Ministru Obras Públikas, Eng. Abel Pires da Silva, nia Atividade Importante Sira Durante Fulan 9 Lidera MOP

Tuir mai, Ministru Obras Públikas (MOP), Eng. Abel Pires da Silva, nia atividade importante sira durante lidera Ministériu Obras Públikas iha fulan 9 nia-laran husi fulan-Marsu to’o Dezembru tinan 2022

𝐌𝐚𝐫𝐬𝐮 𝟐𝟎𝟐𝟐,

2̲2̲ ̲f̲u̲l̲a̲n̲-̲M̲a̲r̲s̲u̲ ̲2̲0̲2̲2̲,̲ Ministru Obras Públikas (MOP), Eng. Abel Pires da Silva, simu posse husi S. Exa, Prezidente Repúblika (PR), Sr. Francisco Guterres Lú Olo, iha Palásiu Prezidensiál, Bairru Pité, Dili iha parte dader, kontinua kedas enkontru ho funsionáriu Mop nian no iha parte loraik kontinua kumprimenta S. Exa, Primeiru Ministru (PM), Jenerál Taur Matan Ruak, iha Palásiu Governu, Dili

Hafoin simu posse iha loron 22, hahú husi 22 to’o 25 fulan-Marsu tinan 2022 nian, Hanesan Ministru Obras Públikas hahú enkontru ho Dirijente sira no vizita Diresaun sira hodi haree direita funsionamentu iha diresaun sira, inklui vizita ba Instituisaun Autónomu ne’ebé tutela ba Ministériu Obras Públikas.

Iha loron 24 fulan-Marsu 2022 Sr. Ministru mós hala’o enkontru dahuluk ho S. Exa, Vise Primeiru Ministru no Ministru Planu Ordenamentu (V-PM no MPO), Sr. José Reis, ho Diretór ezekutivu Ajénsia Dezenvolvimentu Nasionál (ADN), Eng. Mariano Renato Monteiro da Cruz, hanesan parséiru importante MOP nian hodi hametin liután koordenasaun ba implementasaun projetu infraestrutura nian.

̲2̲8̲ ̲f̲u̲l̲a̲-̲M̲a̲r̲s̲u̲ ̲2̲0̲2̲2̲,̲ Ministru Obras Públikas (𝙈𝙊𝙋), Eng. Abel Pires da Silva, enkontru ho dirijente sira no reforsa orientasaun S. Exa, Primeiru Ministru (PM), Jenerál Taur Matan Ruak, hodi sobu ponte Bekussi tuan, monta ponte Bekussi temporáriu hodi fasilita movimentasaun transporte no komunidade nian, aumezmu tempu hamenus rísku inundasaun iha área Bekussi.

𝐀𝐛𝐫𝐢𝐥 𝟐𝟎𝟐𝟐

01 fulan-Abril 2022, Governu liuhosi Ministru Obras Públikas (MOP), Eng. Abel Pires da Silva, akompaña husi Vise Ministru MOP, Eng. Nicolau Lino Freitas, no parte Ministériu Justisa (MJ) ho ofisiál sira negosia ho komunidade iha área Seroja, aldeia Golgota, suku Kumoro, postu administrativu Dom Aleixu, munisípiu Dili, hodi identifika rai estadu ho medida 50mx100m ka 5000 metru kuadradu (5000m2) oferese ba eskola Koléjiu São Miguel Arcanjo iha área Seroja nian antes sobu eskola refere no haluhan estrada protokolu husi Tasi-Tolu mai to’o Rotunda Prezidente Nicolau Lobato, Kumoro.

02 fulan-Abril 2022: Konsellu Administrasaun Fundu Infraestrutura (KAFI) delibera desizaun finál ba projetu emerjénsia halo rehabilitasaun ba estrada área Tasi-Tolu. KAFI deside halo ajudikasaun direita ba kompañia Jonize Unip. Lda, husi kompañia neen (6) ne'ebé antes ne'e MOP rekomenda ba KAFI.

Iha loron ne’e mós, Ministru Obras Públikas (MOP), Eng. Abel Pires da Silva, hala’o inspesaun ba konstrusaun estrada Laulara-Solerema, no observa kondisaun estrada foun Kasnafar-Sarlala, husi kapitál Dili ba Aileu nian.

Lansamentu fatuk dahuluk ba konstrusaun estrada Laulara-Slerema iha loron 31 Outubru 2019. Tuir planu, projetu ne'e konstrui durante tinan 2 ho balun hahú husi 31 fulan-Maiu 2019 to'o 16 Novembru 2021, maibé la konsege finaliza tanba impaktu husi Covid-19, inklui problema sira seluk, nune'e ho renovasaun kontratu, projetu ne'e sei finaliza iha fim tinan ida-ne'e.

Estrada nasionál Laulara-Solerema ne'e konstrui husi komapañia Internasionál China Wu Yi, hetan supervizaun husi kompañia Kunhwa.

Orsamentu ba projetu ne'e impréstimu husi Banku Mundiál ho montante millaun $17, ho distánsia kilometru 22.

06 fulan-Abril 2022, Konsellu Ministrus delibera atu autoriza Ministru Finansas, Sr. Rui Augusto Gomes, atu negosia ho Banku Mundiál kona-ba kondisaun espesífika sira ba empréstimu hodi finansiamentu projetu fornesimentu bee-moos ba sidade Dili. Projetu ne’e ho objetivu atu aumenta área kobertura ba servisu abastesimentu bee moos no hadi’a kapasidade institusionál BTL.EP nian. Projetu ne’e ho valór totál dolar amerikanu millaun 123,37, iha ne’ebé USD 120,76 mai husi empréstimu ne’e rasik. Projetu ne’e ho durasaun tinan 7, hahú husi tinan 2023 to’o 2029 no sei benefisia ba ema naín 82.300 husi munisípiu Dili nian.

06 fulan-Abril 2022, Ministru Obras Públikas (MOP), Eng. Abel Pires da Silva, asina kontratu ho Diretór Kompañia Auto Zone Unip. Lda, iha edifísiu IJE.IP, Kolmera, Dili, hodi fornese ekipamentu pezadu ba IJE.IP. Ho kontratu ne’e kompañia Auto Zone fornese ekipamentu pezadu unidade 15, ho orsamentu tuir kontratu millaun $1.6 resin ($1.688.800).

08 fulan-Abril 2022, Ekipa tékniku inspesaun projetu husi Gabinete Vise Ministru Obras Públikas (V-MOP) aprezenta relatóriu Inspesaun no Verifikasaun ba Projetu P44, ba Ministériu Obras Públikas (MOP), Eng. Abel Pires da Silva, no Vise Ministru MOP, Eng. Nicolau Lino Freitas Belo, iha gabinete MOP, Kaikoli, Dili. Objetivu husi aprezentasaun relatóriu ne'e mak Sr. Ministru hakarak hatene kle'an kona-ba projetu 143 ne'ebé Governu anteriór ezekuta no husi projetu ne'e iha projetu 44 mak laiha kontratu.

11 fulan-Abril 2022, Diretór Jerál Habitasaun no Urbanízmu (DJHU), Eng. Roger Tortuliano Belo, akompaña husi tékniku sira aprezenta dezeñu jardim iha fatin 3 iha kapitál Dili ba Ministru Obras Públikas (MOP), Eng. Abel Pires da Silva, iha salaun enkontru Gabinete MOP, Kaikoli, Dili. Jardim hirak ne’ebé DHJU hala’o ona nia dezeñu mak Jardín iha Feról, jardín iha Kampung ALor, no jardín iha Timor Lodge oin.

22 fulan-Abril 2022, Ministru Obras Públikas (MOP), Eng. Abel Pires da Silva, atualiza servisu infraestrutura hanesan estrada, bee-moos no eletrisidade ba S. Exa, Primeiru Ministru (PM), Jenerál Taur Matan Ruak, iha rezidénsia Primeiru Ministru, Faról, Dili. Iha enkontru ne’e, Sr. Ministru hetan orientasaun hodi hadi’ak di’ak liután servisu Obras Públikas nian liuliu atendimentu sira iha tereñu.

