PONTE BA MOTA KARAU ULUN TUTULURO DEFIKULTA KOMUNIDADE TUTULURO, MOP: DEZEÑIA IHA ONA VERIFIKASAUN ADN

TUTULURO, 30 NOVEMBRU 2021: S. Exa, Ministru Obras Públikas (MOP), Arq. Salvador Eugénio Soares dos Reis Pires, informa ba komunidade iha suku Tutuluro, postu administrativu Same, munisípiu Manufahi katak dezeñu ba ponte Mota Karau ulun suku Tutuluro nian daudauk ne’e iha ona Ajénsia Dezenvolvimentu Nasionál (ADN) verifika, hafoin verifika sei lori ba Konsellu Administrasaun Fundu Infraestrutura (KAFI) hodi aprova, bainhira aprova ona mak sei lori ba Komisaun Nasionál Aprovizionamentu (CNA) hodi loke tenderizasaun para hetan manán na’in hodi kontrui ponte iha mota refere.

“Iha 2019 ita dezeñu ba ponte iha pakote sanulu, inklui mós ponte Tutuluro dezeñu hotu ona, agora iha ADN, hein ADN verifika hotu KAFI aprova ita tender ona, manán na’in ida mai ita halo ona. 2019 ami inagura estrada rurál iha Betano, ha’u ko’alia ba populasaun sira iha postu Same vila, hatete, 2019 ita halo estudu ba ponte Tutuluro. Sim, estudu ne’e hotu ona, agora ADN verifika hela, kuandu ADN verifika hotu lori ba KAFI, KAFI aprova lori ba CNA loke tender hetan kompañia manán na’in sira bele mai halo ona konstrusaun, ida-ne’e tanba iha estrada seidauk reforma hanesan iha EDTL ne’e, ita sei tuir burokrasia ida tuan ne’e, ADN tenke verifika, KAFI tenke aprova no Can loke tender, tanba sira sei hanesan ajénsia ba departamentu estrada no ponte, ne’ebé ha’u espera katak,”Sr. Ministru Obras Públikas informa ba komunidade suku Tutuluro, liuhosi intervensaun iha lansamentu projetu eletrifikasaun iha suku refere.

Sr. Ministru afirma “Funsionamentu Governu mak hanesan ne’e, maibé atu hatete ba populasaun sira katak Governu ne’e hadomi ita-boot sira, S. Exa Primeiru Ministru Jenerál Taur Matan Tuak, nia mai husi povu funu na’in ida ne’ebé nia hadomi ita-boot sira, ne’ebé ida-ne’e mak ita hakarak maibé ita tenke halo ho serteza, tanba saida mak ita tenke gasta tempu halo planu didi’ak tanba projetu sira ne’e presiza osan barak, investimentu osan barak ita tenke mitiga risku, foti dadus, kontekstualiza ita-nia planu sira ne’e ho terenu para, bainhira ita halo karik, halo ho kualidade i goja ba oin para Governu hanoin fali buat seluk. Dalabarak ita-boot sira bele dehan Sr. Ministru tempu ne’e halo estudu mak barak! Estudu tenke halo duni tamba ponte sira ne’e la’os ponte ki’ik, investimentu sira iha estrada ne’e la’os osan oituan maibé osan barak ne’ebé ita tenke serteza ho ita-nia investimentu, ne’e mak liuhosi estudu atu hatene risku, fó solusaun, i see risku ne’e mosu solusaun iha ona, ne’e mak liuhosi planeamentu ne’e, ne’ebé estudu ne’e importante”.

Iha oportunidade ne’e, Sr. Ministru esplika mós kona-ba prosesu implementasaun projetu ida bazeia ba burokrasia iha Governu.

Xefe suku Tutuluro, Sr. Sebastião da Costa Hornai, hato’o preokupasaun ba Sr. Ministru Obras Públikas kona-ba mota ne’ebé durante ne’e defikulta tebes movimentasaun komunidade nian iha suku refere bainhira udan.

“Ohin Sr. Ministru ho nia komitiva tomak to’o mai asiste mota ne’ebé mak durante ne’e ami postu 4 ne’e nia problema boot mak ne’e. Kuandu tempu udan Sr. Ministru to’o mai senti rasik, saida mak ami senti, ohin Sr. Ministru to’o mai dalaruma mós senti hotu. Ami husu kona-ba ami-nia estrada ne’ebé kompañia abandona to’o agora, ne’e ligasaun mós ba fatin Saudozu Nocolau Lobato, liga ba postu Turiskai, liga ba postu Alas, liga mós ba Fatuberliu, liga mós postu Same,”Xefe suku informa.

Tanba ne’e, xefe suku reprezenta komunidade husu ba Governu liuliu Sr. Ministru Obras Públikas hodi atende preokupasaun komunidade nian.

Komunidade iha suku Tutuluro dorante ne’e hetan defikuldade tebes ultrapasa mota refere ho transporte públiku ka privadu liuliu karreta ne’ebé laiha dalan seluk, tenke liuhosi mota-laran bainhira ba suku Tutuluro ou husi Tutuluro ba Same kapitál munisípiu Manufahi nian inklui postu administrativu sira seluk. Komunidade utiliza ponte tara hodi fasilita movimentu komunidade nian no ho motorizada, inklui estudante sira eskola iha Same vila.

#Media_MOP

Read More

KOMUNIDADE TUTULURO AGRADESE NO SENTE HANESAN MILAGRE, VIII GOVERNU, MOP-EDTL,EP DADA ELETRISIDADE BA TUTULURO NE’EBÉ TINAN BARAK TUUR NAKUKUN

TUTULURO, 30 NOVEMBRU 2021: S. Exa, Ministru Obras Públikas (MOP), Arq. Salvador Eugénio Soares dos Reis Pires, akompaña husi Prezidente Eletrisidade Timor-Leste Empreza Públika (EDTL,EP), Eng. Paulo da Silva hamutuk ho administradór munisípiu Manufahi, Sr. Arantes Isaac Sarmento, inklui autoridade sira seluk lansa projetu eletrifikasaun ba suku Tutuluro, postu administrative Same, munisípiu Manufahi.

Ministru Obras Públikas (MOP), Arq. Salvador Eugénio Soares dos Reis Pires, lansa projetu eletrifikasaun ba suku Tutuluro, postu administrative Same, munisípiu Manufahi. (Foto MOP).

“Lansamentu projetu ida-ne’e fasparte husi programa Governu nian ne’ebé komprometidu hakarak halo hotu projetu eletrifikasaun ba sira ne’ebé mak eletrisidade seidauk tama kuaze 76 sukus, i ba suku Manufahi ita halo ona iha suku Mindelu i ohin loron (30/11) hamutuk ho Administradór, Prezidente EDTL ho autoridade lokál sira ita mai lansa projetu liña eletrifikasaun ba suku Tutuluro husi aldeia Daor ba to’o Dalun hamutuk 5.3KM, ba média tensaun i baixa tensaun ne’e pruvolta 6.7KM i sei benefisia kliente kuaze 250. Ne’e ba kobertura aldeia 3, ba aldeia 4, Sr. Prezidente ho nia ekipa sira komprometidu para halo uluk levantamentu dadus kuandu projetu ne’e la’o bele halo expansaun ba iha aldeia sira seluk atu nune’e komunidade iha suku Tutuluro tomak bele asesu ba eletrisidade bainhira projetu ida ohin ita lansa ne’e kompleta,”Sr. Ministru Obras Públikas informa ba jornalista sira hafoin serimonia lansamentu projetu eletrifikasaun iha suku Tutuluro.

Sr. Ministru esplika, “Manufahi kuaze suku 17 mak seidauk asesu eletrisidade, rua ita lansa tiha ona halo ona lansamentu primeira pedra i konstrusaun la’o hela, ida Mindelu, ida mak ohin suku Tutuluro, agora restante ne’e iha ona prosesu balun ba tenderizasaun i restu ne’ebé ita la konsege halo tenderizasaun iha tinan ida-ne’e, EDTL sei loke tenderizasaun inísiu tinan oin, iha fulan-Janéiru ka Fevereiru ne’e ita lansa ba suku sira ne’ebé mak seidauk hetan projetu eletrifikasaun”.

Governu liuhosi Ministériu Obras Públikas liuliu EDTL,EP kontinua halo esforsu bazeia ba kompromisu VIII Governu Konstitusionál lideradu husi S. Exa, Primeiru Ministru, Jenerál Taur Matan Ruak, mak mandatu Governu ida-ne’e remata suku hotu tenke asesu ona eletrisidade. Kompromisu ne’e bele realiza tanba Governu reforma ona EDTL sai Empreza Públika ho autonomia finanseira, judisiál no administrativa hodi ezekuta projetu sira.

Iha intervensaun, Sr. Ministru husu apoiu autoridade lokál, komunidade inklui veteranus sira atu realiza projetu ne’e  ho di’ak no termina tuir tempu ne’ebé iha, nune’e komunidade bele asesu ona eletrisidade.

Sr. Ministru agradese mós ba esforsu tomak EDTL,EP nian kontinua ezekuta projetu eletrifikasaun ba suku sira ne’ebé seidauk asesu ba eletrisidade.

Xefe suku Tutuluro, Sr. Sebastião da Costa Hornai, konsidera serimonia lansamentu ba projetu eltrifikasaun iha suku refere hanesan milagre boot ida tanba durante tinan barak ona komunidade suku Tutuluro tuur iha nakukun laran no la senti ukun-an loloos. Tanba ne’e, xefe suku lori komunidade tomak Tutuluro nian agradese ba VIII Governu Konstitusionál, liuhosi Ministériu Obras Públikas, liuliu EDTL,EP ne’ebé konsege dada eletrisidade ba suku Tutuluro.

