Prezidente PN Akompaña Husi MOP Ensera Konferénsia Nasionál Bee, Saneamentu no Ijiene

Prezidente PN Akompaña Husi MOP Ensera Konferénsia Nasionál Bee, Saneamentu no Ijiene

 

Dili, Kinta, 12 Jullu 2018: S. Exa, Ministru Obras Públikas (MOP), Arg. Salvador Eugénio Soares dos Reis Pires, akompaña S. Exa, Prezidente Parlamentu Nasionál (PN), Sr. Arão Noe de Jesus, halo enseramentu ba Konferénsia Nasionál bee, Saneamentu no Ijiene, iha loron-Kinta loraik, 12 fulan-Jullu tinan 2018, iha Hotel Timor, Dili.

Iha Serimonia enseramentu ne’e, Prezidente PN, Sr. Arão Noe de Jesus, iha nia diskursu rekomenda ba Ministériu Obras Públikas atu kontinua kontrola distribuisaun bee-moos ba komunidade no presiza konsiénsializa komunidade hodi labele estraga de’it bee ka halo ko’ak kanu iha dalan la tuir distribuisaun ne’ebé parte Servisu Agua no Saneamentu (SAS) fahe ona, tanba ne'e, afeita ba komunidade seluk defísil asesu ba bee-moos.

Prezidente PN hatete, komunidade barak halerik ba bee-moos maibé balun bee-moos estraga de’it, tanba laiha konsiénsia husi komunidade atu asegura distribuisaun bee-moos ne’ebé iha. Tanba ne’e, Prezidente PN husu la’os de’it hamosu projeitu foun maibé presiza haree ba kestaun sira ne’ebé iha.

Nune’e mós iha diskursu, S. Exa, Ministru Obras Públikas, Sr. Salvador Eugénio Soares dos Reis Pires, hatete, iha mandatu Oitavu (VIII) Governu Konstitusionál nian, governu sei halo esforsu hodi garante distribuisaun bee-moos ba komunidade sira, liuliu komunidade iha kapitál Dili, no mós iha área rurál sira.

Tanba ne’e, Sr. Ministru Obras Públikas hatete, Governu Konstitusionál daualu sei esforsu makaas atu tau orsamentu ba investimentu bee-moos, hodi distribui no garante fornesimentu bee-moos ba populasaun.

 

Ministériu Obras Públikas

#Media_MOP