MOP ORIENTA OBRAS PÚBLIKAS LAUTÉM ATU KOORDENA SERVISU, LABELE IMPEDE PROJETU
LAUTÉM, 23 JUNNU 2021: S. Exa, Ministru Obras Públikas (MOP), Arq. Salvador Eugénio Soares dos Reis Pires, informa orienta Obras Públikas munisípiu Lautém nian koordena ho kompañia konstrutór sira maibé labele hapara projetu ne’ebé la’o hela iha munisípiu.
“Imi solusiona tiha problema ne’e, projetu labele para, imi koordena, imi ko’alia ho sira para rezolve, importante mak projetu ne’e tenke ba oin tanba tenke tuir kontratu agora labele hapara hanesan ne’e,”Sr. Ministru Obras Públikas fó orientasaun ne’e bainhira haree direita kondisaun ponte iha área postu administrativu Lautém, munisípiu Lautém nian.
Sr. Ministru mós fó ona orientasaun ba Gabinete Inspesaun atu halo investigasaun ba problema refere.
“Ha’u fó ona despaxu ba gabinete inspesaun atu halo investigasaun tanba sira hatete dehan ita-boot hapara tiha projetu,”Sr. Ministru hatete.
Hatan ba problema ne’e, Diretór Obras Públikas munisípiu Lautém nian, Sr. Abrão Vieira, informa katak obras públikas munisípiu haruka ona karta mai nasionál liga ho asuntu ne’e, no Obras Públikas munisípiu hapara tanba kompaña konstrutór la ateru dalan iha área postu administrativu Lautém nian ba Lospalós vila ne’ebé kondisaun liuliu manila mak kondisaun ladi’ak.
“Ita-nia ponte oan ida iha leten ne’e atu monu de’it ona ne’ebé ita tau tiha ona gorong-gorong depois gorong-gorong (manila) ne’e foin daudauk udan boot ne’ebé gorong-gorong sorin ne’e mak ku’ak ona, ha’u haruka sira hadi’a tiha ida-ne’e mak liu sira lakohi, depois ponte kotu pasiénsia, depois estrada husi ne’e to’o Tutuala ne’e ku’ak boboot, loron-loron komunidade kestiona, sira-nia treek oan sira liu mós araska, ne’e mak ita haruka sira taka netik ku’ak boboot ne’e sira lakohi,”Diretór Obras Públikas munisípiu Lautén ne’e informa.
Husi informasaun ne’e, Sr. Ministru husu kona-ba hadi’ak gorong-gorong no ateru estrada ne’e tama iha kontratu ga lae? Diretór ne’e informa katak “Ne’e la inklui iha kontratu maibé kuandu sira (kompañia) atu halo mobilizasaun estrada ne’e tenki di’ak para sira liu, depois ita-nia komunidade mós tenke asesu di’ak, see komunidade asesu ladi’ak mak loron-loron komunidade kestiona ne’e ita iha ne’e mak loron-loron rona lian hela de’it”.
Iha momentu ne’e kedas, Sr. Ministru akompaña husi Diretór Jerál Administrasaun no Finansas (DJAF), Sr. Januário Patrício Barbosa, no Jestór Unidade Jestaun Manajementu (PMU) estrada, Sr. Sidónio Amaral Freitas, inklui konsultór no kontratór ba konstrusaun estrada nasionál Baukau-Lautém.
Iha oportunidade ne’e, Sr. Ministru husu apoiu kompañia internasionál sira ne’e nian hodi monta manila nune’e bele fasilita movimentasaun transporte liuliu kompañia sira ne’ebé atu transporta ekipamentu konstrusaun ba mai iha área refere.
0 Comments:
Posting Komentar