“Ita suku Tutuluro ohin hetan milagre boot ida tanba durante tinan barak ita halerik hela tanba ita Tutuluro ne’e seidauk senti saida mak ukun-an, ukun-an ne’e iha vila de’it mais ohin ita mós tama ona iha lista ida sente ukun-an, ne’ebé ha’u hanesan xefe suku Tutuluro ho povu tomak fó agradese ba VIII Governu Konstitusionál nia esforsu ne’ebé bele implementa projetu eletrisidade mai iha suku Tutuluro ne’e. Depois ami hakarak rekomenda hela Sr. Ministru Obras Públikas, ami Tutuluro nia aldeia 7, ami-nia totál xefe família iha 500 resin, ami-nia komunidade tomak iha rihun rua resin mais ahi ohin tama ona iha Tutuluro aldeia 3 mak asesu ona, aldeia 4 mak seidauk,” Xefe suku Tutuluro agradese.

Nune’e mós, Administradór munisípiu Manufahi, Sr. Arantes Isaac Sarmento, agradese ba VIII Governu Konstitusionál lideradu Jenerál Taur Matan Ruak, no Ministériu Obras Públikas ne’ebé iha kompromisu hasai povu husi nakukun ba naroman.

“Agradese ba Sr. Ministru Obras Públikas no mós agradese ba Sr. Primeiru Ministru VIII Governu, Jenerál maun Taur Matan Ruak, ne’ebé mak iha kompromisu boot tebes hakarak duni liberta povu ida-ne’e husi mukit no terus, husi nakukun ba naroman, tuir palavra da luta Liberta da Patria, Liberta do Povo, Liberta patria liberta tiha ona i ohin liberta povo ida-ne’e, hasai povu ida-ne’e husi susar no mukit sira ne’ebé iha, hanesan servidó povu iha munisípiu Manufahi, agradese tebes ba ida-ne’e. Ohin lansamentu ba projetu ne’e hanesan mós iha Turiskai,”Sr. Administradór agradese.

Sr. Administradór hatutan “Ida-ne’e marka história boot ida ba komunidade sira iha Tutuluro no mós história ida ba Manufahi, Domingu liubá ita komemora loron Komemorasaun Proklamasaun Independénsia 28 Novembru i ohin lansamentu eletrisidade ba komunidade sira, psinsípiu no valór ba independénsia ne’e mak ida-ne’e, Governu nia responsabilidade boot tebes ba povu, povu iha direitu atu asesu ba eletrisidade, povu iha direitu atu asesu ba estrada, povu iha direitu atu asesu ba bee-moos, povu iha direitu atu lori nia oan sira ba eskola, i povu iha direitu mós atu hetan no tratamentu saúde ne’ebé di’ak, ida-ne’e mak kompromisu Governu nian, ida-ne’e mak kompromisu servidór estadu nian perante ba povu ida-ne’e”.

Iha fatin hanesan, Prezidente EDTL,EP, Eng. Paulo da Silva, fó lia-menon ba komunidade suku Tutuluro tomak atu, kontribui no kopera ho kompañia hodi implementa projetu ho di’ak, kontrolu mós servisu kompañia nian.

“Ha’u husu na’in hira ajuda autoridade sira para kontrolu sira-nia servisu para garante nia kualidade, tanba EDTL hanesan empreza públika la’os ona Diresaun Jerál uluk, nia natureza la hanesan ona entaun ita garante nia kualidade, lais maibé tenke ho kualidade, lais depois liu fulan ida, fulan rua, airin namtati ne’e EDTL sei lakohi, tanba ida-ne’e ami sei husu ba autoridade lokál, komunidade atu ajuda EDTL kontrolu nia kualidade. Husu mós ba inan-aman, projetu ida-ne’e ita laiha verbas ba iha Gantrugi ka indiminizasaun, entaun ha’u husu para ajuda, koopera, see kona ita-nia nuu, haas sanak ruma ke sira hakrak tesi, ajuda mós iha ne’eba tanba ita laiha osan ba ida-ne’e,”Sr. Prezidente EDTL,EP ameno.

Bainhira projetu ne’e remata, Sr. Prezidente EDTL,EP hakarak Tutuluro sai ezemplu ba komunidade sira seluk hodi jere eletrisidade, no hafoin fulan rua ka tolu, tékniku EDTL sei halo vizita hikas ba Tutuluro hodi monta kontadór prepagu, tanba ne’e komunidade tenke koopera, tanba liuhosi monta kontadór ba kliente sira mak bele hatama hikas reseita hodi fornese mina ba sentrál eletrika Hera no Betano.

Projetu eletrifikasaun ba suku Tutuluro ne’e ezekuta husi kompañia Damenia Unipesoal. Lda durante fulan 4, ho orsamentu hamutuk $297, 686. 48.

#Media_MOP

Read More

MOP NO CCI-TL ASINA PROTOKOLU KOOPERASAUN BA SERTIFIKASAUN NO INSKRISAUN EMPREZA KONSTRUSAUN SIVÍL NO KONSULTÓRIA TÉKNIKA SIVÍL

DILI, 23 NOVEMBRU 2021: S. Exa, Ministru Obras Públikas (MOP), Arq. Salvador Eugénio Soares dos Reis Pires, no Prezidente Kámara Komérsiu Industria Timor-Leste (CCI-TL, sígla Portugés), Sr. Oscar Lima, iha Tersa-feira ne’e, iha Hotel Timor asina protokolu kooperasaun ba sertifikasaun no inskrisaun empreza konstrusaun sivíl no konsultoria téknika sivíl.

Ministru Obras Públikas (MOP), Arq. Salvador Eugénio Soares dos Reis Pires, no Prezidente Kámara Komérsiu Industria Timor-Leste (CCI-TL, sígla Portugés), Sr. Oscar Lima, iha Tersa-feira ne’e, iha Hotel Timor asina protokolu kooperasaun ba sertifikasaun no inskrisaun empreza konstrusaun sivíl no konsultoria téknika sivíl.(Foto MOP).

Protokolu kooperasaun ne’e asina bazeia ba primeira alterasaun ba Dekretu Lei nú. 27/2010, de 22 de Dezembru kona-ba Rejime Jurídiku ba Sertifikasaun no Inskrisaun ba Empreza Konstrusaun Sivíl no Konsultoria Téknika Sivíl, ne’ebé altera ho Dekretu Lei nú. 17/2021, de 22 de Setembru.

“Ita asina akordu implementasaun husi Dekretu Lei 17/2021 de 22 de Setembru ne’ebé halo primeiru alterasaun ba Dekretu Lei 27/2021 de 22 de Dezembru atu halo sertifikasaun no inskrisaun ba ita-nia impreza sira atu informa ba Governu di’ak liután kona-ba kapasidade finanseira, jestaun, ekipamentu no rekursu umanu husi ita-nia seitór privadu sira ne’ebé iha, agora akordu ne’e tama ho CCI-TL tanba sira mak hanesan mahon ba setór privadu hotu iha Timor-Leste, sira hamutuk ho Governu identifika sira-nia membru emprezariál sira ne’e hodi bele halo inskrisaun ida-ne’e. Aliende ida-ne’e, Dekretu Lei ida-ne’e mais importante ne’ebé signifikativu mak hasai tiha artigu ida iha artigu 7 iha Dekretu Lei ida primeiru ne’e, ne’ebé halo limitasaun ba setór privadu bele konkore de’it millaun $7.5, iha ne’eba limitasaun ne’e ita hasai tiha katak ba oin sira bele konkore liu ida-ne’e, laiha limitasaun,”Sr. Ministru Obras Públikas, informa ba jornalista sira iha Hotel Timor, hafoin asina akordu kooperasaun ho CCI-TL.

Sr. Ministru akresenta presiza mós halo reforma ba lei sira seluk hodi fasilita di’ak liután seitór privadu liuliu iha prosesu tenderizasaun no pagamentu ba emprezáriu sira, tanba durante ne’e, emprezáriu sira preokupa maka’as kona-ba pagamentu tarde, no situasaun ne’e akontese tanba prosesu burokrasia ne’ebé eziste iha Governu nia-laran.

“Klaru katak reforma lei sira seluk tenke halo, husi parte seluk karik Lei Jestaun Finanseira, Lei Aprovizionamentu, ne’ebé parte ami-nian halo hela advokasia ho Ministériu Finansas no mós ha’u enkoraja Sr. Prezidente CCI-TL ho ekipa tomak para atu halo aprosimasaun ho ministériu relevante seluk, para bele toma inisiativa reforma sira ne’e, para bele fasilita liután ita-nia seitór privadu, tanba ita-boot sira hatene katak Governu hotu-hotu nia vizaun hakarak lori dezenvolvimentu i atu realiza dezenvolvimentu ne’e la’os parte Governu mesak de’it, tenke iha parseiru i parseiru ne’ebé di’ak mak seitór privadu tanba sira mak sai hanesan ezekutadór husi planu dezenvolvimentu ne’ebé Governu halo, maibé ita dehan burokrasia, ita-nia negósiu ambiente ladi’ak buat sira ne’e hotu sei la ajuda, tulun ita-nia seitór privadu sira para dezenvolve, entaun ohin ne’e faz parte husi reforma ida ne’ebé ita presiza halo, ne’ebé hasai tiha limitasaun ne’ebé uluk ita tau hela ba ita-nia setór privadu sira, atu loke dalan ba sira atu partisipa liu efetivamente ou ativu liután iha ita-nia prosesu dezenvolvimentu nasionál,”Sr. Ministru esplika.

Iha intervensaun, Sr. Ministru afirma katak hanesan Ministru Obras Públikas ezekuta de’it polítika VIII Governu Konstitusionál nian, bainhira atu promove projetu liuliu kategoria emerjénsia tuir Lei Aprovizionamentu liuliu iha artigu 92, 94 tenke iha justifikasaun téknika para atu justifika de’it nia aktu hasai kontratu sira ne’e, tanba ne’e atu labele fó risku ba seitór privadu sira mak projetu emerjénsia hotu hanesan inundasaun iha 13 Marsu tinan 2020 no 4 Abril tinan 2021 ne’e Governu fó siguransa kontratuál ba empreza depois ezekuta projetu sira.

