𝐌𝐎𝐏 𝐇𝐄𝐓𝐀𝐍 𝐈𝐍𝐓𝐄𝐑𝐕𝐈𝐒𝐓𝐀 𝐊𝐎𝐍𝐀-𝐁𝐀 𝐈𝐌𝐏𝐋𝐄𝐌𝐄𝐍𝐓𝐀𝐒𝐀𝐔𝐍 𝐏𝐑𝐎𝐉𝐄𝐓𝐔 𝐒𝐈𝐑𝐀

𝘿𝙞𝙡𝙞, 16 Novembru 2022: Ministru Obras Públikas (MOP), Eng. Abel Pires da Silva, hetan intervista husi jornalista sira kona-ba planu, programa no implementasaun ba projetu sira ne'ebé daudauk ne'e la'o hela.

Transkrisaun intervista husi jornalista sira ho Sr. Ministru iha Parlamentu Nasionál bainhira partisipa debate espesialidade ba Proposta Orsamentu Jerál Estadu (OJE) tinan fiskál 2023 nian mak hanesan tuir mai:

Jornalista: Oinsá ponte Kasnafar ne'e tender ona?

Sr. Ministru: Sim ne'e tender Internasionál tamba liu millaun $ 5, iha semana 2 liuba Konsellu Ministru aprova tiha ona, agora ita hein rezultadu tender.

Jornalista: Baihira mak bele publika?

Sr. Ministru: Ne'e CNA (Komisaun Nasionál Aprovizionamentu) nia responsabilidade, ami hein de'it, hanesan ho ita-boot sira, ita hotu hein de'it, tamba CNA ne'e iha Ministériu Finansas nia okos, husik sira halo servisu, importante maka deliberasaun kleur ona, hanoin semana rua ona, oituan tan hanesan ne'e bele sai ona.

Jornalista: Sr. Ministru akordu kona-ba estrada Manatutu-Natarbora oinsá?

Sr. Ministru: Ne'e tamba iha lapsu tékniku ne'ebé maka momentu ne'eba akontese, see la sala iha 2019, entaun Governu la konsege selu servisu ne'ebé sira halo tiha ona. Agora bazeia ba rekomendasaun husi Kámara de Kontas rasik, tamba sira maka halo audit ba projetu hotu-hotu, projetu impréstimu hotu-hotu, husi ne'e sira fó rekomendasaun katak ba obra sira ne'ebé ita seidauk selu ne'e presiza para Ministériu hatama proposta ba Konsellu Ministrus aprova para ita buka dalan para halo pagamentu, tamba ne'e maka ita halo, horbaihira ne'e Konsellu Ministrus aprova alterasaun kontratu para kontratu ne'e bele moris fali, obra sira ne'ebé uluk sira halo ne'e, ita tau fila-fali i ita hahú fila-fali prosesu atu halo pagamentu, ida-ne'e di'ak tamba di'ak ba Governu, di'ak ba kompañia sira.

Jornalista: Nia valór maka millaun 6 ne'e ka?

Sr. Ministru: Valór loloos ne'e ida la to'o millaun $6, totál kontratu maka millaun $6, maibé ida ne'ebé mak seidauk selu ne'e la to'o millaun $2.

Jornalista; Altera para reativa fali kontratu?

Sr. Ministru; Sim altera para reativa fali kontratu, aprova obra sira ne'ebé uluk sira halo, depois ita hahú halo prosesu pagamentu, tamba sira-nia obra ita seidauk selu 2019 kedas. Hanesan mós projetu sira seluk P44 nian ne'e mós Konsellu Ministru halo deliberasaun oinsá maka buka dalan para selu, hanesan mós seguransa Loro-Sa'e hotu. Agora ita iha ona prosesu draf ba Dekretu-Lei para oinsá formaliza no legaliza prosesu atu halo pagamentu ba sira.

Jornalista; la to'o millaun $2 ne'e, projetu 2 ka ida de'it?