22 fulan-Abril 2022, Ministru Obras Públikas (MOP), Eng. Abel Pires da Silva, akompaña husi dirijente sira husi Diresaun Jerál Obras Públikas no Autoridade Nasionál Água no Saneamentu (ANAS) hala’o vizita no observa debu barak ne'ebé joven sira ho apoiu husi Permakultura Timor-Leste (PERMATIL) ke'e iha área Natsuka, aldeia Sukalau, suku Dare, postu administrativu Vera Cruz, munisípiu Dili.

27 fulan-Abril 2022, Konsellu Ministrus aprova projetu Rezolusaun Governu nian ba nomeasaun Sr. João Amaral, nu’udár Prezidente Konsellu Fiskál empreza públika BEE Timor-Leste (BTL, EP), no Sra. Regina de Jesus no Sr. Acácio Pinto nu’udár vogál Konsellu Fiskál BTL, EP nian. Kompete ba Konsellu Fiskál, nu’udár órgaun fiskalizasaun BTL, EP, garante kumprimentu husi norma legál, norma estatutária no norma regulamentár sira ne’ebé aplikavel ba empreza no fiskaliza ninia jestaun finanseira no patrimoniál. Tuir estatutu sira empreza públika ida-ne’e nian, nomeasaun ne’e propoin husi Membru Governu ne’ebé responsavel ba setór bee no saneamentu nian, Ministru, Eng. Abel Pires da Silva no husi membru Governu ne’ebé responsavel iha área finansas nian, Ministru, Sr.Rui Augusto Gomes.

𝐌𝐚𝐢𝐮 𝟐𝟎𝟐𝟐

04 fulan-Maiu 2022, Tuir projetu sira ne’ebé aprezenta husi Sr. Ministru Obras Públikas, Konsellu Ministrus delibera ona atu autoriza loke prosedimentu aprovizionamentu, liuhusi konkursu públiku internasionál, ba obras públikas kona-ba obras reparasaun auto-estrada Suai – Beasu, Seksaun 1: Suai – Fatuk-ahu/Mola no kona-ba konstrusaun Estrada Munisipál Uaiaka Kelikai – Ossu.

06 fulan-Maiu 2022, Ministru Obras Públikas (MOP), Eng. Abel Pires da Silva, reprezenta husi Diretór Jerál Habitasaun no Urbanízmu (DJHU), Arg. Roger Tortuliano Belo, asina akordu kooperasaun ho Reitór Universidade Nasionál Timor-Lorosa’e, Sr. João Soares Martins, liuhosi komemorasaun lian Portugés ne’ebé iha loron 5 fulan-Maiu tinan ida-ne’e, iha Auditória UNTL, Dili, hodi fó formasaun lian Portugés ba funsionáriu sira iha Ministériu Obras Públikas liuliu iha DJHU.

06 fulan-Maiu 2022, Konsellu Administrasaun Fundu Infraestrutura (KAFI) iha Sesta-feira ne’e aprova ona Dezeñu Enjenária Detalladu (DED) ba projetu konstrusaun estrada munisipál iha munisípiu Baukau husi postu administrativu Laga ba to’o postu administrativu Baguia, ne’ebé aprezenta husi Ministru Obras Públikas (MOP), Eng. Abel Pires da Silva, liuhosi enkontru KAFI iha salaun enkontru Ministériu Planu no Ordenamentu (MPO), Hudi-Laran, Dili. Hafoin aprova iha KAFI, Sr. Ministru Obras Públikas aprezenta fali projetu ne’e ba Konsellu Ministru hetan deliberasaun para loke prosesu tenderizasaun.

07 fulan-Maiu 2022, Ministru Obras Públikas (MOP), Eng. Abel Pires da Silva, akompaña husi Direstór Nasionál Estrada Ponte no Kontrolu i Seias (DNEPCC), Eng. Nene Lobato, no tékniku supervizór sira diálogu ho komunidade sira iha BTN II Tasi-Tolu ne’ebé antes ne’e la simu kompañia Jonize Unip, Lda. konstrui valeta foun ida husi Terminál Tasi-Tolu ba Tasi, maibé liuhosi diálogu ne’e konsege konvense ona preokupasaun komunidade nian no komunidade autoriza bele hahú ona halo konstrusaun, nune’e kompañia sei halo konstrusaun valeta iha área refere ne’ebé tama pakote ida ho projetu emerjénsia konstrusaun estrada iha Tasi-Tolu.

13 fulan-Maiu 2022, Konsellu Ministrus delibera atu autoriza hodi loke prosedimentu aprovizionamentu nian ida ho tipu Konkursu Públiku Internasionál, ba adjudikasaun kontratu ida ba reabilitasaun estrada munisipál, entre Laga - Baguia. Estrada ne’ebé atu reabilita ho naruk kilómetru 38.03 no valór globál ne’ebé estima maka US$ 22.366.181,74 (dolar amerikanu millaun ruanulu resin-rua, rihun atus tolu neen-nulu resin-neen no atus ida ualunulu resin-ida, no sentavu hitunulu resin-haat). Objetivu husi obra reabilitasaun estrada ne’e maka hodi garante asesibilidade no dezenvolvimentu ekonómiku nasaun nian.

24 fulan-Maiu 2022, Ministru Obras Públikas (MOP), Eng. Abel Pires da Silva, akompaña Prezidente Institutu Jestaun Ekipamentus Institutu Públiku (IJE.IP), Sra. Hermenegilda da Costa Laurentina, asina minutas diskusaun no Memorandu Entendimentu (Memorandum of Understanding – MoU) ho ekipa survey husi Ajénsia Japaun ba Kooperasaun Internasionál (Japan International Cooperation Agency - JICA) iha Timor-Leste hodi apoiu ekipamentu pezadu ba Ministériu Obras Públikas liuliu ba IJE.IP hodi atende situasaun emerjénsia sira.

24 fulan-Maiu 2022, Komisaun Nasionál Aprovizionamentu (CAN, sígla Portugués) publika konkursu públiku kona-ba projetu estrada munisipál Uaiaka-Kelikai-Ossu.

27 fulan-Maiu 2022, Komisaun Nasionál Aprovizionamentu (CAN, sígla Portugués) publika konkursu públiku kona-ba projetu estrada munisipál Laga-Baguia.

27 fulan-Maiu 2022, Ministru Obras Publikas (MOP), Eng. Abel Pires da Silva, halo abertura ba relatóriu Inspesaun ba projetu 44 iha salaun Elizabeth City 8 Manleuana Dili. Relatóriu ba Inspesaun ne'e lidera husi Vise Ministru Obras Públikas (V-MOP), Eng. Nicolau Lino, no akompaña husi Diretór Jerál Administrasaun no Finansas, Sr. Januário Barbosa, ekípa tékniku Inspesaun P44 no hetan partisipasun direita husi kompañia hirak ne’ebe sai na'in ba projetu 44.

30 fulan-Maiu 2022, Ekipa survey husi Ajénsia Japaun ba Kooperasaun Internasionál (Japan International Cooperation Agency - JICA) lidera husi Xefe Reprezentante JICA nian iha Timor-Leste, Sr. Goto Ko, halo aprezentasaun rezultadu estudu kona-ba rekoperasaun infraestrutura iha kapitál Dili liuliu mota Kumoro nian ba Ministru Obras Públikas (MOP), Eng. Abel Pires da Silva, no Vise Ministru MOP, Eng. Nicolau Lino Freitas Belo, iha salaun enkontru Gabinete MOP, Dili.

31 fulan-Maiu 2022, Ministru Obras Públikas (MOP), Eng. Abel Pires da Silva, akompña S. Exa, Primeiru Ministru (PM), Jenerál Taur Matan Ruak, hamutuk ho Membrus Komisaun Interministeriál ba Implementasaun Projetu Kabu Submariñu Fibra Ótika asina kontratu ho kompaña Alcatel Submarine Networks (ASN) ba projetu akizisaun no instalasaun kabu submariñu fibra ótika husi Darwin, Port Hedland, Austrália mai kapitál Díli, Timor-Leste.

Kontratu públiku ne’ebé asina ho kompaña ASN ho montante millaun $38,6 hodi halo instalasaun ligasaun dijitál kabu submariñu fibra ótika husi Austrália mai Timor-Leste. Projetu ne’e rasik ho durasaun fulan 18, hahú husi fulan-jullu 2022 no remata iha fulan-janeiru 2024.