“Ha’u sempre hatete iha dia 13 de Marsu iha 2020 nian bainhira atribui, fó ordem de traballu ba emprezáriu sira ne’ebé atu ezekuta projetu emerjénsia iha tempu ne’eba, atu hatete katak Governu nia papél mak tenke fó seguransa, servisu kontratuál ba emprezáriu, ami labele husik hela ita-boot sira iha kondisaun ida, haruka ita-boot sira promove tiha obra depois la fornese seguransa kontratuál ba ita-boot sira. Projetu emerjénsia 13 Marsu ita halo iha tempu badak, fulan 6, iha tempu ne’eba to’o agora laiha problema kontratuál ho projetu sira ne’ebé mak Governu ne’e ho nia vizaun hakarak promove, i hanesan mós 4 Abril agora ekipa Task Force hala’o hela, espera katak projetu sira ne’ebé ita promove ne’e fó siguransa kontratuál ba seitór privadu sira, labele fó fali risku finanseira ba ita-boot sira, depois lori fali loss ka kerugian ba ita-boot sira, entaun Governu ida-ne’e boa fee”,Sr. Ministru afirma.

KONA-BA PROJETU 143

Sr. Ministru hatete “Dala-barak ha’u hasoru ita-boot sira ha’u moe, ha’u triste oituan ho situasaun sira ne’ebé mak ita hasoru hanesan projetu 143, no seluk tan ne’ebé bainhira VIII Governu tama mai muda polítika ita-boot sira ne’ebé mak iha obra ou promove ona maibé seidauk iha kontratu hetan defikuldades para atu hetan prosesu pagamentu. VIII Governu lideradu husi S. Exa, Primeiru Ministru, Sr. Taur Matan Ruak, nia hanoin katak ita tenke promove projetu bazeia ba ita-nia lei, no Maun Boot Xanana kuaze tinan 10 kapitaliza ona ita-nia seitór privadu”.

Tanba ne’e, Sr. Ministru esklarese katak, dala-barak Parlamentu Nasionál no seitór privadu sira sempre husu kona-ba projetu 143 maibé hanesan ministru ezekuta de’it polítika VIII Governu Konstitusionál nian.

CCI-TL AGRADESE EMPREZA NASIONÁL KONKORE BA PROJETU LAIHA LIMITASAUN

Iha fatin hanesan, Prezidente CCI-TL, Sr. Oscar Lima, reprezenta emprezáriu tomak agradese ba VIII Governu Konstitusionál lideradu husi S. Exa, Primeiru Ministru (PM), Jenerál Taur Matan Ruak, liuliu ba Sr. Ministru Obras Públikas ne’ebé halo esforsu halo ba alterasaun Dekretu Lei 17/2021 husi Dekretu Lei 27/2010 nian ne’ebé lemite partisipasaun seitór privadu iha projetu boot sira, maibé ho alterasaun ne’e bele fó oportunidade atu empreza nasionál mós bele konkore iha projetu boot sira.

“Governu ne’ebé lidera husi Jenerál Taur Matan Ruak, ami-nia obrigadu boot teb-tebes i Sr. Ministru favór hato’o hela ba Sr. Primeiru Ministru katak ami kontenti tanba a partir ohin Timoroan sira atu hakarak ka lakohi sira sei hetan oportunidade i sira sei la haluha atu halo investimentu iha sira-nia rain ida-ne’e. Ami-nia agradesimentu boot teb-tebes ne’ebé ami hakarak fó ba ita-boot i momentu ida-ne’e, prezensa loron ida ohin ne’e importante tebtebes, loron ida ohin ne’e sente katak foun ida ba ami, enkontru ida ohin ne’e ita hatete loloos katak ne’e buat ida ne’ebé ami ejiji tempu naruk tebes ona dezde IV Governu Konstitusionál, iha momentu ne’eba ha’u-nia kolega Julio Alfaro mak Prezidente Kámara Komérsiu Industria mais ami la konsege, tuir mai Primeiru Ministru hira, komesa husi Maun Boot Kay Rala Xanana Gusmão, Dr. Mari ALkatiri, Dr. Rui Maria de Araujo, ikus mai Jenerál Taur Matan Ruak, iha tempu ida-ne’e Jenerál Taur Matan Ruak mak ita konsege realiza, Ami hakarak hatete de’it ba Exelénsia, buat ne’e la la’o mesak, tanba ita-boot nia sensebilidade, tanba ita-boot mós uluk hanesan emprezáriu ida”, Sr. Prezidente CCI-TL hato’o iha intervensaun.

PSr. Prezidente CCI-TL hatutan “Primeira ves mak Governu iha konfiansa ba setór privadu nasionál, ida-ne’e CCI-TL kontenti tebes, ami mós hatene katak konfiansa ne’ebé ita-boot sira fó mai ami la’os tanba hanoin ami maibé tanba ami mós merese ona, ita setór privadu nasionál merese ona hetan fatin ida-ne’e, tanba barak tebes hatudu iha tereñu hatudu katak seitór privadu nasionál, emprezáriu timoroan barak teb-tebes iha ona kapasidade para atu ezekuta orsamentu barak liu millaun $20 mós sira barak bele ona, tanba ne’e ami hatene katak merese para hetan ida-ne’e, maibé ita-boot la halo esforsu mós ami la hetan nein serteza”.

Alterasaun Dekretu Lei ne’e bele fó oportunidade ba emprezáriu nasionál hodi ezekuta projetu sein iha limite, nune’e osan bele sirkula de’it iha timor. Maske nune’e, atu ezekuta projetu sira, Prezidente CCI-TL husu “Ba emprezáriu nasionál sira atu prepara ekipemantu, prepara tékniku, servisu ho responsabilidade para bele hatudu ita-nia kbi’it para bele dehan ita bele duni, selae ita tau pozisaun Ministru Obras Públikas iha problema nia-laran”.

Prezidente CCI-TL mós husu ba estrutura CCI-TL iha munisípiu sira atu koopera ho Ministériu Obras Públikas para halo levantamentu dadus ne’ebé feitu, fó informasaun ne’ebé klaru loloos para atu halo sertifikasaun no inskrisaun ba empreza nasionál sira.

Nune’e mós Diretór Jerál Administrasaun Finansas (DJAF) Ministériu Obras Públikas nian, Sr. Januário Aparício Barbosa, asinatura protokolu kooperasaun ne’e pasu importante ne’ebé instituisaun estadu halo ho seitór privadu hodi hametin kooperasaun no parseria hodi hametin kualidade dezenvolvimentu iha seitór infraestrutura liuliu ho servisu obras públikas nian.

Antes ne’e, bazeia ba Dekretu Lei 27/2021 nian, Ministériu Obras Públikas halo ona sertifikasaun ba kompañia sira, no rezultadu husi ezersisiu ne’e Ministériu Obras Públikas konsege emiti sertifikadu ba kompañia konstrusaun sivíl hamutuk 600, iha sertifkasaun ne’e iha kualifikasaun A, B1, B2, no klasifikasaun C. Esforsu maka’as ne’e ein felizmente sertifikadu sira ne’e kaduka tiha iha 2015, depois de prosesu revogasaun labele halo tanba sistema perturba hela, mezmu nune’e ezersísiu anteriór nafatin halo hanesan esperiénsia hodi halo sistema sustentável iha futuru.

“Ita koko no reativa fila-fali sistema i ita halo mudansa tanba ne’e, iha tinan ida-ne’e Governu halo primeiru alterasaun tuir Dekretu Lei nú 17/2021 de 22 de Setembru husi alterasaun dahuluk Dekretu Lei nú 27/2010, 22 de Dezembru, ida-ne’e hanesan gia ita para fó apoiu ba implementasaun ba Dekretu Lei refere, no mós manutensaun ba sistema sertifikasaun oras ne’e estabelesidu fali ona katak depois de asina protokolu ba sertifikasaun ita sei servisu hamutuk di’ak liután hodi bele fó rezistu ba kompañia sira ne’ebé eziste iha Timor-Leste,”Sr. Diretór DJAF informa.

Sr. Diretór hatutan “Tuir planu ekipa tékniku Ministériu Obras Públikas sei koordena ho CCI-TL iha munisípiu 13 hodi halo sosializasaun ba Dekretu Lei nú 17/2021 de 22 de Setembru, tuir kedas ida-ne’e ita sei halo inskrisaun ba kompañia sira no prosesu ba iha verifikasaun para ita bele haree sertifikasaun ba iha kompañia sira hotu, espera katak iha tempu besik sistema sertifikasaun bele efetivu liután iha tinan 2022, atu nune’e servisu hamutuk entre Ministériu Obras Públikas no CCI-TL mak ohin ita hamutuk iha fatin ida-ne’e hodi asiste hamutuk S. Exa, Ministru Obras Públikas no Exelentísimu Prezidente CCI-TL asina protokolu de kooperasaun kona-ba sertifikasaun no inskrisaun ba iha empreza konstrusaun sivíl no konsultoria sivíl sira hotu”.

Serimonia asinatura ba protokolu kooperasaun partisipa husi Diretór Ajénsia Dezenvolvimentu Nasionál (AND), Sr. Renato Mariano Monteiro da Cruz, ne’ebé reprezenta S. Exa, Vise Primeiru Ministru no Ministru Planu Ordenamentu (V-PM no MPO), Sr. José Reis, Diretór Banku Nasionál Komérsiu Timor-Leste (BNCTL, sígla Portugés), Sr. Brigidio Sousa, Reprezentante husi Organizasaun Internasionál Traballu (ILO, sígla Inlgés), Prezidente instituisaun autónomu tutela ba Ministériu Obras Públikas, estrutura CCI-TL nasionál to’o munisípiu, inklui konvidadu sira seluk.

#Media_MOP

Read More

MOP HALO INSPESAUN BA PROJETU ESTRADA NASIONÁL MAUBARA-LOES NO ATABAE-BATUGADE, ATINJI ONA 94.5%

MAUBARA, 16 NOVEMBRU 2021: S. Exa, Ministru Obras Públikas (MOP), Arq. Salvador Eugénio Soares dos Reis Pires, akompaña husi Manajer Unidade Manajementu Projetu (PMU, sígla Ingés) estrada, Sr. Sidónio da Costa Freitas, halo inspesaun ba projetu konstrusaun estrada nasionál husi Tibar to’o Likisa, husi Maubara-Karimbala to’o Loes munisípiu Likisa nian no husi Atanae-Batugade postu administrativu Balibo, munisípiu Bobonaro.