Sr. Ministru; Keta-ketak, ida millaun $2 no ida millaun $1.5 maka ne'e ka, mais ha'u ladún lembra, mais ne'e nia montante boot, ida-ne'e montante ne'ebé kleur ona ita seidauk prosesa. Ho dalan ida-ne'e, iha rekomendasaun husi Kámara de Kontas rasik, ho alterasaun ba kontratu husi Konsellu Ministru, agora ita iha prosesu para halo pagamentu, ne'ebé parte legál ne'e loos ona, ba kompañia rua ne'e kompañia Internasionál rua, halo supervizaun ba obra sira ne'e, sira-nia servisu sira halo ona, agora ita halo pagamentu.

Jornalista; pagamentu ba empreza rua ne'e prejudika orsamentu estadu?

Sr. Ministru: Ne'e estadu nia dívida ne'e tenke selu, ne'e problema seluk, ita bele rezolve fásil.

Jornalista: Projetu rua ne'e Ida ne'ebé maka la to'o millaun $2? Entre Manatutu-Natarbora ka Manatutu-Laklubar?

Ministru; Ha'u la lembra nia númeru ne'e, importante maka ita bele rezolve.

Jornalista; Ministru atu husu de'it prosesu Bee husi Gleno mai Dili?

Sr. Ministru; Ne'e ita-boot sira ba klarifika ho Presidente Bee Timor-Leste (BTL), tamba ita buka dalan hela para oinsá hahú projetu ne'e, mais ha'u hanoin dezeñu mós seidauk iha ne’ebé informasaun loloos klarifika ho Presidente BTL. Mais ein proinsípiu ba bee nian ne'e ita iha projetu barak, iha MCC ( Millennium Challenge Corporation), nian millaun $420, parte lubuk ida ne'e ba bee, balun ba saneamentu. Pois ita halo impréstimu ba Banku Mundiál, no mós ba ADB (Banku Dezenvolvimentu Aziátiku), mós kona-ba bee Dili laran ne'e ita kobre hotu besik millaun $1. Agora prosesu kontratu ba impréstimu ne'e asina hotu ona. Impréstimu hanesan ADB ho Banku Mundiál ne'e impréstimu mais ho Amerika husi MCC ne'e grand (Gratuita).

Jornalista: Grand husi MCC baihira maka implementa?

Sr. Ministru: Implementa tiha ona, agora halo hela prosesu identifikasaun ba ita-nia komunidade afeitadu sira, ne'e lista iha Ministériu Justisa, Ministru nia servisu, ita hein ida-ne'e, ha'u ko'alia ona ho Sr. Ministru Justisa besik remata ona, ne'ebé kuandu remata ona, ita bele lansa tender ona, ne'ebé ida ne'eb ladún problema.

Jornalista: Ministru, oinsá ho konservasaun bee iha foho leten sira ne'eba, mais ou menus iha Dili laran ne'e ida ne'ebé maka la'o ona?

Sr. Ministru: Agora daudaun ne'e la'o hotu ona, iha parte Metiaut mós la'o, ne'eba ne'ee NGO PERMATIL, parte Bekora mota ulun mós la'o, depois mota Maloa nia leten ne'e to'o iha Manleuanna, ne'e agora NGO sira nia obra agora la'o hela, ha'u akompaña beibeik liuhosi grupu Watshap, see ita-boot sira iha tempu bele ba akompaña tamba servisu ida-ne'e importante para bele hetan benefísiu oin-oin, ida atu prezerva bee, udan been labele tuun hotu mai Dili laran, baihira ita prezerva entaun kapasidade ho kuantidade bee mai sobu ne'e bele redus.

Iha tempu hanesan ita servisu ho ita-nia NGO sira, ita-nia joven sira no komunidade sira, entaun sira mós bele hetan servisu. Ne'ebé loron-loron ne'e pruvolta 600 populasaun no membru komunidade sira ne'ebé mak ajuda servisu, ne'ebé hetan benefísiu iha servisu. Iha tempu hanesan kuandu naksobu oituan, entaun Ministériu mós lakon osan oituan para bele hadi'ak ba oin, mais ninia benefísiu másimu ne'e ita tenke haree no haan tempu tinan ida ka tinan rua hanesan ne'e.

#Media_MOP