𝐉𝐮𝐧𝐧𝐮 𝟐𝟎𝟐𝟐

04 fulan-Junnu 2022, Ministru Obras Públikas (MOP), Eng. Abel Pires da Silva, akompaña husi Sekretáriu Estadu Ambiente (SEA), Sr. Demétrio do Amarál de Carvalho, no Prezidente Bee Timor-Leste Empreza Públika (BTL.EP), Eng. Carlos Peloi dos Reis, inagura projetu bee-moos iha aldeia Dakolo, suku Nanu, postu administrativu Fatumea, munisípiu Kovalima.

Projetu ne’e tender husi Ministériu Obras Públikas iha 2019 manán husi kompañia Karisan Bonansa, Unip, Lda, hahú servisu iha fulan-Dezembru 2019 to’o 31 Maiu 2020 maibé infrenta tiha pandémia Covid-19 entaun hadi’a tiha to’o fulan-Outubru 2020, projetu ne’e nia totál osan $165, 277,57, durasaun servisu maka fulan neen. Projetu ida-ne’e rehabilitasaun ba tanki 3 ho konstrusaun foun ba tanki 10, ho distánsia Kilometru 5 resin.

13 fulan-Junnu 2022, Ministru Obras Públikas (MOP), Eng. Abel Pires da Silva, halo inspesaun ba projetu konstrusaun estrada nasionál husi munisípiu Baukau ba munisípiu Vikeke. Entertantu projetu estrada nasionál trosu Baukau-Venilale no Venilale-Vikeke ne'e kontrui husi kompañia Internasionál CRIG-COVEC ho distánsia Kilometru 58 resin, ho orsamentu millaun $44 dollar Amerikanu, fundu impréstimu husi Banku Dezenvolvimentu Aziátiku (ADB).

Projetu estrada ne'e iha Lot 2, Lot 1 mak husi Baukau to'o Venilale no Lot 2 mak husi Venilale to'o Vikeke. Konstrusaun estrada nasionál Baukau-Venilale Lot 1 atinji pursentu 57,91 ba konstrusaun fíziku, no lot 2 husi Venilale to’o Vikeke atinji pursentu 43.53%.

Iha loron hanesan, Sr. Ministru hala’o mós observasaun ba konstrusaun estrada rurál ne’ebé konstrui liuhosi programa Estrada Rurál ba Dezenvolvimentu (ERD) husi área Teulale to’o Uatabo, suku Buruma, postu administrativu Baukau, munisípiu Baukau ne'ebé konstrui husi kompañia lokál Mexa Unip, Lda, ho distánsia Kilometru 4.8.

14 fulan-Junnu 2022. Ministru Obras Públikas (MOP), Eng. Abel Pires da Silva, akompaña husi Prezidente Autoridade Nasionál Água no Saneamentu Institutu Públiku (ANAS.IP), Eng. Domingos Pinto, no tékniku sira husi Diresaun Nasionál Estrada, Ponte no Kontrollu i Seias (DNEPCC) inklui tékniku ANAS.IP rasik halo survey ba mota husi mota Maloa to’o mota uluk Ailok-Laran nian hodi rona informasaun no haree direita parte hirak ne’ebé sai fatin ba implementasaun programa prezervasaun udan-been ka halo barazen iha mota-ulun.

17 fulan-Junnu 2022, Ministru Obras Públikas (MOP), Eng. Abel Pires da Silva, enkontru ho kargu sefia husi diresaun no funsionáriu sira, inklui parte Sekretária Estadu Kooperativa (SeKoop) hodi ko'alia kona-ba planu atu harii kooperativa hodi fasilita impréstimu ka nesesidade báziku ba funsionáriu sira iha ministériu.

18 fulan-Junnu 2022, Ministru Obras Públikas (MOP), Eng. Abel Pires, akompaña husi Diretór Jerál Obras Públikas (DJOP), Eng. Rui Hernani, no Diretór Nasionál Estrada, Ponte no Kontrollu i Seias (DNEPCC), Eng. Milton Ramanata de Castro Monteiro, inklui tékniku sira halo observasaun direita ba kondisaun estrada husi Manatutu to’o kruzamentu ba postu administrativu Laklubar no to’o postu administrativu Natarbora nian. Observa mós kondisaun ponte no mota Lamara, ponte Dilór no mota Welolo ne’ebé defikulta movimentasaun komunidade nian iha área refere.

21 fulan-Junnu 2022, Electronic Life Tecnology (ELT Co, Ltd) husi Korea halo aprejentasaun ida ba Ministru Obras Públikas (MOP), Eng. Abel Pires da Silva, kona-ba projetu konstrusaun koneksaun rede ba mikro-rede halo redusaun ba emisaun karbonu no estabelesimentu estanadarizasaun ba kontinuasaun enérjia Solár iha Timor-Leste, iha edifísiu MOP, Kaikoli, Dili. Ne’e aprezentasaun faze kona-ba estudu viabilidade ba sistema solár panél iha munisípiu Atauro, ne'ebé durante ne'e ekipa ELT serisu hamutuk ho Eletrisidade Timor-Leste Empreza Públika (EDTL.EP) halo ona ba suku 5 iha munisípiu refere maka, suku Vila Atauru, Makili, Beloi, Bikeli no suku Makadadi.

22 fulan-Junnu 2022, Konsellu Ministru delibera atu autoriza selebrasaun akordu kontribuisaun finanseira entre Governu Timor-Leste ho Ajénsia Kooperasaun Internasionál Japoneza (JICA), kona-ba programa reabilitasaun urjente ba infraestrutura ne’ebé aat kauza husi inundasaun. Kontribuisaun finanseira husi JICA ne’e ho valór besik dolar amerikanu US$ 7.400.000 (dolar amerikanu millaun hitu rihun atus haat). Konsellu Ministrus delibera ona atu indika Ministru Finansas hodi asina akordu ne’e lori Governu Timor-Leste nia naran.

27 fulan-Junnu 2022, Ministru Obras Públikas (MOP), Eng. Abel Pires da Silva, sai sasin ba asinatura akordu ka MoU (Memoradum of Understanding) ba koperasaun servisu entre instituisaun tolu hanesan, Institutu Jestaun no Ekipamentu Institutu Públiku (IGE-IP, sigla Portugés) Eletrisidade Timor-Leste Empreza Públiku (EDTL.EP) no Institutu Petróleu no Jeolójia (IPG-IP, sígla Portugés) hodi responde servisu no atendimentu Públiku.

27 fulan-Junnu 2022, Ministru Obras Públikas (MOP), Eng. Abel Pires da Silva, asina akordu kooperasaun ho Responsável UN Women iha Timor-Leste, Sra. Amy Nishtha Satyam, iha salaun enkontru MOP, Kaikoli, Dili. Asinatura akordu ne'e hanesan kompromisu ida liuhosi parseria ne'e atu asegura espasu públiku no planeamentu urbanu ne'ebé inkluzivu no seguru ba ema hotu liuliu ba feto, labarik no ba ema ho defisínsia sira.

28 fulan-Junnu 2022, Ministru Obras Públikas (MOP), Eng. Abel Pires da Silva, akompaña husi Prezidente Konsellu Administrasaun Eletrisidade Timor-Leste Empreza Públika (EDTL.EP), Eng. Paulo da Silva, ho ekípa halo observasaun direita ba funsionamentu Sentrál Elétrika Hera, munisípiu Dili.

28 fulan-Junnu 2022, Preziente Autoridade Nasionál Água no Saneamentu Institutu Públiku (ANAS.IP), Eng. Domingos Pinto, lidera ekipa konjunta ba prezervasaun bee iha kapitál Dili aprezenta rezultadu suvey ne'ebé hala'o iha mota Benamauk - Bekora mota ulun no Bekussi, inklui Ailok-Laran mota ulun no mota ulun seluk iha kapitál Dili hodi halo prezervasaun udan-been iha mota ulun sira ba Ministru Obras Públikas (MOP), Dr. Eng. Abel Pires da Silva, iha salaun enkontru Gabinete MOP, Kaikoli, Dili.

29 fulan-Junnu 2022, Konsellu Ministrus delibera atu aprova alterasaun Kontratu Públiku nu. ICB/018/MOPTC- 2017 ba obra atu hadi’a no halo manutensaun ba Estrada Dili- Ainaro, Lote 2: trosu Laulara – Solerema, datadu loron 10 fulan-setembru tinan 2018 no autorizasaun hodi aumenta despeza korespondente. Prazu ne’ebé prevee atu entrega obra ne’e aumenta tan loron 365, sura hahú husi data efetividade kontratu nian, no sei termina iha loron 16 fulan-novembru tinan 2022 no presu aumenta tan dolar amerikanu US$ 984.188,24, nune’e, tanba aumentu ne’e, valór finál kontratu nian sa’e to’o dolar amerikanu US$ 18.839.489,50. Projetu deliberasaun ne’e aprezenta husi Ministru Obras Públikas, Eng. Abel Pires da Silva.

