MOP APREZENTA NO HETAN ONA APROVASAUN IHA KONSELLU MINISTRU KONA-BA ALTERASAUN BA DEKRETU LEI NO. 27/2021

MOP APREZENTA NO HETAN ONA APROVASAUN IHA KONSELLU MINISTRU KONA-BA ALTERASAUN BA DEKRETU LEI NO. 27/2021

DILI, 11 AGOSTU 2021: S. Exa, Ministru Obras Públikas (MOP), Arq. Salvador Eugénio Soares dos Reis Pires, partisipa iha reuniaun Konsellu Ministru ne’ebé lidera husi S. Exa, Primeiru Ministru (PM), Sr. Taur Matan Ruak, iha Palásiu Governu, Dili, hodi aprezenta Dekretu Lei ba alterasaun dahuluk ba Dekretu Lei no. 27/2010 loron 22 fulan-Dezembru no hetan aprovasaun husi Konsellu Ministru.

Iha enkontru Konsellu Ministrus ne’e aprova ona projetu Dekretu-Lei, ne’ebé aprezenta husi Ministru Obras Públikas, Salvador Soares dos Reis Pires, ba alterasaun dahuluk ba Dekretu-Lei n. 27/2010, loron 22 fulan-dezembru, ne’ebé aprova ona Rejime Jurídiku Sertifikasaun no Inskrisaun Empreza Konstrusaun Sivíl no Konsultoria Téknika Sivíl nian. Ho intervensaun lejizlativa ida-ne’e hakarak elimina limitasaun ne’ebé uluk la permite empreza nasionál sira hala’o servisu sira konstrusaun sivíl nian ho valór aas liu dolar amerikanu millaun 7,5.

Konsellu Ministrus hala’o sorumutuk iha Palásiu Governu, iha Dili no, hafoin analiza ba aprezentasaun kona-ba pontu situasaun epidemiolójika país nian, husi Sala Situasaun Sentru Integradu Jestaun Krize nian, aprova ona:

• Projetu sira Rezolusaun Governu nian ne’ebé mantein impozisaun serka sanitária iha munisípiu sira Dili no Ermera to’o tuku 23:59 husi loron 26 fulan-agostu; no

• Projetu Rezolusaun Governu nian ne’ebé mantein konfinamentu domisiliáriu jerál ba populasaun husi Postu Administrativu Ermera no Postu Administrativu Railaku, iha Munisípiu Ermera nian, to’o tuku 23:59, husi loron 25 fulan-agostu.

Nune’e, bandu sirkulasaun ema sira-nian entre munisípiu Dili no Ermera no sirkunskrisaun administrativa sira-seluk, exetu iha kazu hirak ne’ebé ninia fundamentu forte tanba razaun seguransa públika, saúde públika, asisténsia umanitária, manutensaun sistema abastesimentu públiku, ka razaun seluk ne’ebé presiza atu hala’o ba interese públiku nian. La inklui iha proibisaun sirkulasaun ida-ne’e indivíduu sira ne’ebé komprova vasinasaun kompleta (doze rua) kontra COVID-19, no mós labarik sira ho idade tinan 6 mai kraik ne’ebé akompaña indivíduu sira ne’e.

Iha Postu Administrativu sira Ermera no Railaku, mantein mós impozisaun konfinamentu domisiliáriu jerál ba ema hotu ne’ebé maka hela ka oras ne’e iha hela iha postu administrativu rua husi munisípiu Ermera, ne’ebé tenke hela iha sira nia uma ka iha sira nia alojamentu temporáriu, ne’ebé inklui sentru akollimentu, exetu iha situasaun ne’ebé prevee ona iha anteriór, liuliu tanba razaun saúde, serbisu, asesu ba sasán no servisu nesesidade bázika nian. Ema sira ne’ebé komprova vasinasaun kompleta (doze rua) kontra COVID-19 nian, la inklui iha impozisaun konfinamentu domisiliáriu ne’e.

Ikusliu, Konsellu Ministrus aprova ona projetu deliberasaun, kona-ba revizaun ba valór husi tarifas, ba taxa konsesaun no ba penalidade Portu Tibar nian, ne’ebé aprezenta husi Ministru Finansas, Rui Augusto Gomes. Projetu Dekretu-Lei ida-ne’e sai ona hanesan objetu deliberasaun nian iha Sorumutuk Konsellu Ministrus iha loron 28 fulan-jullu tinan 2021,maibé tanba iha alterasaun balun iha faze redasaun finál nian, presiza submete fali Dekretu Lei ne’e ba deliberasaun foun Konsellu Ministrus nian.

Revizaun ba valór hirak-ne’e ho fatór indeksasaun 1,061, konsidera diminuisaun tráfegu karga nian, kompara ho previzaun sira, konsidera realidade ekonómika iha tinan hirak ikus ne’e, konsidera difikuldade sira ne’ebé rezulta husi pandemia COVID-19, konsidera mós vontade konsesionária nian hodi kontinua dezenvolve projetu no hahú opera ho lais liu, no konsidera mós katak valór sira ne’ebé maihusi revizaun ne’e hanesan ho valór sira ne’ebé sei vigora hela, karik konsesionária hahú ona operasaun iha data ne’ebé prevee ona.

#Media_MOP