KONSELLU MINISTRU APROVA REZOLUSAUN IMPOEN KONFINAMENTU DOMISILIÁRIU JERÁL IHA KAPITÁL DILI

KONSELLU MINISTRU APROVA REZOLUSAUN IMPOEN KONFINAMENTU DOMISILIÁRIU JERÁL IHA KAPITÁL DILI

DILI, 25 AGOSTU 2021: S. Exa, Ministru Obras Públikas (MOP), Arq. Salvador Eugénio Soares dos Reis Pires, iha Kuarta-feira ne’e partisipa iha reuniaun Konsellu Ministru ordinária ne’ebé lidera husi Vise Primeira Ministra no Ministra Solidariedade Sosiál (V-PM no MSSI), Sra. Armanda Berta dos Santos, iha Palásiu Governu, Dili.

Iha reuniaun Konsellu Ministru ne’e hafoin analiza aprezentasaun ba pontu situasaun epidemiolójika nasionál, husi Koordenadór Sala Situasaun Sentru Integradu Jestaun, aprova Dekretu Governu kona-ba medida sira ezekusaun Deklarasaun Estadu Emerjénsia nian, ne’ebé efetua husi Dekretu Prezidente Repúblika n. 69/2021, loron 24 fulan-agustu, hodi hatán ba pandemia COVID-19. Estadu emerjénsia, ne’ebé renova ona, abranje ba territóriu nasionál tomak no vigora entre tuku 00:00 husi loron 31 fulan-agustu tinan 2021 to’o tuku 23:59 loron 29 fulan-setembru tinan 2021.

Kompara ho medida sira ezekusaun estadu emerjénsia anteriór nian rejista alterasaun ida, ne’ebe oras ne’e bandu, iha territóriu nasionál tomak, atividade sira hotu ne’ebé implika halibur ema barak.

Regra sira seluk mantein, liuliu obrigasaun ba indivídou sira hotu ne’ebé hela iha Timor-Leste atu mantein distánsia, pelumenus, metru ida ho ema seluk ne’ebé la hela iha ekonomia komún. Kontinua obriga atu utiliza máskara oin nian ne’ebé taka inus no ibun bainhira hakarak tama ka hela iha fatin públiku ka privadu hirak ne’ebé ema hotu uza no fase liman bainhira hakarak tama ba estabelesimentu komersiál sira, industriál ka prestasaun servisu sira-nian ka ba edifísiu sira iha ne’ebé servisu administrasaun públika nian funsiona. Durante estadu emerjénsia, lisensa, autorizasaun, vistu no autorizasaun rezidénsia no ato administraativu sira seluk sei válidu nafatin la depende ba nia prazu validade.

Konsellu Ministrus aprova projetu Rezolusaun Governu ne’ebé impoen konfinamentu domisilariu jerál ba populasaun iha munisípiu Dili, entre tuku 00:00 loron 27 fulan-agusto to’o tuku 23:59 loron 2 fulan-setembru tinan 2021.

Nune’e, impoen konfinamentu dimisiliáriu jerál ba ema hotu ne’ebé maka hela ka agora daudaun iha Munisípiu Dili, ne’ebé tenke hela iha sira-nia uma ka iha sira nia alojamentu temporáriu, ne’ebé inklui sentru akollimentu, exetu iha situasaun ne’ebé prevee iha diploma ne’e, liuliu tanba razaun saúde, serbisu, asesu ba sasán no servisu nesesidade bázika nian no simu vasina kontra COVID-19.

Iha área hotu-hotu munisípiu Dili nian, bandu atu transporte públiku, liuliu táxi, mikrolete, biskota no anguna halo sirkulasaun;

Suspende selebrasaun relijioza koletiva, no bandu mós atu hala’o serimónia fúnebre ne’ebé envolve partisipasaun ema na’in sanulu liu, sira ne’ebé, durante serimónia ne’e rasik tenke uza máskara oin nian hodi taka inus no ibun no mantein distánsia, pelumenus metru ida ho ema seluk ne’ebé prezente iha serimónia ne’e.