𝐉𝐮𝐥𝐥𝐮 𝟐𝟎𝟐𝟐

01 fulan-Jullu 2022, Ministru Obras Públikas (MOP), Abel Pires da Silva, akompaña husi Diretór Jerál Habitasaun no Urbanízmu (DJHU), Eng. Roger Tertuliano Belo, no kompañia Konsultór MGIEL EIPE Unip. Lda, no ITS ITS SAINS TECHNO Unip. Lda, aprezenta rezultadu estudu prelimináriu polu dezenvolvimentu iha munisípiu Baukau no Batugade, iha postu administrativu Balibo, munisípiu Bobonaro ba S. Exa, Primeiru Ministru (PM), Jenerál Taur Matan Ruak, no rezultadu hatudu katak Baukau no Batugade iha poténsia ba kriasaun polu dezenvolvimentu espesiál, no presiza Governu kontinua ba dezeñu detalladu no planu mestri.

15 fulan-Jullu 2022, Ministru Obras Públikas (MOP), Eng. Abel Pires da Silva, asiste asinatura akordu kooperasaun entre Prezidente Bee Timor-Leste Empreza Públika (BTL.EP), Eng. Carlos Peloi dos Reis, ho Prezidente Adjuntu Profesór GT Internasionál husi Taiwan, Sr. Paul Hsu, iha salaun Gabinete MOP, Kaikoli, Dili. Akordu kooperasaun ne’e hodi fahe esperiénsia ba malu liuliu kona-ba fornesimentu bee-moos ba komunidade, no espera katak kooperasaun ne’e kontinua atu nune’e bele fó kapasitasaun ba kapasitasaun institusionál no rekursu humanus iha BTL.EP hodi fornese servisu di’ak liután ba komunidade.

20 fulan-Jullu 2022, Konsellu Ministrus delibera ona hodi autoriza Ministru Finansas, Sr. Rui Augusto Gomes, atu selebra Akordu Finansiamentu ho Banku Mundiál (Asosiasaun Internasionál Dezenvolvimentu) ba projetu fornesimentu bee iha Dili. Akordu ida-ne’e ho objetivu atu halo kontratasaun empréstimu ida ho valór besik dolar amerikanu millaun $121, ho períodu maturidade tinan 40, hodi finansia projetu fornesimentu bee iha Dili. Programa ne’e sei dezenvolve liuhosi finansiamentu ho durasaun tinan hitu no komponente tolu, ba komponente dahuluk refere ba dezenvolvimentu infraestrutura sira abastesimentu bee nian, komponente daruak nian kona-ba hadi’a kapasidade institusionál servisu sira ba setór ida-ne’e no datoluk hadi’a jestaun projetu sira.

21 fulan-Jullu 2022, Kompañia konsultór Mafra Consultant Tecnico e Engeneria Unip. Lda, halo aprezentasaun finál ba estudu viabilidade no planu mestri ba konstrusaun no rehabilitasaun ba Hospitál Nasionál Guidu Valadares (HNGV) ba Ministru Obras Públikas (MOP), Eng. Abel Pires da Silva, iha salaun MOP, Kaikoli, Dili.

25 fulan-Jullu 2022, Ministru Obras Públikas (MOP), Eng. Abel Pires da Silva, asiste aprezentasaun relatóriu ikus husi Ajénsia Japaun nian ba Kooperasaun Internasionál (JICA, sígla Inglés) kona-ba estudu no analizasaun ba kalamidade ka inundasaun iha mapitál Dili ne'ebé akontese iha loron 4 fulan-Abril 2022.

27 fulan-Jullu 2022, Konsellu Ministru aprova projetu Dekretu-Lei, ba alterasaun dahuluk ba Dekretu-Lei nú 11/2006 loron 12 fulan-abril, kona-ba kriasaun institutu jestaun ekipamentu Timor-Leste no aprovasaun ba ninia estatutu ida-idak, ne’ebé aprezenta husi Ministru Obras Públikas, Eng. Abel Pires da Silva.

29 fulan-Jullu 2022, Ministru Obras Públikas (MOP), Eng. Abel Pires da Silva, akompaña husi Sekretáriu Estadu Asuntu Kombatentes Libertasaun Nasionál (SEAKLN), Sr. Júlio da Conseição 'Loro Mesak', lansa projetu prefurasaun bee-moos ba komunidade iha aldeia Kuna'in, suku Matai, postu administrtativu Maukatar, munisípiu Kovalima husi Institutu Petróleu e Geologia - Instituto Público (IPG.IP).

30 fulan-Jullu 2022, Kompañia konstrutór hahú monta ponte temporáriu iha Bekusi antes sobu dezeñu kuartu-kuartu ponte Bekusi tuan okos. Ponte temporáriu ne'e kompañia sobu husi ponte Besi iha Mota-Masin Fronteira munisípiu Kovalima nian ne'ebé la uza ona, tanba ne'e Ministru Obras Públikas (MOP), Eng. Abel Pires da Silva, orienta sobu ponte ne'e hodi monta temporáriu iha Bekusi hodi fasilita movimentasaun ema no transporte nian kontinua lao hanesan babain antes sobu ponte tuan.

𝐀𝐠𝐨𝐬𝐭𝐮 𝟐𝟎𝟐𝟐

01 fulan-Agostu 2022, Ministru Obras Públikas (MOP), Eng. Abel Pires da Silva, akompaña husi Prezidente Institutu Jestaun Ekipamentus Institutu Públiku (IJE.IP), Eng. Hermenegilda da Costa Laurentina, observa servisu normalizasaun ba mota Welolo, iha suku Luka, postu administrativu Vikeke, munisípiu Vikeke. Iha observasaun ne’e nota katak, bee sulin hikas ona tuir mota-laran no ema no transporte bele halo ona movimentasaun iha estrada ne’ebé antes ne’e bee nakonu.

03 fulan-Agostu 2022, Reuniaun extraordinária Konsellu Administrasaun Fundu Infraestrutura (KAFI) aprova projetu importante tolu mak hanesan projetu estrada urbana no munisipál iha Maliana, munisípiu Bobonaru nian hamutuk Kilometru 25 (25KM) resin, projetu rehabilitasaun estrada husi Manleuanna to'o Kasnafar kuaze Kilometru ida resin ne'ebé hetan estragus iha kalamidade 04 Abril 2021, no projetu konstrusaun estrada foun Dili-Aileu husi Fatisi iha área bee tudak to'o Sarlala kuaze Kilometru 8, estrada ne’e sei tau aspalt.

12 fulan-Agostu 2022, Ministru Obras Públikas (MOP), Eng. Abel Pires da Silva, akompaña husi Prezidente Autoridade Munisipál munisípiu Dili, Sra. Guilhermina Filomena Saldanha, akompaña husi ekipa tékniku husi Diresaun Jerál Habitasaun no Urbanízmu (DJHU) no Polísia Nasionál Timor-Leste (PNTL) halo sensebilizasaun ba komersiante sira ne’ebé konstrui edifísiu komérsiu iha estrada ninin atu kontinua kuidadu no proteze fasilidade públiku hanesan drenajen no trotoár sira, inklui kontribui halo limpeza no organiza edifísiu sira hodi hafurak sidade Dili.

17 fulan-Agostu 2022, Konsellu Ministrus aprova projetu Dekretu-Lei, ne’ebé aprezenta husi Ministru Obras Públikas, Eng. Abel Pires da Silva, kona-ba alterasaun daruak Dekretu-Lei nú. 8/2019, loron 24 fulan-abril, ho redasaun ne’ebé mai husi ninia alterasaun dahuluk, ne’ebé aprova ona liuhosi Dekretu –Lei nú. 50/2022, 14 fulan-outubru, kona-ba Orgánika Ministériu Obras Públikas nian.

