EZEKUSAUN OJE TINAN FISKÁL 2021 BA MOP ATINJI 86%

EZEKUSAUN OJE TINAN FISKÁL 2021 BA MOP ATINJI 86%

DILI, 10 AGOSTU 2021: Ezekusaun Orsamentu Jerál Estadu (OJE) tinan fiskál 2021 nian ba Ministériu Obras Públikas to’o iha loron 10 Agostu tinan 2021 ne’e atinji ona pursentu 86 (86%). Taxa ezekusaun ba OJE 2021 ne’e sa’e maka’as hafoin ministériu halo transferénsia daruak OJE 2021 nian ba Eletrisidaded Timor-Leste Empreza Públika (EDTL,E.P) no Bee Timor-Leste Empreza Públika (BTL,E.P).

“Rezultadu ezekusaun ikus liu loron ohin (09/08) nian, ita-nia ezekusaun to’o ohin loron persentajen sa’e maka’as oituan, atuál ne’e ita atinji ona pursentu 86 (86%). Pursentu 86 ne’e tanba iha loron hirak liubá ita ezekuta ona transferénsia públika ba empreza rua, EDTL no BTL ne’ebé ita-nia ezekusaun ne’e sa’e,”Diretór Nasionál Orsamentu no Finansas (DNOF), Sr. João Amarál, informa liuhosi Mini Komité Revizaun Orsamentu OJE tinan fiskál 2022 nian iha JL Vila, Fatuhada, Dili.

Orsamentu ba MOP ho nia dotasaun atuál hamutuk millaun $234 resin ($234,511,942.00), ezekusaun aktuál $201.775.626,00 (86%); Obligasaun $8.382.266 (4%); Kompromisu $6.831.090,00 (3%); no Balansu $17.522.960,00 (7%).

Antes ne’e, iha loron 26 fulan-Jullu tinan 2021 liubá, liuhosi serimonia fahe tetu fiskál 2022 nian, S. Exa, Ministru Obras Públikas (MOP), Arq. Salvador Eugénio Soares dos Reis Pires, afirma katak taxa ezekusaun Ministériu Obras Públikas nian sei sa’e maka’as to’o pursentu 80 resin hafoin segundu transferénsia orsamentu ba EDTL,E.P no BTL,E.P. Inklui mós ho ezekusaun projetu manutensaun ba estrada rurál ne’ebé tenderizasaun fó sai tiha ona, balun tama ona iha kontratasaun, iha ne’ebé mobilizasaun komesa kompañia manán na’in sira husi prosesu aprovizionamentu hala’o hela.

Transferénsia daruak ne’e hala’o hodi finansia ka ezekuta ba atividade ne’ebé empreza públika rua ne’e hala’o.

#Media_MOP