Estabelesimentu komersiál, industriál, artezanál ka prestasaun servisu nian taka ba públiku, ho exesaun ba estabelesimentu sira ne’ebé autoriza iha Rezolusaun Governu ne’e, liuliu estabelesimentu ne’ebé fa’an ai-han no sasán nesesidade bázika nian, eletrisidade, telekomunikasaun, prestasaun kuidadu médiku, farmásia, postu kombustivel nian, no instituisaun finanseira sira.

Restaurante sira bele fornese hahán iha rejime take away ka entrega iha uma de’it no estabelesimentu sira-seluk ne’ebé taka ba públiku bele dezenvolve ninia atividade liuhusi servisu entrega ba uma de’it.

Vendedór ambulante ba sasán alimentár no sasán ba nesesidade bázika bele mantein sira-nia atividade. Merkadu sira munisípoi nian, Manleuana no Taibessi, mantein ninia funsionamentu, husi tuku 6 dadeer to’o tuku 6 loro-kraik.

Aprova mós projetu Rezolusaun Governu nian ba:

• Ne’ebé impoen serka sanitária iha munisípiu Dili no Ermera to’o tuku 23:59 loron 13 fulan-setembru;

• Ne’ebé impoen serka sanitária iha munisípiu Baucau no Covalima hahú husi tuku 23:59 loron 26 fulan-agustu tinan 2021 to’o tuku 23:59 loron 8 fulan-setembru tinan 2021 ;

• Ne’ebé mantein impozisaun serka sanitária iha no inklui área sira husi Suku Naimeco, iha postu administrativu Pante Macassar, no suku Bobometo, iha postu administrativu Oesilo, suku sira ne’e iha Rejiaun Espesiál Oe-Cusse Ambeno to’o tuku 23:59 loron 8 fulan-setembru.

Nune’e, bandu sirkulasaun ema sira-nian entre área no munisípiu sira ne’ebé refere ona no sirkunskrisaun administrativa sira-seluk, exetu iha kazu hirak ne’ebé nia fundamentu forte tanba razaun sira seguransa públika, saúde públika, asisténsia umanitária, manutensaun ba sistema abastesimentu públiku ka razaun seluk ne’ebé presiza atu hala’o ba interese públiku nian. La inklui iha proibisaun sirkulasaun ida-ne’e indivíduu sira ne’ebé komprova vasinasaun kompleta (doze rua) kontra COVID-19, no mós ba labarik sira ho idade tinan 6 mai kraik ne’ebé akompaña.

Aprova mós projetu Rezulusaun Governu ne’ebe mantein Konfinamentu domisiliáriu jerál ba populasaun iha postu administrativu Ermera no Railaco, iha munisípiu Ermera, to’o tuku 23:59, loron 1 fulan-setembru.

Nune’e, bandu nafatin sirkulasaun ema sira-nian entre postu administrativu sira ne’e no sirkunskrisaun administrativa sira-seluk, exetu iha kazu hirak ne’ebé nia fundamentu forte tanba razaun sira seguransa públika, saúde públika, asisténsia umanitária, manutensaun sistema abastesimentu públiku, ka razaun seluk ne’ebé presiza atu hala’o ba interese públiku nian. La inklui iha proibisaun sirkulasaun ida-ne’e indivíduu sira ne’ebé komprova vasinasaun kompleta (doze rua) kontra COVID-19, no mós labarik sira ho idade tinan 6 mai kraik ne’ebé akompaña indivíduu sira ne’e.

Konsellu Ministrus aprova, ho alterasaun, projetu Dekretu-Lei ne’ebé aprezenta husi S. Exa, Prezidésia Konsellu Ministrus, Sr. Fidelis Manuel Leite Magalhães, kona-ba Baze Jerál sira husi Organizasaun Administrasaun Públika. Projetu Dekretu-Lei ne’e atu promove koerénsia lejizlasaun ne’ebé adopta ona iha matéria administrativa, hodi favorese unidade, efisiénsia no efikásia husi nia asaun. Diploma ne’e define prinsípiu efisiénsia administrativa, ne’ebé administrasaun direta no indireta Estadu nain, bele garante máxima efisiénsia iha uzu rekursu públiku sira ba satisfasaun nesesidade koletiva sira, tuir interese públiku no respeita ba sidadaun sira-nia direitu. Nune’e administrasun direta no indireta Estadu nian atu hatán ba efikás interese públiku, ne’ebé la konsidera kualkér atusaun husi interese privadu iha nia organizasaun.