Ho konsiderasaun ba tomada pose titulár foun ida Ministériu Obras Públikas nian, objetivu mak atu halo alterasaun sira ne’ebé presiza hodi organiza fila-fali servisu balun ne’ebé inklui iha Ministériu, atu fó efisiénsia boot liután iha ezekusaun ba ninia atribuisaun sira.

Ho nune’e, halo divizaun ba Diresaun Jerál Administrasaun no Finansas ba diresaun rua ho vokasaun ne’ebé lahanesan. Ida haree liu ba ezekusaun orsamentál ne’ebé inklui Diresaun Nasionál Aprovizionamentu no Orsamentu no Finansas, iha ne’ebé inklui mós Unidade Planeamentu Estratéjiku, ne’ebé ba oin sei sai hanesan diresaun nasionál. Seluk haree liu ba kestaun administrasaun jerál rekursu sira iha Ministériu, iha ne’ebé inklui Diresaun Nasionál Administrasaun no Jestaun Patrimóniu no Rekursu Umanu, aumenta mós Diresaun Nasionál Teknolojia Informasaun nian, ne’ebé hakarak atu fó suporte apoiu ba dijitalizasaun servisu iha Ministériu.

Hasai mós Diresaun Jerál sira ne’ebé hakotu tiha ona ho nomeasaun ba órgaun diretivu empreza públika, Bee Timor-Leste, E.P. no Eletrisidade de Timor-Leste, E.P.

Diresaun Nasionál Estrada, Ponte no Kontrolu ba Inundasaun eleva sai Diresaun Geral no fahe ba diresaun nasionál 4: Diresaun nasional ida haree liu ba konstrusaun estrada no ponte, Diresaun Nasional ida hare los deit ba manutensaun no prezervasaun estrada no ponte, diresaun nasional ida seluk tan haree ba prevensaun no kontrolu ba bee-sa’e. Hodi nune’e Ministériu bele iha entidade ida ho kompeténsia espesífika hodi hamenus risku inundasaun ne’ebé akontese hela ba beibeik, tanba alterasaun klimátika sira.

11 fulan-Agostu 2022, Ministru Obras Públikas (MOP), Eng. Abel Pires da Silva, no Prezidente Bee Timor-Leste Empreza Públikas (BTL.EP), Eng. Carlos Peloi dos Reis, asina akordu kooperasaun ho Reitór Universidade Timor-Lorosa’e (UNTL), Dr. João Soares Martins, iha salaun video konferénsia UNTL, Dili, ho objetivu hametin relasaun ho Universidade Nasionál Timor-Leste (UNTL) para oinsá kria kondisaun ba instituisaun importante ida-ne’e bele apoiu Ministériu Obras Públikas.

20 fulan-Agostu 2022, Ministru Obras Públikas (MOP), Eng. Abel Pires da Silva, orienta tékniku no kompañia hahú sobu ona Ponte Bekusi tuan ne’ebé iha tempu udan sai kauza ba inundasaun iha área Taibesi.

22 fulan-Agostu 2022, Ministru Obras Públikas (MOP), Eng. Abel Pires da Silva, akompaña husi Prezidente Institutu Jestaun Ekipamentus Institutu Públiku (IJE.IP), Eng. Hermenegilda da Costa Laurentina, asina nota kooperasaun ho Ekipa Survey Ajénsia Japaun ba Kooperasaun Internasionál (Japan International Cooperation Agency-JICA) iha Timor-Leste lidera husi Sr. Hirano Junichi, hala’o ona survey ba estragus infraestraestrutura sira iha kapitál Dili no munisípiu sira.

26 fulan-Agostu 2022, Ministru Obras Públikas (MOP), Eng. Abel Pires da Silva, reprezenta S. Exa, Primeiru Ministru (PM), Jenerál Taur Matan Ruak, akompaña husi membru Governu sira inagura rehabilitasaun estrada nasionál Hera, munisípiu Dili to'o munisípiu Manatutu.

Projetu estrada importante ida-ne’e ho distánsia hamutuk Kilómetru 48.74, orsamentu ba konstrusaun de’it liu millaun $48, aumenta tan ho fundu kontijénsia millaun $3 ho balun, ba de’it manutensaun besik millaun $2, totál orsamentu ba konstrusaun estrada ne’e besik millaun $54 husi Dili ba Manatutu.

24 fulan-Agostu 2022, Ministru Obras Públikas (MOP), Eng. Abel Pires da Silva, hamutuk ho Vise Ministra Turízmu Komunitária no Kultura, Sra. Inácia da Conceição Teixeira, Prezidente Komisaun Funsaun Públikas (KFP), Sr. Faustino Cardoso Gomes, no Preizdente Autoridade Munisipál munisípiu Dili, Sra. Guilhermina Filomena Saldanha, sai sasin ba asinatura Akordu Kooperasaun ka Memorandum of Understanding (MoU) entre Prezidente Institutu Jestaun Ekipamentus (IJE.IP), Eng. Hermenegilda da Costa Laurentina, ho Diretór Jerál Ministériu Turízmu, Komérsiu no Indústria (MTKI), Sr. Jelino Soares, atu loke estrada kilometru 4 (4KM) husi Metinaru ba Ermori, suku Mantelau, postu administrativu Metinaru, munisípiu Dili.

26 fulan-Agostu 2022, Ministru Obras Públikas (MOP), Eng. Abel Pires da Silva, inagura projetu eletrifikasaun nasionál iha suku Daisua no Grotu iha postu administrativu Same, munisípiu Manufahi.

29 fulan-Agostu 2022, Komisaun Nasionál Aprovizionamentu (KNA) publika kompañia manán na’in ba projetu rehabilitasaun estrada munisipál iha munisípiu Baukau husi postu administrativu Laga ba postu administrativu Baguia.

29 fulan-Agostu 2022, Ministru Obras Públikas (MOP), Eng. Abel Pires da Silva, no Prezidente Institutu Jestaun Ekipamentus Institutu Públiku (IJE.IP), Eng. Hermenegilda da Costa Laurentina, akompaña S. Exa, Primeiru Ministru (PM), Jenerál Taur Matan Ruak, simu simu ekipamentu pezadu husi kompañia Auto Zone Internasionál Unip. Lda, iha edifísiu IJE.IP, Kolmera, Dili.

Projetu fornesimentu ekipamentu pezadu hamutuk unidade 15 ba IJE.IP ne’e manán husi kompañia Auto Zone liuhosi prosesu konkursu públiku ne’ebé loke iha Komisaun Nasionál Aprovizionamentu (KNA), ho orsamentu tuir kontratu millaun $1.6 resin ($1.688.800).

31 fulan-Agostu 2022, Ministru Obras Públikas (MO), Eng. Abel Pires da Silva, asina Nota Kooperasaun ka Memorandum of Understending (MoU) ho Diretór Jerente PT. Maccaferri Indonézia, Sr. Riccardo Laneri, iha salaun enkontru Gabinete MOP, Kaikoli, Dili, ba servisu hamutuk iha área tékniku sivíl no solusiona materiál ba Ministériu Obras Públikas iha kontekstu atu apoiu konstrusaun infraestrutura reziliénsia iklima iha Timor-Leste.

31 fulan-Agostu 2022, Ministru Obras Públikas (MOP), Eng. Abel Pires da Silva, asina akordu ho Ekipa Survey husi Ajénsia Japaun ba Kooperasaun Internasionál (Japan International Cooperation Agency - JICA, ne'ebé akompaña husi Xefe Reprezentante JICA mai Timor-Leste Sr. Ko Goto, iha salaun enkontru MOP, Kaikoli, Dili. Asinatura akordu ne'e relasaun ho servisu Konsultória ba programa rehabilitasaun emerjénsia ba infraestrutura ne'ebé hetan estragus husi inundasaun.

𝐒𝐞𝐭𝐞𝐦𝐛𝐫𝐮 𝟐𝟎𝟐𝟐

09 fulan-Setembru 2022, Ministru Obras Públikas (MOP), Eng. Abel Pires da Silva, akompaña husi Sekretáriu Estadu Kooperativa (SEKoop), Sr. Elizário Ferreira, inagura Kantina Bom Dia ne’ebé nia edifísiu estabelese iha resintu Ministériu Obras Públikas, Kaikoli, Dili.

