MOP Partisipa Iha Workshop Realiza Husi MCC

MOP Partisipa Iha Workshop Realiza Husi MCC

Dili, Tersa, 02 Outubru 2018: S. Exa, Ministru Obras Públikas (MOP), Arq. Salvador Eugénio Soares dos Reis Pires, iha Tersa-feira ne’e partisipa iha workshop ne’ebé realiza husi Millennium Challenge Corporation (MCC) hamutuk ho governu Timor-Leste, liuhosi Ministériu Reforma Lejislativa no Asuntu Parlamentár (MRLAP) ba programa tinan 5 nian.

Workshop ne’e hala’o iha salaun CNE, Lalini Larigutu, Kolmera, Dili, durante loron rua nia-laran hahú husi loron 2 to’o 3 fulan-Outubru, pontu fokál husi kada ministériu tuur hamutuk, kria diskusaun ho apoiu ekipa MCC husi Washington, Estadu Unidus Amerika (EUA) nian, guia diskusaun ne’e, depois mak sei identifika hamutuk abut husi kontranjimentu ekonómiku sira no dezenvolve hamutuk ho programa ba tinan lima nian.

Nune’e, workshop ne’e hanesan halo analizasaun ba problema nia huun sira no konsultasaun oinsá mak bele resolve problema sira ne’ebé Timor-Leste infrenta.

Programa ne’e sei hetan apoiu finanséiru husi EUA liuhosi programa MCC nian, no servisu hamutuk ho Governu Timor-Leste durante tinan 5 nia-laran.

Rekoñesimentu ne’ebé MCC iha ba Timor-Leste hodi fó apoiu finanséiru mak, EUA konsidera Timor-Leste hanesan nasaun ida ne’ebé iha kualidade institusionál, nasaun ida ne’ebé iha demokrasia, nasaun ida ne’ebé iha vontade boot atu investe osan públiku nian ba hadi’ak povu nia moris, no hanesan nasaun ne’ebé iha vontade boot atu uza osan públiku nian hodi hadi’ak kualidade rekursu umanus iha rai-laran.

Workshop ba loron dahuluk ne’e hetan partisipasaun husi, S. Exa, Ministru Reforma Lejislativa no Asuntu Parlamentár (MRLAP), Sr. Fidelis Magalha?s, S. Exa, Ministru Obras Públikas (MOP), Arq. Salvador Eugénio Soares dos Reis Pires, S. Exa, Ministru Justisa (MJ), Sr.Manuel Cárceres da Costa, S. Exa, Vise Ministra Saúde (MS), Sra. Élia António de Araújo dos Reis Amaral, S. Exa, Sekretária Estadu ba Igualidade no Inkluzaun (SEII), Sra. Maria José da Fonseca Monteiro de Jesus, S. Exa, Sekretáriu Estadu Formasaun Profesionál no Empregu (SEFOPE), Sr. Julião da Silva, inklui embaixadora EUA mai Timor-Leste, Sra. Kathleen M. Fitzpatrick, no Prezidente Komisaun Funsaun Públika (KFP), Sr. Faustino Cardoso.

Workshop ne’e abertura husi S. Exa, Ministru Reforma Lejislativa no Asuntu Parlamentár (MRLAP), Sr. Fidelis Magalha?s, no embaixadora EUA mai Timor-Leste, Sra. Kathleen M. Fitzpatrick.

 

Ministériu Obras Públikas

#Media_MOP