Konsellu Ministru Aprova Proposta Alterasaun Lei OJE 2021

Konsellu Ministru Aprova Proposta Alterasaun Lei OJE 2021

DILI, 24 MARSU 2021: S. Exa, Ministru Obras Públikas (MOP), Arq. Salvador Eugénio Soares dos Reis Pires, iha Kuarta-feira ne’e partisipa iha reuniaun Konsellu Ministru ne’ebé lidera husi S. Exa, Primeiru Ministru (PM), Sr. Taur Matan Ruak, iha Ministériu Finansas, iha Dili.

Iha reuniaun Konsellu Ministrus ne’e aprova projetu Proposta Lei ba alterasaun dahuluk ba lei nu. 14/2020, loron 29 fulan-dezembru, ne’ebé aprova Orsamentu Jerál Estadu ba tinan 2021 (OJE 2021), sei aprezenta ba Parlamentu Nasionál ho pedidu prioridade no urjénsia, hodi fó resposta ba situasaun epidemiológica COVID-19 nian no ba ninia efeitu ekonómiku no sosiál sira.

Ho alterasaun ida-ne’e, reseita konsolida sira Setór Públiku Administrativu nian sa’e ba millaun dolar amerikanu $2.165,1 no reseita sira órgaun no servisu Administrasaun Sentrál nian sa’e ba millaun dolar amerikanu $1.932,5. Orsamentu Rejiaun Administral Espesiál Oekuse Ambeno no Seguransa Sosiál la sei afetadu.

Alterasaun ne’e atu finansia konjuntu ida husi medida prinsipál neen intervensaun nian katak Governu prepara ona, ne’ebé hanesan:

1) apoiu ba empregu;

2) moratória kréditu nian;

3) izensaun propinas;

4) akizisaun alimentu;

5) apoiu ba profisionál liña oin sira; no

6) medida prevensaun no mitigasaun COVID-19.

Iha ámbitu medida apoiu ba empregu, prevee atribuisaun subsídiu estraórdináriu ida, ho períodu fulan tolu, hahú husi fulan-marsu to’o fulan-maiu tinan 2021, ba traballadór sira ne’ebé servisu ba ema seluk ho montante ekivalente ho 70% husi saláriu ba setór sira atividade nian ne’ebé legalmente iha impedimentu hodi halo operasaun no 50% husi remunerasaun ba setór sira ne’ebé halo hela operasaun hanesan baibain. Entidade empregadór no traballadór sira sei dispensa husi devér pagamentu kontribuisaun sosiál relativa ho rendimentu ne’e.

Ba traballadór independente sira, ba emprezáriu individuál sira, ba traballadór sira servisu doméstiku nian no ba jerente no administradór sira, prevee mós atribuisaun subsídiu estraordináriu ida, hanesan ba periódu fulan-tolu, ekivalente ho 85% husi valór remunerasaun konvensionál. Sira mós sei dispensa husi devér pagamentu kontribuisaun sosiál relativa ba rendimentu ne’e. Ne’ebé inklui mós medida ne’e hanesan traballadór sira ne’ebé hala’o atividade informál, durante sira halo ba ninia formalizasaun hamutuk ho Institutu Nasionál Seguransa Sosiál.

Prevee mós subsídiu estraordináriu dezempregu nian ba traballadór inskritu sira no ho kontribuisaun realiza ona ba seguransa Sosiál, ho montante 40% husi valór remunerasaun konvensionál relativa ho eskalau da-1 ne’ebé hanesan baze insidénsia kontributiva ba seguransa sosiál iha adezaun fakultativa.

Ba traballadór independente sira, ba emprezáriu individuál sira, ba traballadór sira servisu doméstiku nian no ba jerente no administradór sira, prevee dispensa husi dever pagamentu kontribuisaun sosiál no atribuisaun subsídiu estraordináriu ba kompartisipasaun kona-ba kustu enerjia no renda sira.

Ne’e atu hamenus/alivia kustu ho amortizasaun empréstimu ba devedór sira, ho implementasaun moratória nian iha kumprimentu obrigasaun sira ne’ebé mosu husi kontratu konsesaun kreditu nian, liuhusi adiamentu durante fulan sia husi vensimentu obrigasaun nian siraatu entrega filafali kapitál, no liuhusi kompartisipasaun Estadu nian iha pagamentu osan-funan nian.