Aprova mós, ho alterasaun, projetu Dekretu-Lei ba alterasaun dahuluk ba Dekretu-Lei n. 19/2018, loron 27 fulan-dezembru ne’ebé aprova ona iha Orgániku Ministériu Assuntus Kombatentes Libertasaun Nasionál, ne’ebé aprezenta husi S. Exa, Ministru, Sr. Júlio Sarmento da Costa “Meta Mali”. Alterasaun ne-e atu hadi’a kapasidade implementasaun nian husi serbisu sira, liuliu serbisu sira ne’ebé halo atendimentu ba Kombatente sira Libertasaun Nasionál nian no haforsa kapasidade institusionál iha área téknika no operasionál balun ministériu nian, liuliu iha matéria kapasitasaun no formasaun profisionál ba rekursu umanus sira ka iha matéria informátika no teknolojia sira informasaun, protokolu no komunikasaun institusionál.

Konsellu Ministrus Aprova projetu Rezolusaun Governu, ne’ebé aprezenta husi S. Exa, Ministtu Finansas, Sr. Rui Augustu Gomes, kona-ba definisaun kompozisaun Komité Revizaun Polítika (koñesidu ho naran CROP) ba Orsamentu Jerál Estadu tinan 2022. Kabe ba Komité Revizaun Polítiku atu verifika alokasaun estratéjiku rekursu sira husi submisaun orsamentál nian, atu bele atinje kompromisu no objetivu sira ne’ebé hateten ona iha dokumentu estratéjiku sira no hodi análiza kapasidade atu ezekuta planu sira ba tinan finanseiru 2022. CROP ne’e sei prezide husi Primeiru-Ministru no kompostu mós husi Vise-Primeiru-Ministru, Ministru Prezidénsia Konsellu Ministrus, Ministru Koordenadór Assuntus ekonómikus, Ministru Finansas, Ministru Edukasaun, Juventude no Desportu, Ministru Transporte no Komunikasoins no husi Ministru Administrasaun Estatál. Sei partisipa mós iha sorumutuk sira CROP nian observadór sira, sekretária Estadu Igualdade no Inkluzaun, Sekretáriu Estadu Juventude no Desportu no Komisária Direitus Labarik nian.

Ikus liu, Konsellu Ministrus haree aprezentasaun husi S. Exa, Ministériu Edukasaun, Juventude no Desportu, Sr. Armindo Maia, no S. Exa, Sekretáriu Estadu Juventude no Desportu, Sr. Abrão Saldanha, kona-ba pontu situasaun ba preparasaun Jogu Desportivu Comunidade dos Países de Língua Portuguesa (CPLP) nian ba da-XII. Eventu ne’e prevee atu hala’o iha Timor-Leste, entre loron 10 to’o loron 22 fulan jullu tinan 2020, maibé adia ba tinan 2022, tamba pandemia COVID-19, hanesan eventu desportivu sira seluk nivel mundiál. Harre katak mantein preokupasaun ne’ebé adia eventu oda-ne’e, Governu rekomenda hodi adia filafali jogu CPLP da-XII ba tinan 2024.

#Media_MOP

Read More

MOP HATO’O KSOLOK SELEBRASAUN LORON FALINTIL BA DALA-46

MOP HATO’O KSOLOK SELEBRASAUN LORON FALINTIL BA DALA-46

DILI, 20 AGOSTU 2021: S. Exa, Ministru Obras Públikas (MOP), Arq. Salvador Eugénio Soares dos Reis Pires, no Vise Ministru Obras Públikas (V-MOP), Eng. Nicolau Lino Freitas Belo, hamutuk ho funsionáriu tomak hato’o ksolok Selebrasaun Aniversáriu Loron Forças Armadas de Libertação Nacional Timor-Leste (FAILINTIL) ba dala-46 hahú husi loron 20 fulan-Agostu tinan 1975 to’o 20 fulan-Agostu tinan 2021.