13 fulan-Setembru 2022, Ministru Obras Públikas (MOP), Eng. Abel Pires da Silva, asina akordu kooperasaun ka Memorandum of Understanding (MoU) ho Prezidente Cruz Vermella Timor-Leste (CVTL), Sra. Madalena Hanjam, no Prezidente Institutu Petróleu e Geologia (IPG), Sr. Gabriel Gaspar Apaício, iha salaun enkontru MOP, Kaikoli, Dili kona-ba programa fornesimentu bee-moos ba komunidade liuliu iha área rurál.

14 fulan-Setembru 2022, Konsellu Ministru autoriza loke tan konkursu públiku internasionál no realizasaun despeza ba obra públika sira. Nune’e mós kona-ba projetu konstrusaun estrada munisipál Laga-Baguia no Uaiaka-Kelikai to’o parte balun Ossu nian Konsellu Ministru autoriza adjudikasaun kontratu públiku ne’ebé hala’o ona husi Komisaun Nasionál Aprovizionamentu (CAN, sígla Portugués). Rezultadu autorizasaun ba projetu rua ne’e, sei lori ba Kámara de Kontas para hetan vistu, hafoin hetan vistu hahú ona prosesu konstrusaun ba projetu refere.

Konsellu Ministrus delibera hodi autoriza prosedimentu aprovizionamentu nian, liuhusi konkursu públiku internasionál no realizasaun despeza ba obra públika sira kona-ba reabilitasaun:

1. estrada husi Manatutu ba Laklo - valór globál ne’ebé estima maka US$ 8.315.330,44;

2. estrada husi Aileu (Be’cluru) ba Likidoe Laklo - valór globál ne’ebé estima maka US$ 25.154.925,51;

3. estrada husi Alas ba Wedeberek- valór globál ne’ebé estima maka - US$23.232.296,32;

4. estrada urbana Maliana nian - Pakote I- valór globál ne’ebé estima maka US$ 16.314.392,06; no

5. estrada urbana Maliana nian - Pakote II – estrada prinsipál- valór globál ne’ebé estima maka US$ 23.587.019,36;

𝘼𝙡𝙞𝙚𝙣𝙙𝙚 𝙣𝙚’𝙚, 𝙖𝙪𝙩𝙤𝙧𝙞𝙯𝙖 𝙖𝙙𝙟𝙪𝙙𝙞𝙠𝙖𝙨𝙖𝙪𝙣 𝙠𝙤𝙣𝙩𝙧𝙖𝙩𝙪 𝙥ú𝙗𝙡𝙞𝙠𝙪 𝙨𝙞𝙧𝙖 𝙗𝙖 𝙧𝙚𝙖𝙗𝙞𝙡𝙞𝙩𝙖𝙨𝙖𝙪𝙣:

1. seksaun husi Laga ba Baguia - Pakote IV estrada munisipal sira - ; no

2. seksaun husi Quelicai ba Ossu- Pakote III estrada munisipal sira.

16 fulan-Setembru 2022, Ministru Obras Públikas (MOP), Eng. Abel Pires da Silva, akompaña husi Prezidente Eletrisidade Timor-Leste Empreza Públikas (EDTL.EP), Eng. Paulo da Silva, Prezidente Autoridade Nasionál Eletrisidade Institutu Públiku (ANE.IP), Eng. Ruben Jerónimo Freitas, inagura Projetu Eletrifikasaun Nasionál (PEN) iha suku Dato-Rua, postu administrativu Fohorem, munisípiu Kovalima.

21 fulan-Setembru 2022, Konsellu Administrasaun Fundu Infraestrutura (KAFI) aprova konstrusaun ba Ponte Kasnafar no nahe aspalt ba projetu estrada pakote 1 no 2 husi Kasnafar to'o Sarlala ne'ebé aprezenta husi Diretór Jerál Obras Públikas (DJOP), Eng. Rui Hernani, akompaña husi tékniku sira.

22 fulan-Setembru 2022, Ministru Obras Públikas (MOP), Eng. Abel Pires da Silva, asina akordu kooperasaun ho Reprezentante Programa Nasoens Unidas ba Dezenvolvimentu (UNDP, sígla Inglés) iha Timor-Leste, Sra. Munkhtuya Altangerel, iha edifísiu MOP, Kaikoli, Dili, ho objetivu mak atu apoiu iha área infraestrutura nian, liuliu oinsá bele hetan infraestrutura resiliénte husi iklima.

26 fulan-Setembru 2022, Ministru Obras Públikas (MOP), Eng. Abel Pires da Silva, asina ona kontratu ho Organizasaun Naun Governamentál (ONG) neen (6) mak hanesan, ETADEP, HTL, AMKTL, Rede HASATIL, Fundasaun SIÃO no PERMATIL ba implementasaun programa konservasaun no prezervasaun udan-been iha foho sira hale'u kapitál Dili.

28 fulan-Setembru 2022, Ministru Obras Publikas (MOP), Eng. Abel Pires da Silva, no Prezidente Konsellu administrasaun B’e Timor-Leste, E. P. (BTL, E.P.), Eng. Carlos Peloi dos Reis, halo aprezentasaun ida kona-ba implementasaun akordu entre Repúblika Demokrátika Timor-Leste no Millennium Challenge Corporation (MCC) iha área be’e, saneamentu no drenajen sira, iha reuniaun Konsellu Ministru ne’ebé lidera direita husi S. Exa, Primeiru Ministru (PM), Jenerál Taur Matan Ruak, iha Palásiu Governu, Dili.

Komponente ne’e, tama iha akordu kooperasaun ne’ebé asina ona ho MCC, iha loron 19 fulan-jullu tinan 2022, objetivu atu hamenus kontaminasaun be’e moos no be’e rai-okos, ne’ebé kauza ba moras no impede moris-di’ak no saúde labarik no adultu sira.

Projetu ne’e inklui konstrusaun fábrika ida ba produsaun dezinfetante kímiku ba sistema abastesimentu be’e sidade nian, konstrusaun husi sistema sentrál dahuluk be’e reziduál nasaun nian, hadi’a rede drenajen ba kapitál Dili no ba munisipiu viziñu haat. Tuir programa ne’e sei realiza mós reforma polítika no institusionál sira, no mós mudansa sosiál no komportamentu hodi hadi’a sistema sanemanetu báziku no jestaun be’e ba nivel domestiku.

Komponente be’e, saneamentu no drenajen sira, aleinde fó impaktu diretu ba-iha saúde sidadaun nian, maibé mós sei atua hodi hamenus risku inundasaun nian, ne’ebé Timor-Leste hasoru ona iha tinan hirak ikus ne’e, hodi evita ninia impaktu ambientál sira no sosiuekonómiku, hodi asegura jestaun sustentavel be’e no saneamentu.

Estima katak atividade tratamentu bee sei benefísia ema rihun 429 husi munísipiu Dili no rihun 64 fora husi Dili. Projetu saneamentu ne’e sei benefisia ema liu rihun 106 hela iha Dili no tuir planu mestre prvee katak to’o tinan 2036 benefisia ema liu rihun 300 husi kapital.

Komponente be’e, saneamentu no drenajen sira sei iha investimentu totál hamutuk millaun dolar amerikanu 372,2. Atividade sira tratamentu be’e nian sei iha kustu millaun 8,3, iha sistema saneamentu nian sei uza millaun 342,8 no sistema drenajen nian sei iha kustu millaun 8,9. Projetu ne’e mós sei inklui besik millaun 7 ba fortalesimentu institusionál no reforma regulatóriu no millaun 5,2 ba kampaña alterasaun sosiál no komportamentál.

30 fulan-Setembru 2022, Ministru Obras Públikas (MOP), Eng. Abel Pires da Silva, hanesan mós Ministru Transporte no Komunikasaun Interiñu, halo inspesaun ba konstrusaun rotunda I no II iha portaun entrada no sai Portu Baia Tibar nian, hodi fó orientasaun atu tékniku sira bele aselera projetu refere.

𝐎𝐮𝐭𝐮𝐛𝐫𝐮 𝟐𝟎𝟐𝟐

05 fulan-Outubru 2022, Ministru Obras Públikas (MOP), Eng. Abel Pires da Silva, nu’udar Ministru Transporte no Komunikasaun (MTK) ein ezersísiu halo aprezentasaun ida kona-ba opsaun polítika-lejizlativa subjasente sira ba inisiativa kriasaun rejime kona-ba transporte aéreu internasionál regulár no la’ós regulár. Opsaun sira ne’ebé aprezenta ho objetivu atu estabelese norma no kondisaun sira ba ezersísiu direitu tráfegu aéreu nian tuir akordu bilaterál no multilaterál ne’e.

