DILI, 30 MARSU 2020: S. Exa, Ministru Obras Públikas (MOP), Arq. Salvador Eugénio Soares dos Reis Pires, iha Segunda-feira ne'e hala'o enkontruho direun sira hodi fó orientasaun ba diresaun Eletrisidade Timor-Leste (EDTL) no Diresaun Jerál Água no Saneamentu (DGAS) hodi prepara subsídiu ba konsumidores sira iha Timor laran tomak iha tempu badak nia-laran.
Subsídiu ba konsumidores enérjia eletrisidade ne'ebé deside ona tuir rendimentu kada fulan nian, mak sei fó subsídiu dollar US $10 ka pruvolta US $15 dollares iha fulan ida nia-laran durante periódu Estadu Emerjénsia.
Tuir mai intervista Jornalista sira ho Sr. Ministru hafoin hala'o enkontru ho diresaun sira iha edifísiu EDTL-MOP, Kaikoli, Dili.
Jornalista: Sr. Ministru bele esplika kona-ba ohin enkontru ho xefe departamentu sira?
Sr. Ministru: Ohin, ami ko'alia kona-ba preparasaun atu fó subsídiu eletrisidade no bee-moos ba konsumidores iha teritóriu tomak. Iha ne'e ami halo diskusaun kona-ba preparasaun sira hanesan produs Token , agora ita prodús hela token ne'e. Ida fali tan mak horsida loraik ami-nia diretores relevantes sira sei ko'alia ho operadores telekomunikasaun sira hanesan TT (Timor Telekom) Telekomsel, no Telemor atu nune'e bele fasilita ita-nia komunikasaun ka SMS ba ita-nia kliente sira, kliente sira sei haruka sira-nia númeru rejistu kontadór nian mai EDTL, depois EDTL sei haruka Token ne'e ba sira depois sira bele ense pulsa kontadór iha sira-nia uma.
Ita-nia dezafiu agora oinsá mak atu haruka pulsa ka token ne'e ba iha ita-nia kliente ka konsumidór sira iha sira-nia uma. Nia objetivu mak atu prevene ita-nia konsumidór labele sai husi uma. Ita hamutuk iha fatin ida de'it ne'e bele halo fali kontaminasaun COVID-19 ne'e att liután, ne'e meus atu prevene COVID-19 ne'e.
Jornalista: Ida-ne'e vale ba komunidade baibain ka implementa mós ba emprezáriu ou instituisaun públiku sira?
Sr. Ministru: Ita-boot sira bele dehan ne'e ba kliente hotu-hotu kada kategoria, ita ko'alia subsídiu ka ezensaun tarefa ita la ko'alia gratuita, ita ko'alia subsídiu ba fulan ida-ne'e ami hanoin hela, montante US $10 ka pruvolta 15 dollares ba kada kliente. Ne'e ba Timor laran tomak, ne'e hanesan de'it, ne'e mak ha'u ko'alia kona-ba Taxa Fiksa ba ema hotu-hotu ne'ebé kategoria konsumidór.
Token agora ita produs hela, depois kuandu hotu ona, sistema atu fó token ne'e ba ita-nia konsumidór sira preparadu ona ami bele anúnsia númeru fiksa ruma ba kliente sira bele kontaktu. Iha loron ida, rua ka tolu depende ba preparasaun tékniku, maibé mais sedu ne'e di'ak liután.
Jornalista: Signifika uza sistema token telekomunikasaun sei manda mensajen ba kliente sira hodi ense?
Sr. Ministru: Ita sei estabelese númeru rua ka tolu, atu kliente sira bele mensajen sira-nia rezistu kontadór depois EDTL sei manda pulsa US $10 ka pruvolta US $15 dollares ba kada kliente, sira bele ense ba sira-nia kontadór prepagu iha uma.
Jornalista: Implementasaun subsidiu nee orientadaun husi PM ka nusa?
Sr. Ministru: Ida-ne'e bazeia ba artigu 26 iha dekretu Governu ne'ebé aprova iha sábadu ne'e iha Konsellu Ministru. Ne'e meus implementa estadu emerjénsia ne'ebé hatete katak kada Governu tutela bele fó ezensaun tarefa husi servisu públiku ne'ebé sira tutela ba, ida-ne'e mak ami halo.
Jornalista: Sistema token ne'e karik la defikulta parte tékniku nian para bele transfere pulsa ba kliente?
Sr. Ministru: Ohin ami deskuti sira dehan posível, maibé sira sei prepara hela. Ha'u apela ba ita-nia konsumidór sira para atu pasiénsia oituan, ami sei halo esforsu tomak para ida-ne'e mais lais posível para implementa ezensaun tarefa ida-ne'e ka subsídiu ida-ne'e ba ita-nia konsumidór sira.
Jornalista: Signifika katak iha fulan ida-ne'e Estadu Emerjénsia ne'e bele fó US $10 dollares to'o US $15 dolares ba konsumidores?
Sr. Ministru: Ami hanoin katak, tanba normalmente kada fulan ne'e rendimentu US $2.4 Milloens ne'e ami ohin deside halo kalkulasaun aritmetika katak ita bele fó subsídiu ba ita-nia kliente sira 160. 555 klientes depois ita bele fó US $15 dollares kada konsumidór.
Jornalista: Liga ba bee, agora daudauk kapital Dili preokupa ba bee?
Sr. Ministru: Kona-ba bee, ami-nia ekipa Task Force DNSA (Diresaun Nasionál Servisu Água) kontinua halo servisu, ita-boot sira hatene katak ita tenta atu rekopera fali sistema bee-moos sira.
Jornalista: Bee-moos mós gratuita?
Sr. Ministru: Iha fulan ida-ne'e ba bee sira ne'ebé mak liga ona sistema DNSA nian sei fó gratuita ba sira, subsídiu fulan ida-ne'e katak gastus fulan ne'e sira sei la halo pagamentu subsidiu ba sira, depois ita-nia ekipa tékniku DNSA sei halo leitura ba de'it kontadór komesa fali iha inísiu depois Estadu Emerjénsia ne'e remata.
Jornalista: Subsídiu ne'e hahú implementa baihira?
Sr. Ministru: Subsídiu ne'e ita tenta hela, dekretu Governu foin aprova iha sabadu, fó kompeténsia ba ministru tutela para atu halo ezensaun de tarefa ka subsídiu, ida-ne'e mak ami ohin prepara hela, deskuti atu implementa, ita produs ona ita-nia token, agora ita haree fali meus oinsá mak ita bele distribui token sira ne'e ba kada konsumidores. Meus ida mak, horsida (30/03) loraik ami-nia tékniku sira sei ko'alia ho operadór telekomunikasaun sira, ha'u mós prepara karta aberta ba sira atu nune'e ajuda distribui token ka sms liuhosi telefone.
0 Comments:
Posting Komentar