KOMUNIDADE TUTULURO AGRADESE NO SENTE HANESAN MILAGRE, VIII GOVERNU, MOP-EDTL,EP DADA ELETRISIDADE BA TUTULURO NE’EBÉ TINAN BARAK TUUR NAKUKUN

TUTULURO, 30 NOVEMBRU 2021: S. Exa, Ministru Obras Públikas (MOP), Arq. Salvador Eugénio Soares dos Reis Pires, akompaña husi Prezidente Eletrisidade Timor-Leste Empreza Públika (EDTL,EP), Eng. Paulo da Silva hamutuk ho administradór munisípiu Manufahi, Sr. Arantes Isaac Sarmento, inklui autoridade sira seluk lansa projetu eletrifikasaun ba suku Tutuluro, postu administrative Same, munisípiu Manufahi.

Ministru Obras Públikas (MOP), Arq. Salvador Eugénio Soares dos Reis Pires, lansa projetu eletrifikasaun ba suku Tutuluro, postu administrative Same, munisípiu Manufahi. (Foto MOP).

“Lansamentu projetu ida-ne’e fasparte husi programa Governu nian ne’ebé komprometidu hakarak halo hotu projetu eletrifikasaun ba sira ne’ebé mak eletrisidade seidauk tama kuaze 76 sukus, i ba suku Manufahi ita halo ona iha suku Mindelu i ohin loron (30/11) hamutuk ho Administradór, Prezidente EDTL ho autoridade lokál sira ita mai lansa projetu liña eletrifikasaun ba suku Tutuluro husi aldeia Daor ba to’o Dalun hamutuk 5.3KM, ba média tensaun i baixa tensaun ne’e pruvolta 6.7KM i sei benefisia kliente kuaze 250. Ne’e ba kobertura aldeia 3, ba aldeia 4, Sr. Prezidente ho nia ekipa sira komprometidu para halo uluk levantamentu dadus kuandu projetu ne’e la’o bele halo expansaun ba iha aldeia sira seluk atu nune’e komunidade iha suku Tutuluro tomak bele asesu ba eletrisidade bainhira projetu ida ohin ita lansa ne’e kompleta,”Sr. Ministru Obras Públikas informa ba jornalista sira hafoin serimonia lansamentu projetu eletrifikasaun iha suku Tutuluro.

Sr. Ministru esplika, “Manufahi kuaze suku 17 mak seidauk asesu eletrisidade, rua ita lansa tiha ona halo ona lansamentu primeira pedra i konstrusaun la’o hela, ida Mindelu, ida mak ohin suku Tutuluro, agora restante ne’e iha ona prosesu balun ba tenderizasaun i restu ne’ebé ita la konsege halo tenderizasaun iha tinan ida-ne’e, EDTL sei loke tenderizasaun inísiu tinan oin, iha fulan-Janéiru ka Fevereiru ne’e ita lansa ba suku sira ne’ebé mak seidauk hetan projetu eletrifikasaun”.

Governu liuhosi Ministériu Obras Públikas liuliu EDTL,EP kontinua halo esforsu bazeia ba kompromisu VIII Governu Konstitusionál lideradu husi S. Exa, Primeiru Ministru, Jenerál Taur Matan Ruak, mak mandatu Governu ida-ne’e remata suku hotu tenke asesu ona eletrisidade. Kompromisu ne’e bele realiza tanba Governu reforma ona EDTL sai Empreza Públika ho autonomia finanseira, judisiál no administrativa hodi ezekuta projetu sira.

Iha intervensaun, Sr. Ministru husu apoiu autoridade lokál, komunidade inklui veteranus sira atu realiza projetu ne’e  ho di’ak no termina tuir tempu ne’ebé iha, nune’e komunidade bele asesu ona eletrisidade.

Sr. Ministru agradese mós ba esforsu tomak EDTL,EP nian kontinua ezekuta projetu eletrifikasaun ba suku sira ne’ebé seidauk asesu ba eletrisidade.

Xefe suku Tutuluro, Sr. Sebastião da Costa Hornai, konsidera serimonia lansamentu ba projetu eltrifikasaun iha suku refere hanesan milagre boot ida tanba durante tinan barak ona komunidade suku Tutuluro tuur iha nakukun laran no la senti ukun-an loloos. Tanba ne’e, xefe suku lori komunidade tomak Tutuluro nian agradese ba VIII Governu Konstitusionál, liuhosi Ministériu Obras Públikas, liuliu EDTL,EP ne’ebé konsege dada eletrisidade ba suku Tutuluro.

