MOP Partilla Polítika Governu Ba Implementasaun Projetu Infraestrutura ho Kompañia Implementador Projetu Emerjénsia

MOP Partilla Polítika Governu Ba Implementasaun Projetu Infraestrutura ho Kompañia Implementador Projetu Emerjénsia

 

Dili, 12 Junnu 2020: S. Exa, Ministru Obras Públikas (MOP), Arq. Salvador Eugénio Soares dos Reis Pires, partilla ka fahe polítika no programa Governu Konstitusionál daualu (VIII) nian ba implementasaun projetu infraestrutura ba kompañia implementadór projetu emerjénsia bee no saneamentu ba rekoperasaun estragus afeitadu husi inundasaun iha loron 13 fulan-Marsu 2020.

Sr. Ministru partilla polítika no programa Governu nian ba emprezáriu sira iha ámbitu enkontru inisiasaun no asinatura kontratu ba projetu emerjénsia hamutuk neen (6) husi Diresaun Jerál Água no Saneamentu (DGAS) Ministériu Obras Públikas (MOP) nian ne’ebé sei hala’o durante tinan ida-ne’e nia-laran.

Sr. Ministru esplika, polítika Governu Konstitusionál daualu (VIII) nian ba implementasaun projetu infraestrutura hotu tenke tuir lei aprovizionamentu maibé projetu hirak ne’e tuir rekomendasaun husi ekipa Task Force katak projetu ne’e priense rekezitus tuir lei aprovizionamentu tama iha projetu emerjénsia.

Tuir mai intervensaun Sr. Ministru nian iha okaziaun enkontru inisiasaun no asinatura kontratu projetu emerjénsia bee no saneamentu iha edifísiu DNEPCC-DGOP Raikotu-Dili, ba rekoperasaun inundasaun 13 fulan-Marsu 2020;

Bom dia ba ita-boot sira hotu,

Siñór Diretór Jerál sira,

Diretór Nasionál sira,

Emprezáriu ou Diretór Kompañia sira,

Iha ne’e ha’u mós hakarak fahe ka partilla ba ita-boot sira polítika no programa VIII Governu Konstitusionál nian ba ita-boot, seitór privadu sira.

Ita-boot sira hatene katak Ministru Obras Públikas dala-barak la simu ta-boot sira iha nia eskritóriu ou servisu fatin tanba mudansa polítika ne’ebé mak ami hanoin ita tenke halo, tuir ita-nia programa Kinkinál Governu nian.

Ita-boot sira hatene katak ita-nia Planu Estratéjiku Dezenvolvimentu Nasionál (PEDN) hatuur investimentu setór tolu importante, ida mak infraestrutura, seluk ne’e sosiál no ekonómiku. Iha ne’eba governu hakarak halo investimentu boot iha infraestrutura, maibé kualidade obra ne’e rasik?, oinsá promove projetu ne’e rasik? Tenke igual ka hanesan ba ema hotu-hotu, boa governasaun ne’e komponente ida importante ba VIII Governu Konstitusionál, tanba ne’e, atu esklarese ba ita-boot sira katak misaun Ministériu Obras Públikas iha VIII Governu Konstitusionál nian mak atu hadi’a prestasaun servisu obras públikas nian, fornesimentu servisu ba ita-boot sira tuir regras ne’ebé iha, ho regras ne’ebé mak vigór, no mós promove transparánsia, kontabilidade no aumezmu tempu prevensaun korupsaun. Ha’u la hatete iha ne’e korupsaun ne’e burak ka oinsá maibé prevensaun ne’e importante, tanba ne’e prosesu hotu tenke bazeia ba regras ne’ebé mak iha.

Dezenvolvimentu setór privadu, ba ita-boot sira importante tebes, dala-barak ami ko’alia, iha timor laran tomak kuaze 5.000 resin emprezáriu lokál ita laiha paun hodi fahe ba ema hotu-hotu, tanba obra ne’e depende ba nesesidades, depende ba tarzetu meta programa kinkinál governu ida nian. Ne’ebé, dalan ne’ebé justu liu mak tuir tenderizasaun, depois ita-boot sira kompete ho ita-boot sira-nia rekursu tomak, aumezmu tempu, situasaun ne’e mós obriga ita-boot sira atu estratéjiku liután, maneja ita-boot sira-nia rekursu hanesan negósiu karik hatene hela koloka ita-boot sira-nia rekursu iha ida-ne’e, rai oituan para halo obra foun, ida ne’eba atu investe, ida-ne’eba atu diversifika no ida-ne’e mak ha’u gasta ba operasaun, ne’ebé, ida-ne’e sei kontribui maka’as ba ita-boot sira-nia dezenvolvimentu seitór privadu ne’ebé ita-boot sira hola parte ba, no mós sai fali parséiru importante ba Governu. Ikus liu, see ita-boot sira mak riku, avansadu liu, ita-boot sira ajuda fali Governu hodi kria empregu ba timoroan sira, tanba ne’e, la’os governu mesak de’it mak iha responsabilidade atu fó empregu ba ita-nia ema sira maibé ita-boot sira mós hanesan parséiru atu ajuda governu kriasaun kampu traballu liuhosi ita-boot sira-nia negósiu, ida-ne’e mak ami hanoin importante tebes.