Ministru Obras Públikas (MOP), Arq. Salvador Eugénio Soares dos Reis Pires, akompaña husi Manajer Unidade Manajementu Projetu (PMU, sígla Ingés) estrada, Sr. Sidónio da Costa Freitas, halo inspesaun ba projetu konstrusaun estrada nasionál husi Tibar to’o Likisa, husi Maubara-Karimbala to’o Loes munisípiu Likisa nian no husi Atanae-Batugade postu administrativu Balibo, munisípiu Bobonaro. (Foto MOP).

Projetu Melloramentu no Manutensaun husi Maubara-Karimbala nian no husi Atabae-Batugade ho distánsia Kilometru 37.8 (37.8KM).

“Ha’u ohin ho manejer PMU ba projetu impréstimu mai halo inspesaun oituan tanba projetu sira ne’e kuaze atu hotu ona liuliu mak husi Tasi-Tolu mai Tibar haree oituan danus balun ne’ebé mak akontese tanba kalamidade ne’ebé sira tenke halo retensaun molok  projetu ne’e remata ka entrega ba Governu, Ha’u hakarak PMU asegura lai reparasaun ba danus sira ne’e i asegura mós kualidade, halo inspesaun, hanesan mós mai Maubara-Atabae, Atabae-Batugade kuaze atu hotu ona, ita-boot sira haree iha seksaun ida-ne’e nia prosesu atinji ona 94.5% hela de’it oituan ona atu kompleta, entaun nia objetivu mak mai ko’alia ho sira kona-ba alterasaun sira ne’ebé mak sira tenke halo. Iha fatin rai halai sira ne’e sira tenke halo ajustamentu, sira tenke ko’a fali foho ne’e, ha’u mós husu ba sira tenke buka planu mitigasaun ne’e kontekstualizadu ho estrutura rai nian para asegura katak bainhira projetu ne’e entrega, projetu ne’e entrega ho kualidade i fasilita duni ita-nia atividade ekonómiku, tuir ita-nia vizaun ba investimentu iha jestaun estrada ninian. Projetu ne’e pruvolta 37.8KM, ho orsamentu impréstimu husi ADB,”Sr. Ministru informa ba jornalista sira iha Karimbala, postu administrativu Maubara, munisípiu Likisa hafoin halo inspesaun ba konstrusaun estrada iha fatin refere.

Sr. Ministru hatutan “Ha’u husu ba sira atu haree didi’ak, balun hanesan kalamidade rai halai liuliu iha Karimbala nian atu sira buka solusaun ida ne’ebé kontekstualizadu, kona duni ba estrutura rai ne’e, atu nune’e, bainhira ita halo ona konstrusaun mitiga, erojaun ida-ne’e labele akontese tan tuir mai, ne’e atu asegura de’it katak molok projetu ne’e entrega ba Governu, sira haree duni buat ki’ikoan sira ne’e hodi asegura katak sira kompleta hotu estragus sira ki’ikoan sira ne’ebé mak iha ou potensialidade ne’ebé mak sira presiza hadi’a ne’e tenke hadi’a komplementamente, atu nune’e entrega mai ita entrega ho kualidade duni, laiha problema ruma”.

Iha inspesaun ne’e atu asegura katak iha estragus balun ne’ebé mak kompañia konstrutór presiza hadi’ak tenke hadi’ak tuir dezeñu no espesifikasaun ne’ebé mak iha, atu nune’e antes projetu ne’e entrega ba Governu tenke entrega ho kualidade.

“Ita hatete ba sira katak kualidade ne’e importante tanba Governu investe osan barak liuliu husi impréstimu liuhosi ita-nia parseiru dezenvolvimentu sira, banku sira i ita presiza retornu husi investimentu ne’e, retornu ne’e mak dalan tenke kualidade depois fasilita fali ita-nia dezenvolvimentu ekonómiku”, Sr. Ministru orienta.

Daudauk ne’e kompañia halo ona reparasaun ba estragus sira ne’ebé iha liuliu husi Maubara to’o Loes nian, aliende ne’e, iha mós seksaun ki’ikoan-ki’ikoan hanesan iha Tasi-Tolu to’o Tibar nian iha foho sorin rai halai no Sr. Ministru orienta atu kompañia tenke buka solusaun, aumezmu tempu halo mós estudu buka hatene kualidade estrutura rai, nune’e, bainhira fó solusaun tenke ho solusaun ida ne’ebé responde duni ba kondisaun rai nian.

Iha prosesu inspesaun ne’e, kompañia sira promete sei halo esforsu hodi garante kualidade ne’ebé di’ak liuliu halo melloramentu no manutensaun ba estragus sira ne’ebé iha.

Projetu Melloramentu no Manutensaun estrada Maubara-Loes no Atabae-Batugade ne’e ho montante orsamentu $20,748,566.21 ho fundu impréstimu Banku Dezenvolvimentu Aziátiku (ADB, sígla Ingés). Projetu ne’e konstrui husi kompañia internasionál CBMIConst/Chongqing Road Engineering (Group Co.,Ltd, no hetan superviziona husi kompañia DONGSUNG ENGINEERING CO.,LTD. servisu hamutuk (Joint Venture) ho Dong Il ENGINEERING CONSULTANS CO.,LTD no asosiasaun ho kompañia KAI WATU KMANEK,CONSULTANT.

#Media_MOP

Read More

MOP ASINA AKORDU SUBSIDIÁRIU MILLAUN $4 HUSI GOVERNU AUSTRÁLIA, HADI’A SISTEMA KANALIZASAUN BEE-MOOS NE’EBÉ HETAN ESTRAGUS IHA KALAMIDADE 4 ABRIL

DILI, 11 NOVEMBRU 2021: S. Exa, Ministru Obras Públikas (MOP), Arq. Salvador Eugénio Soares dos Reis Pires, no Embaixadór Austrália mai Timor-Leste, Sr. Peter Roberts, akompaña husi Prezidente Bee Timor-Leste Empreza Públika (BTL.EP), Sr. Carlos Peloi dos Reis, asina akordu subsidiáriu millaun 4$ Dollar Austrália husi Governu Austrália ba hadi’a sistema kanalizasaun bee-moos ne’ebé hetan estragus iha kalamidade 4 fulan-Abril tinan 2021 liubá.

Ministru Obras Públikas (MOP), Arq. Salvador Eugénio Soares dos Reis Pires, no Embaixadór Austrália mai Timor-Leste, Sr. Peter Roberts, akompaña husi Prezidente Bee Timor-Leste Empreza Públika (BTL.EP), Sr. Carlos Peloi dos Reis, asina akordu subsidiáriu millaun 4$ Dollar Austrália husi Governu Austrália. (Foto MOP)

 “Asisténsia Subsidiáriu ne’ebé Austrália fornese ba Governu Timor-Leste liuhosi Ministériu Obras Públikas liuliu BTL.EP ho osan valór millaun $ 4 Dollar Austrália, ho objetivu atu ajuda BTL.EP hadi’a sistema bee-moos ne’ebé hetan estragus iha kalamidade 4 Abril 2021 liubá. Sistema bee rua ne’ebé hetan sofre maka’as maka bee-moos tohu meta, ida fali tan mak Lakoto Mutudare, entaun osan millaun $4 Dollares Austrália ne’e BTL uza para atu halo reparasaun,”Sr. Ministru informa ba jornalista sira hafoin asina akordu subsidiáriu ne’e iha Novu Turizmu, Dili.

Sr. Ministru hatutan “Aliende ne’e, sira fó mós asisténsia téknika atraves PARTISIPA, sira nia programa ida husi Embaixada Austrália fó asisténsia téknika, ho enjinéiru sira no seluk tan i ajuda ekipa BTL atu halo planu mitigasaun. Ho osan no asisténsia téknika ne’e espera katak fó tulun BTL halo reparasaun lalais atu nune’e bele fornese bee-moos ba ita-nia komunidade liuliu hirak ne’ebé halo ligasaun ba sistema bee-moos rua ne’e. Ohin ha’u mós husu katak see bele ita expanda tan programa ne’e ba oin iha futuru ho Governu Austrália. Ita-boot hatene katak Governu Austrália ba área infraestrutura bázikas sira mak sai hanesan parseiru ida boot tebes ho Governu Timor-Leste atraves Ministériu Obras Públikas”.

Implementasaun husi programa ne’e sei hala’o hafoin planu mitigasaun ne’ebé ekipa hala’o hela, nune’e emidiatamente sei implementa programa ne’e hodi garante fornesimentu bee-moos ba komunidade.

Intervensaun Sr. Ministru nian iha serimonia asinatura subsidiáriu ne’e agradese ba Governu Austrália ne’ebé durante ne’e sai parseiru ida boot liu ba Governu Timor-Leste liuliu iha área fornesimentu infraestrutura bázikas hanesan iha bee-moos.

Embaixadór Austrália mai Timor-Leste, Sr. Peter Roberts, aifrma “Programa ne’e ho objetivu atu responde ba nesesidade urjenti no emidiata fó kontinuasaun ba sistema bee-moos iha Dili, programa ida-ne’e sei inklui servisu emerjénsia hanesan hadi’a lalais liña distribuisaun ne’ebé att no instalasaun ba fontes bee atu nune’e uma kain sira bele asesu ba bee-moos lalais, rekoperasaun iha tempu médiu nian, hamoos no dezenvolve liña distribuisaun foun hodi satan tempu udan tuir mai ne’e no rekoperasaun iha tempu naruk nian apoiu Bee Timor-Leste dezenvolve planu transmisaun bee iha tempu naruk nian ba tinan 50 tuir mai ne’ebé iha estudu”.

Austrália kontinua kompromete sira-nia apoiu ba infraestrutura bázika liuliu iha área bee-moos ne’ebé liga direita ba populasaun nia moris.

Iha fatin hanesan, Prezidente BTL.EP, Sr. Carlos Peloi dos Reis, informa katak sistema kanalizasaun bee-moos hetan estragus iha kalamidade 4 Abril liubá ne’e defisil tebes no lori tempu barak mak bele hadi’a hodi normaliza fornesimentu bee-moos ba komunidade.

Serimonia asinatura asiste husi ekipa programa PARTISIPA, Prezidente Autoridade Nasionál Água no Saneamentu Institutu Públiku (ANAS.IP), Sr. Domingos Pinto, diretór sira husi BTL.IP inklui enijéiru sira.

