MOP Simu Relatóriu Husi Vise Ministru Sesante

MOP Simu Relatóriu Husi Vise Ministru Sesante

 

Dili, Tersa 26 Juñu 2018 : S. Exa. Ministru Obras Públikas (MOP), Arq. Salvador Soares dos Reis Pires, iha serimonia Hand Over iha edifísiu Ministériu Obras Públikas, Transporte no Komunikasaun, Merkadu Lama, Dili, simu mós relatóriu husi Vise Ministru Reforma ba Dezenvolvimentu Institusionál sesante, Mariano Renato Monteiro da Cruz no Vise Ministru Dezenvolvimentu ba Abitasaun, Ordenamentu no Ambiente sesante, Abrão Gabriel Soares Oliveira, ne’ebé tutela ba ministériu MOP.

Iha diskursu ministru MOP foun iha Governu Konstitusionál daualu (VIII) ne’e agradese ba lider másimu Aliansa Mudansa ba Progresu (AMP), Prezidente AMP, Kay Rala Xanana Gusmão, Portavós AMP, Taur Matan Ruak atuál Primeiru Ministru (PM) no Konselleru AMP, José dos Santos ‘Naimori Bukar’ ne’ebé fó konfiansa hodi serví povu no nasaun iha mandatu oitavu Governu Konstitusionál nian.

Hanesan ministru MOP sei halo esforsu makaas hodi kontinua servisu ne’ebé halo ona ho nia vizaun sira mak, sei hametin konektividade entre rejiaun, mehi hakarak povu tenke asesu eletrisidade atinji pursentu 100, hadi’a polítika fornesimentu bee-moos ba komunidade, presiza iha laboratoriu nasionál no abitasaun ba komunidade sira.

“Abitasaun ba komunidade sira tanba povu atu moris di’ak, ne’e haree liu hosi kondisaun moris povu nian. Ita nia mehi mak povu Timor-Leste tenke iha moris ida prósperu”, ministru MOP hatete.

Tanba ne’e, durante mandatu VIII Governu Konstititusionál nian iha tinan lima nia-laran (2018-2023), governu liu hosi MOP sei halo esforsu nune’e bele kria konektividdade entre rejiaun liuliu ba iha área poténsiál sira hodi nune’e komunidade bele asesu ba estrada no merkadu. Nune’e mós sei halo servisu makaas iha tinan lima nia laran atu nune’e komunidade bele hasesu ba eletrisidade no bee-moos iha oras 24 nia-laran.

Atu atinji mehi sira ne’e ministru husu funsionáriu MOP nian hahú husi kliner to’o iha ministru sai ekipa ida de’it, apoiu malu, melhora servisu atendimentu ba públiu.

Iha serimonia entrega ne’e, Vise Ministru Reforma ba Dezenvolvimentu Institusionál sesante, Renato Monteiro, agradese ba funsionáriu sira ne’ebé apoiu ona servisu ministériu nian durante mandatu VII Governu Konstitusionál no rekomenda ba governu foun presiza kria laboratóriu nasionál ne’ebé di’ak, no oinsá mak iha polítika ne’ebé di’ak hodi hadi’a bee-moos no eletrisidade.

Aliende ne’e, ministru sesante ne’e mós husu oinsá mak fó kapasitasaun ba membru ka tékniku sira iha Obras Públikas nian hodi nune’e tékniku sira bele hatene didi’ak kona-ba materál no prosesu sira hodi nune’e bele garante kualidade obra.

Ministru sesante mós husu ba funsionáriu sira hodi koopera ho ministru foun hodi nune’e bele hala’o polítika ho di’ak hodi serví povu no nasaun.

Iha serimonia hand over ne’e, aliende hosi vise ministru sesante ba ministru MOP iha mós hand over husi Vise Ministru Transporte no Telekomunikasaunsesante ba Ministru Transporte no Komunikasaun.

Ministériu Obras Públikas

#Media_MOP