MOP Loke Ponte Comoro III ba Públiku, Ofisialmente Inagura Iha Outubru

MOP Loke Ponte Comoro III ba Públiku, Ofisialmente Inagura Iha Outubru

Dili, Kinta, 13 Setembru 2018: S. Exa, Ministru Obras Públikas (MOP), Arq. Salvador Eugénio Soares dos Reis Pires, ofisialmente loke ponte Comoro III ba públiku, hodi fasilita movimentasaun transporte públiku no privadu inklui komunidade iha ponte Comoro.

Ponte ne’e ofisialmente sei inagura iha fulan-Outubro tinan ida-ne’e, liuhosi vizita S. Exa, Ministru Negósiu Estranjéiru (MNE) Japaun nian, Sr. Taro Kono, mai Timor-Leste.

Iha serimonia entrega husi Embaixadór Japaun liuhosi ajénsia Japaun nian ba Governu Timor-Leste ne’e, no kontinua loke Ponte Comoro III ne’e ba públiku hodi utiliza ponte refere.

“Ha’u hakarak lori governu nia-naran liuhosi Ministériu Obras Públikas agradese ba Governu no povu Japonés ba tulun ne’ebé mak fó ona mai Timor-Leste liuhosi governu ba konstrusaun Ponte ho osan pruvolta millaun 16 resin,” Sr. Ministru hatete.

Aliende ponte ne’e, JICA mós halo konstrusaun estrada hodi hatutan estrada ejistente ne’ebé liga husi Delta ba to’o Rai-Kotu, inklui tuun husi Rai-Hun, Kampun-Baru nian ba to’o rotunda, Comoro nian.

Ministru Obras Públikas mós agradese ba komunidade suku Comoro liuliu iha fatin konstrusaun Ponte Comoro nian ne’ebé iha kooperasaun di’ak no fó apoiu makaas ba konstrusaun ponte refere ho susesu.

Sr. Ministru Obras Públikas garante katak Ponte Comoro III iha kualidade ne’ebé di’ak tanba kontrusaun ne’e hetan supervizaun másimu husi tékniku MOP.

“Ha’u fiar ponte ne’e kualidade di’ak tanba ita halo la’os halo de’it ninia supervizaun, kolaborasaun ho Ministériu Obras Públikas ho tékniku sira, ne’ebé sira rigurozu tebes ho kualidade no servisu ne’e etapa por etapa no hetan supervizaun másimu,” Sr. Ministru garante.

Naran ba ponte ne’e, daudauk ne’e governu kordena ona ho embaixada Japaun iha Timor-Leste no governu rasik mós sei deside naran ba Ponte refere, tanba ne’e hein inagurasaun ofisiál mak sei públika naran ba ponte refere.

Iha fatin hanesan, embaixadór Japaun mai Timor-Leste, Sr. Hiroshi Miami, kontente sai sasin ba abertura Ponte Comoro III, ne’ebé sei fasilita movimentasaun transporte públiku, privadu no komunidade iha área refere.

Sr. Embaixadór hatete, Japaun fó apoiu ona ba Timor-Leste iha área infra-estrutura oioin ba dezenvolvimentu Timor-Leste nian.

Embaixadór ne’e mós agradese ba kompañia Japonés sira ne’ebé kontrui ona ponte Comoro III tuir tempu ne’ebé determina.

Iha serimonia ne’e hetan partisipasaun husi Ministru Transporte no Komunikasaun (MTK), Joé Agostinho, embaixadór Japaun mai Timor-Leste, reprejentante ajénsia Internasionál JICA iha Timor-Leste, Xefe-suku Comoro, Eurico Guterres, xefe-aldeia no komunidade sira iha área refere.

Atu fó hanoin fila-fali katak, Ponte Comoro III ne’e finansia husi Governu Japaun ho totál orsamentu Japaun nian ¥1.690.000.000,00 (Yen Japaun) ba orsamentu dollar Amerikanu nian hamutuk $16.171.610,00.

Ponte ne’e konstrui husi konsultan Nippon Engineering Consultants Co. Ltd and Idea Consultans,Inc, e Contractor Tobishima Corporation.

Periodu kontratu ba konstrusaun ponte Comoro III iha loron 4 fulan-Junnu 2016 to’o loron 31 fulan-Agostu tinan 2018, ponte nia naruk metru 250 no luan metro 11.50, no estrada nia naruk ho luan mak 3.2 Kilometru + 14 metru, no kona-ba tipu ponte ne’e mak PC Box Grider Bridge.

 

Ministériu Obras Públikas

#Media_MOP