#Media_MOP

Read More

MOP ABERTURA SEMINÁRIU DAHULU ANE,IP KONA-BA POTÉNSIA ENÉRJIA SOLÁR IHA TIMOR-LESTE NO ESBOSU DEKRETU LEI ENÉRJIA RENOVÁVEL

DILI, 11 NOVEMBRU 2021: S. Exa, Ministru Obras Públikas (MOP), Arq. Salvador Eugénio Soares dos Reis Pires, iha Kinta-feira ne’e halo abertura ba semináriu dahuluk husi Autoridade Nasionál Eletrisidade Institutu Públiku (ANE,IP) kona-ba Poténsia Enérjia Solár iha Timor-Leste no Esbosu Dekretu Lei Enérjia Renovável, ne’ebé hala’o iha Novu Turizmu, Dili.

Ministru Obras Públikas (MOP), Arq. Salvador Eugénio Soares dos Reis Pires, hato’o hela nia intervensaun iha semináriu dahuluk ANE.IP kona-ba Poténsia Enérjia Solár iha Timor-Leste no Esbosu Dekretu Lei Enérjia Renovável, ne’ebé hala’o iha Novu Turizmu, Dili. (Foto MOP).

Semináriu ne’e ho tema “Promove no Asegura Sustentabilidade Enérjia Renovável” ho sub-tema rua mak “Poténsia Enérjia Solár iha Timor-Leste no Esbosu Dekretu Lei Enérjia Renovável”.

“Semináriu ohin ne’e kona-ba estudu potensialidade ba enérjia renovável no ko’alia mós esbosu Dekretu Lei ba investimentu enérjia renovável ne’ebé ANE,IP mak hala’o. Ne’e sei iha faze konsultasaun ho objetivu katak depois de konsultasaun husi estudu ne’e rasik ita  bele prodús dokumentu ofisiál ne’ebé autoridade prodús para bele informa ba Governu tantu Governu ida-ne’e no Governu iha futuru kona-ba poténsialidade ne’ebé mak iha. Aliende ne’e, papél husi autoridade nasionál ne’e para atu fiskaliza kualker investimentu ne’ebé Governu hala’o liuhosi EDTL,EP no mós investimantu sira ne’ebé mak seitór privadu sira pretende atu halo liuliu liga ba investimentu liuhosi sistema produsaun enérjia renovável sira, entaun, see laiha kondisaun sira hanesan estudu sira agora halo!, tanba estudu uluk ita halo iha Planu Estratéjiku Dezenvolvimentu Nasionál (PEDN) ne’e hatete katak potensialidade Timor-Leste nian 22MW de’it i foin daudauk sira halo fali ita-nia potensialidade kuaze 5000MW, entaun ida-ne’e mak ohin sira mai ho parte relevante hotu para ita bele haree ida-ne’e,”Sr. Ministru informa ba jornalista sira hafoin halo abertura ba semináriu ne’e iha Novu Turizmu.

Sr. Ministru hatutan “Governu mós prepara hela, Ministériu Finansas ho Banku Dezenvolvimentu Aziátiku (ADB) ba investimentu 100MW solar panel, see ita halo investimentu, iha ne’eba ita sei hamenus kustu produsaun no aban bainrua kustu produsaun menus ona, di’ak ba ita–nia atividade ekonómiku liuliu ba ita-nia seitór privadu sira ne’ebé halo investimentu, tanba ita-boot sira hatene katak maneira produsaun ho gajoel ne’e kuaze 35 to’o 50 centavus kada KW/H ne’e depende ba mós merkadoria hanesan mina nia presu, see nia tuun ita-nia produsaun tuun, nia sa’e ita-nia produsaun mós sa’e i ida-ne’e ladún sustentável, tanba ne’e mak ita halo maneira oioin prepara hela kondisaun husi estudu sira ne’e para Governu ida-ne’e ka Governu oin mai bele uza hanesan dadus para halo desizaun polítika ba investimentu iha setór enérjia liuliu enérjia renovável”.

Intervensaun Sr. Ministru nian iha abertura parabeniza ANE.IP ne’ebé esforsu hala’o estudu para oinsá sai mata-dalan ba Governu halo investimentu iha área enérjia renovável.

“Ha’u hakarak parabeniza Sr. Prezidente ANE,IP ba loron históriku ida-ne’e primeira ves hala’o semináriu ho tema Promove no Asegura Sustentabilidade Enérjia Renovável setór eletrisidade, ne’ebé ko’alia kona-ba potensidade enérjia solár iha Timor-Leste no esbosu dekretu lei ba investimentu enérjia renovável ne’e rasik”, Sr. Ministru fó parabéns.

Iha oportunidade ne’e, Sr. Ministru partilla mós ba partisipantes hotu kona-ba objetivu Governu nian ba forma instituisaun ANE,IP no oinsá mak kontribui ba vizaun jerál Governu nian. Iha PEDN, Governu hakarak lori ben-star ba povu liuhosi investimentu infraestrutura bázika sira, ida mak infraestrutura bázika iha enérjia eletrisidade. Husi Governu anteriór kedas halo investimentu lubuk ida liga produsaun, transmisaun no distribuisaun enérjia eletrisidade.

Sr. Ministru afirma “VIII Governu Konstitusionál lideradu husi S. Exa, Primeiru Ministru, Sr. Taur Matan Ruak, kontinua kompromete katak kontinua programa ne’e, i ita-boot sira hatene katak projetu investimentu sira ne’e ita hala’o tiha ona, ita hakarak oinsá mak iha instituisaun ida ou iha sistema ka mekanízmu ne’ebé bele iha autonomia administrative judisiál, autonomia finanseira para bele jere ita-nia infraestrutura ne’e rasik, ho autoridade hanesan ANE,IP para bele superviziona, fiskaliza i asegura katak fornesimentu infraestrutura bázikas liuliu enérjia eletrisidade ne’e to’o duni iha kualidade ida ne’ebé mak ita mehi”.

Ikus liu, Sr. Ministru deseja susesu iha semináriu ne’e ho tema “Promove no Asegura Sustentabilidade Enérjia Renovável” ho sub-tema rua mak “Poténsia Enérjia Solár iha Timor-Leste no Esbosu Dekretu Lei Enérjia Renovável” hodi prodús dokumentus ne’ebé bele fornese ba Governu hodi halo investimentu iha enérjia renovável.

Iha fatin hanesan, Prezidente ANE,IP, Eng. Ruben Jerónimo Freitas, hatete “Iha posibilidade ba seitór privadu sira hodi investe iha setór eletrisidade liuliu investimentu iha área enérjia renovável ninian, partisipasaun husi setír privadu sira-nian iha seitór eletrisidade ba área renovável ninian bele ajuda hodi redús kustu produsaun nian ne’ebé sei afeita mós ba iha redusaun tarefa eletrisidade no mós alivia dependénsia ba iha kombustíveis husi produsaun enérjia ninian”.

Prezidente ANE.IP afirma, iha semináriu ne’e, aliende partilla rezultadu estudu kona-ba poténsia solár iha rai-laran ANE.IP mós prepara esbosu lei inísiu kona-ba enérjia renováveis nian ne’ebé distribui ona mós ba iha instituisaun relevante sira.

Semináriu ne’e partisipa husi reprezentante Ministru Petróliu no Rekursu Minerais (MPRM), Prezidente EDTL,EP, Eng. Paulo da Silva, Prezidente Autoridade Nasionál Água no Saneamentu (ANAS), Sr. Domingos Pinto, inklui Diretór Jernál no Nasionál sira, reprezentante husi instituisaun interesadu sira liga ho setór enérjia nian.

Oradór sira iha semináriu ne’e mai husi Autoridade Nasionál Lisensa Ambientál (ANLA), Kámara Komérsiu Industria Timor-Leste (CCI-TL, sígla Portugés), SERVE,IP, no TRADE INVEST no partisipantes hotu iha semináriu ne’e.

#Media_MOP

Read More

MOP ENKORAJA KOMUNIDADE ATABAE TENKE VASINA

ATABAE, 08 NOVEMBRU 2021: S. Exa, Ministru Obras Públikas (MOP), Arq. Salvador Eugénio Soares dos Reis Pires, enkoraja komunidade suku Atabae, postu administrative Atabae, munisípiu Bobonaro atu partisipa iha kampaña vasinasaun para tenke vasina hodi proteze-an husi surtu Dovid-19.

“Apa-ama sira eletrisidade tama mais imi tenke salva imi-nia vid alai, selae eletrisidade tama tiha see mak atu uza, imi hetan susar hotu tiha halo nusa, ne’ebé hotu tiha lansamentu ne’e, see mak seidauk vasina ba vasina lai, importante mak salva vida, vida kuandu laiha ona eletrisidade mós la importante ona,” Sr. Ministru Obras Públikas, hato’o iha ámbitu lansamentu projetu eletrifikasaun hodi dada eletrisidade husi aldeia Haelesu to’o Nunudoi, suku Atabae, postu administrativu Atabae, munisípiu Bobonaro.

Sr. Ministru husu komunidade tenke vasina liuliu inan-aman sira ne’ebé seidauk vasina tenke vasina hodi nune’e aumenta imunidade hodi proze-an husi Covid-19.

Hafoin lansamentu projetu eletrifikasaun ne’e, Sr. Ministru asisti komunidade simu vasinasaun hodi hasa’e imunidade kontra Covid-19 iha suku refere.

#Media_MOP

Read More

KOMUNIDADE KONTENTE MOP-EDTL DADA ELETRISIDADE BA KOMUNIDADE ALDEIA HAELESU-NUNUDOI

ATABAE, 08 NOVEMBRU 2021: Komunidade suku Atabae, postu administrativu Atabae, munisípiu Bobonaro sente kontete tanba Ministériu Obras Públikas (MOP) liuhosi Eletrisidade Timor-Leste Empreza Públika (EDTL,E.P) bele lansa ona projetu eletrifikasaun hodi dada eletrisidade ba komunidade sira husi aldeia Haelesu ba to’o Nunudoi.