“Relembra Aswa’in Falintil Sira nia Luta ba Ukun-Rasik-An, Hatutan no Kontinua Luta ba Dezenvolvimentu Timor-Leste ida Prosperu, Riku no Seguru ba Ema Hotu”

#VivaTimor-Leste

#VivaFALINTIL

#VivaPovuMaubere 

Read More

TESTE SWAB BA FUNSIONÁRIU SIRA IHA GABINETE MOP

TESTE SWAB BA FUNSIONÁRIU SIRA IHA GABINETE MOP

DILI, 19 AGOSTU 2021: S. Exa, Ministru Obras Públikas (MOP), Arq. Salvador Eugénio Soares dos Reis Pires, akompaña funsionáriu Gabinete MOP, ho seguransa pesoál sira inklui Diretór Jerál Administrasaun no Finansas (DJAF), Sr. Januário Aparício Barbosa, Diretór Nasionál Aprovizionamentu (DNA), Sr. Quintiliano Belo, hetan teste swab iha salaun Gabinete MOP, Kaikoli, Dili.

Iha loron hanesan, S. Exa, Ministru Obras Públikas ho família hetan teste swab iha nia rezidénsia hodi prevene propagasaun surtu Kovid-19 liuliu variante foun Delta iha Timor-Leste.

Sr. Ministru Obras Públikas agradese no fó obrigadu ba ekipa liña frente ne’ebé kontinua hala’o servisu fó teste swab ba públiku.

#Media_MOP

 

Read More

AVIZU IKUS BA HAMAMUK UMA/FATIN ABITANTE AFEITADU HUSI ROTUNDA KUMORO TO’O TASI-TOLU

AVIZU IKUS BA HAMAMUK UMA/FATIN ABITANTE AFEITADU HUSI ROTUNDA KUMORO TO’O TASI-TOLU

DILI, 17 AGOSTU 2021: Diretór Jerál Obras Públikas no Koordenadór Jerál Eispropriasaun Rotunda-Tasitolu, Sr. Rui H. Freitas Guterres, husu ba komunidade afeitadu husi melloramentu estrada protokolu husi Retunda Kumoro to’o Tasi-tolu atu hamamuk uma ou fatin hamutuk 140 ne’ebé hetan ona kompensasaun.

Abitante sira presiza hamamuk uma ou fatin sira ne’ebé hetan ona indiminizasaun durante semana rua-nia laran hahú husi loron despaxu ka avizu ne’e fó sai.

Servisu ekipamentu pezadu husi Ministériu Obras Públikas sei hala’o demulisaun ka sobu uma ou fatin afeitadu sira iha tempu badak.

#Media_MOP

Read More

KONSELLU MINISTRU APROVA DEKRETU GOVERNU KRIASAUN UJIP BA DEZENVOLVIMENTU AEROPORTU INTERNASIONÁL KUMORO

KONSELLU MINISTRU APROVA DEKRETU GOVERNU KRIASAUN UJIP BA DEZENVOLVIMENTU AEROPORTU INTERNASIONÁL KUMORO

DILI, 18 AGOSTU 2021: S. Exa, Ministru Obras Públikas (MOP), Arq. Salvador Eugénio Soares dos Reis Pires, iha Kuarta-feira ne’e partisipa iha reuniaun Konsellu Ministru ordinária ne’ebé lidera husi S. Exa, Primeiru Ministru (PM), Sr. Taur Matan Ruak, iha Palásiu Governu, Dili.

Iha reuniaun Konsellu Ministru ne’e delibera atu autoriza S. Exa, Ministru Petróleo no Minerais, Sr. Victor da Conceição Soares, hahú dilijénsia nesesária no urjente sira, ho objetivu posibilidade arendamentu ho opsaun kompra nian, ka akizisaun ba instalasaun sira ne’ebé ho kondisaun dígna no bele simu servisu Ministériu Petróleo no Minerais sira hotu, ne’ebé daudaun ne’e lokaliza iha fatin oin-oin iha sidade Dili.

Aprova ona projetu Rezolusaun Governu nian, ne’ebé aprezenta husi Ministru Finansas, Rui Augusto Gomes, ba Kriasaun Unidade Jestaun Integrada husi Projetu Dezenvolvimentu Aeroportu Internasionál Prezidente Nicolau Lobato (UJIP) Kumoro. Unidade ida-ne’e, sei iha dependénsia direta ba Komisaun Interministeriál kona-ba negosiasaun apoiu finanseiru ba rekualifikasaun Aeroportu Internasionál Nicolau Lobato (AINL), hanesan estrutura temporária ida ba implementasaun projetu ne’ebé sei kontinua ho jestaun téknika no estratéjika sentralizada iha ezekusaun projetu AINL nian iha ninia komponente no ninia faze sira.

