INSPESAUN BA KONSTRUSAUN ESTRADA BAUKAU-LAUTÉN ATINJI 84%, MOP HUSU TENKE GARANTE NIA KUALIDADE ~ Ministry of Public Works

INSPESAUN BA KONSTRUSAUN ESTRADA BAUKAU-LAUTÉN ATINJI 84%, MOP HUSU TENKE GARANTE NIA KUALIDADE

LAUTÉM, 23 JUNNU 2021: S. Exa, Ministru Obras Públikas (MOP), Arq. Salvador Eugénio Soares dos Reis Pires, akompaña husi Diretór Jerál Administrasaun no Finansas (DJAF), Sr. Januário Patrício Barbosa, no Jestór Unidade Jestaun Manajementu (PMU) estrada, Sr. Sidónio Amaral Freitas, hodi halo inspesaun ba progressu konstrusaun estrada nasionál diresaun husi munisípiu Baukau to’o munisípiu Lautém ne’ebé daudauk ne’e atinji ona pursentu 84 (84%).

Durante inspesaun no akompaña amprezentasaun husi kompoñia kontratór no konsultór, Sr. Ministru husu atu garante kualidade ne’ebé di’ak, nune’e bainhira projetu ne’e hotu kompñia Internasionál sira bele rai hela kondisaun infraestrutura ho kualidade di’ak hodi fó benefísiu ba komunidade sira ne’ebé asesu iha infraestrutura refere.

“Ha’u-nia fatin nakloke no suporta ita-boot sira hodi ko’alia ba issu sira ne’ebé relevante, bazikamente hodi fasilita povu Timor-Leste. Ha’u-nia parte sei halo buat hotu hodi suporta ita-boot sira-nia servisu, no dala ida tan, favór garante kualidade ne’ebé di’ak. Kualidade projetu ne’e mak importante tebes,”Sr. Ministru hatete bainhira hala’o enkontru ho kompañia kontratór no konsultór iha akampamentu kompañia konsultór nian iha postu administrative Laga, munisípiu Baukau.

Kompañia kontratór no konsultór mós promete sei halo konstrusaun ba trosu estrada ne’e ho di’ak hodi garante nia kualidade.

Inspesaun husi Sr. Ministru Obras Públikas hodi haree direita progresu konstrusaun, rona preblema no preokupasaun ne’ebé kompañia kontratór no konsultór infrenta iha tereñu, inklui haree mós kualidade konstrusaun estrada refere. Observa pontu importante sira iha konstrusaun estrada trosu Baukau-Lautém ne’ebé presiza halo realineamentu iha área protezidu sira, ponte ejistente sira, no prosesu indiminizasaun ba komunidade afeitadu sira.

Ho nune’e Sr. Ministru husu ba PMU no kompañia konsultór atu servisu hamutuk, koordena no ko’alia ho komunidade afeitadu sira ba prosesu indiminizasaun, nune’e bele fasilita konstrusaun trosu refere hodi labele atraza prosesu konstrusaun.

Aliende ne’e, kompañia kontratór no konsultór hato’o preokupasaun kona-ba kauza husi Estadu Emerjénsia, Serka Sanitária no Konfinamentu Obrigatóriu iha kapitál Dili ne’ebé afeita progressu konstrusaun liuliu prosesu mobilizasaun ekipamentus no traballadór husi Dili ba munisípiu Baukau-Lautém hala’o servisu, maibé problema pandémia ne’e problema mundiál nune’e kompañia sira kontinua kumpri regra Organizasaun Saúde Mundiál (OMS) no Ministériu Saúde nian. Daudauk ne’e kompaña kontinua implementa teste temperatura kada loron ba traballadór estranjeiru no timoroan ne’ebé hala’o servisu iha trosu refere hodi evita propagasaun pandémia COVID-19.

Tuir observasaun, konstrusaun estrda nasionál ne’e iha parte balun hahú nahe ona aspalt no iha parte balun sei halo pengerasan ba base course, inklui sei hada moru protesaun sira.

Projetu ne’e konstrui husi kompañia Internasionál joint venture husi kompañia CBMI Construction Co., LTD no Chonqing Road Engineering Group CO., LTD no hetan superviziona husi kompañia Internasionál Donsung Engineering CO., LTD, iha Joint Venture hamutuk ho Dongil Engineering CO., LTD, asosia hamutuk ho kompañia nasionál Kai Watu Kmanek Consultant Unip.Lda.

Tuir informasaun ba projetu ne’e nian, projetu ne’e hahú iha loron 05 fulan-Setembru 2017 no remata iha loron 21 Fevereiru 2020 maibé seidauk konsege remata tanba ho situasaun polítika no pandémia COVID-19 ne’ebé atraza prosesu finalizasaun ba projetu refere, ho finansiamentu fundu impréstimu husi Banku Dezenvolvimentu Aziátiku (ADB) ho montante US 29, 315, 346.10 ho distánsia 57,6KM.