“Ita suku Tutuluro ohin hetan milagre boot ida tanba durante tinan barak ita halerik hela tanba ita Tutuluro ne’e seidauk senti saida mak ukun-an, ukun-an ne’e iha vila de’it mais ohin ita mós tama ona iha lista ida sente ukun-an, ne’ebé ha’u hanesan xefe suku Tutuluro ho povu tomak fó agradese ba VIII Governu Konstitusionál nia esforsu ne’ebé bele implementa projetu eletrisidade mai iha suku Tutuluro ne’e. Depois ami hakarak rekomenda hela Sr. Ministru Obras Públikas, ami Tutuluro nia aldeia 7, ami-nia totál xefe família iha 500 resin, ami-nia komunidade tomak iha rihun rua resin mais ahi ohin tama ona iha Tutuluro aldeia 3 mak asesu ona, aldeia 4 mak seidauk,” Xefe suku Tutuluro agradese.

Nune’e mós, Administradór munisípiu Manufahi, Sr. Arantes Isaac Sarmento, agradese ba VIII Governu Konstitusionál lideradu Jenerál Taur Matan Ruak, no Ministériu Obras Públikas ne’ebé iha kompromisu hasai povu husi nakukun ba naroman.

“Agradese ba Sr. Ministru Obras Públikas no mós agradese ba Sr. Primeiru Ministru VIII Governu, Jenerál maun Taur Matan Ruak, ne’ebé mak iha kompromisu boot tebes hakarak duni liberta povu ida-ne’e husi mukit no terus, husi nakukun ba naroman, tuir palavra da luta Liberta da Patria, Liberta do Povo, Liberta patria liberta tiha ona i ohin liberta povo ida-ne’e, hasai povu ida-ne’e husi susar no mukit sira ne’ebé iha, hanesan servidó povu iha munisípiu Manufahi, agradese tebes ba ida-ne’e. Ohin lansamentu ba projetu ne’e hanesan mós iha Turiskai,”Sr. Administradór agradese.

Sr. Administradór hatutan “Ida-ne’e marka história boot ida ba komunidade sira iha Tutuluro no mós história ida ba Manufahi, Domingu liubá ita komemora loron Komemorasaun Proklamasaun Independénsia 28 Novembru i ohin lansamentu eletrisidade ba komunidade sira, psinsípiu no valór ba independénsia ne’e mak ida-ne’e, Governu nia responsabilidade boot tebes ba povu, povu iha direitu atu asesu ba eletrisidade, povu iha direitu atu asesu ba estrada, povu iha direitu atu asesu ba bee-moos, povu iha direitu atu lori nia oan sira ba eskola, i povu iha direitu mós atu hetan no tratamentu saúde ne’ebé di’ak, ida-ne’e mak kompromisu Governu nian, ida-ne’e mak kompromisu servidór estadu nian perante ba povu ida-ne’e”.

Iha fatin hanesan, Prezidente EDTL,EP, Eng. Paulo da Silva, fó lia-menon ba komunidade suku Tutuluro tomak atu, kontribui no kopera ho kompañia hodi implementa projetu ho di’ak, kontrolu mós servisu kompañia nian.

“Ha’u husu na’in hira ajuda autoridade sira para kontrolu sira-nia servisu para garante nia kualidade, tanba EDTL hanesan empreza públika la’os ona Diresaun Jerál uluk, nia natureza la hanesan ona entaun ita garante nia kualidade, lais maibé tenke ho kualidade, lais depois liu fulan ida, fulan rua, airin namtati ne’e EDTL sei lakohi, tanba ida-ne’e ami sei husu ba autoridade lokál, komunidade atu ajuda EDTL kontrolu nia kualidade. Husu mós ba inan-aman, projetu ida-ne’e ita laiha verbas ba iha Gantrugi ka indiminizasaun, entaun ha’u husu para ajuda, koopera, see kona ita-nia nuu, haas sanak ruma ke sira hakrak tesi, ajuda mós iha ne’eba tanba ita laiha osan ba ida-ne’e,”Sr. Prezidente EDTL,EP ameno.

Bainhira projetu ne’e remata, Sr. Prezidente EDTL,EP hakarak Tutuluro sai ezemplu ba komunidade sira seluk hodi jere eletrisidade, no hafoin fulan rua ka tolu, tékniku EDTL sei halo vizita hikas ba Tutuluro hodi monta kontadór prepagu, tanba ne’e komunidade tenke koopera, tanba liuhosi monta kontadór ba kliente sira mak bele hatama hikas reseita hodi fornese mina ba sentrál eletrika Hera no Betano.

Projetu eletrifikasaun ba suku Tutuluro ne’e ezekuta husi kompañia Damenia Unipesoal. Lda durante fulan 4, ho orsamentu hamutuk $297, 686. 48.

#Media_MOP