Konsellu Ministrus delibera atu autoriza Sr. Ministru Finansas, atu prosede negosiasaun ho Banku Aziátiku Dezenvolvimentu nian, kona-ba kondisaun espesífika sira empréstimu nian relasiona ho projetu modernizasaun ba distribuisaun enerjia elétrika. Haree katak negosiasaun inisiál sira tenke dezenvolve husi ekipa téknika ida liderada husi Ministériu Finansas sei bele nomeia, liuhusi despaxu, membru sira ne’ebé integra iha ekipa negosiasaun ida-ne’e.

Hafoin análize aprezentasaun husi pontu situasaun epidemiolójika nasionál, husi Sala Situasaun Sentru Integradu Jestaun Krize, Konsellu Ministrus delibera ona propoin ba Sua Exelénsia, Señór Prezidente Repúblika, Sr. Francisco Guterres Lú Olo, renovasaun estadu emerjénsia nian, ba loron 30 tan. Ho hanoin katak kauza determinante sira ne’ebé justifika ona deklarasaun estadu emerjénsia no ninia renovasaun sira kontinua mantein, no atubele evita no neutraliza risku propagasaun sira husi variante foun SARS-CoV-2, no nune’e bele proteje saúde públika no kapasidade resposta husi Sistema Nasionál Saúde nian, Governu propoin ba Señór Prezidente Repúblika katak, ho renovasaun estadu emerjénsia nian, permite suspensaun ka restrisaun ba direitu no garantia fundamentál balun.

Aprova mós projetu Rezolusaun Governu nian, atu:

Mantein impozisaun serka sanitária iha área abranjida sira iha suku Naimeko, iha Postu Administrativu Pante Makasar, no husi Suku Bobometo, iha Postu Administrativu Oesilo, postu administrativu rua ne’e iha Rejiaun Administrativa Espesiál Oekuse Ambeno, to’o tuku 23:59 loron 30 fulan-agostu tinan 2021.

Mantein impozisaun serka sanitária iha Munisípiu Dili no iha Postu Administrativu Ermera no Postu Administrativu Railaku, iha Munisípiu Ermera nian, to’o tuku 23:59 loron 30 fulan-agostu tinan 2021.

Hanesan Konsellu Ministrus deside ona iha semana kotuk, sei mantém impozisaun serka sanitária iha Postu Administrativu sira seluk iha Munisípiu Ermera, to’o tuku 23:59 husi loron 26 fulan-agostu no mós mantein konfinamentu domisiliáriu jerál ba populasaun husi Postu Administrativu Ermera no Postu Administrativu Railaku, iha Munisípiu Ermera nian, to’o tuku 23:59, husi loron 25 fulan-agostu.

Nune’e bandu sirkulasaun ema sira-nian entre área ka munisípiu sira ne’ebé temi ona no sirkunskrisaun administrativa sira-seluk, exetu iha kazu hirak ne’ebé ninia fundamentu sira forte tanba razaun seguransa públika, saúde públika, asisténsia umanitária, manutensaun ba sistema abastesimentu públiku ka razaun seluk ne’ebé presiza atu hala’o ba interese públiku nian. La inklui iha proibisaun sirkulasaun ida-ne’e indivíduu sira ne’ebé komprova vasinasaun kompleta (doze rua) kontra COVID-19, no mós labarik sira ho idade tinan 6 mai kraik ne’ebé akompaña indivíduu sira ne’e.

S. Exa, Ministériu Finansas, Sr. Rui Gomes, aprezenta ba Konsellu Ministrus opsaun sira polítiku-lejizlativa subjasente nian kona-ba proposta kriasaun subsídiu alimentar no subsidiu transporte ba funsiunáriu publiku sira. Opsaun sira ne’ebé aprezenta kona-ba subsídiu transporte prevee atu substitui atribuisaun karreta Estadu nian ho subsídiu ida-ne’e, permite hamenus kustu jestaun no manutensaun nian ho karreta. Opsaun sira ne’ebé aprezenta kona-ba subsídiu alimentar prevee atribuisaun mensál ba beins alimentares husi produsaun lokál ba funsionáriu públiku sira. Kriasaun ba subsídiu rua ne’e sei análiza no delibera filafali iha sorumutuk Ezekutivu nian tuir mai.

