𝐃𝐉𝐇𝐔 𝐀𝐏𝐑𝐄𝐙𝐄𝐍𝐓𝐀 𝐃𝐄𝐙𝐄Ñ𝐔 𝐁𝐀 𝐉𝐀𝐑𝐃Í𝐍 𝐍𝐎 𝐀𝐓𝐔𝐀𝐋𝐈𝐙𝐀 𝐒𝐄𝐑𝐕𝐈𝐒𝐔 𝐏𝐑𝐎𝐉𝐄𝐓𝐔 𝐇𝐀𝐁𝐈𝐓𝐀𝐒𝐀𝐔𝐍 𝐍𝐎 𝐔𝐑𝐁𝐀𝐍Í𝐙𝐌𝐔 𝐁𝐀 𝐌𝐎𝐏

𝘿𝙞𝙡𝙞, 20 Dezembru 2022: Diretór Jerál Habitasaun no Urbanízmu (DJHU), Eng. Roger Tertuliano Belo, akompaña husi Diretór Nasionál no tékniku sira aprezenta dezeñu kona-ba Jardín parte Mota Maloa liuliu husi Sumafro (lampu merah) Aitarak-Laran nian tuun ba to’o Tasi Pantai Kelapa nian. Aliende ne’e, atualiza mós servisu sira relasiona ho projetu habiitasaun no urbanízmu ba Ministru Obras Públikas (MOP), Eng. Abel Pires da Silva, iha salaun enkontru DJHU, Mandarin, Dili.

Iha oportunidade ne’e, Diretór DJHU akompaña husi Diretór Nasionál no tékniku sira atualiza mós projetu Jardín sira ne’ebé daudauk ne’e la’o hela hanesan Jardín 2006 iha Kolmera nian, Jardín SAMES oin iha Kampung Alor nian, Jardín iha Timor Lodge oin, parte Tasi ibuk KAK oin, Liña Bisikleta no seluk tan ne’ebé identifikadu hanesan fatin ba konstrusaun jardín ne’ebé bele hafurak kapitál Dili, inklui projetu harii habitasaun foun iha Hera, Pelican Paradise iha Tasi-Tolu.

Husi aprezentasaun ne’e, Sr. Ministru Obras Públikas agradese tanba dezeñu ne’e di’ak no orienta tékniku sira atu dezeñu sira integradu mós ho kruzamentu estrada sira, nune’e labele hamosu engrafamentu iha estrada públiku no protokolu sira.

Sr. Ministru mós orienta kontinua halo aprosimasaun ho komunidade ne’ebé hela iha rai estadu liuliu área afeitadu bainhira hahú konstrusaun ba projetu jardín sira iha kapitál Dili, atu nune’e komunidade bele koopera ho di’ak. Aliende ne’e, Sr. Ministru hatutan, iha área afeitadu sira barak mak komunidade buka moris ka halo negósiu, tanba ne’e, presiza halo identifikasaun, bainhira konstrusaun hahú Governu bele fasilita atu nune’e labele afeita maka’as liu ba negosiante sira-nia negósiu.

Tékniku sira informa katak DJHU halo ona aprosimasaun ho negosiante sira no negosiante sira koopera di’ak tebes no prontu kolabora ho konsiente katak prontu hamamuk fatin maibé Governu konsidera netin sasán ne'ebé hetan estragus.

Iha ámbitu koordenasaun bainhira implementa projetu jardín sira presiza mós involve husi Teras no Propriedade hodi haree mós ba estatutu rai ne’ebé iha.

Enkontru ne’e partisipa direita husi Diretór Jerál Habitasaun no Urbanízmu (DJHU), Sr. Roger Tertuliano Belo, ho nia diretór nasionál no tékniku sira.

#Media_MOP