Propoin mós, atu fó subsidiu ba pagamentu propinas ba estudante ensinu superór sira, ne’eb’e labele hala’o ensinu prezensiál, to’o dolar amerikanu $150.

Prevee akizasaun ai-han husi produtór nasionál sira husi Sentru Lojístika Nasionál ba distribuisaun husi ema no família sira ne’ebé presiza liu.

Parte husi reforsu OJE 2021 sei utiliza mós hodi finansia medida prevensaun no mitigasaun COVID-19, liuliu relasiona ho implementasaun programa vasinasaun no akizisaun materiál barak tan ba teste sira no tratamentu kona-ba moras internadu sira, no mós, konstrusaun fatin izolamentu no kuarentena foun no aumentu kapasidade fatin sira ne’ebé eziste ona.

Sei prevee mos iha Proposta Lei nee osan ba apoiu ba profisionál liña oin, ba atividade SIJK, ba Programa Sesta Bázika no ba reforsu estok foos iha Sentru Lojístiku Nasionál.

Medida sira ne’e ezije reforsu ida Orsamentu Jerál Estadu nian, ne’ebé konsentra iha aumentu dotasaun husi Fundu COVID-19. Aumentu ne’ebé prevee ona iha despeza akontese tanba inskrisaun saldu jerénsia, ne’ebé apuradu iha ezersísiu tinan 2020 nia rohan, maibé ne’ebé la inskreve iha OJE 2021, no mós iha realokasaun dotasaun orsamentál sira entre servisu sira hahú husi Dotasaun ba Governu tomak no fundu Infraestrutura sira, la presiza atu hasa’e montante transferénsia nian husi Fundu Petrolíferu ba OJE.

Iha Konsellu Ministru ne’e análize mós aprezentasaun husi koordenadór Sentru Integradu Jestaun Krize (SIJK), kona-ba pontu situasaun epidemiolójika iha Timor-Leste. Daudaun ne’e rejista kazu esporádiku iha Oekuse no Covalima, propagasaun kazu iha Baukau, Vikeke no Lospalos ho orijen iha ema sira ne’ebé mai iha Dili, molok impozisaun serka sanitária, no propagasaun maka’as liuhusi SARS-CoV-2 iha área oin-oin sidade Dili nian.

Responsável sira sala situasaun SIJK nian aprezenta hanesan prioridade imediata para ho foku sira transmisaun nian ne’ebé eziste, liuhusi detesaun lais ida no izolamentu husi kazu pozitivu hotu-hotu. Ne’e hakarak mós hodi aumenta kapasidade análiza laboratoriál no rastreiu kontaktu nian sira. Ne’e mós hanesan prioritáriu hodi prevene transmisaun virus ba munisípiu sira seluk no atu prepara asaun sira mitigasaun nian ne’ebé presiza ba posível foku transmisaun komunitária ne’ebé bele iha. Objetivu prioritáriu sira seluk maka mitigasaun kona-ba efeitu sosiu ekonómiku sira COVID-19 nian.

Haree ba evolusaun situasaun epidemiolójika iha postu administrativu Fatumea, munisípiu Kovalima, Konsellu Ministrus aprova ona projetu Rezolusaun Governu ne’ebé revoga Rezolusaun Governu nu. 13/2021, loron 10 fulan-marsu, ne’ebé impoin Serka Sanitária iha postu administrativu Fatumea.

Governu delibera ona atu propoin ba S. Exa, Señór Prezidente Repúblika, Sr. Francisco Guterres Lú Olo, renovasaun estadu emerjénsia nian, ba loron tolunulu tan. Haree ba mudansa preokupante husi situasaun epidemiolójika no proliferasaun ba kazu sira ne’ebé mak rejista ona husi kontájiu COVID-19 nian, tantu iha nível rejionál, no mós iha nível mundiál, no atu evita no neutraliza risku sira husi propagasaun SARS-CoV-2, atu nune’e bele proteje saúde públika no iha kbi’it atu hatán ba Sistema Nasionál Saúde nian, Governu propoin ba Señór Prezidente Repúblika katak, ho renovasaun estadu emerjénsia nian ne’e, permite atu suspende ka limita direitu no garantia fundamentál balun.

#Media_MOP