MOP Lidera Enkontru Ba Konstrusaun Estrada Rotunda To’o Tasi-Tolu

MOP Lidera Enkontru Ba Konstrusaun Estrada Rotunda To’o Tasi-Tolu

DILI, 04 JENÉIRU 2021: S. Exa, Ministru Obras Públikas (MOP), Arq. Salvador Eugénio Soares dos Reis Pires, akompaña husi S. Exa, Vise Ministru Obras Públikas (Vise MOP), Eng. Nicolau Lino Freitas Belo, hala’o enkontru ho Diretór Jerál no Unidade Manajementu Projetu (PMU) hodi ko’alia kona-ba konstrusaun estrada nasionál husi Rtunda to’o Tasi-Tolu.

Iha enkontru ne’e Sr. Ministru Obras Públikas ko'alia liu kona-ba preparasaun Governu nian liuhosi MOP servisu hamutuk ho Ministériu Finansas atu aselera konstrusaun estrada protokolu trosu rotunda Presidente Nicolau Lobato ba to'o iha inter-seksaun Tibar nian (Section 1, naruk hamutuk 1,9 KM), Prosesu preparasaun dokumentasaun ba projeitu refere tuir rekizitus ADB (Banku Dezenvolvimentu Aziátiku) nian iha faze revisaun no halo technical due diligence.

Iha loron 22 fulan-Maiu 2020 liuhosi tele-konferénsia, MOP husu ona ADB nia apoiu atu utiliza balansu (Saldo) husi fundus impréstimu ba projetu sira ne’ebé iha hodi finansia ba estrada refere ne’ebé estratéjiku tebes ba Timor-Leste tamba fasilita no sei hasa'e mobilidade ema no sasán liuliu relasiona ho operasionalizasaun Portu Baya Tibar nian iha tinan 2021.

Relasiona ho dokumentu sira ne’ebé Governu submete ba ADB, daudauk ne’e, ADB haruka ona nia péritu mai hodi halo análiza no avalia prosesu preparasaun sira, tanba ADB konsiente katak projetu refere importante tebes, maibé tamba de'it pandémia Covid-19 nune’e dada tempu oituan ba avaliasaun dokumentu sira ne’e.

Antes ne’e, Governo Timor-Leste iha mós akordu ho kompañia ne’ebé daudaun ne’e halo konstrusaun ba Portu Baya Tibar, katak estrada refere tenke finaliza iha fulan-Agustu 2021, maibé ho situasaun polítika no pandémia Covid-19 mak extende ona to’o fulan-Maiu tinan 2022 hodi finaliza projetu refere.

Iha oportunidade ne’e, S. Exa, Ministru Obras Públikas hato’o Boas Festas no Boas Entradas iha tinan foun 2021 ba Sr. Vise Ministru no Diretór Jerál no tékniku sira ne’ebé partisipa iha enkontru ne’e.

Entertantu, enkontru ne’e partisipa husi Diretór Jerál Obras Públikas (DGOP) Eng. Rui Hernani Freitas, reprezentante husi Ministériu Finansas (MF), inklui partisipa mós husi Jerente Unidade Manajementu Projetu (PMU-sígla Inglés), estrada, Sr. Sidónio da Costa Freitas, no tékniku sira.

#Media_MOP