MOP REALIZA MINI KOMITÉ REVIZAUN ORSAMENTU OJE TINAN FISKÁL 2022

 MOP REALIZA MINI KOMITÉ REVIZAUN ORSAMENTU OJE TINAN FISKÁL 2022

DILI, 09 AGOSTU 2021: S. Exa, Ministru Obras Públikas (MOP), Arq. Salvador Eugénio Soares dos Reis Pires, akompaña husi Vise Ministru MOP, Eng. Nicolau Lino Freitas Belo, lidera mini Komité Revizaun Orsamentu Jerál Estadu (OJE) tinan fikál 2022 nian ba Ministériu Obras Públikas inklui ajénsia tutela no ajénsia autónomu sira ne'ebé tutela ba MOP.

"Objetivu enkontru ohin ne'e, depois de ezersísiu husi Ministériu Finansas halo, atribui pakote ba ministériu depois akompana ho ami-nia enkontru ida mais resente ko'alia kona-ba atribuisaun orsamentu, fahe pakote iha Maubara iha tempu ne'eba, entaun ohin sira mai aprezenta fali rezultadu ezersísiu depois de fahe pakote ba kada ajénsia sira, inklui mós ajénsia autónomu sira ne'ebé tutela ba MOP hanesan BTL, EDTL ne'ebé benefisia husi orsamentu transferénsia pùblikas husi MOP ba iha sira. Ohin sira aprezenta sira-nia planu atribuisaun husi pakote ne'ebé Ministériu Finansas atribui ba ami millaun $157, ne'ebé fahe ba EDTL, BTL, kuaze ajénsia hotu kumpri pakote, ida-ne'e mak ha'u-nia orientasaun. Ne'ebé ohin ne'e ami haree fali pakote millaun $157, osan ne'e aloka ba ajénsia sira ne'e aloka ba saida de'it molok ita tama iha faze ida tuir mai mak KROP ne'e polítiku ne'ebé S. Exa, Primeiru Ministru mak sei lidera, entaun lori ba aprezenta para lori ba aprovasaun iha Konsellu Ministru depois ba Parlamentu Nasionál," Sr. Ministru Obras Públikas, informa ba jornalista sira iha JL. Villa, Fatuhada, Dili, hafoin lidera mini revizaun orsamentu tinan fiskál 2022.

Governante ne'e hatutan enkontru ne'e "apenas detallamente aprezenta osan pakote ida ita fó, purizemplu ba EDTL millaun $90 fahe ba saida de'it, hanesan mós BTL millaun $17 ne'e fahe ba saida de'it, agora Diresaun Jerál Obras Pùblikas no Diresaun Jerál Habitasaun no Urbanízmu mós hanesan”.

"EDTL ami-nia planu millaun $90, ne'e kobre ba kombustível sira, klaru katak sira iha orsamentu ne'ebé atribuidu iha tinan ne'e, sira iha balansu sira sei lori ba tinan oin, aliende ne'e sira mós rekolla reseita tinan-tinan millaun $30 resin, i espera katak tinan oin mai di'ak liután tanba tinan ne'e sira halo hela akizasaun ba rihun 102 kontadores prepagu, see ida-ne'e instala hotu ho sira-nia kontrolu ba koneksaun ilegál sira no kliente sira ne'ebé seidauk hetan koneksaun husi konsumidores sira ne'e hau hanoin sira-nia reseitas sei bele aumenta iha tinan oin, ho ida-ne'e, ho osan ne'ebé ita atribui ba sira sustenta sira-nia atividade operasaun i BTL kuaze millaun $17, ohin sira halo hela aprezentasaun ohin iha progresu hela katak ida-ne'e sufisiente ona ba sira tanba ida-ne'e orsamentu anuál nian, see aban bainrua la to'o 2023 haree fali orsamentu, aliemde ne'e Gobernu iha kontijénsia no buat seluk tan kuanu iha nesesidades previstu ruma ita bele rekore fali”.

Planu no prioridade Ministériu Obras Públikas nian iha tinan fiskál 2022 mak kontinua programa eletrisidade, bee-moos, estrada no habitasaun urbanízmu.

Tetu Fiskál 2022 nian ne’ebé Ministériu Finansas atribui ba Ministériu Obras Públikas hamutuk millaun $157 resin, husi tetu ne’e ajénsia sira halo azersísiu fahe ba Saláriu Vensimentu hamutuk millaun $2.773.899,13, Bens Servisu millaun $26.832.930,00, Transferénsia Públika millaun $107.000.000,00, Kapitál Menór millaun 349.000,00, no Kapitál Dezenvolvimentu millaun 20.184.948,00.

Pakote Orsamentu aprezenta husi Diretór Jerál Administrasaun no Finansas (DJAF), Sr. Januário Aparício Barbosa, ho Diretór Nasionál Orsamentu no Finansas (DNOF), João Amarál, kona-ba pakote orsamentu ne'ebé elabora ona husi ajénsia sira.

Enkontru ne'e partisipa mós husi Diretór Jerál Obras Públikas (DJOP), Sr. Rui Hernani, Diretór Jerál Habitasaun no Urbanízmu (DJHU), Sr. Roger Tertuliano Belo, akompaña husi Diretór Nasionál, Xefe Departamemtu inklui tékniku sira.

Partisipa mós husi Prezidente EDTL Empreza Pùblika, Sr. Paulo da Silva, Prezidente BTL,E.P, Sr. Carlos Peloi dos Reis, ho vise Prezidente, vogál, tékniku no assesór sira.

#Media_MOP