DILI, 16 MARSU 2020: S. Exa, Ministru Obras Públikas (MOP), Arq. Salvador Eugénio Soares dos Reis Pires, hafoin akpompaña S. Exa, Primeiru Ministru (PM), Sr. Taur Matan Ruak, iha Segunda (16/03) loraik, fó kedas orientasaun ba Diretór Jerál no Nasionál sira halo atendimentu emerjénsia ba bareira no moru protesaun iha mota Bemori liuliu ponte My Friend nian, iha ponte Bekussi no iha ponte Maufelu Merkadu Bekora nian, inklui iha fatin seluk.
Nune’e, Diresaun Jerál Obras Públikas (DGOP) sei halo konstrusaun ba moru protesaun iha mota ninin ho emerjénsia iha área ne’ebé afeitadu. Diresaun Jerál Água no Saneamentu (DGAS) sei rezolve kanalizasaun bee-moos ba komunidade liuliu komunidade área Taibessi, Bekussi no fatin seluk ne’ebé kanu hetan estragus husi mota iha loron 13 fulan-Marsu 2020.
Diresaun Jerál Eletrisidade (DGE) sei buka solusaun emerjénsia ba tore enérjia eletrisidade iha Timor laran tomak ne’ebé sai ameasadu monu, nune’e labele afeita ba distribuisaun enérjia eletrisidade iha Timor laran tomak.
Ekipa husi Institutu Jestaun Ekipamentus (IGE) kontinua mantein ekipamentu pezadu iha mota Bemori, Bekusi no fatin seluk tan hodi halo normalizasaun no hasai sedimentasaun ne’ebé nakonu iha mota laran.
0 Comments:
Posting Komentar