DILI, 15 ABRIL 2020: S. Exa, Ministru Obras Públikas (MOP), Arq. Salvador Eugénio Soares dos Reis Pires, partisipa iha reuniaun Konsellu Ministru ne'ebé lidera husi S. Exa, Primeiru Ministru (PM), Sr. Taur Matan Ruak, iha CCD, Dili.
Iha reuniaun Konsellu Ministru ne'e assisti aprezentasaun husi S. Exa, Ministru Koordenadór Asuntus Ekonómiku iha ezersisiu, Sr. Fidelis Manuel Leite Magalhäes, kona-ba polítika ekonómika hodi hatán ba COVID-19. Durante aprezentasaun governante ne'e mós hato'o previzaun sira husi konsekuénsia ekonómika ba COVID-19 no iha respostas ne'ebé posível hodi bele implementa tuir akordu ho evolusaun ba situasaun nasionál no aprezenta mós prioridade sira hanesan apoiu ba distansiamentu sosiál no saúde, protesaun ba ema no ba ema sira ne'ebé mak vulneráveis liu no apoiu ba traballadór no empreza sira.
Konsellu Ministru aprova ona projetu Dekretu Governu, ne'ebé aprezenta husi S. Exa, Ministra Finansas iha ezersisiu, Sra. Sara Lobo Brites, kona-ba regras ezekusaun sira husi despeza Fundu COVID-19, Fundu ida ne'e, kria liuhusi Lei n. 2/2020, loron 6 fulan- abril no regulamenta husi Decreto-Lei n. 12/2020, loron 14 fulan-abril, ho objetivu atu finansia despeza sira ne'ebé relasiona ho prevensaun no kombate ba COVID-19.
Dekretu Governu ne'ebé agora hetan aprovasaun hodi estabelese regras ezekusaun ba despeza husi Fundu COVID-19, sei defini prosedimentu ne'ebé Ministériu sira hotu tenke lao tuir, órgäun autónomu sira ne'ebé mak laiha reseita própria no servisu autónomu hodi submete ba Fundu atu hatán ba pagamentu kona-ba medida prevensaun sira no kombate COVID-19.
Prosedimentu konsiste iha preparasau ba planu asaun ne'ebé integra kada medida prevensaun no kombate COVID-19 sei ezekuta husi entidade, kalendarizasaun ba medida no ninia kustu.
Planu asaun sira ne'e hetan ona apresiasaun husi Komisaun Interministerial Koordenasaun Implementasaun Medida Prevensaun sira no Kontrolu ba Surto Coronavirus foun, ne'ebé sei avalia ninia adekuasaun ba estratéjia nasionál prevensaun no kombate COVID-19. Despeza sira hotu tama iha planu asaun ne'ebé sei selu depois liuhosi Fundu COVID-19, tuir akordu ho mekanizmu ne'ebé kria ona.
0 Comments:
Posting Komentar