasaun sira liliu projetu Mina iha Suai ne'eba".

Parte tékniku, Diretór Nasionál Edifikasaun (DNE), Sr. Lino Pereira, prontu atu apoiu servisu sira ne’ebé liga ho servisu infraestrutura liuliu edifikasaun.

Partisipa iha reuniaun ne’e mak hanesan Sr. Ministru MOP rasik, Sr. Ministru MPM, Diretór Timor Gap, DNE, inklui tékniku sira DNE no Gabinete MOP no MPM.

#Media_MOP