MOP ORIENTA AJÉNSIA HOTU HALO PREPARASAUN MÁSIMU BA APREZENTASAUN PROGRAMA BA OJE 2022 NIAN IHA KROP

MOP ORIENTA AJÉNSIA HOTU HALO PREPARASAUN MÁSIMU BA APREZENTASAUN PROGRAMA BA OJE 2022 NIAN IHA KROP

DILI, 08 SETEMBRU 2021: S. Exa, Ministru Obras Públikas (MOP), Arq. Salvador Eugénio Soares dos Reis Pires, iha Kuarta-feira ne’e, iha salaun enkontru MOP, Kaikoli, Dili, kontinua hala’o enkontru koordenasaun ho Diresaun Jerál no ajénsia autónomu sira hodi fó orientasaun atu halo preparasaun másimu antes aprezenta planu no programa ba Orsamentu Jerál Estadu (OJE) tinan fiskál 2022 nian iha Komisaun Revizaun Orsamentu Polítika (KROP) iha nível tékniku no polítiku, ne’ebé sei hala’o iha loron aban (Kinta, 09/09) no bainrua (Sesta, 10/09), iha Ministériu Finansas, Dili.

Iha enkontru ne’e Diresaun Jerál no ajénsia autónomu ida-idak aprezenta planu no programa tuir orientasaun Sr. Ministru nian, inklui programa ba orsamentu adisionál tuir nesesidade no importánsia iha ajénsia tutela no autónomu sira.

Programa MOP nian iha 6 ba tinan fiskál 2022 mak hanesan tuir mai:

1. Programa Boa Governasaun

2. Água no Saneamentu

3. Kontrolu Kualidade iha Konstrusaun Sivíl no Obras Públikas

4. Dezenvolve, Konstrusaun, Rehabilitasaun, Manutensaun no Jestaun Estrada, Ponte no Kontrolu i Seias

5. Eletrisidade

6. Dezenvolvimentu Rurál no Urbana

Tetu Fiskál 2022 nian ne’ebé Ministériu Finansas atribui ba Ministériu Obras Públikas hamutuk millaun $157 resin. Tuir ajenda téknikamente sei halo aprezentasaun iha iha loron 09 fulan-Setembru 2021 no KROP sei hala’o iha loron 10 fulan-Setembru tinan 2021 iha Ministériu Finansas, Dili.

Relatóriu ezekusaun OJE 2021 no Programa ba OJE 2022 nian aprezenta husi Diretór Jerál Administrasaun no Finansas (DJAF), Sr. Januário Aparício Barbosa, ho Diretór Nasionál Orsamentu no Finansas (DNOF), Sr. João Amarál, tuir pakote orsamentu ne'ebé elabora ona mai husi ajénsia sira.

Enkontru ne'e partisipa mós husi Diretór Jerál Obras Públikas (DJOP), Sr. Rui Hernani, Diretór Jerál Habitasaun no Urbanízmu (DJHU), Sr. Roger Tertuliano Belo, akompaña husi Diretór Nasionál, Xefe Departamemtu sira.

Partisipa mós husi Prezidente EDTL,E.P, Sr. Paulo da Silva, Prezidente BTL,E.P, Sr. Carlos Peloi dos Reis, Prezidente Institutu Jestaun Ekipamentu Institutu Públiku (IJE,I.P), Sra. Hermenegilda da Costa Laurentina, Prezidente Autoridade Nasionál Eletrisidade (ANE,I.P), Sr. Ruben Jerónimo Freitas, Prezidente Autoridade Nasionál Água no Saneamentu (ANAS,I.P), Sr. Domingos Pinto, Vise Prezidente, vogál, inklui parte Unidade Manajementu Projetu (PMU) estrada.

#Media_MOP