MOP AKOMPAÑA PM OBSERVA PROGRESU KONSTRUSAUN EDIFÍSIU TDD ATINJI ONA 27%

MOP AKOMPAÑA PM OBSERVA PROGRESU KONSTRUSAUN EDIFÍSIU TDD ATINJI ONA 27%

DILI, 13 AGOSTU 2021: S. Exa, Ministru Obras Públikas (MOP), Arq. Salvador Eugénio Soares dos Reis Pires, hamutuk ho S. Exa, Prezidente Tribunál Rekursu (TR), Sr. Deolindo dos Santos, S. Exa, Ministru Justisa (MJ), Sr. Manuel Carseres, akompaña S. Exa, Primeiru Ministru (PM), Sr. Taur Matan Ruak, observa progressu konstrusaun edifísiu Tribunál Distritu Dili, iha suku Kaikoli, postu administrative Vera Krus, munisípiu Dili, ne’ebé daudauk ne’e atinji ona pursentu 27 (27%).

“Ne’e S. Exa, Prezidente Tribunál Rekursu konvida ami, ha’u, Sr. Ministru Justisa, Sr. Ministru Obras Públikas ami mai vizita fatin ida-ne’e i iha tinan kotuk (2020) ita lansa, ha’u hakarak hatete katak, ha’u kontente loos haree kontratór nia servisu ho mós konsultan nia servisu, kualidade di’ak tanba ita halo obras balun iha Timor ha’u haree rasik mais ida-ne’e ha’u apresia, ha’u espera tinan oin bele remata,”S. Exa, Sr. Primeiru Ministru informa ba jornalista sira hafoin vizita no observa progressu konstrusaun edifísiu Tribunál Distritu Dili, iha suku Kaikoli.

Iha estadu de direitu demokrátiu, pilar importante boot ida mak setór justisa, tanba ne’e presiza prepara infraestrutura ne’ebé di’ak hodi fasilita servisu setór justisa nian, prepara kuadru sira, prepara teknolojia ne’ebé di’ak nune’e servidór sira servisu ho konfortábel hodi konsentra ba iha servisu atende sidadaun sira.

Sr. Primeiru Ministru hatete, “Ha’u fó parabéns ba sira, ba S. Exa, Prezidente Tribunál Rekursu tanba ekipa tékniku ne’ebé halo akompañamentu ne’e di’ak loos i ha’u espera katak ida-ne’e sai referénsia boot ida ba ita-hotu ninia esforsu ba dezenvolvimentu infraestrutura iha futuru oin mai, kualidade, kualidade, kualidade ne’e importante loos, tanba ita gasta osan mais ita mós hakarak uza, ita gasta osan depois ita gasta de’it, ita la uza ba tempu naruk ne’e dehan ita soe masin ba iha tasi-laran”.

Sr. Primeiru Ministru apresia mós ba kontratór, konsultór, ekipa tékniku no traballadór sira ne’ebé hala’o servisu ho di’ak tebes, no husu kontinua halo servisu ho hodi garante kualidade edifísiu dura ba tinan naruk.

Konstrusaun ba edifísiu TDD ne’e lansa iha loron 25 fulan-Novembru tinan 2020. Obra ne’e konstrui husi kompañia Xineza, China Shandong International Economic & Technical Cooperation Group, R.P. no hetan supervizaun husi kompañia DACREA parseria ho AEC (Archtimor Engineering Consultents), no projetu ne’e nia kustu mai husi Orsamentu Jerál Estadu dollar amerikanu millaun 10,990 resin, no daudauk ne’e atinji ona pursentu 27 (27%).

Enkuantu períodu konstrusaun ba obra refere hamutuk loron 510, sura husi loron 12 fulan-Outubru tinan 2020 to’o loron 6 fulan-Marsu tinan 2022.

#Media_MOP