Ministru Obras Públikas (MOP), Arq. Salvador Eugénio Soares dos Reis Pires, hato’o nia intervensaun iha lansamentu projetu eletrifikasaun iha suku Atabae, postu administrativu Atabae, munisípiu Bobonaro. (Foto MOP)

“Ami sente kontente tebes tanba foin primeira ves, ukun-an tinan 20 resin ona foin mak atu asesu ba eletrisidade,” Xefe Aldeia Madebau, Sra. Ángela Fontes Reis, informa ba jornalista sira iha suku Atabae, hafoin serimonia lansamentu projetu eletrifikasaun iha área refere.

S. Exa, Ministru Obras Públikas (MOP), Arq. Salvador Eugénio Soares dos Reis Pires, informa katak lansamentu projetu ne’e hanesan esforsu Governu nian kona-ba programa eletrifikasaun nasionál ba suku sira ne’ebé seidauk asesu ba eletrisidade, ho metas ida katak to’o iha tinan 2023 komunidade bele husi suku hotu bele asesu ona eletrisidade iha teritóriu nasionál.

“Ida-ne’e pasparte husi programa eletrifikasaun nasionál husi 76 sukus ne’ebé mak seidauk asesu eletrisidade atraves EDTl,E.P ita esforsu tenta kompleta tiha no EDTL fó sai ona ba seguda ves pakote 78 pakote kobre 55 sukus, no restante suku 21 iha faze planeamentu ne’ebé tuir sira-nia planu sei promove iha 2022, entaun ida-ne’e mak ita halo, ita tárzetu ita halo uluk ba suku sira depois kontinua ba aldeia sira ne’ebé mak apezar sira-nia suku tama ona maibé aldeia seidauk hetan asesu ba eletrisidade, atu nune’e tuir ita-nia meta to’o 2023 ita bele halo hotu ona fornesimentu liña eletrisidade ba suku sira iha teirtóriu tomak. Ohin ha’u hamutuk ho Prezidente EDTL ho ekipa, reprezentante autoridade munisípiu, autoridade lokál no komunidade sira lansa projetu iha suku Atabae Lama, husi aldeia Hailesu ba Nunudoi, ne’e ba faze ida primeiru, Haelesu ba Fatubesi no pruvolta 7.8KM, ne’e sei benefisia kliente hamutuk 160 komunidade, espera katak ho programa ida-ne’e laiha impedimentu ruma, laiha dezafiu ruma iha tereñu, nune’e ita tempu badak komunidade bele asesu eletrisidade,”Sr. Ministru Obras Públikas, informa ba jornalista sira iha suku Atabae Lama, hafoin lansamentu projetu eletrifikasasaun iha suku refere.

Iha intervensaun Sr. Ministru husu hato’o “Ha’u mai lori Governu sentrál nia naran liuliu VIII Governu nian lideradu husi S. Exa, Primeiru Ministru, Jenerál Taur Matan Ruak, ida-ne’e prioridade VIII Governu nian hatudu katak ita-nia Primeiru Ministru hadomi ita-nia povu sira, nia hakarak prioritiza liu mak infraestrutura bázikas atu povu bele asesu ba infraestrutura bázika, ohin realmente nesesidade ba eletrisidade ita mai lansa, S. Exa, Primeiru Ministru hatene katak 70% husi ita-nia populasaun ne’ebé konstrui ita-nia rai kuaze hela iha área rurais, iha tinan barak ona apa-ama sira, naan feton sira imi ejiji loos dezenvolvimentu tama iha ita-nia suku, ohin dehan husi suku Haelesu ba to’o aldeia Fatubesi, la’os ne’e de’it maibé sei extende to’o Nunudoe iha Atabae Lama”.

Iha intervensaun Sr. Ministru husu ba autoridade lokál,  veteranu no komunidade tomak atu apoiu no kontribui nune’e kompañia bele realiza projetu eletrifikasaun ne’e tuir tempu ne’ebé iha.

Sr. Ministru mós agradese ba esforsu husi EDTL hodi realiza projetu eletrifikasaun iha teritóriu nasionál inklui iha suku Atabae Lama hodi fornese enérjia eletrisidade ba komunidade.

Iha fatin hanesan, Prezidente EDTL,E.P, Eng. Paulo da Silva, fó parabéns ba komunidade sira ne’ebé bele hetan oportunidade hodi asesu ba eletrisidade.

“Opotunidade ida-ne’e tanba ho vizaun no polítika ida ita-nia Governu nian liuliu ita-nia Exelénsia Sr. Ministru ne’ebé fó prioridade ba setór eletrisidade, ne’e la’os tanba nia Atabae ona mais nia iha vizaun oinsá lori oportunidade ba Timoroan hotu-hotu, tanba ne’e orienta EDTL atu fó prioridade inklui nain hira nia área,”Prezidente EDTL hato’o liuhosi nia intervensaun.

Prezidente EDTL, E.P mós husi kooperasaun komunidade nian ho empreza hodi ajuda, kontribui, no fasilita durante kompañia implementadór nune’e projetu le’o ho di’ak bele fornese ona ba komunidade.

Iha fatin hanesan kompañia implementadór sira promete sei finalize projetu ne’e iha fulan-Janéiru tinan oin hodi fornese eletrisidade ba komunidade.

“Ami promete katak iha Janéiru nia laran ami sei entrega eletrisidade ba komunidade para bele utiliza, sasán sira, ai-riin kompletu ona, hein lori fiu mai tereñu,” garante Diretór Kompañia Mota Loes Unip.Lda, Sr. Norberto Pires.

Serimonia Lansamentu ba projetu ne’e partisipa husi autoridade seguransa no sivíl munisípiu, postu administrativu sira, inklui komunidade, no asiste mós husi Diretór Jerál Administrasaun no Finansas (DJAF),Sr. Januário Barbosa, Prezidente Autoridade Nasionál Eletrisidade Institutu Públiku (ANE,I.P), Eng. Ruben Jerónimo Freitas, ho ekipa tomak.

Projetu eletrifikasaun nasional husi aldeia Haelesu to’o Nunudoi hala’o husi kompañia Mota Loes Unip.Lda, JV ho kompañia Rarilvos Unip.Lda, ho montante orsamentu hamutuk $355,364,82, ne’ebé sei hala’o durante fulan 3 nia-laran.

#Media_MOP

Read More

AUDÉNSIA PÚBLIKA DAHULUK HO KOMISAUN C NO E, PROPOSTA OJE 2022 BA MOP MILLAUN $160.4 RESIN

DILI, 05 NOVEMBRU 2021: S. Exa, Ministru Obras Públikas (MOP), Arq. Salvador Eugénio Soares dos Reis Pires, hamutuk ho S. Exa, Ministru Transporte no Telekomunikasaun (MTK), Sr. José Agostinho da Silva, halo audénsia públika ho komisaun C ne’ebé trata asuntu finansas públika no komisaun E ne’ebé trata asuntu infraestrutura, hodi aprezenta relatóriu ezekusaun Orsamentu Jerál Estadu (OJE) tinan fiskál 2021 nian no proposta OJE 2021 nian iha Parlamentu Nasionál.

Ministru Obras Públikas, Arq. Salvador Eugénio Soares dos Reis Pires, akompaña husi ajénsia sira halo audénsia ho komisaun C no E iha Parlamentu Nasionál. (Foto MOP).

“Proposta Orsamentu Jerál Estadu 2022 nian ba Ministériu Obras Públikas hetan alokasaun orsamentu  hamutuk Millaun $160 dollar resin ne’ebé sofre redusaun pruvolta 33%, kuaze millaun $80.2 husi dotasaun orijinál 2020 ka 32% husi millaun $74 husi orsamentu ratifikativu 2021. Husi proposta orsamentu $ 160. 431.417 dollares ne’e atu finansia programa lima, sub-programa 11 no atividades 40, osan totál ne’e fahe ba programa 5,”Sr. Ministru informa ba deputadu sira husi komisaun C no E iha Parlamentu Nasionál.

Programa 5 mak hanesan tuir mai:

1.      * Programa Estrada, Pontes, Kontrolu i Seias, no Konstrolu Kualidade konstrusaun sivíl, hetan 20% husi totál alokasaun orsamentu ho valór millaun $32.8 resin.

2.      * Ba programa Dezenvolvimentu Rurál no Urbana, hetan alokasaun 2% husi totál orsamentu alokadu ho valór millaun $3.
7 resin.

3.     * Ba programa Boa Governasaun no Jestaun Institusionál, hetan alokasaun 11% husi totál orsamentu alokadu ho valór millaun $16.9 resin.

4.      * Ba Programa Agua i Saneamentu, ne’ebé mós enkaixa iha Boa Governasaun, hetan 11% husi totál orsamentu alokadu  ho valór millaun $17 resin.

5.      * Ikus liu ba programa Eletrisidade, ne’ebé enkaixa mós iha Boa Governasaun, hetan kuaze 56% husi alokasaun  husi orsamentu alokadu ho valór millaun $90.

Atu sumariza de’it katak husi proposta OJE 2022 nian ne’ebé aloka ba Ministériu Obras Públikas fahe ba kategoris por item mak Saláriu i vensimentu hamutuk 2%, Bens i Servisu totál 16%, Kapitál minór 1%, Kapitál Dezenvolvimentu 14%, no Transferénsia Públikas kuaze 67%.

Projesaun reseitas ba 2022 mak Diresaun Nasionál Peskiza no Laboratoriu Nasionál rihun $50, ba Bee Timor-Leste Empreza Públika (BTL,E.P) rihun $250, ba Eletrisidade Timor-Leste (EDTL,E.P) millaun $40, ba Diresaun Nasionál rihun $25, ba Institutu Jestaun Ekipamentu (IJE) rihun $100.

Sr. Ministru mós aprezenta relatóriu ezekusaun Orsamentu Jerál Estadu (OJE) tinan fiskál 2021 nian ba deputadu sira husi membru komisaun C no E. Totál OJE tinan fiskál 2021 ne’ebé Ministériu obras Públika ezekuta ona hamutuk 95.1% husi valór orsamentu hamutuk Millaun $222.9 resin.

