𝐑𝐄𝐅𝐋𝐄𝐒𝐀𝐔𝐍, 𝐌𝐎𝐏 𝐎𝐑𝐆𝐔𝐔𝐋𝐔 𝐍𝐎 𝐊𝐎𝐍𝐓𝐄𝐍𝐓𝐈 𝐒𝐄𝐑𝐕𝐈𝐒𝐔 𝐇𝐀𝐌𝐔𝐓𝐔𝐊 𝐇𝐎 𝐅𝐔𝐍𝐒𝐈𝐎𝐍Á𝐑𝐈𝐔 𝐎𝐁𝐑𝐀𝐒 𝐏Ú𝐁𝐋𝐈𝐊𝐀𝐒, 𝐇𝐔𝐒𝐔 𝐊𝐎𝐍𝐓𝐈𝐍𝐔𝐀 𝐒𝐄𝐑𝐕𝐈𝐒𝐔 𝐇𝐎 𝐃𝐈’𝐀𝐊

 𝘿𝙞𝙡𝙞, 27 Dezembru 2022: Ministru Obras Públikas (MOP), Eng. Abel Pires da Silva, hamutuk ho Vise Ministru MOP, Eng. Nicolau Lino Freitas Belo, no funsionáriu tomak realiza reflesaun hamutuk hodi hadi’ak-an serví di’ak liután povu no nasaun iha tinan 2023.

Durante intervensaun iha serimónia reflesaun ho tema “Hakbi’it Kualidade Dezempeñu Servisu Funsionáriu Nu’udar Servidór Estadu iha Ministériu Obras Públikas”, Sr. Ministru hato’o nia orgullu no sente kontente bele servisu hamutuk ho funsionáriu sira Ministériu Obras Públikas nian ne’ebé durante ne’e halo servisu maka’as iha área infraestrutura hanesan estrada, bee-moos no eletrisidade.

“Sr. Diretór sira hotu, Sr. Xefe departamentu, xefe seksaun sira, funsionáriu tomak, ha’u orgullu tebes bele hamutuk ho ita-boot sira iha ohin loron ne’e, loron kmanek ida-ne’e, agora ita-nia tema ohin loron ne’e mai atu halo reflesaun, agora pergunta boot ida mak ita tenke husu ba ita-nia-an, tanba-sá mak ita tenke halo reflesaun? Ha’u-nia hanoin ne’e iha relasaun ho ita ema kriatura, ita hotu-hotu iha defisiénsia, ita hotu-hotu la perfeitu, tanba ne’e mak esforsu ne’ebé ita halo durante tinan ida, ita hakarak pauza oituan, hakarak haree fali ba kotuk, saida mak ita halo tiha ona, saida mak ita halo ladún di’ak, saida mak ita seidauk halo liu,” Sr. Ministru hatete liuhosi nia intervensaun iha serimónia reflesaun Ministériu Obras Públikas nian ne’ebé realiza iha Tera-Santa.

Sr. Ministru hatutan “Depois haree ba reflesaun ne’e ita prepara-an ba tinan oin, saida mak di’ak, ladún di’ak ita hadi’a, saida mak di’ak ona se bele halo di’ak liután, dalan ne’e oinsá, depis, saida mak ita seidauk halo, ita tenta atu halo, ne’e umanu, ida-ne’e hatudu katak ita ne’e ema ne’ebé hakarak aprende husi ita-nia esperiénsia rasik, pelumenus ha’u-nia esperiénsia durante fulan 9 hamutuk ho ita-boot sira serví ita-nia rai no povu ida-ne’e iha ministériu importante ida-ne’e, ha’u mós bele aprende buat barak, ha’u orgullu ba ida-ne’e ho ita-boot sira hotu, esforsu ne’ebé ita-boot sira halo ne’ebé ha’u hanesan sasin prinsipál iha laran, ne’e merese apresiasaun másimu i hanesan Ministru ha’u fó apresiasaun ba ida-ne’e”.

Sr. Ministru mós husu deskulpa karik “Durante fulan 9 ita servisu hamutuk iha buat balun mak halo sala karik, liafuan ruma la kona laran, hahalok ruma la kona laran, ne’e ho haraik-an ha’u husu deskulpa, para depois ba oin ne’e prontu sala ita, ita haree ba kotuk mais sala sira ne’e ita perdua ba, ita tenke la’o ba oin nafatin para depois ita bele ajuda malu, apoiu malu para ita serví di’ak liután ita-nia rai no ita-nia povu. La’os de’it orgullu tanba servisu hamutuk ho ita-boot sira maibé kontenti tanba ha’u mós aprende buat barak ho ita-boot sira, kondisaun ne’ebé limitadu tebtebes mais kuandu simu orden sira iha ona kampu, ne’e bahas Indonézia dehan Luar biasa, ne’e merese hetan apresiasaun i ha’u aprende husi ita-boot sira, ne’ebé ha’u agradese ba biban aprende mós ho ita-boot sira. Loos, ita konsege halo buat balun mais dala ida-tan iha buat barak liután mak ita presiza halo tanba ita-nia povu hein hela, barak mak sei hein hela estrada ne’ebé di’ak, bee-moos no eletrisidade i ba ida-ne’e ha’u nafatin solisita ita-boot sira-nia kontribuisaun tomak, tanba Ministériu ne’e labele funsiona ho di’ak sein ita-boot sira-nia kontribuisaun. Ba funsionáriu hotu-hotu husi Diretór Jerál sira, Diretór nasionál sira to’o klinér no seguransa sira, ita-boot sira halo ona ha’u orgullu i ha’u kontenti servisu hamutuk ho ita-boot sira, favór ida kontinua servisu ho didi’ak”.

Esforsu ne’ebé MOP halo hetan mós apoiu husi ema batak, la’os de’it iha Obras Públikas nia-laran maibé ho parséiru lubuk ida, apoiu husi S. Exa, Vise Primeiru Ministru no Ministru Planu no Ordenamentu (V-PM no PMO), Eng. Joré Maria dos Reis, ho nia estrutura tomak ne’ebé servisu hamutuk ho di’ak, parséiru internasionál no kompañia sira.

Ikus liu, Sr. Ministru lori S. Exa, Primeiru Ministru (PM), Jenerál Taur Matan Ruak, no Vise MOP nia naran solisita nafatin funsionáriu tomak nia apoiu hodi serví povu no nasaun.

Iha fatin hanesan, Vise Ministru MOP, Eng. Nicolau Lino Freitas Belo, hatete iha reflesaun ne’e hodi refleta servisu ne’ebé hala’o ona durante tinan ida nia-laran, hodi hadi’ak di’ak liután servisu iha tinan 2023.

Vigário Dioseze Dili, Padre Juvito do Rego, iha reflesaun ho neon ho laran fó agradese no obrigadu ba funsionáriu tomak ne’ebé haknar-an iha Ministériu Obras Públikas tanba ho pasiénsia maske iha insulta, tolok maibé kontinua servisu ho di’ak no ho profisionál. Funsionáriu sira iha MOP kaer papél importante tebes no hala’o kna’ar importante iha povu nia-moris, nesesidade báziku ba povu.

Serimónia reflesaun partisipa mós husi konvidadu espesiál Diretór Ajénsia Dezenvolvimentu Nasionál (AND), Eng. Mariano Renato Monteiro da Cruz, partisipa mós husi Prezidente Instituisaun Autónomu sira tutela ba MOP, Diretór Jerál, Diretór Nasionál ho funsionáriu tomak.

#Media_MOP