DILI, 23 ABRIL 2020: S. Exa, Ministru Obras Públikas (MOP), Arq. Salvador Eugénio Soares dos Reis Pires, iha Kinta-feira ne'e partisipa iha reuniaun Konsellu Ministru extraordinária hodi aprezenta projetu Deliberasaun ida, ne'ebé hetan aprovasaun husi Konsellu Ministrus, kona-ba alterasaun ba kontratu públiku empreitada ne'ebé selebra ho empreza China Wu Yi Co. Lda, hodi hadi'ak no halo manutensaun ba Estrada sira iha Dili, datadau loron-14 fulan setembru 2016.
Reuniaun ne'ebé hala'o iha Auditóriu Kay Rala Xanana Gusmão, iha Ministeriu Finansas, Díli ne'e aprova mós projetu Dekretu-Lei, ne'ebé aprezenta husi S. Exa, Ministra da Soliedariedade Sosiál no Inkluzaun (MSSI), Sra. Armanda Berta dos Santos, kona-ba apoiu monetáriu ba agregadu familiár sira iha ámbitu pandemia covid-19. Medida ida-ne'e nuudar intervensaun ida ba kurtu prazu nian, hodi enfrenta impaktu prejudisiál, liuhosi meiu subsisténsia ba família ne'ebé nia rendimentu ki'ik iha territoriu laran tomak, tan provoka husi covid-19. Ema sira ne'ebé maka sei sai nu'udar benefisiáriu maka agregadu familiár sira ne'ebé kompostu husi pelumenuz sidadaun ida, ne'ebé rejista ona to'o loron-31 fulan-Marsu 2020 iha Livru Rejistu " Uma Kain" no iha família ne'e nia laran nia elementu ida fulan-fulan no regulár simu osan boot liu 500 dólar amerikanu. Apoiu ne'e sei ho osan 100 dólar amerikanu fulan-fulan ba agregadu familiár. Pagamentu sei halo hahú husi fulan tuirmai hafoin aprova tiha diploma ida-ne'e no kustu hotu sei finansia huai Fundu covid-19.
Konsellu Ministru aprova tiha mós kompra de arroz husi Vietname, ne'ebé propoin husi S. Exa, Ministru Koordenadór Asuntu Ekonómiku en ezersísiu, Sr. Fidelis Leite Magalhães, hodi reforsa stock arroz ne'ebé daudauk ne'e eziste hela no hodi bele hatán ba situasaun susar ruma ne'ebé bele mosu karik durante pandemia covid-19.
S. Exa, Ministru Saúde (MS)en ezersísiu, Sr. Bonifásiu Maukoli dos Reis, aprezenta ba Konsellu Ministrus pontu situasaun kona-ba pandemia COVID-19 iha rai-laran. To'o daudauk ne'e rejista ona kazu pozitivu hamutuk 23 ne'ebé konfirmadu ema sira ne'ebé infetadu ho korona virus foun no kazu foun provável haat. Pasiente sira ne'ebé infetadu ho korona virus foun daudauk ne'e la senti sintoma ka aprezenta sintoma kmaan ona. Rejista tiha mós kazu ne'ebé pasiente ida rekuperadu ona. Hein hela rezultadu husi teste ba 28 kazu suspeitu no 327 hetan ona rezultadu negative. Daudauk ne'e iha konfinamentu obrigatóriu hamutuk ema 405 no iha auto kuarantena hamutuk ema 27. 1643 sidadaun maka ramata ona períudu 14 dias kuarantena.
Konsellu Ministru mós anúnsia tiha kampaña semanál, hamutuk ho organizasaun Naoses
Unidas, hodi " Basa-liman ba Herói Timorense", atu hatudu públiku nia laran-luak ba traballhadór sira ne'ebé servisu hamriik iha liña oin hodi hatán ba covid-19, hodi partisipa iha ronda basa-liman ho grupu boot. Tanba ne'e, enkoraja ema hotu iha Timor-Leste atu basa- liman semana-semana, iha tersa-feira, tuku 19 oras durante minute 5 nia laran, iha ida-idak nia uma, hahú hosi tersa-feira oin mai loron-28 fulan abril, hodi partisipa iha kampaña" Basa-liman ba Herói Timor oan sira", no sei rejista momentu hirak ne'e iha vídeo no sei divúlga iha rede sosiál sira ho nia Tag #Applaud TimorenseHeroes.
0 Comments:
Posting Komentar