Durante audénsia públika ne’e deputadu sira kestiona preokupasaun komunidade nian iha área infraestrutura liuliu estrada, eletrisidade, bee-moos, inklui habitasaun no urbanízmu iha kapitál Dili.

Audénsia Públika lidera husi Prezidente Komisaun C Sra. Deputada, Maria Angelica Rangel dos Reis, hamutuk ho deputadu sira husi komisaun C no E. Sr. Ministru akompaña husi S. Exa, Vise Ministru MOP, Eng. Nicolau Lino Freitas Belo, Prezidente ajénsia autónomu tutela ba MOP, Diretór Jerál no Nasionál sira, inklui dirijente sira husi Ministériu Transporte no Komunikasaun.

 #Media_MOP

Read More

MOP KONTINUA ORIENTA DJOP-DNEPCC NO PMU ASEGURA KUALIDADE KONSTRUSAUN ESTRADA NASIONÁL BAUKAU-VIKEKE

OSSU, 29 OUTUBRU 2021: S. Exa, Ministru Obras Públikas (MOP), Arq. Salvador Eugénio Soares dos Reis Pires, kontinua fó orientasaun ba Diresaun Jerál Obras Públikas (DJOP), Diresaun Nasionál Estrada Ponte, Kontrolu i Seias (DNEPCC, sígla Portugés) no Unidade Manajementu Projetu (PMU, sígla Ingés) estrada hodi kontrolu no asegura projetu konstrusaun estrada nasionál Lot 1 husi munisípiu Baukau to’o Venilale no Lot 2 husi Venilale to’o munisípiu Vikeke.

Ministru Obras Públikas, Arq. Salvador Eugénio Soares dos Reis Pires, ko'alia kona-ba konstrusaun estrada nasional Baukau-Vikeke. (Foto MOP)

“Ha’u-nia orientasaun ba sira (DJOP-DNEPCC no PMU) tenke kontinua promove projetu sira ne’e tuir dezeñu no espesifikasaun ne’ebé iha no tenke asegura nia kualidade, ha’u husu ba sira para tau-matan nafatin ba nia progresu,”Sr. Ministru Obras Públikas informa ba jornalista sira iha suku Builale, postu administrativu Ossu, munisípiu Vikeke, hafoin inagurasaun ba estrada rurál iha suku refere, bainhira jornalista sira husu kona-ba kualidade projetu konstrusaun estrada nasionál Baukau-Vikeke. 

Sr. Ministru hatutan “Ita iha Unidade Manajementu Projetu ne’ebé inklui ho nia tékniku sira, sira mak haree ida-ne’e, i dala ida tan ha’u-nia orientasaun ba sira atu diariamente ou semenálmente iha tereñu atu kontinua haree nia progresu sira ne’e, karik lakunas sira halai sees husi espesifikasaun, kompañia iha obrigasaun tuir kontratu ne’ebé iha”. 

Parte DJOP no PMU estrada kontinua asegura kualidade husi investimentu iha infraestrutura ne’ebé Governu halo no tenke husu kompañia kontratór sira atu kumpri kontratu, dezeñu no Bill of Quantity (BoQ) ne’ebé iha.

Antes ne’e iha média sosiál Facebook publika ona kona-ba lamentasaun sira husi komunidade komunidade kona-ba kualidade konstrusaun estrada nasionál husi munisípiu Baukau to’o munisípiu Vikeke. 

Projetu estrada nasionál trosu Baukau-Venilale no Venilale-Vikeke ne'e kontrui husi kompañia Internasionál CRIG-COVEC ho distánsia Kiloemetru 58 resin, ho orsamentu millaun 44 dollar Amerikanu, fundu impréstimu husi Banku Dezenvolvimentu Aziátiku (ADB). 

Lansamentu fatuk dahuluk ba konstrusaun estrada Baukau-Vikeke hala'o husi S. Exa, Ministru Obras Públikas (MOP), Arq. Salvador Eugénio Soares dos Reis Pires, iha loron 09 fulan-Agostu tinan 2019. 

Projetu estrada ne'e iha Lot 2, Lot primeiru mak husi Baukau to'o Venilale no Lot segundu mak husi Venilale to'o Vikeke. Hafoin lansamentu kompañia konstrutór no superizór mobiliza kedas ekipamentu pezadu no halo levantamentu dadus ba reassentamentu ka indiminizasaun ba komunidade nia ai-horis ne'ebé afeitadu husi konstrusaun ne'e rasik. 

Konstrusaun projetu ne'e sei hala'o durante tinan tolu (3) nia-laran, hahú husi fulan-Agostu tinan 2019 no sei termina iha fulan-Fevereiru tinan 2022.

 #Media_MOP

Read More

HAMUTUK HO EMBAIXADÓR UNIAUN EUROPEIA INAGURA REHABILITASAUN ESTRADA RURÁL 9KM HUSI LARIGUTU TO’O BUILALE

BUILALE, 29 OUTUBRU 2021: S. Exa, Ministru Obras Públikas (MOP), Arq. Salvador Eugénio Soares dos Reis Pires, hamutuk ho embaixadór Uniaun Europeia, Sr. Andrew Jacobs, inagura estrada rurál ne’ebé rehabilitadu hamutuk Kilomoetru 9 (9KM) husi Larigutu suku Ossu de Sima to’o suku Builale, postu administrative ossu, munisípiu Vikeke. 

Ministru Obras Públikas, Arq. Salvador Eugénio Soares dos Reis Pires, hato’o hela nia intervensaun iha inagurasaun estrada rurál husi Larigutu suku Ossu de Sima to’o suku Builale, postu administrative ossu, munisípiu Vikeke. (Foto MOP)

“Ohin ha’u ho Sr. Embaixadór Uniaun Europeia mai inagura Estrada Rurál trosu husi suku Ossi de Sima, Larigutu mai to’o Builale ho distánsia 9KM, ne’ebé fó benefísiu direita rihun 1200 resin no husi benefisiáriu ne’e kuaze 236 mak feto. Programa ne’e programa parseira ba dezenvolvimentu Agro-Florestál hodi halo rehabilitasaun no manutensaun ba estrada rurál ho Uniaun Europeia, Governu Alemaña, no ILO para halo rehabilitasaun no manutensaun ba estrada rurál ho objetivu atu ajuda Governu Timor-Leste para fornese ben-star ba ita-nia povu, redus pobreza no promove sustentabilidade ekonomia no mós prezerva ita-nia ambiente ,”Sr. Ministru informa ba jornalista sira hafoin serimonia inagurasaun estrada rurál iha suku Builale, postu administrativu Ossu, munisípiu Vikeke. 

Sr. Ministru hatutan, “Depois projetu ne’e entrega mai Governu, Governu liuhosi Orsamentu Jerál Estadu (OJE) tinan-tinan ne’ebé ita tau ba Estrada Rurál ba Dezenvolvimentu (ERD) kategoria manutensaun periódika ita bele orsamenta para kontinua mantein manutensaun estrada ne’e, atu nune’e kontinua funsiona hodi fasilita atividade populasaun ba asesu merkadu, asesu ba saúde, ida-ne’e mak esforsu Governu nian husi parseria entre Governu Timor-Leste ho Uniaun Europeia”. 

Iha diskursu Sr. Ministru aprezenta katak populasaun Timor-Leste maioria hela iha área rurál tanba ne’e dezde Governu anteriór mai to’o ohin loron kontinua halo esforsu investe maka’as iha infraestrutura bázika liuliu iha estrada rurál. 

“Ha’u kontenti tebes hamutuk ho Embaixadór Andrew Jacobs iha ne’e mai inagura estrada Larigutu, suku Ossu de Sima mai iha Builale, ne’ebé hanesan rezultadu parseria ba dezenvolvimentu Agro-Florestál ne’ebé implementa husi ILO, ne’ebé finansia husi Uniaun Europeia no Governu Alemaña no mós ILO. Ohin loron hanesan tempu di’ak ida ita bele inagura estrada seksaun ida-ne’e ho vizaun atu tuluk Governu fó ben-star ba ita-nia povu, hasa’e dezenvolvimentu sósiu-ekonómiku ba ita-nia povu, hanesan ita-boot sira hatene katak ita-nia kontinua komprometidu husi kedas Governu anteriór mai to’o agora esforsu hakarak investe iha infraestrutura bázikas, see ita-boot sira haree iha ita-nia sensu 2015 kuaze 70% populasaun hela iha área rurál, ne’ebé investimentu iha infraestrutura bázikas hanesan estrada rurál ne’e importante tebes atu bele fó ben-star ba ita-nia povu,”Sr. Ministru aprezenta. 

Sr. Ministru rekoñese “Misaun husi programa ERA-Agro-Florestál mak atu promove modalidade Mão de Obra ka implementasaun, rehabilitasaun no manutensaun estrada rurál, no mós fó kapasitasaun ba ita-nia empreza lokál sira, no ba mós ajenti Governu nian ne’ebé iha administrasaun munisipál sira, atu bele fó oportunidade ba ita-nia komunidade bele partisipa iha prosesu dezenvolvimentu husi obra sira ne’e. Programa ne’e ita-boot sira haree rasik katak lori duni benefísiu ba ita i lori Governu nia naran ha’u hakarak rekoñese ida-ne’e ba parseria ka tulun ne’ebé mak Uniaun Europeia, Governu Alemaña fó ita". 

Iha intervensaun ne’e Sr. Ministru agradese ba parte hotu ne’ebé kontribui ba realizasaun projetu ne’e la’o ho di’ak. 

Embaixadór Uniaun Europeia, Sr. Andrew Jacobs, “Orgullu tebes ohin partisipa inagurasaun estrada rurál husi Larigutu mai Builale, no ha’u vizita Larigutu tinan rua liuba, ha’u haree progresu iha konstrusaun estrada ne’ebé agora ha’u haree pontu de vista ekonómiku estrada halo diverente boot ba komunidade rurál, agora asesu ba fasilidade saúde, ba eskola, ba merkadu, ha’u haree katak iha oportunidade ba to’os na’in sira hodi fa’an produtu, asesu ba merkadu, ha’u haree iha kios, iha empregu. Ha’u kontente loos katak durante konstrusaun estrada iha empregu ba ema barak, inklui feto barak mak iha oportunidade ba empregu, fó treinamentu ba kontratór”. 

