GOVERNU ALTERA DEKRETU LEI REJIME KONTRIBUTIVU SEGURANSA SOSIÁL

DILI, 20 OUTUBRU 2021: S. Exa, Ministru Obras Públikas (MOP), Arq. Salvador Eugénio Soares dos Reis Pires, partisipa iha reuniaun Konsellu Ministru ne’ebé lidera husi S. Exa, Primeiru Ministru (PM), Sr. Taur Matan Ruak, iha Palásiu Governu, Dili.

Reuniaun Konsellu Ministru

Reuniaun Konsellu Ministru hafoin halo análize ba aprezentasaun  kona-ba pontu situasaun epidemiolójika país nian, ne’ebé halo husi koordenadór sira Sala Situasaun Sentru Integradu Jestaun Krize (SIJK) nian, delibera atu propoin ba Sua Exelénsia  Señór Prezidente Repúblika, Sr. Francisco Guterres Lú Olo, renovasaun estadu emerjénsia ba loron tolunulu tan, hahú husi oras tuku 00:00 loron 30 fulan-outubru tinan 2021 to’o tuku 23:59 loron 28 fulan-novembru tinan 2021.

Ho hanoin katak kauza determinante sira ne’ebé justifika ona deklarasaun estadu emerjénsia no ninia renovasaun sira kontinua mantein, no atubele evita no neutraliza risku propagasaun sira husi variante foun SARS-CoV-2, no nune’e bele proteje saúde públika no kapasidade resposta husi Sistema Nasionál Saúde nian, Governu propoin ba Señór Prezidente Repúblika katak, ho renovasaun estadu emerjénsia nian, permite suspensaun ka restrisaun ba direitu no garantia fundamentál balun.

Aprova ona projetu Dekretu-Lei haat ne’ebé aprezenta husi S. Exa, Vise-Primeira-Ministra no Ministra Solidariedade Sosiál no Inkluzaun, Sra. Armanda Berta dos Santos, kona-ba:

1.      Alterasaun dahuluk ba Dekretu-Lei nu. 20/2017, loron 24 fulan-maiu, ne’ebé aprova rejime inskrisaun no obrigasaun kontributiva iha ámbitu rejime kontrributivu seguransa sosiál nian. Projetu Dekretu-Lei ida ne’e ninia obetivu maka: 

a.       Estende rejime ne’e ba grupu traballadór foun sira; 

b.  Korije aspetu balu iha baze insidénsia kontributivu nian no haluan númeru eskalaun adezaun fakultativa nian; 

c. Asegura protesaun no enkuadramentu traballadór sira hodi halo atividade profisionál temporariamente iha estranjeiru; no 

d.       Garante tratamentu ne’ebé hanesan ba traballadór sira hotu, liuhusi halakon norma ne’ebé impoin plafond ida iha kontribuisaun ne’ebé tenke selu (no ninia benefísiu ne’ebé sei simu) ba traballadór sira ne’ebé ho kontratu termu sertu iha Administrasaun Públika. 

2.      Alterasaun dahuluk ba Dekretu-Lei nu. 17/2017, loron 24 fulan-maiu, no ba Dekretu-Lei nu. 19/2017, loron 24 fulan-maiu, ne’ebé aprova rejime jurídiku kona-ba Pensaun ba Invalidéz no Ferik-katuas no rejime Jurídiku prestasaun nian bainhira ema mate iha ámbitu rejime kontributivu seguransa sosiál. Ho Projetu Dekretu-Lei ida ne’e ninia obetivu maka: 

a.       Garante prinsípiu báziku rejime kontributivu nian, ne’ebé asosia ho dever atu kontribui ba direitu hodi simu prestasaun sosiál sira; 

b.      Regula fórmula kálkulu nian kona-ba pensaun invalidéz no ferik-katuas ba traballadór sira ne’ebé parsialmente abranje husi rejime tranzitóriu nian (ho direitu iha formasaun); 

c.       Asegura katak ema ne’ebé kontribui ba reime erál ne’e sei sempre hetan direitu ba pensaun ne’ebé boot liu husi valór Subsídiu Apoiu ba ferik-katuas no Inválidu sira, no 

d.      Klarifika tratamentu ne’ebé atu fó ba ema bainhira mate ba efeitu Seguransa Sosiál nian. 

3.      Alterasaun dahuluk ba Dekretu-Lei nu. 19/2008, loron 19 fulan-juñu, ne’ebé aprova Subsídiu Apoiu ba Idozu no Inválidu sira. Ho konsiderasaun katak, bainhira diploma legál ne’ebé refere tiha ona tama iha vigór, seidauk iha rejime seguransa sosiál seluk  iha Timor-Leste no ho konsiderasaun katak, reime kontributivu seguransa sosiál nian. Ninia obetivu mak hakarak atu revee no adapta regra-jerál kona-ba akomulasaun husi benefísiu sira, atu nune’e Dekretu-Lei ne’e bele sai justu ba sosiedade. 

4.      Alterasaun dahuluk ba Dekretu-Lei nu. 55/2020, loron 28 fulan-outubru, ne’ebé aprova konstituisaun Fundu Rezerva ba Seguransa Sosiál (FRSS) no oinsá atu define ninia Modelu Jestaun nian. Ho projetu Dekretu-Lei ne’e hakarak atu halo alterasaun ba limite sira investimentu nian iha asaun no dívida privada, hodi asegura “karteira referénsia” ida ne’ebé efetivamente kumpri objetivu sira husi FRSS nian no mós aumenta marjen liberdade atuasaun Governu anualmente, tuir komportamentu ekonomia no merkadu nian. 

Konsellu Ministrus delibera hodi aprova prosedimentu aprovizionammentu nian ba adjudikasaun kontratu relativu ba projetu jestaun lixu Dili nian, tuir projetu ne’ebé aprejenta husi S. Exa, Ministru Administrasaun Estatal, Sr. Miguel Pereira de Carvalho, projetu ne’e iha komponente tolu hanesan: 

·         prestasaun servisu rekolla no tula lixu sira iha sidade Dili nian, relativu ba Lote 1 – Zona Oeste no Lote 2 – Zona Oeste; 

·         konsesaun/design, konstrusaun, reabilitasaun no jestaun aterru nian ida no estasaun tratamentu lixu iha Tibar; 

·         fornesimentu ekipamentu sira ba rekolla lixu iha Dili no ba aterru no estasaun tratamentu lixu tibar, no fornesimentu kontentór no kaixote lixu nian, fornesimentu ekipamentu rekolla lixu no ba operasaun aterru nian, no fornesimentu ekipamentu ba operasaun aterru nian. 

Ikusliu, S. Exa, Ministru Prezidénsia Konsellu Ministrus, Sr. Fidelis Manuel Leite Magalhães, aprezenta pontu situasaun ezekusaun kona-ba Planu Lejizlativa Governu tinan 2021 nian. Planu leizlativa ne’e aprova ona husi Konsellu Ministrus iha reuniàun loron 13 fulan-janeiru liubá no elabora ona ho baze iha proposta sira ne’ebé submete husi membru Konsellu Ministrus sira. Planu ne’e kompostu husi previzaun intervensaun lejizlativa ida Governu nian no  prioridade ida-idak, fahe tuir setór sira, ba tinan 2021. Husi inisiativa 241 ne’e prevee iha inísiu tinan, durante reuniãun, membru Konsellu Ministrus analiza sira ne’ebé finaliza tiha ona, sira ne’ebé sei prosesu hela no sira ne’ebé seidauk aprezenta ba Konsellu Ministrus.

 

#Media_MOP