MOP Selebra Festa Natál 2020 No Tinan Foun 2021 Ho Família Boot Obras Públikas

MOP Selebra Festa Natál 2020 No Tinan Foun 2021 Ho Família Boot Obras Públikas

DILI, 18 DEZEMBRU 2020: S. Exa, Ministru Obras Públikas (MOP), Arq. Salvador Eugénio Soares dos Reis Pires, realiza festa Natál 2020 no tinan foun 2021 ho funsionáriu tomak Ministériu Obras Públikas nian.

Sr. Ministru hato'o Felíz Natál 2020 no Prósperu Tinan foun 2021 ba família boot Ministériu Obras Públikas nian.

“Feriadu besik to’o ona, ha’u deseja Felíz Natál no mós Prósperu Anu Novu ba ita-boot sira hotu, ba ita-boot sira-nia família, komprimentus ba sira, agradesimentu, hato’o ha’u-nia komprimentus no agradesimentu ba ita-boot sira-nia dedikasaun serví iha Ministériu Obras Públikas. Espera katak ita-boot sira enjoy (festeza) ita-nia festa ne’e hamutuk ho Ministru, Vise Ministru ho Diretór sira, Diretór Nasionál, Xefe Departamentu no funsionáriu tomak ita hanesan família boot Obras Públikas nian,” Sr. Ministru Obras Públikas hato’o liuhosi nia intervensaun iha Festa Natál hamutuk iha edifísiu MOP, Kaikoli, Dili.

Sr. Ministru mós hato’o agradesimentu ba funsionáriu tomak iha diresaun sira hanesan Diresaun Jerál Administrasaun Finansas (DGAF), Diresaun Jerál Obras Públikas (DGOP), Diresaun Jerál Água no Saneamentu (DGAS), Diresaun Jerál Eletrisidade (DGE), Diresaun Jerál Habitasaun no Urbaniizmu (DGHU), inklui funsionáriu sira husi Institutu Jestaun no Ekipamentus (IGE) no Unidade Manajementu Projetu (PMU) estrada nian ne’ebé durante tinan 2020 nia-laran halo servisu maka’as hodi atende nesesidade no preokupasaun populasaun sira-nian.

“Ha’u hein hela tempu ida-ne’e atu hamutuk fali ho ita-boot sira selebra, festeza hamutuk depois de tinan naruk ne’e ita servisu maka’as loos, ha’u hatene katak tinan 2020 tinan ida ke susar barak pandémia COVID-19, depois ita iha inundasaun, ita iha dezastre ita-nia staff mate, alin sira ne’ebé mak mai servisu ho ita mós hetan dezastre. Ha’u agradese loos ba ita-boot sira-nia servisu, liuliu ita-nia staff tékniku sira durante ne’e, apezar de ita iha susar bar-barak ita hamutuk ita konsege ultra pasa, presta duni ita-nia kna’ar para atu hakma’an nasaun ne’e nia todan, ha’u hakarak hato’o parabéns ba ita-boot sira hotu ba ita-boot sira-nia dedikasaun no servisu maka’as iha 2020 ne’e”.

Sr. Ministru hatutan “Ha’u hanesan ministru, dala-barak eziji Diretór jerál sira, Prezidente IGE, no mós Diretór Nasionál no Xefe Departamentu sira atu servisu tanba ita-nia kna’ar hanesan servidór estadu, inklui mós ha’u, Ita-nia servisu mak présta infraestrutura bázika ba povu tomak, kuandu ita la hala’o ita-nia servisu, ema barak nia vida hetan afeitadu. Dala-barak ha’u siak oituan ho ita-boot sira, Diretór Jerál, Diretór Nasionál no Xefe Departamentu sira tanba de’it kna’ar ne’ebé mak ita lori, ha’u hanoin katak ita-nia sentimentu responsabilizasaun ne’ebé tula iha ita-nia kabaas katak see ita la présta ita-nia servisu sei fó impaktu negativu ba ita-nia povu sira. Apezar de ita-nia relasaun umanu entre individu ha’u ho Diretór Jerál, Diretór Nasionál no Xefe Departamentu sira hanesan ema baibain maibé ita-boot sira tenke komprende katak ne’e instituisaun Governu nian ha’u-nia kna’ar atu superviziona ita-boot sira no kontinua halo milloramentu lori instituisaun ne’e ba oin”.

Akresenta liután “Dala-barak ha’u ho Diretór Jerál no staff sira, ami halimar iha tempu ne’ebé folga ou iha tempu servisu mós, maibé ha’u-nia ejijénsia mak ita senke halo nafatin ita-nia servisu, ha’u la presiza tuir ita-boot sira hanesan ha’u-nia staff ida maibé bainhira ha’u presiza ita-boot sira atu présta tuir tempu, prestasaun ne’e tenke iha, ida-ne’e mak responsabilizasaun, ita-boot sira tenke hatudu, ha’u hatene katak iha limitasaun oioin, rekursu finanseira, birokrasia oioin ne’ebé iha, ita la’os mesak de’it maibé ita-nia servisu mós tenke superviziona husi ministériu sira seluk, hanesan MPO (Ministériu Planu Ordenamentu), ADN (Ajénsia Dezenvolvimentu Nasionál), Ministériu Finansas Sentrál ne’ebé presiza ita atu ativu liután, komunika atu lori ita-nia servisu ne’e ba oin, tanba ida-ne’e mak birokrasia Governu nian ne’ebé eziste, maibé ha’u hakarak hato’o parabéns ba ita-boot sira”.

Iha oportunidade ne’e, Sr. Ministru Obras Públikas mós hato’o felisitasaun S. Exa, Primeiru Ministru (PM), Sr. Taur Matan Ruak, nian ba ministériu tomak inklui mós Ministériu Obras Públikas liuliu ba funsionáriu tomak ne’ebé halo servisu maka’as hodi prepara planu no programa ba proposta Orsamentu Jerál Estradu (OJE) 2021 nian ne’ebé Parlamentu Nasionál (PN) aprova ona iha semana kotuk no hein hetan promulgasaun husi S. Exa, Prezidente Repúblika (PR), Sr. Francisco Guterres Lú Olo.

“Ha’u hakarak hato’o mós felisitasaun husi S. Exa Primeiru Ministru nian, Konsellu Ministru ikus agradese ba ministériu hotu-hotu, kazu ida-ne’e ba Ministériu Obras Públikas ba kargu sefia sira no mós staff sira hotu, ho ita-boot sira-nia servisu maka’as halo ita-nia OJE 2021 posível no hetan ona aprovasaun iha Parlamentu Nasionál iha semana hirak liubá,”Sr. Ministru hatete.

Aliende ne’e, Sr. Ministru Obras Públikas mós simu taxa no entrega sertifikadu rekoñesimentu ba ekipa jogadór MOP nian feto no mane ne’ebé manán durante jogu iha tinan 2020 nia-laran inklui sai terséiru lugár iha expozisaun ba Komemorasaun Loron Proklamasaun Independénsia 28 Novembru 2020 nian ne’ebé komemora iha munisípiu Likisa.

Atividade festa Natál 2020 no Tinan foun 2021 hamutuk ne’e Ministériu Obras Públikas realiza tanba hetan kontribuisaun orsamentu husi funsionáriu sira-nian hahú husi Gabinete Ministru, Gabinete Vise, Diresaun Jerál, Diresaun Nasionál, no funsionáriu tomak inklui husi IGE nian.

#Media_MOP