06 fulan Outubru 2022, Ministru Obras Públikas (MOP), Eng. Abel Pires da Silva, asina esbosu minuta dikusaun (Minutes of Discussion - MoD) ho Ajénsia Japaun nian ba Kooperasaun Internasionál (JICA, sígla Inglés) ba programa atu halo rehabilitasaun emerjénsia ba infraestrutura ne'ebé hetan estragus kauza husi kalamidade 04 Abril 2021.

06 fulan-Outubru 2022, Konsellu Administrasaun Fundu Infraestrutura (KAFI aprova rezultadu ternder ba projetu Fui Aspalt ba estrada Fatisi (bee tudak) to’o Sarlala, no mós projetu rehabilitasaun ba moru protesaun iha Manleuanna to’o mota Kasnafar.

07 fulan-Outubru 2022, Ministru Obras Públikas (MOP), Eng. Abel Pires da Silva, ho Sekretáriu Estadu Ambiente (SEA), Sr. Demétrio do Amaral de Carvalho, hamutuk ho dirijente sira iha institutu autónomu no tutela, inklui Diretór Organizasaun Naun Governamentál (ONG) no Autoridade Lokál sira akompaña S. Exa, Vise Primeiru Ministru no Ministru Planu Ordenamentu (V-PM no PMO), Eng. José Maria dos Reis, reprezenta S. Exa, Primeiru Ministru (PM), Jenerál Taur Matan Ruak, halo lansamentu ba projetu konservasaun udan-been no rai hodi minimiza rísku inundasaun iha kapitál Dili ne’ebé realiza iha Metiaut, postu administrativu Kristu Rei, munispíu Dili.

Atividade prezervasaun udan-been no rai ne’e lokaliza iha suku rua, aldeia 6 munisípiu Aileu nian, no iha munisípiu Dili kobre suku 16, ho aldeia 70, atividade ne’e involve komunidade kuaze 600 tesik kada loron hodi halo servisu .

ONG nasionál 6 ne’ebé asina ona kontratu ho MOP hodi implementa projetu prezervasaun udan-been no rai iha foho sira hale'u kapitál Dili mak hanesan PERMATIL, ETADEP, HTL, AMKTL, Rede HASATIL, no Fundasaun SIÃO.

08 fulan-Outubru 2022, Ministru Obras Públikas (MOP), Eng. Abel Pires da Silva, akompaña husi Reprezentante Kooperasaun Finanséiru Internasionál (IFC, sígla Inges), Sr. David Freedman, ho Diretora Rejionál IFC nian, Sra. Isabel Chatterton, no simu direita husi Prezidente Konsellu Administrasaun Eletrisidade Timor-Leste Empreza Públika (EDTL.EP), Eng. Paulo da Silva, Prezidente Autóridade Nasionál Eletrisidade Institutu Públiku (ANE-IP), Eng. Ruben Jerónimo Freitas, vizita no haree direita servisu operasaun iha sentrál elétrika Hera.

Aliende ne’e, identifika mós fatin ba harii enérjia renovável ne’ebé sei hamosu sub-estasaun Solar Panel iha postu administrativu Laleia, munisípiu Manatutu no Win Solar Panel iha suku Triloka, postu administrativu Baukau, munisípiu Baukau.

17 fulan-Outubru 2022, Ministru Obras Públikas (MOP), Eng. Abel Pires da Silva, asina kontratu ho kompañia manán na’in sira kona-ba projetu konstrusaun ba moru protesaun mota husi Manlauanna to’o mota Kasnafar ne’ebé hetan estragus iha kalamidade 4 Abril 2021, no projetu tau aspalt ba estrada husi Fatisi (bee tudak) nian ba to’o Sarlala.

25 fulan-Outubru 2022, Ministru Obras Públikas (MOP), Eng. Abel Pires da Silva, partisipa iha serimónia asinatura akordu impréstimu ho Banku Dezenvolvimentu Aziátiku (ADB- Singla Inglés) ne'ebé sei fó montante millaun $127, ba Governu Timor-Leste. Akordu ne'e asina husi Ministru Finansas (MF), Dr. Rui Augusto Gomes, ho Diretór ADB iha Timor-Leste, Sr. Sunil Mitra, ne'ebé hala'o iha salaun Auditóriu Kay-Rala Xanana Gusmão, Ministériu Finansas, Aitarak-Laran, Dili.

26 fulan-Outubru 2022, Konsellu Ministrus, tuir projetu ne’ebé aprezenta husi Ministru Obras Públika, Eng. Abel Pires da silva, delibera atu autoriza prosedimentu Aprovizionamentu ba obras públika ne’ebé relasiona ho projetu konstrusaun Manleuana River Training Works no Rede Drenajem D04, iha Kaikoli. ho valór intestimentu ida ho totál hamutuk dolar amerikanu millaun $15,6.

26 fulan-Outubru 2022, KAFI aprova tender ba Servisu Konsultóriu ba preparasaun Dezeñu Enjeñaria Detalladu (DED) ba estrada nasionál pakóte A, munisípiu Manufahi (Arteriál, A14), hahú husi munisípiu Manatuto, postu administrativu Natarbora ba to'o Betano, munisípiu Manufahi nian ho nia distánsia Kilómetru 7,5, estrada nasionál (Arteriál, A14), Same Luak ba to'o Betano ho distánsia Kilómetru 10, Estrada munisipál (Colector,C28), Dotik-Fatuberlihu-Alas distánsia Kilómetru 16,25 no pakóte B ba munisípiu Lautem husi Mehara ba Lautem (Celector,C02, ho distánsia kilómetru 20,17.

25 fulan-Outubru 2022, Ministru Obras Públikas (MOP), Eng. Abel Pires da Silva, asina dokumentu finál ba rehabilitasaun estrada munisipál pakote tolu iha munisípiu Baukau, hahú husi Uaiaka ba postu administrativu Kelikai, to'o parte balun postu administrativu Ossu, munisípiu Vikeke nian ne'ebé asina ona iha loron Tersa-feira liubá iha Gabinete MOP, Kaikoli, Dili.

Hafoin asina dokumentu finál kontratu rehabilitasaun estrada refere parte Diresaun Jerál Obras Públikas (DJOP) liuhosi Diresaun Nasionál Estrada, Ponte no Kontrolu i Seias (DNPCC-sígla Portugés) haruka ona ba Kámara de Kontas hodi hetan vistu ikus antes halo lansamentu no konstrusaun ba projetu refere.

Rehabilitasaun estrada munisipál pakóte tolu hahu husi Uaiaka-Kelikai- Ossu ho distánsia kilómetru 22-700 husi kompañia Internasionál Chongqing International Construction Corporation (CICO), ho nia montante orsamentu Milloens, $16.547.661.76.

27 fulan-Outubru 2022, Ministru Obras Públikas (MOP), Eng. Abel Pires da Silva, asina dokumen finál ba rehabilitasaun estrada munisipál husi postu administrativu Laga ba postu Baguia nian iha Gabinete MOP, Kaikoli, Dili.

Hafoin asina dokumentu finál kontratu rehabilitasaun estrada refere parte Diresaun Jerál Obras Públikas (DJOP) liuhosi Diresaun Nasionál Estrada, Ponte no Kontrolu i Seias (DNPCC-sígla Portugés) sei kontinua haruka ba Kámara de Kontas hodi hetan vistu ikus antes halo lansamentu no konstrusaun ba projetu refere.

Rehabilitasaun estrada munisipál trosu Laga-Baguia ho distánsia kilómetru 38+030 husi kompañia Internasionál Norinco Corporation Lda, ho nia montante orsamentu $21,695,194,98.

𝐍𝐨𝐯𝐞𝐦𝐛𝐫𝐮 𝟐𝟎𝟐𝟐

09 fulan-Novembru 2022, Konsellu Ministrus, tuir projetu sira ne’ebé aprezenta husi Ministru Obras Públikas, Eng. Abel Pires da Silva, delibera no aprova ona, entre projetu sira ne’ebé liu ona husi Kámara Kontas nian, tuir lei:

● alterasaun ba kontratu ne’ebé selebra ho kompañia Sinoitech Engineering Consults, hodi halo serbisu konsultoria ba supervizaun obra públika sira ne’ebé liga ba konstrusaun estrada entre Manatutu – Natarbora no Laklubar, ho valór dolar amerikanu millaun 6,1; no

● alterasaun ba kontratu ne’ebé selebra ho kompañia Katahira Engineers International, liuhusi selebrasaun adenda n. 1, no ne’ebé refere ba “variations orders” n. 1 to’o 6, hodi konsidera kustu totál reál operasaun aprovizionamentu nian, ne’ebé sei muda ba valór dolar amerikanu millaun 9,4.