Hanesan ohin Diretór Jerál Obras Públikas (DGOP) hanesan Koordenadór Task Force dehan, importante tebes katak ita-nia fundu foin daudauk ne’e limita tebes husi duo-desimál, ami iha KAFI (Konsellu Administrasaun Fundu Infraestrutura) ami buka tuun buka sa’e, muda rekursu hodi tau netik para atu halo projetu emerjénsia ida-ne’e, ne’eduni kumprimentu ba kalendáriu husi projetu ne’e rasik importante, Sr. Primeiru Ministru, nia preokupadu tebes katak projetu hotu-hotu ne’ebé emerjénsia sai fali multi-anuál, ne’e nia la kompriende, ne’ebé ami tenta kalendáriu sira ne’e hotu, ekipa Task Force ne’e iha, ho ekipa SAS-DNSA (Servisu Água no Saneamentu – Diresaun Nasionál Servisu Água) nian liuhosi DGAS servisu hamutuk ho ita-boot sira, atu nune’e ita-boot sira présta servisu tuir kalendáriu no ho kualidade, para, see ita loke fali tenderizasaun tanba ita-boot sira prestasaun servisu, iha esperiénsia ho ita-boot sira-nia kapasidade finanséiru, jestaun no buat seluk tan bele fó vantazen barak liu ba ita-boot sira atu kompete, ne’ebé ida-ne’e mak ami tenta atu promove.

Tanba saida mak ohin ha’u mensiona katak dezenvolvimentu setór privadu ne’e importante?, tanba, ba ami hanesan ministru tutela komprende katak operasaun husi kompañia sira ne’e depende kas keuangan, cash flow, fluxo de caixa, see ita-boot sira ba halo projetu ruma ne’ebé ajudikadu depois laiha kontratu see mak sai vítima, ita-boot sira, ne’ebé iha ne’e ita tenta atu ajuda malu, nune’e obra sira ne’ebé mak ita-boot sira présta, imi gasta tiha rekursu, gasta tempu, ita-boot sira tenke hetan duni benefísiu, husi projetu ne’ebé iha benefísiu mútua entre governu ho ita-boot sira no mós ita-nia tarzetu mak kria ambiente ka kontribui ba dezenvolvimentu sósiu-ekonómiku povu nian, liuliu kresimentu ekonómiku liuhosi kriasaun empregu.

Ita-boot sira tenke hatene, ba governu importante tebes katak kada dollar ida, sentavus ida ne’ebé ita investe husi obra públiku, ne’e povu nian hotu, ne’e tenke iha retornu ekonómiku, loos ga lae? Não vale a pena, governu fahe de’it projetu ba ita-boot sira para setór privadu kontente maibé la sustenta nia kualidade para longu prazu atu atinji vizaun ida boot ne’ebé ita dehan kresimentu sósiu-ekonómiku ne’e, ne’ebé tau tiha ona iha ita-nia PEDN ne’ebé sai mata-dalan ba ita, ida-ne’e mak ami-nia preokupasaun, intensaun, vizaun, no misaun iha ministériu, ne’ebé sei hala’o durante mandate VIII Governu Konstitusionál, no ami prontu loos atu sai ita-boot sira-nia parséiru.

Ha’u hanoin ita-boot sira importante hetan oportunidade maibé tenke iha kontabilidade, oinsá ami fó projetu ida ba ita-boot sira, loos ga lae? Tuir regras mak tenke ba tenderizasaun prosesu aprovizionamentu nian. Hanesan ohin Diretór Jerál ko’alia iha prosesu aprovizionamentu ne’e rasik, Komisaun Nasionál Aprovizionamentu (CNA) mak ne’e, iha lei aprovizionamentu hatete katak azustu direita ne’e mós iha maibé iha artigu 92 no 94 iha lei aprovizionamentu nian hatete katak obra ne’e sai emerjénsia kuandu nia priense rekezitu katak estragus ka akontesimentu ida fó risku ba vida no seguransa públika ema-nian.

Iha projetu totál 28 husi akontesimentu inundasaun, dezastre naturais loron 13 Marsu, iha obras públikas nian estrada, ponte no kontrolu seias, no mós água no saneamentu nian hamutuk 16 mak priense rekezitus ba azustu direitu tuir artigu 92, 94 lei aprovizionamentu nian, projetu 12 husi Diresaun EDTL nian la priense rekezitus no agora ami halo hela prosesu normál atu loke tenderizasaun ba kompañia sira.

