𝐊Á𝐌𝐀𝐑𝐀 𝐊𝐎𝐍𝐓𝐀𝐒 𝐅Ó 𝐎𝐍𝐀 𝐕Í𝐒𝐓𝐔 𝐁𝐀 𝐏𝐑𝐎𝐉𝐄𝐓𝐔 𝐄𝐒𝐓𝐑𝐀𝐃𝐀 𝐋𝐀𝐆𝐀-𝐁𝐀𝐆𝐔𝐈𝐀 𝐍𝐎 𝐔𝐀𝐈𝐀𝐊𝐀- 𝐊𝐄𝐋𝐈𝐊𝐀𝐈- 𝐎𝐒𝐒𝐔

𝐺𝑂𝑉𝐸𝑅𝑁𝑈 𝑆𝐸𝐼 𝐿𝐴𝑁𝑆𝐴 𝐾𝑂𝑁𝑆𝑇𝑅𝑈𝑆𝐴𝑈𝑁 𝐼𝐻𝐴 𝐹𝑈𝐿𝐴𝑁 𝐷𝐸𝑍𝐸𝑀𝐵𝑅𝑈

𝙏𝙞𝙗𝙖𝙧, 25 Novembru 2022: Ministru Obras Públikas (MOP), Eng. Abel Pires da Silva, hatete MOP simu ona vístu husi Kámara Kontas ba konstrusaun projetu estrada munisipál husi postu administrativu Laga ba Baguia no Uaiaka-Kelikai-Ossu iha loron hirak liubá, tanba ne'e iha tempu badak Governu sei halo lansamentu hodi hahú konstrusaun ba projetu refere.

Tuir mai transkrisaun intervista husi jornalista sira ho Sr. Ministru iha Tibar hafoin partisipa serimónia lansamentu ba Konstrusaun Otél Pelican Paradise mak hanesan tuir mai:

Jornalista; Baihira loos mak halo lansamentu ba projetu estrada ne'ebé vistu ona ne'e?

Sr. Ministru: Vistu ne'e semana kotuk estrada Uaiaka-Kelikai nian sai ona, horseik estrada Laga-Baguia nian mós sai ona, ohin lokraik ha'u konvida kompañia sira para halo preparasaun ba lansamentu ne'e, sira dehan mobilizasaun ne'e sira presiza tempu oituan para halo normalizasaun, Ita bele lansa maibé hahú ne'e maka presiza tempu, tamba oras ne'e Xina Lockdown hela entaun atu mobiliza sira-nia rekursu prinsipál sira ne'e sei han tempu, maibé ha'u hatete katak, importante maka ita lansa fulan oin, dentru de Dezembru, i sira hahú halo ona preparasaun iha tereñu. Sira mós komesa ona estrada rua refere, sira mós bele ona halo intervensaun atu halo manutensaun ba estrada ne'e rasik hodi hein konstrusaun, ida-ne'e maka ohin ami konkorda malu.

Sira propoin semana oin bele, ha'u dehan katak ha'u sei kordena tempu liuliu ho S. Exa, Primeiru-Ministru Jenerál Taur Matan Ruak, tamba ne'e ita hein katak, S. Exa, Sr. Primeiru-Ministru maka sei ba lansa, maibé ha'u seidauk komfirma ho S. Exa, Primeiru-Ministru para ita hetan ona S. Exa, Primeiru-Ministru nia desponibilidade baihira entaun ita justifika.

Jornalista; Entaun data fiksu seidauk hatene halo lansamentu ne'e?

Sr. Ministru; Tempu badak, kompañia bele halo ona preparasaun tomak, tamba agora ne'e finál hotu ona, hein de'it implementa ne'ebé ami agradese tebes ba apoiu tomak husi Ministériu Finansas, KAFI (Konsellu Administrasaun Fundu Infraestrutura) liuliu Prezidente KAFI, Kamarada José Reis, Vise Primeiru Ministru, agradese mós ba CNA (Komisaun Nasionál Aprovizionamentu), ninia servisu no mós apoiu ne'ebé ita simu husi Kámara Kontas (Camara das Contas), ho ida-ne'e hein katak la kleur tan obra bele hahú. Presenza kompañia ne'e mós bele ajuda movimentasaun populasaun sira iha ne’eba, ha'u hanoin ema hotu bele kontenti.

Jornalista; Senhor Ministru, Orsamentu ne'ebé tau ba ne'e balun tau ba halo indiminizasaun ba komunidade ka lae?

Sr. Ministru; Lae ida ne'e ketak, ne'e orsamentu Ministériu nian, ida indiminizasaun ne'e mai husi Ministériu nian besbesik hotu ona mais laiha problema, dadus hotu ona, ita iha de'it problema rekerimentu ida atu loke konta bankária, atu halo pagamentu tenke loke konta bankária, agora ita-nia inan-aman sira iha foho no iha munisípiu ne'e maioria laiha bileti identidade (BI), maibé rekerimentu atu loke konta iha banku tenke iha rua ne'e, kartaun eleitorál ho mós Bileti Identidade, entaun ami kordena ho Ministériu Justisa (MJ), para kria ou hasai Bileti Identidade temporáriu para prosesu pagamentu bele lao. Em prinsípiu maioria komunidade sira apoiu ne'ebé ita hein de'it para lansa.

Ohin ami konkordánsia ona, kompañia ne'e mós konkorda bele lansa dentru semana ida semana rua nia-laran. Mais sira prontu ne'ebé ita hein, nai Primeiru-Ministru nia tempu, see disponível ita avansa.

Jornalista; S.Exa Ministru, iha ponte Kasnafar ne'e, agora daudauk udan mai hela de'it komunidade mós preokupa loos?

Sr. Ministru; Sim ponte Kasnafar agora tender hela, ita labele halo buat ida tamba ne'e ita-nia lei, ha'u hanoin katak ita atu ajudika, maibé labele ajudika tamba kritéria la priense, atu ajudika ne'e ita iha kritéria tolu, ne'e la'os hanesan ulu-uluk nian bee ita fahe de'it, ajudika arbiru de'it, ita tuir lei, lei ne'e iha kritéria tolu, ida iha risku, risku ema nia vida, ida fali iha forsa natureza iha, maibé ida fali estrutura ezistente ne'e tenke iha, estrada karik estrutura tenke iha (estrada iha nanis). Agora ida ne'eba ponte, ponte ezistente laiha, entaun ida husi tolu ne'e la priense, entaun ita labele ajudika.

Jornalista; Entaun tinan ida-ne'e ita la garante katak bele la'o?

Sr. Ministru; Tinan oin ita hein, tender la'o hela, ita hein tender hotu obra bele la'o.

#Media_MOP