MOP HUSU ENJINÉIRU INTERNASIONÁL ATU FAHE ESPERIÉNSIA BA ENJINÉIRU TIMOROAN

MOP HUSU ENJINÉIRU INTERNASIONÁL ATU FAHE ESPERIÉNSIA BA ENJINÉIRU TIMOROAN

LAGA, 23 JUNNU 2021: S. Exa, Ministru Obras Públikas (MOP), Arq. Salvador Eugénio Soares dos Reis Pires, husu enjinéiru Internasionál sira liuliu kompañia kontratór no konsultór sira ne’ebé daudauk ne’e halo konstrusaun ba projetu estrada nasionál trosu munisípiu Baukau to’o munisípiu Lautém atu fahe ka transfere esperiénsia ba enjinéiru timoroan ne’ebé daudauk ne’e servisu hamutuk iha projetu refere.

“Ita-boot sira iha esperiénsia barak, servisu iha nasaun bar-barak, ha’u hakarak husu ita-boot sira atu fahe esperiénsia baa mi-nia enjinéiru timoroan ne’ebé servisu hamutuk ho ita-boot sira iha projetu ida-ne’e,”Sr. Ministru Obras Públikas husu bainhira asiste aprezentasaun husi konsultór no kontratór sira kona-ba progresu servisu projetu konstrusaun estrada nasionál Baukau-Lautém, iha akampamentu kontratór nian iha postu administrativu Laga, munisípiu Baukau.

Sr. Ministru mós husu enjinéiru timoroan sira atu pasiénsia no haraik-an hodi aprende barak liután husi enjinéiru sira husi rai-liur, tanba Timor ba timoroan hotu no Timor presiza ema matenek hodi dezenvolve infraestrutura Timor-Leste nian.

“Ema sira ne’e halo projetu iha fatin barak, ne’ebé haraik-an, tenke humilde hodi servisu buka esperiénsia no matenek. Agora imi tenke hatene mak oinsá servisu didi’ak koopera para na’ok matenek barak liu, tanba projetu la’os ida-ne’e de’it, ita sei iha obra bar-barak aban bainrua ita tenke halo, nasaun labele para hanesan ne’e de’it, ne’ebé ita-boot sira oportunidade iha ne’e tenke aproveita másimu,”Sr. Ministru husu ba enjinéiru timoroan sira.

Enjinéiru husi kompañia kontratór no konsultór sira prontu atu fahe esperiénsia ba enjinéiru timoroan sira liuhosi implementasaun projetu estrada nasionál sira, no timoroan ne’ebé servisu iha projetu refere sei haraik-an no kolabora hodi hetan esperiénsia no matenek husi enjinéiru sira husi rai-liur.

#Media_MOP