𝐏𝐑𝐎𝐏𝐎𝐒𝐓𝐀 𝐎𝐉𝐄 2023 𝐀𝐏𝐑𝐎𝐕𝐀𝐃𝐔 𝐈𝐇𝐀 𝐅𝐈𝐍Á𝐋 𝐆𝐋𝐎𝐁Á𝐋 𝐇𝐎 𝐕𝐎𝐓𝐔𝐒 𝐀𝐅𝐀𝐕Ó𝐑 42

𝘿𝙞𝙡𝙞, 17 Novembru 2022: Ministru Obras Públikas (MOP), Eng. Abel Pires da Silva, hamutuk ho membru Governu sira seluk akompaña S. Exa, Priméiru Ministru (PM), Jenerál Taur Matan Ruak, debate proposta Orsamentu Jerál Estadu (OJE) tinan fiskál 2023 nian ho deputadu sira iha Parlamentu Nasionál, husi jeneralidade to'o espesialidade hahú iha loron 07 Novembru no hetan ona aprovasaun iha finál globál ohin loron 17 fulan Novembru 2022.

Proposta OJE ne'e aprova hafoin diskusaun durante semana ida resin husi jeneralidade to’o espesialidade, iha Kinta ne'e Parlamentu Nasionál aprova ona iha finál globál proposta Orsamentu Jeral Estadu (OJE) ba tinan fiskál 2023 nian ho votu a favór 42, kontra 21 no abstensaun 2.

OJE 2023 ho montante dolar amerikanu billaun $3,16. Kompostu husi Orsamentu Administrasaun Sentrál billaun $2,8 (inklui ona Fundu Kombatentes Libertasaun Nasionál, billaun $1), Orsamentu ba Seguransa Sosiál millaun $235,7 no ba RAEOA millaun $120.

Proposta OJE 2023 mak Primeira Proposta OJE ne’ebé Oitavu Governu Konstitusionál prepara bazeia ba regras orsamentál foun aprovadu husi Lei Enkuadramentu Orsamentál. Proposta Orsamentu ne’e kontempla ona Orsamentu tuir Programa no alokasaun orsamentu ba prioridade nasionál ne’ebé mak defini ona iha Lei das Grandes Opções do Plano 2023 ne’ebé mak promulga husi Prezidente Repúblika, José Ramos Horta iha fulan juñu liubá.

Proposta ne’e mai ho lema “Investimentu Produtivu no Kresimentu Inkluzivu ba Jerasaun Futuru” – aprezenta distribuisaun rekursu nasionál ne’ebé justu no ekuitativu hodi mellora prestasaun servisu, rekuperasaun ekonómiku no reziliénsia, promove kresimentu ekonómiku ida ne’ebé inkluzivu no sustentável iha médiu prazu.

Proposta OJE 2023 ne’e dezeña bazeia ba Objetivu Estratéjiku husi Oitavu Governu Konstitusionál ne’ebé nia objetivu atu fornese sidadaun sira: 1) Oportunidade atu iha moris saudável, seguru no moris naruk; 2) Asesu ba koñesimentu, teknolojia no inovasaun; no 3) Asesu ba rekursu sufisiente hodi garantia vida moris ida ne’ebé dignu.

Iha Proposta OJE 2023, Governu propoin ba Parlamentu Nasionál atu hasa’e impostu seletivu konsumu foun ne’ebé inklui:

 10% impostu ba karreta ho valór liu US $10.000

 20% ba karreta ho valór liu US $25.000

 30% ba karreta ho valór liu US $50.000

 Aumentu iha impostu konsumu ba tabaku no produtu tabaku seluk husi US $50 kada kilograma sa’e ba US $100 kada kilograma.

 Impostu konsumu foun US $1.00 kada kilograma ba masi-midar.

 Introdusaun impostu konsumu foun ho valór US $3 kada litru ba bebida asukarada (Fanta, Coca-Cola, Sunkist, Sprite no sst). Ida-ne’e Governu introdús atu proteje sidadaun sira nia saúde públiku. Aleinde ne’e, Governu mós propoin hodi hasa’e impostu importasaun husi 2,5% sa'e ba 5%.

Liuhusi introdusaun impostu hirak ne’e, Governu halo projesaun katak reseitas doméstika sei sa’e husi millaun $153,7 iha 2022, ba millaun $174,9 iha 2023.

Introdusaun impostu hirak ne’e sai nu’udar instrumentu fiskál ida ne’ebé Governu uza atu hasa’e kolesaun reseitas doméstika iha tinan hirak tuir-mai hodi redús dependénsia ba Fundu Minarai.

Medidas hirak ne’e mós aliña ho Polítika Reforma Fiskál no Jestaun Finansas Publikas – ajenda Reforma importante ida ne’ebé inísia ona desde 2015 no Oitavu Governu Konstitusionál lideradu husi Primeiru-Ministru, Jenerál Taur Matan Ruak komprometidu atu kontinua implementa.

Primeiro-Ministro: S.E. Taur Matan Ruak: https://www.facebook.com/photo/?fbid=685199789628898&set=a.434631884685691

Ministro das Finanças, Rui Augusto Gomes: https://www.facebook.com/photo/?fbid=483114777251954&set=a.230643962499038

#Media_MOP