NÚMERU KAZU COVID-19 SA’E MAKA’AS, GOVERNU IMPOIN KONFINAMENTU DEMISILIÁRIU JERÁL IHA ERMERA

NÚMERU KAZU COVID-19 SA’E MAKA’AS, GOVERNU IMPOIN KONFINAMENTU DEMISILIÁRIU JERÁL IHA ERMERA

DILI, 30 JULLU 2021: S. Exa, Ministru Obras Públikas (MOP), Arq. Salvador Eugénio Soares dos Reis Pires, partisipa iha reuniaun Konsellu Ministru ne’ebé lidera husi S. Exa, Primeiru Ministru (PM), Sr. Taur Matan Ruak, iha Palásiu Governu, Dili.

Iha reuniaun Konsellu Ministru hahú ho análize aprezentasaun kona-ba pontu situasaun epidemiolójika nasionál iha munisípiu Ermera, husi Sala Situasaun Sentru Integradu Jestaun Krize nian.

Haree ba evolusaun husi situasaun epidémika iha Ermera ne’ebé agrava liu, ho númeru kazu diagnostíkadu husi vírus SARS-CoV ne’ebé sa’e maka’as iha munisípiu ne’e no atu prevene risku ne’ebé mosu husi propagasaun COVID-19, Governu liuhosi Konsellu Ministru aprova ona projetu Rezolusaun Governu nian ne’e impoem konfinamentu domisiliáriu jerál ba populasaun iha Postu Administrativu Ermera no Railaku iha munisípiu Ermera, hahú husi tuku 00:00 loron 31 fulan-jullu to’o tuku 23:59 iha loron 11 fulan-agostu tinan 2021.

Nune’e, impoin konfinamentu domisiliáriu jerál ba ema hotu ne’ebé maka hela ka oras ne’e iha hela munisípiu Ermera, ne’ebé tenke hela iha sira nia uma ka iha sira nia alojamentu temporáriu, ne’ebé inklui sentru akollimentu, exetu iha situasaun ne’ebé prevee iha diploma ne’e, liuliu ba razaun saúde, serbisu, ba asesu ba sasan no servisu nesesidade dahuluk nian.

La abranje ba impozisaun konfinamentu domisiliáriu individu ne’ebé komprova vasinasaun kompleta (doze rua) hasoru COVID-19.

Bandu halo sirkulasaun ba transporte públiku iha área hotu iha munisípiu Ermera nian, liuliu mikrolet, biskota no anguna;

Bandu atu halo selebrasaun koletiva relijioza. Bandu mós atu hala’o serimónia fúnebre ne’ebé involve partisipasaun liu ema na’in sanulu, iha ne’ebé, durante serimónia ne’e rasik tenke uza máskara oin nian hodi taka inus no ibun no mantein distánsia, pelumenus metru ida ho ema seluk iha serimónia ne’e.

Taka ba públiku estabelesimentu komersiál, industriál, artezanál ka prestasaun servisu , ho esesaun estabelesimentu ne’ebé autoriza iha Rezolusaun Governu ne’e, liuliu estabelesimentu ba faan ai-han sira no sasan primeira nesesidade nian, eletrisidade, telekomunikasaun, prestasaun kuidadu médiku, farmásia, postu kombustivel nian, instituisaun finanseira sira.

Restaurante sira no empreza sira bele fornese hahan iha rejime take away ka entrega iha uma de’it no estabelesimentu sira-seluk ne’ebé taka ba públiku bele dezenvolve ninia atividade liuhusi servisu entrega ba uma de’it.

Permite atividade ba vendedór ambulante ba sasán alimentár no sasan ba primeira nesesidade nian. Merkadu sira iha Munisípiu Ermera, mantein ninia funsionamentu, husi tuku 6 dader to’o tuku 6 lorokraik.

Konsellu Ministru aprova ona mós deliberasaun ida atu orienta Ministra Saúde no Departamentu sira hotu ne’ebé responsavel ba kampaña vasinasaun, atu nune’e bele mobiliza rekursu nesesáriu sira hotu atu hasa’e númeru vasina loron-loron iha área munisípiu Ermera no dalan ida ne’e bele hasa’e persentajen populasaun ne’ebé vasina ona iha munisípiu ida-ne’e.

#Media_MOP