KONSELLU MINISTRU APROVA MONTANTE PEKUNIÁRIU BA IMPLEMENTASAUN PROJETU SIDADE UNIVERSITÁRIU AILEU
DILI, 16 JUNNU 2021: S. Exa, Ministru Obras Públikas (MOP), Arq. Salvador Eugénio Soares dos Reis Pires, partisipa iha reuniaun Konsellu Ministru ordinária ne'ebé lidera husi S. Exa, Primeiru Ministru (PM), Sr. Taur Matan Ruak, iha edifísiu Ministériu Finansas, Aitarak-Laran, Dili.
Iha reunian Konsellu Ministru ne'e halo aprovasaun mós ba projetu Rezolusaun Governu nian ne’ebé prosede ba definisaun montante pekuniáriu sira hodi selu husi kompensasaun ba utilizasaun terrenu sira ba implementasaun Projetu Sidade Universitária Aileu nian, ne’ebé aprezenta husi S. Exa, Ministru Ensinu Superiór, Siénsia no Kultura, Sr. Longuinhos dos Santos. Rezolusaun Governu nian ne’e define pagamentu másimu ba metru kuadradu ida-idak, hodi halo kompensasaun ba família sira ne’ebé identifika hanesan titulár husi podér pose nian kona-ba terrenu sira ne’ebé abranje iha área implementasaun projetu nian. Define mós montante másimu sira hodi selu ba lakon konstrusaun no kultura agríkola sira.
Konsellu Ministrus mós hafoin análiza ba aprezentasaun kona-ba pontu situasaun epidemiolójika país nian, husi koordenadór sira husi Sala Situasaun Sentru Integradu Jestaun Krize nian (SIJK), aprova ona projetu Rezolusaun Governu nian ne’ebé mantein impozisaun serka sanitária iha Munisípiu sira Baukau, Bobonaru, Dili no Kovalima ba loron 7 tan.
Nune’e, bandu nafatin sirkulasaun ema sira nian entre munisípiu Baukau, Bobonaru, Dili no Kovalima no sirkunskrisaun administrativa sira-seluk, exetu iha kazu hirak ne’ebé ninia fundamentu forte tanba razaun seguransa públika, saúde públika, asisténsia umanitária, manutensaun sistema abastesimentu públiku, ka razaun seluk ne’ebé presiza atu hala’o ba interese públiku nian.
SIJK ne’e sei iha reprezentante ida iha Sentru sira Kontrolu Integradu nian ne’ebé bele simu subdelegasaun kompeténsia ida hodi autoriza sirkulasaun iha territóriu nasionál. Autorizasaun sira ne’e dependente husi rezultadu negativu iha teste COVID-19 nian. Labarik sira ho idade tinan neen mai kraik no ema sira ne’ebé simu ona vasinasaun kompletu (doze rua) la presiza autorizasaun hodi sirkula iha territóriu nasionál.
Konsellu Ministrus deside ona hodi la renova impozisaun konfinamentu domisiliáriu jerál husi populasaun Munisípiu Dili nian.
Konsellu Ministrus aprova mós projetu Rezolusaun Governu nian ba rekondusaun Sr. Florêncio da Costa Sanches, ba kargu Diretór Ezekutivu husi Servisu Rejistu no Verifikasaun Emprezariál, IP, (SERVE) ba mandatu tinan tolu, iha rejime eskluzividade. Projetu Rezolusaun Governu nian ida-ne’e aprezenta husi S. Exa, Ministru Koordenadór Asuntus Ekonómikus, Sr. Joaquim Amaral.
Aprova mós projetu Rezolusaun Governu nian haat, ne’ebé aprezenta husi S. Exa, Ministru Administrasaun Estatál, Sr. Miguel Pereira de Carvalho, ba nomeasaun Sr. Ernesto de Oliveira Barreto nudár Prezidente Autoridade Munisipál Bobonaru nian, Sr. Eusébio Salsinha, enkuantu Prezidente Autoridade Munisipál Ermera, Sr. Pedro Paulo Gomes ba Administradór Munisipál Likisá nian, no Sr. Bernardo Lopes ba kargu hanesan Administradór Munisipál Manatutu. Nomeadu haat ne’e sei hala’o respetiva funsaun sira iha rejime komisaun servisu nian, ba períodu tinan lima, konta husi data simu pose nian.
Konsellu Ministrus aprova ona projetu Rezolusaun Governu nian ne’ebé estabelese Komisaun Interministeriál ba Reajustamentu husi Planu Estratéjiku Dezenvolvimentu (PED) tinan 2011-2030, ne’ebé aprezenta husi S. Exa, Vise-Primeiru-Ministru no Ministru Planu Ordenamentu, Sr. José Maria dos Reis. Liu tiha ona tinan sanulu ba implementasaun PED tinan 2011-2030 nian, hakarak realiza ajustamentu filafali ba dokumentu estratéjiku ida-ne’e, estruturamente no kondutór husi prosperidade nasionál, liuhusi estratéjika integrada ida, inkluziva, no reziliente, ne’ebé viabiliza artikulasaun no kreximentu husi setór oioin, hodi permite dezenvolvimentu sosiál no ekonómiku umanu ba país. Reajustamentu ida-ne’e iha mós konsiderasaun hodi hanoin hikas estratéjika sira husi médiu no longu prazu nian, atu hasoru dezafiu sira hanesan sira ne’ebé daudaun ne’e enfrenta, hanesan pandemia COVID-19 no dezastre naturál sira. Hakarak mós reajusta PED tinan 2011-2030 tuir objetivu sira no meta sira ne’ebé prevee iha Planu Rekuperasaun Ekonómika.
Ikusliu, aprova mós projetu Dekretu Governu nian, ne’ebé aprezenta husi S. Exa, Ministru Justisa, Se. Manuel Cárceres da Costa, hamutuk ho S. Exa, Ministru Finansas, Sr. Rui Augusto Gomes, kona-ba rejime remuneratóriu husi membru sira Komisaun Terras no Propriedade, organizmu ne’ebé maka responsavel ba rezolusaun husi kazu disputa sira kona-ba beins imóveis. Projetu Dekretu Governu ida-ne’e sei permite funsionamentu kompletu husi komisaun no kontribui ba rezolusaun kazu pendente rihun ba rihun husi disputa kona-ba imóveis, ne’ebé kontribui ba pás sosiál no dezenvolvimentu ekonómiku.
#Media_MOP