Uniaun Europeia iha intensaun kontinua servisu iha kampu dezenvolvimentu ekonómiku iha área rurál, ami prepara programa foun agora no seidauk deside projetu definitivu. 

Iha fatin hanesan xefe suku Builale, Sr. Antómio Moniz, hatete “Husi tinan 2000 sa’e mai Builale infrenta tebes problema estrada, kuandu komunidade hakarak lori produtu lokál ba merkadu tutur de’it, lori de’it ba Venilale no ba Ossu maibé hahú husi 2019 to’o ohin loron ha’u sente orgullu no kontenti tanba ohin S. Exa, Ministru Obras públikas mai inagura ita hotu haree katak kualker kareta bele hala’o movimentu iha Builale, ne’ebé ha’u sente orgullu tanba iha VIII Governu Konstitusionál no apoiu husi Uniaun Europeia ha’u nu’udar xefe suku Builale lori komunidade Buibela nia-naran ami agradese teb-tebes tanba agora ami bele lori produtu lokál ba merkadu”. 

Suku Builale kompostu husi aldeia 5, no totál populasaun hamutuk 2.095. 

Konstrusaun ba projetu estrada rurál husi Larigutu to’o Builale hahú iha 2019 no loloos ne’e finaliza iha inísiu 2020 nian maibé tanba pandemia Covid-19 no udan ne’ebé akontese la permite no prolonga to’o iha meiadu tinan 2020 projetu hirak ne’e remata no hetan inagurasaun iha loron 29 fulan-Outubru 2021. Inagurasaun ba projetu ne’e reprezenta mós projetu seluk ne’ebé realiza iha munisípiu Vikeke ninian. 

Konstrusaun no rehabilitasaun estrada rurál iha munisípiu Vikeke ne’bé hetan apoiu husi Uniaun Europeia ho distánsia hamutuk 40.50KM, husi númeru ne’e fahe ba;

-         - Estrada rurál Larigutu-Builale ho nia distánsia 9KM 

-          - Estrada rurál Nunteri-Digamasi-Bubulita ho distánsia 8.5KM 

-          - Estrada rurál Bibileo-Fathuosa-Lakuai ho distánsia 4.6KM 

-          - Spot Melloramentu Spot Estrada rurál Luka-Bibileo ho distánsia 17.1KM 

-          - Extensaun estrada ne’ebé daudaun ne’e implementadu hela ho distánsia 1.3KM 

Husi projetu hirak ne’e implementa husi kompañia lokál ne’ebé treinadu on aba métodu servisu Mão de Obras iha Sentru Treinamentu Don Bosco no IADE. Kompañia sira ne’e, 70% feto mak sai na’in. kustu konstrusaun hamutuk USD $1,812,541.06, husi orsamentu ne’e USD $416,885 investe direitamente iha komunidade. 

Projetu hirak ne’e realiza tanba hetan kooperasaun husi Governu Timor-Leste ho Uniaun Europeia, Gvernu Alemaña, Organizasaun Internasionál Traballu (ILO) liuhosi projetu Enhancing Rural Access (ERA) Projetu Agro-Florestál. 

Iha serimonia inagurasaun ne’e partisipa mós husi Administradór munisípiu Vikeke, Administradór postu administrativu, Diretór Jerál Sira, Prezidente órgaun autónomu sira ne’ebé tutela ba Ministériu Obras Públikas, Diretór Jerál no nasionál, parseiru dezenvolvimentu sira hanesan reprezentante husi NAO,  giz, ILO, autoridade seguransa, husi setór privadu no komunidade suku Builale.

 

#Media_MOP

Read More

MOP LANSA FATUK DAHULUK BA PROJETU ELETRIFIKASAUN IHA SUKU MINDELO NO AITEMUA TURISKAI

TURISKAI, 25 OUTUBRU 2021: S. Exa, Ministru Obras Públikas (MOP), Arq. Salvador Eugénio Soares dos Reis Pires, akompaña husi Prezidente Eletrisidade Timor-Leste Empreza Públika (EDTL,E.P), Eng. Paulo da Silva, lansa fatuk dahuluk ba projetu eletrifikasaun iha suku Mindelo no suku Aitemua, postu administrativu Turiskai, munisípiu Manufahi.

Lansamentu Projetu Eletrifikasaun iha suku Mindelu no Aitemu, postu Turiskai, Manufahi. (Foto MOP)

Administradór postu administrativu Turiskai, Sr. Julio Godinho reprezenta komunidade suku Mindelo no Aitemu, inklui komunidade Turiskai tomak hato’o benvindo ba Sr. Ministru ho nia ekipa ne’ebé konsege hala’o vizita ba suku Mindelo no Aitemua hodi halo lansamentu ba projetu eletrifikasaun iha suku rua refere.

Administradór ne’e hatete, durante tinan barak ona suku rua ne’e tuur iha nakukun laran, alerik ba eletrisidade no ohin loron konsege realiza duni, inklui estrada sira husi ba postu administrative Turiskai no suku sira iha Turiskai nian.

“Fatin sira ne’e sai hanesan fatin história, estrada mós hanesan ohin S. Exelénsia nia viajen husi Maubisse mai to’o Turiskai, no to’o iha suku rua ne’e, ha’u hanoin katak S. Exelénsia haree rasik ho matan, bele observa rasik kondisaun sira ne’e hotu, eletrisidade mak ohin ita mai lansa ba suku Aitemua no Mindelu, sei iha suku balun mak seidauk asesu ba eletrisidade,” Administradór postu administrativu Turiskai informa.

S. Exa, Ministru Obras Públikas (MOP), Arq. Salvador Eugénio Soares dos Reis Pires, sente kontente hamutuk ho komunidade suku Mindelo no Aitemua hodi lansa projetu eletrifikasaun ba suku rua refere.

 “Ha’u haksolok tebes hamutuk ho ita-boot sira iha ne’e hodi lansa projetu instalasaun eletrisidade mai suku Mindelu no Aitemua,”Sr. Ministru hato’o iha serimonia lansamentu tau fatuk dahuluk ba projetu eletrifikasaun iha suku Aitemua no Mindelo.

VIII Governu Konstitusionál lideradu husi S. Exa, Primeiru Ministru (PM), Sr. Taur Matan Ruak, prioritiza infraestrutura bázika hanesan estrada, bee-moos no eletrisidade ba komunidade sira, tanba ne’e ba eletrisidade nian Ministériu Obras Públikas liuhosi EDTL,EP kontinua halo esforsu hodi dada eletrisidade ba komunidade liuliu ba suku sira ne’ebé seidauk asesu ba eletrisidade nune’e hakotu tiha projetu eletrifikasaun no haree fali projetu infraestrutura bázika sira seluk.

Iha oportunidade ne’e, Sr. Ministru husu ba komunidade tomak liuliu na’i veteran sira, inan-aman, joven sira hodi kontribui ba projetu dada eletrisidade ba komunidade iha suku rua ne’e, nune’e projetu bele finaliza tuir tempu ne’ebé determina ona iha kontratu.

“Mai ita hamutuk ajuda kontribui ba programa ida-ne’e, projetu ida-ne’e hotu lalais ho kualidade para bele fasilita ita-boot sira-nia atividade loron-loron ba moris di’ak, atu nune’e ita-nia oan sira bele estuda kalan, ita-boot sira bele loke negósiu ki’ikoan no halo buat seluk tan liga ho eletrisidade, see lakohi kontribui ita mak sofre ba dezenvolvimentu atu tama mai iha ita-nia suku, iha fatin-fatin ha’u sempre dehan kuandu Governu halo ona dezenvolvimentu mak balun halo inpedimentu di’ak liu ita prioritiza suku seluk, ha’u espera katak suku Aitemua ho Mindelo sei la halo ida-ne’e para ita halo projetu sira ne’e hotu lalais, para Governu bele haree fali fatin seluk ou haree fali komponente seluk hanesan estrada, dala ida-tan parabéns, ha’u mai lori S. Exa, Primeiru Ministru nia naran nu’udar reprezenta VIII Governu Konstitusionál hodi hato’o ba ita-boot sira hanoin no pensamentu ba programa sira ohin no lansamentu ka realizasaun programa sira ne’ebé foin daudauk ita lansa hamutuk,”Sr. Ministru apela.

Iha oportunidade ne’e, Sr. Ministru esplika kona-ba prosesu  tenderizasuaun projetu ba komunidade hodi hatene oinsá mak bele implementa projetu ida katak atu implementa projetu ida liu prosesu oioin, prosesu interministeriál, prosesu foti desizaun, depois mak to’o iha prosesu loke kunkursu hodi deside manán na’in id aba konstrusaun projetu.

Agradese tanba EDTL sai ona Empreza Públika ne’ebé iha autónomu finanseira, administrativa, no judisiál hodi deside rasik, tanba ne’e, EDTL,E.P nia servisu depende ba prosesu aprovisionamentu kuandu finaliza bele mobilida ekipamentu hahú halo konstrusaun no ohin bele lansa projetu eletrifikasaun iha suku rua ne’e.

Sr. Ministru mós agradese ba Prezidente EDTL,E.P ho nia ekipa tomak ne’ebé halo esforsu maka’as hodi finaliza prosesu tomak hodi dada eletrisidade ba komunidade sira.

Entertantu Prezidente EDTL,EP, Eng. Paulo da Silva, mós esplika kona-ba prosesu tenderizasaun to’o hetan manán na’in hodi implementa projetu ne’e mo husu ba komunidade tomak hodi kontribui prosesu dada eletrisidade ba suku rua ne’e.

Serimonia lansamentu ne’e partisipa husi Diretór Jerál Administrasaun no Finansas (DJAF) Sr. Januário Barbosa,  reprezenta Komandante Polísia Nasionál Timor-Leste (PNTL) munisípiu Manufahi, autoridade lokál, no komunidade suku rua ne’e.

Projetu eletrifikasaun ba suku rua ne’e sei hala’o husi kompañia Aitemalau Tarotu Unip.Lda  ho kompañia Delta Mola, Unip. Lda, durante fulan 5, ho orsamentu hamutuk $ 533,281. 07.

#Media_MOP

Read More