IJE ATUALIZA SERVISU NORMALIZASAUN MOTA BA MOP

IJE ATUALIZA SERVISU NORMALIZASAUN MOTA BA MOP

DILI, 23 SETEMBRU 2021: Prezidente Institutu Jestadu Ekipamentus Institutu Públiku (IJE,I.P), Sra. Hermenegilda da Costa Laurentina, atualiza servisu normalizasaun mota iha kapitál Dili liuliu iha área sira ne’ebé ameasa ba inundasaun ba S. Exa, Ministru Obras Públikas (MOP), Arq. Salvador Eugénio Soares dos Reis Pires, iha edifísiu MOP, Kaikoli, Dili.

Informa mós ba Sr. Ministru kona-ba ezekusaun orsamentu IJE nian ba sosa ekipamentu pezadu hodi apoiu servisu di’ak liután ekipa IJE nian normalizasaun mota, hasai sedimentasaun iha situasaun emerjénsia, inklui apoiu normaliza estrada no loke estrada foun ba komunidade.

Antes ne’e, iha loron 22 fulan-Setembru tinan 2021, Sr. Ministru Obras Públikas hetan intervista husi jornalista sira hafoin reuniaun Konsellu Ministru iha Palásiu Governu, Dili, kona-ba servisu MOP nian liuhosi IJE ba normalizasaun mota, hasai sedimentasaun, inklui konstrusaun barazen ka moru protesaun sira iha Dili laran.

“Klaru, Ministériu Obras Públikas liuhosi IJE atividade normál halo tiha ona, liuhosi IJE ita halo normalizasaun ba mota sira, agora ita-boot sira haree atividade la’o hela iha Bekussi, Lahane Orientál, hala’o uluk iha mota ulun mak tuun mai, hamoos hotu sedimentasaun sira, ida-ne’e mak ita halo. Aliende ne’e, tinan-tinan ita-boot sira haree ita limpeza drenajen sira iha Dili laran, ne’e hala’o hela husi BTL liuhosi kontratasaun ho emprezáriu sira para asegura katak ita-nia infraestrutura ezistente ne’ebé iha ne’e labele blokeiadu i laiha sedimentasaun para udan mai tuir nia volume ida dezeñu ba, nia bele soe bee la’o di’ak ba iha tasi, maibé kuandu ita-nia forsa natureza boot liu fali ita-nia kapasidade infraestrutura eziste, ne’e mak ita dehan kalamidade hanesan foin daudauk akontese,”Sr. Ministru esplika.

Daudauk ne’e, ekipa IJE halo normalizasaun no hasai sedimentasaun hahú husi mota-ulun sira iha kapitál Dili nian, ba drenajen iha kapitál Dili, Bee Timor-Leste Empreza Públika (BTL,E.P) iha kontratu ho kompañia sira kontinua hamoos, nune’e bainhira udan bee bele sulin ba tasi.

#Media_MOP