𝐌𝐎𝐏 𝐇𝐔𝐒𝐔 𝐕𝐈𝐀𝐉𝐄𝐍 𝐃𝐔𝐑𝐀𝐍𝐓𝐄 𝐒𝐄𝐋𝐄𝐁𝐑𝐀𝐒𝐀𝐔𝐍 𝐍𝐀𝐓Á𝐋 𝐍𝐎 𝐓𝐈𝐍𝐀𝐍 𝐅𝐎𝐔𝐍 𝐇𝐎 𝐊𝐔𝐈𝐃𝐀𝐃𝐔 𝐍𝐎 𝐊𝐎𝐍𝐓𝐑𝐎𝐋𝐔 𝐕𝐄𝐋𝐎𝐒𝐈𝐃𝐀𝐃𝐄

𝘿𝙞𝙡𝙞, 22 Dezembru 2022: Ministru Obras Públikas (MOP), Eng. Abel Pires da Silva, husu motorista sira ne’ebé lori karreta no motorizada bainhira hala’o viajen durante selebrasaun Natál no tinan foun 2023 nian atu kuidadu no kontrolu nafatin velosidade durante viajen ba munisípiu no área destinadu sira, atu nune’e to’o iha fatin ho di’ak.

Sr. Ministru hatete “Asidenti barak tanba komesa kontenti (iha selebrasaun ne’e) ne’ebé ita hotu tenke kuidadu-an nafatin” no husu viajen ba munisípiu tenke haree no halai ho velosidade ne’ebé kontroladu tanba estrada balun liga husi kapitál Dili ba munisípiu sei iha faze konstrusaun, nune’e ameasa ba rísku ka asidente ne’e maka’as. Mezmu iha estrada balun konstrusaun finaliza ona maibé tenke kuidadu-an no kontrolu nafatin, importante mak viajen to’o iha fatin destinadu, importante liu mak labele prezudika fali ita-nia moris.

Tuir dadus husi Polísia Nasionál Timor-Leste (PNTL) husi janéiru to’o 18 fulan-Dezembru tinan 2022 hatudu katak kazu asidente tráfegu konsege hamate ema na’in-105 iha teritóriu nasionál. No durante selebrasaun Natál no tinan foun 2023 nian sei iha movimentu maka’as husi kapitál Dili ba munisípiu no husi kapitál munisípiu ba postu, suku no aldeia sira, tanba ne’e tenke kuidadu-an.

Iha oportunidade ne’e, informa tan katak konstrusaun estrada nasionál husi kapitál Dili ba to’o munisípiu Baukau remata ona. Entertantu husi munisípiu Baukau ba to’o munisípiu Lautém no Vikeke daudauk ne’e iha hela prosesu konstrusaun maske seksaun balun tau ona alkatruan.

Husi kapitál Dili ba to’o Maliana kapitál munisípiu Bobonaro nian parte balun seidauk halo konstrusaun, husi kapitál nasaun ba munisípiu Aileu, Ainaro, MaunFahe no Kovalima seksaun balun finaliza ona maibé balun seidauk liuliu seksaun husi Fatisi (bee tudak) nian ba to’o iha Sarlala sei iha prosesu nahe alkatraun ka aspal iha fatin refere tanba ne’e hamenus velosidade iha seksaun hirak ne’e, nune’e mós husi kapitál ba Ermera ne’ebé kondisaun balun sei iha prosesu ba rehabilitasaun.

Husi kondisaun estrada sira ne’e, sura mós ho kondisaun estrada husi kapitál munisípiu sira ba to’o postu administrativu, suku no aldeia sira kondisaun seidauk di’ak, nune’e rísku ba asidente ne’e maka’as.

Ikus liu, Sr. Ministru Obras Públikas hato’o Felíz Natál no Tinan Foun 2023 nian ba Komunidade no Família tomak iha selebrasaun tinan ida-ne’e.

#Media_MOP