Konsellu Ministru Delibera nomeasaun Dr. Paulo da Silva ba Prezidente EDTL,E.P no Eng. Carlos Peloi ba Prezidente BTL,E.P

Konsellu Ministru Delibera nomeasaun Dr. Paulo da Silva ba Prezidente EDTL,E.P no Eng. Carlos Peloi ba Prezidente BTL,E.P

DILI, 06 JANÉIRU 2021: Konsellu Ministru liuhosi liuhosi proposta S. Exa, Ministru Obras Públikas (MOP)nian, Arq. Salvador Eugénio Soares dos Reis Pires, delibera hodi nomea Dr. Paulo da Silva, nu’udar Prezidente Konsellu Administrasaun Eletrisidade Timor Leste E.P (EDTL,E.P.) no nomea Eng. Carlos Peloi dos Reis, nu’udar Prezidente Konsellu Administrasaun Bee Timor-Leste, E.P (BTL,E.P). Sira-na’in rua hetan nomeasaun ba períodu tinan haat.

Konsellu Ministru mós delibera ona kona-ba projetu deliberasaun ne’ebé aprezenta husi S. Exa, Ministru Finansas (MF), Sr. Rui Agusto Gomes, kona-ba fornesimentu kombustível nian ba sentrál elétrika Hera, ne’ebé determina hodi hala’o konkursu públiku internasionál no aprovizionamentu tranzitóriu ho períodu másimu fulan-ualu.

S. Exa, Primeiru-Ministru no Ministru Interiór, Sr. Taur Matan Ruak, no Sekretáriu Estadu Protesaun Sivíl, Sr. Joaquim José Gusmão dos Reis Martins, aprezenta opsaun polítika-lejizlativa sira hanesan baze ba projetu kona-ba Orgánika Autoridade Protesaun Sivíl nian. Projetu ne’e ho objetivu atu define atribuisaun, kompeténsia sira no estrutura orgánika Autoridade Protesaun Sivíl nian, liuliu iha prevensaun no reasaun ba asidente grave sira no katástrofe, prevensaun no protesaun ba populasaun no superintendénsia ba atividade sira bombeirus nian.

Ikus liu, S. Exa, Ministru Koordenadór Asuntus Ekonómikus, Sr. Joaquim Amaral, halo aprezentasaun ida kona-ba projetu ne’ebé iha relasaun ba Fundu Klimátiku Matak- Salvaguarda ba Komunidade Rurál sira no ninia Ativu Fíziku sira kontra Dezastre ne’ebé kauza husi Klima iha Timor Leste” iha ámbitu Fundu Matak ba Klima ne’e.

Fundu ida-ne’e hakarak atu limita no hamenus emisaun gás sira ho efeitu estufa nian iha nasaun sira ne’ebé iha hela faze dezenvolvimentu nia laran no tulun sosiedade vulnerável sira hodi adapta-an ba impaktu hirak ne’ebé labele evita husi mudansa klimátika. Fundu ne’e hahú iha fulan-marsu tinan 2020 no sei implementa to’o fulan-marsu tinan 2026, ho objetivu atu apoiu populasaun rurál sira, ne’ebé kona barak liu ameasa oioin tanba kauza husi klima, ho aumentu ba kapasidade adaptasaun nian, rezilénsia no resposta ba alterasaun klimátika sira.

Entre atividade oioin iha ámbitu projetu ida-ne’e, inklui kriasaun ba sistema saneamentu báziku, sistema irrigasaun nian, reflorestasaun no konstrusaun no reabilitasaun ba infraestrutura sira.

#Media_MOP