𝐒𝐄𝐒𝐓𝐀, 𝐆𝐎𝐕𝐄𝐑𝐍𝐔 𝐇𝐀𝐇Ú 𝐋𝐀𝐍𝐒𝐀𝐌𝐄𝐍𝐓𝐔 𝐁𝐀 𝐊𝐎𝐍𝐒𝐓𝐑𝐔𝐒𝐀𝐔𝐍 𝐏𝐑𝐎𝐉𝐄𝐓𝐔 𝐄𝐒𝐓𝐑𝐀𝐃𝐀 𝐋𝐀𝐆𝐀-𝐁𝐀𝐆𝐔𝐈𝐀 𝐍𝐎 𝐔𝐀𝐈𝐀𝐊𝐀-𝐊𝐄𝐋𝐈𝐊𝐀𝐈-𝐎𝐒𝐒𝐔

𝘿𝙞𝙡𝙞, 06 Dezembru 2022: Ministru Obras Públikas (MOP), Eng. Abel Pires da Silva, hatete iha Sesta feira loron 09 fulan-Dezembru 2022 ne'e VIII Governu Konstitusionál lidera husi S. Exa, Priméiru Ministru (PM), Jenerál Taur Matan Ruak, sei hahú lansamentu ba konstrusaun estrada munisipál husi postu administrativu Laga ba Baguia no husi Uaiaka ba postu Kelikai to'o parte balun Ossu nian.

Tuir mai Intervista husi jornalista sira ho Sr. Ministru iha Palásiu Prezidente hafoin Sr. Ministru akompaña husi Prezidente Institutu Jestaun Ekipamentus no Apoiu Dezenvolvimentu Infraestrutura (IJEADI.IP), Eng. Hermenegilda da Costa Laurentina, enkontru ho S. Exa, Prezidente Repúblika (PR), Dr. José Ramos Horta, hanesn tuir mai:

Jornalista; Prosesu estrada liga ba Laga-Baguia nia prosesu to'o iha ne'ebé ona, nia orsamentu hamutuk millaun hira?, i empreza ida ne'ebé maka halo?

Sr. Ministru; Laga-Baguia nian sesta agora loron 09 S. Exa, Primeiru-Ministru rasik maka sei ba lansa Laga-Baguia dala ida ho Uaiaka-Kelikai no mós to'o Samarogo parte Ossu nian, rua ne'e ita sei lansa iha sesta mai, ne'ebé ha'u komvida ita-boot sira see iha biban bele partisipa hotu ba tamba ita-nia S. Exa, Primeiru-Ministru rasik maka sei lansa. Ida millaun $22, ida fali millaun $18 Milloens, kompañia rua ne'e husi Xina hotu, ne'e tender Internasionál tamba la'os Ministériu Obras Públikas maka halo mais ne'e halo iha CNA (Komisaun Nasionál Aprovizionamentu), CNA, ita-boot sira hatene ne'e parte husi Ministériu Finansas nia okos, ne'ebé ami garantia transparánsia, entaun ita agradese katak, prosesu ne'e atu remata ona, agradese katak la kleur tan sei ba lansa depois kompañia halo mobilizasaun, hanoin inísiu tinan oin Obra ne'e bele la'o ona. Laga-Baguia Norinco no ida fali ne'e kompañia Cico ida uluk halo estrada husi Aileu ba Ainaro ne'e.

Kona-ba enkontru ho Xefe Estadu, Sr. Ministru hatete, agradese tebes ba S. Exa, Prezidente Repúblika nia atensaun ba Ministériu Obras Públikas no IJE nia servisu, ami ohin mai ne'e primeiru atu atualiza servisu ne'ebé maka durante ne'e hala'o, dezafiu ne'ebé maka IJE no Ministériu infrenta no liuliu mós hato'o agradesementu ba S. Exa, Sr. Prezidente tamba fó tulun ona mai ami, promulga tiha ona Dekretu-Lei ne'ebé halo alterasaun ba Ministériu nia estatutu no mós kompeténsia, la'os Ministériu maibé mós IJE nian, hahú husi 25 Novembru 2022.

IJEADI iha ona kapasidade foun tuir lei para atu halo mós intervensaun ba estrada sira ne'ebé maka estraga no mós halo intervensaun ba rede irigasaun sira, entaun Sr. Prezidente mós komprende ba dezafiu ne'ebé mak ami infrenta i liután ami agradese tebes ba Sr. Prezidente nia apoiu katak oinsá mós buka dalan ba ko'alia ho parséiru apoiu tan kondisaun Ministériu nian liuliu IJE nia kondisaun servisu, tamba ne'e maka ohin ko'alia barak liu ba IJE. Iha ne'e Sra. Prezidente IJE iha ne'e ha'u fó tempu ba Prezidente Ko'alia.

