EZEKUSAUN OJE TINAN FISKÁL 2021 BA MOP ATINJI ONA 87%
DILI, 08 SETEMBRU 2021: S. Exa, Ministru Obras Públikas (MOP), Arq. Salvador Eugénio Soares dos Reis Pires, informa ezekusaun Orsamentu Jerál Estadu (OJE) tinan fiskál 2021 ba Ministériu Obras Públikas daudauk ne’e atinji ona pursentu 87 (87%).
“Atuál 87%, ida-ne’e barak liu tanba iha transferénsia públika kuaze 80% resin ne’ebé ami halo ona transferénsia ba EDTL (Eletrisidade Timor-Leste) ho BTL (Bee Timor-Leste) hanesan Empreza Públika bele hala’o sira-nia atividade. Klaru katak sira iha faze estabelesimentu, osan sira ne’e, sira prepara hela projetu ita-boot sira haree hanesan ba eletrisidade nian fó sai ona ba suku balun, prosesu aprovizionamentu la’o hela, agora prepara hela ba segundu faze, BTL mós hanesan halo atuasaun hela ba ita-nia sistema bee-moos sira ne’ebé kleur ona estabelesidu, ita presiza fó atensaun liuliu ba manutensaun nune’e sustenta lai ita-nia nesesidade bee iha kapitál Dili no mós iha munisípiu sira seluk,” Sr. Ministru Obras Públikas, informa ba jornalista sira iha edifísiu Ministériu Finansas (MF), Aitarak-Laran, Dili, hafoin partisipa iha reuniaun Konsellu Ministru.
Sr. Ministru hatutan, “Iha mós projetu foun sira ne’ebé halo hela, ha’u fiar katak bainhira sira kompleta ona, depois mós faze estabelesimentu korporativu sira la’o ona, sira-nia atendimentu bele di’ak liután hodi hadi’ak ita-nia kobertura fornesimentu bee-moos ba komunidade sira di’ak liu no buat sira ne’e presiza tempu tanba sira foin komesa iha faze estabelesimentu”.
Ba iha projetu estrada sira, Sr. Ministru hatete “Ba iha projetu estrada sira seluk ne’e ita-boot sira haree ami fó sai tenderizasaun ona, balun tama kontratu ona nia ezekusaun komesa la’o ona, balun iha prosesu aprovizionamentu, balun sei iha prosesu verifikasaun, ita-boot sira hatene katak Ministériu Obras Públikas ne’e apezar de osan liña ministériu nian ka osan ne’ebé koloke iha Fundu Infraestrutura ami tenke hetan premisaun husi ADN (Ajénsia Dezenvolvimentu Nasionál) ka MPO (Ministériu Planu no Ordenamentu), see prosesu administrativa, birokrasia ne’e kuandu iha intendimentu ita bele halo lais liu, see ita pasa ona prosesu administrativu sira ne’e ezekusaun bele lais, mais ida-ne’e la’os depende mai ami de’it, depende mós ba ministériu seluk nia atendimentu mai Ministériu Obras Públikas para atu aselera prosesu administrativa, birokrasia ne’ebé ita tenke prense hanesan rekezitus molok ita avansa ba tenderizasaun depois hetan manán na’in hodi ezekuta, ida-ne’e mak ita-nia sistema Governasaun interministeriál ne’ebé ita tenke ultrapasa bainhira promove projetu ida”.
Antes ne’e, Diretór Nasionál Orsamentu no Finansas (DNOF), Sr. João Amarál, liuhosi enkontru ba preparasaun relatóriu ezekusaun OJE 2021 nian no preparasaun programa ba OJE 2022 nian iha loron 6 fulan-Setembru tinan 2021 iha salaun enkontru MOP, Kaikoli, Dili, informa katak daudauk ne’e Ministériu Obras Públikas nia ezekusaun ba OJE 2021 atinji ona 87%.
“Ita-nia ezekusaun ne’e ita atinji 87% mezmu que agora osan seidauk tama iha konta bankaria empreza rua nian ne’ebé prosesu la’o ona karik semana ida-ne’e nia-laran osan bele tama ona iha sira-nia konta bankaria, obligasaun iha 4%, depois kompromisiu iha 3%, balansu hela iha 6%,” Sr. Diretór ne’e informa.
Orsamentu ba MOP ho nia dotasaun orijinál hamutuk millaun $234 resin ($234,511,942.00), ezekusaun atuál $203.120.142,00 (87%); Obligasaun $8.628.885 (4%); Kompromisu $7.779.984,00 (3%); no Balansu $14.982.932,00 (6%).
0 Comments:
Posting Komentar