MOP ATUALIZA PREPARASAUN RELATÓRIU EZEKUSAUN OJE 2021 NO PROGRAMA BA 2022 ANTES APREZENTA IHA KROP

MOP ATUALIZA PREPARASAUN RELATÓRIU EZEKUSAUN OJE 2021 NO PROGRAMA BA 2022 ANTES APREZENTA IHA KROP

DILI, 06 SETEMBRU 2021: S. Exa, Ministru Obras Públikas (MOP), Arq. Salvador Eugénio Soares dos Reis Pires, realiza enkontru koordenasaun ho Diresaun Jerál sira no ajénsia autónomu sira hodi atualiza preparasaun planu no programa MOP nian liuliu programa infraestrutura hanesan estrada, bee-moos no eletrisidade hodi aprezenta iha Komisaun Revizaun Orsamentu Polítika (KROP) iha tempu badak.

“Ohin ha’u konvida ita-boot sira mai halo aprezentasaun ba ita-nia proposta Orsamentu Jerál Estadu 2022 antes ba aprezentasaun iha KROP atu haree, ne’ebé iha buat ruma karik ita bele identifika antes ita ba aprezenta hanesan ministériu iha KROP ne’ebé hala’o iha Sesta agora dia 10, ne’ebé ha’u konvida ita-boot sira mai para atu haree ita-boot sira-nia aprezentasaun tantu ministériu rasik, ho Diresaun Jerál rua, no mós ho ajénsia autónomu sira ne’ebé ita-boot sira sei aprezenta ita-boot sira-nia proposta rasik mak institutu tolu ho empreza públika rua,”Sr. Ministru Obras Públikas informa iha inísiu enkontru ho Diretór Jerál, Prezidente Empreza Públika, Prezidente Institutu Públiu sira, Diretór Nasionál inklui Xefe Departamentu sira, iha salaun enkontru MOP, Kaikoli, Dili.

Sr. Ministru fó lembra katak iha enkontru preparasaun OJE 2022 nian antes ne’e fó ona orientasaun atu ajénsia hotu kumpri pakote fiskál husi Ministériu Finansas (MF) maibé sei iha proposta adisionál sira tanba nesesidade iha ministériu liuliu ajénsia sira-nian.

Pakote Orsamentu aprezenta husi Diretór Jerál Administrasaun no Finansas (DJAF), Sr. Januário Aparício Barbosa, ho Diretór Nasionál Orsamentu no Finansas (DNOF), Sr. João Amarál, kona-ba pakote orsamentu ne'ebé elabora ona husi ajénsia sira.

Diretór DNOF, Sr. João Amaral, esplika aprezentasaun MOP nian iha KROP sei iha parte tolu mak: Parte dahuluk, sei halo aprezentasaun ba ezekusaun Orsamentu Jerál Estadu 2021 ne’ebé MOP sei foti ezekusaun ikus iha loron 09 fulan-Setembru 2021 tanba MOP sei halo aprezentasaun ba KROP iha loron 10 fulan-Setembru, parte daruak, MOP sei aprezenta proposta OJE 2022 nian tuir programa no persentajen hira mak ita atu programa iha tetu orijinál OJE 2022, no parte datoluk, Proposta OJE 2022 por Programa Ano Fiskál 2022 programa adisionál sira ne’ebé nesesáriu.

Programa MOP nian tinan fiskál 2022 nian hamutuk 6 mak hanesan tuir mai:

1. Programa Boa Governasaun

2. Água e Saneamentu

3. Kontrolu Kualidade iha Konstrusaun Sivíl no Obras Públikas

4. Dezenvolve, Konstrusaun, Rehabilitasaun, Manutensaun no Jestaun Estrada, Ponte no Kontrolu i Seias

5. Eletrisidade

6. Dezenvolvimentu Rurál no Urbana

Iha enkontru ne’e Diresaun Jerál no ajénsia autónomu ida-idak aprezenta planu no programa iha reuniaun ne’e, inklui programa ba orsamentu adisionál no oinsá elabora di’ak liután antes aprezenta iha KROP.

Tetu Fiskál 2022 nian ne’ebé Ministériu Finansas atribui ba Ministériu Obras Públikas hamutuk millaun $157 resin. Tuir ajenda téknikamente sei halo aprezentasaun iha iha loron 09 fulan-Setembru 2021 no KROP sei hala’o iha loron 10 fulan-Setembru tinan 2021 iha Ministériu Finansas, Dili.

Enkontru ne'e partisipa mós husi Diretór Jerál Obras Públikas (DJOP), Sr. Rui Hernani, Diretór Jerál Habitasaun no Urbanízmu (DJHU), Sr. Roger Tertuliano Belo, akompaña husi Diretór Nasionál, Xefe Departamemtu sira.

Partisipa mós husi Prezidente EDTL,E.P, Sr. Paulo da Silva, Prezidente BTL,E.P, Sr. Carlos Peloi dos Reis, Prezidente Institutu Jestaun Ekipamentu Institutu Públiku (IJE,I.P), Sra. Hermenegilda da Costa Laurentina, Prezidente Autoridade Nasionál Eletrisidade (ANE,I.P), Sr. Ruben Jerónimo Freitas, Prezidente Autoridade Nasionál Água no Saneamentu (ANAS,I.P), Sr. Domingos Pinto, Vise Prezidente, vogál, inklui parte Unidade Manajementu Projetu (PMU) estrada.

#Media_MOP