KONSELLU MINISTRU APROVA DEKRETU LEI HAHÚ ALTERASAUN DARUAK BA KÓDIGU PROSESU SIVÍL

KONSELLU MINISTRU APROVA DEKRETU LEI HAHÚ ALTERASAUN DARUAK BA KÓDIGU PROSESU SIVÍL

DILI, 04 AGOSTU 2021: S. Exa, Ministru Obras Públikas (MOP), Arq. Salvador Eugénio Soares dos Reis Pires, partisipa iha reuniaun Konsellu Ministru ne’ebé lidera husi S. Exa, Primeiru Ministru (PM), Sr. Taur Matan Ruak, iha Palásiu Governu, Dili.

Iha sorumutuk Konsellu Ministrus ne’e aprova ona projetu Dekretu-Lei, ne’ebé aprezenta husi S. Exa, Ministru Justisa, Sr. Manuel Cárceres da Costa, ne’ebé ninia objetivu atu hahú alterasaun daruak ba Kódigu Prosesu Sivil nian, ne’ebé aprova ona husi Dekretu-Lei nu. 1/2006, loron 21 fulan-fevereiru no altera ona husi Lei nu. 6/2021, loron 31 fulan-marsu. Ho Dekretu-Lei ne’e, Governu, ho autorizasaun lejislativa ne’ebé fó husi Parlamentu Nasionál (liuhusi Lei nu. 3/2021, loron 2 fulan-marsu), sei fó fleksibilidade ida ne’ebé boot liu ba faze saneamentu husi prosesu nian, liuliu kona-ba preparasaun audiénsia diskusaun julgamentu, no ssei kontribui ba dezkonjestionamentu justisa sivil. Ho alterasaun ne’e, mantein faze saneamentu hanesan faze prosesuál intermédia husi prosesu, maibé ne’e la nesesária tenke bazeia iha espesifikasaun no iha kestionáriu, ho eskema preparativu alternativu sira. Selesaun husi eskema preparatóriu ba audiénsia diskusaun no julgamentu nian maka halo husi juiz, lihusi despaxu ne’ebé laiha dalan ba rekursu, tuir opsaun ne’ebé iha situasaun konkreta, adekuada liu ba karasterístika konkreta sira litíju nian.

Konsellu Ministrus aprova ona alterasaun daruak ba Dekretu-Lei nu. 17/2020, loron 30 fulan-abríl, ne’ebé kria suplementu remuneratóriu ba funsionáriu, ajente no traballadór administrasaun públika sira ne’ebé fó atividade profisionál oin-oin iha servisu prevensaun ka kontrola COVID-19 nian ka iha kondisaun direta espozisaun ba virus SARS-CoV-2.

Iha alterasaun ne’e, lista kategoria traballadór benefisiáriu sira sei revee filafali, hanoin ba traballadór sira ne’ebé hala’o sira-nia atividade oin-oin iha kondisaun direta espozisaun ba virus SARS-CoV-2 maka ohin luan liu duké ne’ebé prevee ona iha Dekretu-Lei anteriór, liuliu ho inkluzaun husi tékniku sira ne’ebé envolve ona iha programa vasinasaun kontra COVID-19, guarda prizionál no koveiru sira, entre seira seluk, ne’ebé maka la abranje to’o oras ne’e.

Valór suplementu remuneratóriu ida ne’e, sei finansia husi Fundu COVID-19 nian, variasaun entre dolar amerikanu 5 to’o 25 kada loron, tuir grau risku sira ne’ebé funsionáriu sira hasoru, tuir tabela ne’ebé aprova ho diploma ida ne’e.

Alterasaun hirak ne’ebé prevee iha diploma ne’e prodúz efeitu hahú husi loron 30 fulan-abríl tinan 2020, data tama iha vigór husi Dekretu-Lei ne’ebé oras ne’e altera.

Direitu ba suplementu sira ne’e sei prolonga to’o loron 31 fulan-dezembru tinan 2021, sein prejuizu ba posibilidade posteriór hodi halo estensaun liuhusi intervensaun lejizlativa foun.

Aprova ona mos projetu Dekretu Governu, ne’ebé aprezenta husi S. Exa, Ministru Administrasaun Estatal, Sr. Miguel Pereira de Carvalho, kona-ba alterasaun dahuluk ba Dekretu Governu ne’ebé refere ba remunerasaun husi Prezidente Autoridades Municipál no Administradór Municipál sira. Diploma ida ne’e hakarak atu adekua remunerasaun Prezidente Autoridade Munisipál ni Administradór Munisipál sira ho responsabilidade ne’ebé boot katak dezempeñu kargu nian implika, hanesan reprezentante sira, ba nivel munisipál, husi Governu Sentrál, ne’ebé kaer responsabilidade sira ba servisu oin-oin sira ne’ebé fó husi Governu ba sidadun lokál sira. Ho projetu Dekretu Governu ne’e, hahú husi fulan-janeiru tinan 2022, Prezidente Autoridade Munisipál sira sei simu remunerasaun fulan-fulan dolar amerikanu 1.600 no Administradór Munisipál sira sei simu dolar amerikanu 1.300.

Konsellu Ministrus aprova ona projetu Rezolusaun Governu, ne’ebé mós aprezenta husi Sr. Ministru Administrasaun Estatal, kona-ba atualizasaun resenseamentu eleitorál iha estranjeiru no aprovasaun kalendáriu kona-ba operasaun resenseamentu eleitorál iha estranjeiru, ba eleisaun Prezidente Repúblika ne’ebé hala’o iha tinan 2022. Rezolusaun Governu ne’e ho objetivu atu asegura realizasaun operasaun resenseamentu eleitorál iha estranjeiru, hodi permite sidadaun timór sira ne’ebé hela iha estranjeiru, hodi fó sira nia direitu ba votu. Atividade sira inskrisaun nian no atualizasaun inskrisaun iha resensiamentu eleitorál sei hala’o iha loron 3 fulan-setembru tinan 2021 to’o loron 14 fulan-janeiru tinan 2022, ne’ebé sei sai períodu ida ne’ebé naruk tebes la hanesan baibaintanba pandemia COVID-19. Aleinde misaun diplomátika no postu konsulár sira, atividade hirak ne’e sei mós hala’o iha postu resensiamentu movel sira iha Austrália, iha Koreia Sul, iha Portugál no iha Reinu Unidu.

Ikusliu, Konsellu Ministrus delibera hodi aprova projetu Rezolusaun Governu ne’ebé impoin serka sanitária iha área sira ne’ebé abranje husi Suku Naimeco, iha Postu Administrativu Pante Makasar no husi Suku Bobometo, iha Postu Administrativu Oesilo, postu administrativu rua ne’e iha Rejiaun Administrativa Espesiál Oekuse Ambenu, hahú oras 00:00 loron 5 fulan-agostu tinan 2021 to’o oras 23:59 loron 18 fulan-agostu tinan 2021.

Nune’e, bandu sirkulasaun ema sira-nian entre Suku sira ne’ebé temi no sirkunskrisaun administrativa sira-seluk, exetu iha kazu hirak ne’ebé ninia fundamentu forte tanba razaun seguransa públika, saúde públika, asisténsia umanitária, manutensaun ba sistema abastesimentu públiku ka razaun seluk ne’ebé presiza atu hala’o ba interese públiku nian. La inklui iha proibisaun sirkulasaun ida-ne’e indivíduu sira ne’ebé komprova vasinasaun kompleta (doze rua) kontra COVID-19, no mós labarik sira ho idade tinan 6 mai kraik ne’ebé akompaña indivíduu sira ne’e.

#Media_MOP