KONSTRUSAUN ESTRADA KASNAFAR-SARLALA, RETIFIKA DEZEÑU IHA ONA VERIFIKASAUN ADN

 KONSTRUSAUN ESTRADA KASNAFAR-SARLALA, RETIFIKA DEZEÑU IHA ONA VERIFIKASAUN ADN

DILI, 23 SETEMBRU 2021: S. Exa, Ministru Obras Públikas (MOP), Arq. Salvador Eugénio Soares dos Reis Pires, informa prosesu kontinuasaun ba konstrusaun estrada Kasnafar-Sarlala daudauk ne’e sei halo retifikasaun ba dezeñu bazeia ba estragus iha kalamidade 04 fulan-Abril tinan 2021. Dezeñu daudauk ne’e iha ona verifikasaun Ajénsia Dezenvolvimentu Nasionál (ADN).

“Ida Kasnafar to’o Sarlala, dezeñu kompletu tiha ona, depois de kalamidade 4 Abril, estragus boot liu ne’ebé dezeñu sira ne’e la kobre estragus sira ne’e entaun ita tenke retifika fali, retifikasaun la’o hela, agora ami haruka ona ba ADN verifika hela, para kuandu aprovasaun ADN iha ona ita lori ba KAFI (Konsellu Administrasaun Fundu Infraestrutura) aprova, aprova tiha ba fali CNA (Komisaun Nasionál Aprovizionamentu) para tender, ita-nia prosesu burokrasia mak hanesan ne’e, lae ema dehan la halo servisu, laiha, ne’e prosesu administrativa ne’e ami tenke halo uluk lai, kuandu fó ona mai obras mak ami ezekuta,”Sr. Ministru Obras Públikas informa ba jornalista sira, hafoin partisipa iha reuniaun Konsellu Ministru, iha Palásiu Governu, Dili.

Antes ne’e, Sr. Ministru Obras Públikas hala’o vizita traballu postu administrativu Laulara, munisípiu Aileu informa katak, konstrusaun estrada nasionál Kasnafar (estrada foun husi Kumoro mota ulun) to’o Sarlala, postu administrativu Laulara, munisípiu Aileu nia orsamentu tama iha Orsamentu Jerál Estadu (OJE) tinan fiskál 2021, maibé estrada refere hetan estragus barak husi kalamidade 04 fulan-Abril, nune’e tékniku sira presiza refitika nia dezeñu depois mak kontinua prosesu konstrusaun.

#Media_MOP