Iha oportunidade ida-ne’e, ha’u kontenti tebes mai fahe, komunika polítika VIII Governu Konstitusionál ba ita-boot sira tanba ita la hasoru malu loron-loron, ne’ebé iha eventu sira ne’e ha’u sempre uza oportunidade para atu komunika polítika VIII Governu Konstitusionál nian ba ita-boot sira, atu nune’e ita-boot sira bele kompriende. Dala idatan ita-boot sira tenke hanoin paun fuan rua ka tolu de’it iha meja leten, imi nain sanolu ne’e, ita atu deside fó loos ba see, see mak merese liu, loos ka lae? Di’ak liu ita-boot sira kompete depois bazeia ba ita-boot sira-nia rekursu, ita-boot sira-nia kapasidade finanséira, esperiénsia no seluk tan, ita-boot sira bele manán iha konkursu ne’e.

Molok atu taka, ha’u husu ba ita-boot sira-nia seriedade, kalendáriu ne’e importante, kualidade ne’e importante ba ita-boot sira katak ami kria CPV ba tinan ne’e de’it, tinan oin laiha ona, ne’ebé ita-boot sira tenke priesta iha tinan ida-ne’e tanba projetu ne’e projetu emerjénsia no ami sei iha defikuldae barak atu esplika extensaun projetu emerjénsia ba Konsellu Ministru ka Parlamentu Nasionál atu hetan fali osan para atu sustenta ita-boot sira-nia obras ne’e, ne’ebé CPV ida ami kria la’os multi-anuál, ne’e CPV anuál, tinan ida-ne’e de’it, ne’ebé dala ida de’it para ita-boot sira présta depois hetan pagamentu iha tinan ida-ne’e, tuir kalendáriu.

Aliende ne’e, favór ida ezekuta ho kualidade komunika ho ami-nia Task Force, ami-nia diresaun sira, see ita-boot sira iha defikuldade ruma ko’alia ho sira hala’o obra, no ita-boot sira parséiru ami-nia.

 

Ikus liu, ha’u hakarak agradese ba ekipa Task Force DGOP hanesan koordenadór no komisaun interministeriál, diretór sira husi ajénsia interministeriál ne’ebé mak hola parte iha ekipa Task Force, ba ita-boot sira-nia servisu, dedikasaun hodi ita to’o iha rohan ida-ne’e.

Ha’u kontente tebes tanba ne’e projetu emerjénsia maibé ita-boot sira iha kontratu, ita-boot sira sei laiha problema ho pagamentu kuandu ita-boot sira présta servisu, baze legál mak kontratu ba halo pagamentu, ida-ne’e fazparte husi proteze ita-boot sira-nia negósiu, ha’u mós la hasai fó de’it ba ita-boot sira laiha kontratu, aban bainrua imi ba investe tiha hotu, imi lori imi-nia faktura mai, ministru tuir mai ka ha’u dehan ida-ne’e kontratu laiha ha’u atu selu ita-boot sira halo nusa, ne’ebé ezersísiu ne’e sai ezemplar ba ita hotu no nia komprimentu ba lei aprovizionamentu hanesan mós horbainhirak Diretór Aprovizionamentu fó hanoin ha’u priense rekezitus husi Tribunál das Contas, rekomendasaun sira dehan ita-boot sira atu promove obra ida tenke tuir rekezitus sira liuliu obra emerjénsia tuir artigu 92 no 94 ne’e, ida-ne’e mak ami halo.

Ita-nia prosesu ne’e tomak transparante no ami sei emvia ami-nia relatóriu maske husi $5 milloens mai kraik maibé ami hakarak haruka ami-nia ezekusaun ne’e antisipadamente, nia prosesu ne’e tomak ba Tribunál das Contas, no KAK (Komisaun Anti Korupsaun) para atu verifika prosesu ne’e tomak, atu nune’e transparante ba ema hotu. Obra ne’e atu proteje mós ita-boot sira halo duni tuir lei ne’ebé vigór no asegura ita-boot sira-nia negósiu.

Ajudikasaun ne’e bazeia ba depaxu husi S. Exa, Primeiru Ministru (PM), Sr. Taur Matan Ruak, ne’ebé iha ne’eba fó kompeténsia ba ekipa Task Force konsege akumula duni, halo levantamentu dadus tékniku no aprezenta ba iha Konsellu Ministru no mós KAFI hodi foti desizaun, no iha etapa lubuk ida, iha kustu prelimináriu bainhira sira halo estudu ka levantamentu dadus tékniku detallu liután, no hetan fali kustu ne’ebé loos liu ne’ebé mak ohin ita-boot sira tama kontratu no asina kontratu para komesa obra sira ne’e.

Ha’u hanoin mak ne’e de’it Obrigado barak, ha’u kontente tebes mai hasoru ita-boot sira atu komunika ami-nia hanoin.

Ida-ne’e mak ha’u hakarak ko’alia ho ita-boot sira, Boa Sorte no Bom Trabalho.

Ha’u fiar katak ita-boot sira sei la husik hela fiar ne’ebé Governu fó ba ita-boot sira monu ba rai

Obrigado barak.

Ministériu Obras Públikas 

#Media_MOP