21 fulan-Novembru 2022, Ministru Obras Públikas (MOP), Eng. Abel Pires da Silva, partsipa iha festivál múzika no kultura Atauro 2022 ho nia tema "𝑯𝒂'𝒖-𝑵𝒊𝒂 𝑰𝒍𝒍𝒂, 𝑯𝒂'𝒖-𝑵𝒊𝒂 𝑻𝒊𝒎𝒐𝒓-𝑳𝒆𝒔𝒕𝒆" ne’ebé hala’o durante loron 21 to’o 24 fulan-Novembru tinan 2022 nia-laran.

23 fulan-Novembru 2022, Ministru Obras Públikas (MOP), Eng. Abel Pires da Silva, simu vistu ikus husi Kámara Kontas (Camara das Contas), ba projetu rehabilitasaun estrada munisipál husi postu administrativu Laga ba postu administrativu Baguia nian, no projetu rehabilitasaun ba estrada Uaiaka-Kelikai-Ossu.

30 fulan-Novembru 2022, Ministru Obras Públikas (MOP), Abel Pires da Silva, hamutuk ho membru Governu sira partisipa iha serimónia inagurasaun ba Portu Baia Tibar ne'ebé ofisialmente inagura husi S. Exa, Prezidente Repúblika (PR), Dr. José Ramos Horta, no S. Exa, Primeiru Ministru (PM), Jenerál Taur Matan Ruak, ne'ebé hala'o iha Portu Baia Tibar, postu administrativu Bazartete, munisípiu Likisa.

𝐃𝐞𝐳𝐞𝐦𝐛𝐫𝐮 𝟐𝟎𝟐𝟐

02 fulan-Dezembru 2022, Konsellu Ministrus, tuir projetu ne’ebé aprezenta husi Ministru Obras Públikas, Eng. Abel Pires da Silva, delibera ona hodi aprova prosedimentu husi aprovizionamentu ba kontratu públiku servisu ba supervizaun konstrusaun sistema bee nian, no saneamentu iha kapitál munisípiu husi Lautém, Manufahi no Viqueque. Kontratu públiku ne’e ho valór millaun dolar amerikanu 6,5 ho objetivu atu asegura supervizaun ba konstrusaun sistema abastesimentu bee moos no saneamentu ba populasaun husi munisípiu sira ne’ebé refere.

02 fulan-Dezembru 2022, Ministru Obras Públikas (MOP), Eng. Abel Pires da Silva, partisipa iha serimónia enseramentu ba programa Estrada Rurál ba Dezenvolvimentu (R4D- singla Inglés) ne'ebé hala'o iha edifísiu Diresaun Nasionál Estrada, Ponte no Kontrollu i Seias (DNEPCC, sigla Portugés), Rai-Kotu, Dili.

05 fulan-Dezembru 2022, Ministru Obras Públikas (MOP), Eng. Abel Pires da Silva, akompaña husi Prezidente Konsellu Administrasaun Institutu Jestaun no Ekipamentu Apoiu Dezenvolvimentu Infraestrutura Institutu Públiku (IJEADI.IP), Eng. Hermenegilda da Costa Laurentina, enkontru ho S. Exa, Prezidente Repúblika (PR), Dr. Jose Manuel Ramos Horta, iha Palásiu Prezidénsiál, Bairru-Pité, Dili, hodi informa atividade MOP no IJEADI.IP ba Xefe Estadu.

09 fulan-Dezembru 2022, Governu lansa projetu rehabilitasaun ba estrada munisipál Laga-Baguia no Uaiaka-Kelikai-Ossu.

15 fulan-Dezembru 2022, Ministru Obras Públikas (MOP), Eng. Abel Pires da Silva, asisti serimónia anunsiasaun parseria foun entre Governu Timor-Leste no Austrália liuhosi programa Fasilidade Finansiamentu Infraestrutura husi Austrália ba Pasífiku (Australian Infrastructure Financing Facility for the Pacific - AIFFP), ho pakote finanseiru ho millaun 68.4 USD konsesionál ba rehabilitasaun Aeroportu Internasionál Prezidenti Nicolau Lobato, Kumoro, Dili, ne’ebé serimónia ne’e realiza iha salaun Ministériu Nagósiu Estranjéiru no Kooperasaun (MNEK), Pantai Kelapa, Dili.

Pakote finanséiru ida-ne'e inklui impréstimu millaun $40USD no kontribuisaun millaun $28.4USD liuhosi AIFFP no programa bilaterál Department of Foreign Affairs and Trade. Ida-ne'e empréstimu ba nasaun dahuluk husi Austrália fó ba Timor-Leste.

16 fulan-Dezembru 2022, Ministru Obras Públikas (MOP), Eng. Abel Pires da Silva, halo inspesaun ba progresu servisu husi kompaña konstrutór Jonize Unip. Lda, kona-ba nahe aspal ba projetu estrada foun husi Fatisi (Bee Tudak) to’o Sarlala diresaun husi Dili ba Aileu nian.

Antes halo inspesaun ba estrada Fatisis Bee Tudak to’o Sarlala, Sr. Ministru halo mós observasaun ba servisu kompañia sira nian ba normalizasaun estrada husi Manleuanna to’o mota Kasnafar ne’ebé hetan estragus husi kalamidade 04 Abril 2021, ne’ebé antes Sr. Ministru asina ona nia kontratu ho kompañia sira hodi halo normalizasaun.

Projetu rehabilitasaun husi Manleuanna to’o Kasnafar kuaze Kilometru ida resin ho totál orsamentu millaun $5.5 ne’ebé ezekuta husi kompañia tolu no estrada Fatisi to’o Sarlala kuaze kilométru 8 ho nia orsamentu tau aspalt hamutuk la to’o millaun $5. Orsamentu hirak ne’e KAFI deside ona tama iha Fundu Infraestrutura.

19 fulan-Dezembru 2022, Ministru Obras Públikas (MOP), Eng. Abel Piresda Silva, asisti serimónia entrega ekipamentu bee, saneamentu no ijiene, ekipamentu atu koko bee, ekipapemtu IT no sasan sira seluk husi , Fundus Nasoins Unidas ba Labarik-sira (UNICEF, sígla Inglés) UNICEF ba Ministériu Saúde (MS) iha salaun Kofi Annan, Uma ONU, Kaikoli, Dili. UNICEF entrega mini laboratóriu, ekipamentu IT no furnitura ba Ministériu Saúde ne’e atu estabelese fasilidade teste kualidade bee iha munisípiu 12, inklui Atauro no RAEOA.

27 fulan-Dezembru 2022, Ministru Obras Públikas (MOP), Eng. Abel Pires da Silva, hamutuk ho dirijente no funsionáriu tomak realiza atividade reflesaun.

27 fulan-Dezembru 2022, Ministru Obras Públikas, Eng. Abel Pires da Silva, nu'udar Prezidente Konsellu Administrasaun Fundu Infraestrutura (KAFI) interiñu lidera KAFI delibera hodi autoriza extensaun ezekusaun ba orsamentu Fundu Infraestrutura (FI). KAFI aprova mós rezultadu tenderizasaun ba projetu Dezeñu Enjinaria Detalladu (DED) ba estrada sira ne'ebé hetan ona manán na'in hodi implementa projetu hirak ne'e.

29 fulan-Dezembru 2022, Ministériu Obras Públikas (MOP) asina kontratu ho kompañia Internasionál husi Indonézia, Dhiratama CIPTA Persada ba implementasaun projetu Dezeñu Enjinaria Detalladu (DED) ba ponte Lamara, iha suku Manehat, postu administrativu Natarbora, munisípiu Manatuto, ne'ebé liga estrada nasionál husi munisípiu Manatuto ba Natarbora to'o munisípiu Vikeke no ba munisípiu Manufahi. Projetu ne'e nia montante orsamentu hamutuk $242.400.

#Media_MOP