Prezidente IJEADI; Sim, ami agradese ba Exa, Prezidente Repúblika tamba bele komvida ami mai iha fatin ida-ne'e atu bele hato'o ami-nia informasaun servisu sira durante ne'ebé IJE hala’o ona, no mós hetan permisaun husi Exa, Sr. Ministru atu hato'o ami-nia atividade lubuk ida i ohin ajenda ne'ebé maka ami ko'alia ho S. Exa, Prezidente Repúblika iha parte mota Laklo nian, ho tan dalan Kamedar, iha fulan 2 ka 3 liu ba, S. Exa, Prezidente Repúblika mós bolu direita ami fó orientasaun servisu balun ba ami tamba faze de melloramentu husi parte IJEADI nian kontinua la'o no loke luan tan estrada kuaje 4.2 kilómetru ne'ebé agora la'o hela iha ne’eba, ami espera katak iha tinan oin fulan Janéiru ami bele finaliza servisu ne'e i ita-nia komunidade sira iha parte ne'eba bele uza.

Iha tan ajenda balun ne'ebé ohin mensiona iha diskusaun ho S. Exa, Prezidente Repúblika katak iha tempu badak husi parte IJEADI nian sei kontinua normalizasaun mota Laklo ne'ebé maka ita-nia komunidade sira afeita iha loron 04 Abril bril tinan ida liu ba iha inundasaun i komu iha preokupasaun balun entre komunidade ho autóridade entaun ami sei iha faze negosiasaun maibé ohin depois de enkontru ami hanoin ona katak tempu badak ami sei kontinua fila-fali servisu iha mota Laklo nian, tempu badak depois de orientasaun ha'u fila husi ne'e ha'u sei orienta ha'u-nia ekípa para aban bele kontinua halo servisu iha mota Laklo tamba ho kondisaun ne'ebé iha katak, iha parte IJEADI nian mákina pezadu sira iha de'it 127 unidade, iha 93 Unidade iha kondisaun di'ak, iha 17 Unidade maka iha hela manutensaun no mós iha 23 iha kondisaun att totál, entaun ho 93 Unidade ne'e ami fahe ba iha kada munisípiu hotu-hotu.

Ho kondisaun ida-ne'e maka iha parte balun komunidade sira-nia pedidu sira ami seidauk bele finaliza, iha parte balun ami finaliza ona maibé husi parte IJEADI katak komprometidu sei kontinua apoiu ita-nia komunidade sira tuir pedidu sira ne'ebé iha i no mós agora daudauk udan mós monu rai ona ami hanoin katak, agora ita haree liuba parte emerjénsia sira ne'ebé maka afeita ba ita-nia komunidade sira, tanba ne'e IJEADI sei mantein apoiu ba komunidade sira.

Sr. Ministru; Iha ponte boot iha Bua-Nurak ne'e infelizmente ponte ki'ik ida iha Lautem IJE ba halo normalizasaun ona, agora iha ponte boot iha Bua-Nurak ne'e infelizmente pontu foun ne'e kompañia halo hela, ne'e parte ida husi estrada Venilale ba Vikeke, iha semana ne'e ha'u sei ba haree direitamente maibé ita fó ona instrusaun ba kompañia para atu halo servisu rua, ida maka kontinua fasilita komunidade sira iha parte ne'eba, ida fali atu aselera prosesu konstrusaun ponte foun i ha'u hetan garantia husi kompañia sira katak, mais tarde fulan tolu tan ponte ne'eba bele prontu ona para komunidade labele foti rísku hodi liutón husi mota-laran.

Kona-ba Bekusi ne'e laiha estragus, ida ne'ebé IJEADI halo ne'e hasai sedimentasaun atu redús rísku para labele akontese inundasaun iha parte ne'eba. Ita mós halo iha parte Bidau nian, iha fatin barak ita mós halo intervensaun, depois ita mós servisu hamutuk ho kompañia Timoroan ne'ebé iha kapasidade para halo manutensaun ba bee-dalan sira, ne'ebé ida-ne'e ketak, ami sei tenta hela oinsá ita selebra kontratu ho kompañia ne'e i see rua ne'e maka la'o hotu ha'u sente di'ak liután.

Obrigadu barak