Reuniaun Inisiál Ekipa MOP No IFC Kona-Ba Habitasaun Ho Pressu Asesível

Reuniaun Inisiál Ekipa MOP No IFC Kona-Ba Habitasaun Ho Pressu Asesível

DILI, 04 MARSU 2021: Ekipa tékniku Ministériu Obras Publikas (MOP) kompostu husi Diresaun Jerál Habitasaun no Urbanizmu (DGHU), asesór gabinete Ministru MOP no Vise-Ministru nian, tékniku Planeamentu Urbanu no Habitasaun no ekipa Unidade Parseria Públiku Privadu (UPPP) husi Ministériu Finansas (MF) partisipa iha enkontru inísiu virtuál ho porta vóz no péritu sira husi International Finance Corporation (IFC) kona-ba projetu habitasaun ho presu asesível ka a?ordable housing ne’ebé tuir planu sei implementa iha tinan ida-ne’e (2021), hahú ho estudu viabilidade.

Enkontu inísiu ne’e ko’alia liu kona-ba projetu ne’e ninia rasionál no objetivu sira, merkadu ba habitasaun, planu implementasaun projetu, no seluk tan.

Haktuir akordu ne’ebé asina ona entre Governu Timor-Leste reprezenta husi Ministériu Obras Publikas (MOP) no Ministériu Finansas (MF) ho IFC iha loron 22 fulan-Dezembru 2020 liubá foka ba inisiasaun estudu viabilidade hodi harii uma ka habitasaun foun hamutuk unidade 2,000 iha área Halidolar-Hera no iha futuru sei implementa iha eis Merkadu Kumoro ne’ebé identi?kadu ona husi Ministériu Justisa liuhosi Diresaun Jeral Teras no Propriedade.

Orsamentu ba estudu harii habitasaun ne’e aprova ona iha reuniaun Konsellu Administrasaun Fundu Infraestrutura (KAFI) bainhira aprezenta husi S. Exa, Vise Ministru Obras Públikas (V-MOP), Eng. Nicolau Lino Freitas Belo, iha reuniaun KAFI, tinan 2020.

Estudu ba harii habitasaun foun iha Hera, husi IFC sei hala’o durante tinan ida ho balun (fulan 18) no ho orsamentu hamutuk USD $550,000.00. Planu no polítika Governu Konstitusionál daualu (VIII) nian iha área habitasaun no urbanizmu mak oinsá organiza di’ak liután kapitál Dili, nune’e Governu esforsu aan atu harii uma ba komunidade ho organizadu ho tipu presu asesível no resiliente ba mudansa klimátika, no iha ne'ebé populasaun ho rendimentu ki’ik sira bele asesu ba.

Enkontu inísiu ida-ne’e liuhosi maneira enkontru telekonferénsia hodi tau konsiderasaun ba regra Estadu Emerjénsia ba prevensaun transmisaun lokál pandémia COVID-19 ho númeru ne’ebé aumenta iha kapitál Dili.

#Media_MOP