𝐄𝐒𝐓𝐀𝐃𝐔 𝐎𝐅𝐈𝐒𝐈𝐀𝐋𝐌𝐄𝐍𝐓𝐄 𝐈𝐍𝐀𝐆𝐔𝐑𝐀 𝐏𝐎𝐑𝐓𝐔 𝐁𝐀𝐈𝐀 𝐓𝐈𝐁𝐀𝐑

𝘿𝙞𝙡𝙞, 30 Novembru 2022: Ministru Obras Públikas (MOP), Abel Pires da Silva, hamutuk ho membru Governu sira partisipa iha serimónia inagurasaun ba Portu Baia Tibar ne'ebé ofisialmente inagura husi S. Exa, Prezidente Repúblika (PR), Dr. José Ramos Horta, no S. Exa, Primeiru Ministru (PM), Jenerál Taur Matan Ruak, ne'ebé hala'o iha Portu Baia Tibar, postu administrativu Bazartete, munisípiu Likisa.

Serimónia inagurasaun portu foun no modernu ne’e akontese iha ámbitu Komemorasaun Loron Proklamasaun Independénsia Repúblika Demokrátika Timor-Leste ba dala-47. Ho inagurasuan ne’e, Portu Baía Tibar sei troka Portu Díli hodi fasilita movimentu importasaun no esportasaun ba sasán ho kapasidade kargu kontentór hamutuk millaun ida kada tinan. Portu ne’e inklui ka’is ida ho versus rua ne’ebé sei uza hodi redús atrazu iha libertasaun kontentór inklui kustu tranzasaun atu fasilita efisiénsia servisu alfandegáriu no atividade komérsiu.

Efisiénsia ne’e konsidera hanesan pasu importante ida ba Ministériu Finansas iha ámbitu Reforma Fiskál no Jestaun Finansas Públikas, ajenda Reforma importante ida ne’ebé mak inísia ona dezde tinan 2015 no Governu Konstitusionál VIII lideradu husi Primeiru-Ministru, Jenerál Taur Matak Ruak komprometidu atu kontinua implementa.

Efisiénsia hirak ne’e mós sei ajuda Governu liuhosi Ministériu Finansas atu kolekta reseitas ho maneira ida ne’ebé justu, lais no transparente hodi ajuda redús país ninia dependénsia ba Fundu Minarai.

Portu foun no modernu ne’e sei fasilita Timor-Leste ninia konektividade marítima iha rejiaun Ázia, liga Timor-Leste ba merkadu komérsiu globál no hasa’e liután país ninia asesu komérsiu ba merkadória sira hanesan agrikultura, turizmu, peskas, pekuária no mós indústria sira seluk, dalan ida atu ajuda Timor-Leste diversifika ninia produsaun.

Konstrusaun Portu Baía Tibar ne'e lansa iha loron 30 fulan-Agostu 2018, ne'e ho modalidade Parseria Públiku Privada (PPP, sigla Inglés) entre Governu Timor-Leste ne’ebé aloka millaun $130 iha Fundu Viabilidade (VGF, sigla Inglés) no Timor Port, sub-sidiáriu husi Bolloré ho millaun $150, hamutuk millaun $280 ba faze inísiu husi totál investimentu estimativu millaun $500 ba tinan 30.

Inaugurasaun Portu Baía Tibar ne'e partisipa mós husi Eis Primeiru-Ministru, Dr. Mari Alkatiri, espoza eis Prezidente Repúblika Sra. Cristy S.Gusmão, Orgaun Soberanu haat, Membru Governu tomak, Membru Parlamentu Nasionál, Sosiedade Sivíl no autoridade seguransa no defeza, autóridade lokál sira husi munisípiu Likisa, Korpu diplomátiku seitór privadu no komunidade sira.

#Media_MOP