#Media_MOP

 

Read More

KONSTRUSAUN ESTRADA LAULARA-SOLEREMA ATINJI ONA PURSENTU 35, KASNAFAR-SARLALA SEI RETIFIKA DEZEÑU

KONSTRUSAUN ESTRADA LAULARA-SOLEREMA ATINJI ONA PURSENTU 35, KASNAFAR-SARLALA SEI RETIFIKA DEZEÑU

LAULARA, 12 AGOSTU 2021: S. Exa, Ministru Obras Públikas (MOP), Arq. Salvador Eugénio Soares dos Reis Pires, hatete konstrusaun estrada nasionál Laulara-Solerema, munisípiu Aileu nian daudauk ne’e atinji ona pursentu 35 (35%), no konstrusaun estrada nasionál husi Kasnafar (mota ulun Kumoro nian) ba Sarlala daudauk ne’e iha prosesu retifikasaun dezeñu kauza husi kalamidade 04 Abril tinan 2021.

“Ita-boot sira haree katak tinan 2019 ha’u mai lansa tiha fatuk dahuluk ba estrada Laulara-Solerema restu, ne’e ita mai lansa iha 2019, ita mai lansa iha ne’e agora konstrusaun la’o hela atinji ona 35%, ne’ebé kuandu di’ak karik ita-boot sira bele uza,”Sr. Ministru informa ba komunidade postu administrativu Laulara, munisípiu Aileu, bainhira hala’o vizita traballu ba suku Fatisi hodi haree direita kondisaun estrada ne’ebé normaliza husi ekipa Institutu Jestaun Ekipamentu (IJE) iha suku refere.

Kona-ba konstrusaun estrada nasionál Kasnafar (estrada foun husi Kumoro mota ulun) to’o Kasnafár, postu administrativu Laulara, munisípiu Aileu nia orsamentu tama iha Orsamentu Jerál Estadu (OJE) tinan fiskál 2021, maibé hetan estragus barak husi kalamidade 04 fulan-Abril, nune’e tékniku sira presiza refitika nia dezeñu.

Sr. Ministru hatuta, kona-ba “Trosu Kasnafar-Sarlala loloos ne’e trosu Kasnafar-Sarlala tama tiha ona fundus infraestruturas para halo konstrusaun iha tinan ida-ne’e, depois de kalamidade nia tamañu ka estragus ne’e barak liu ita tenke retifika fali dezeñu tuir kondisaun ne’ebé agora iha, entaun retifikasaun dezeñu ne’e agora la’o hela, signifika ida-ne’e hotu tiha ita sei lori ba ADN (Ajénsia Dezenvolvimentu Nasionál), ADN verifika lori ba KAFI (Konsellu Administrasaun Fundu Infraestrutura), KAFI aprova ita bele lori ba tenderizasaun, kuandu hetan ona manán na’in ruma bele halo mobilizasaun depois halo hotu ita-nia estrada ida-ne’e”.

Antes vizita traballu ba suku Fatisi, Sr. Ministru hala’o uluk enkontru ho Administradór munisípiu Aileu, Sr. Abel da Conceição, no Komandante Polísia Nasionál Timor-Leste (PNTL) munisípiu Aileu, Superintendente Polísia, Jorge Monteiro, hato’o preokupasaun kona-ba progressu konstrusaun estrada Kasnafar-Sarlala ne’ebé kleur ona kondisaun seidauk di’ak.

“Ohin ami rua na’i administradór ko’alia hela, ho mós Sekretária dehan katak estrada ne’e kleur tiha ona, komandante polísia mós hatete estrada ne’e kleur tiha ona? Estrada ne’e tanba uluk ne’e la’o hela fahe ba kompañia lima tanba ne’e kuandu seidauk hotu ita labele loke tan kontratu ida, ba fali, funsionamentu Governu nian mak hanesan ne’e, ne’ebé kontratu ida hotu mak ita haree fali,”Sr. Ministru esplika.

Konstinuasaun ba konstrusaun estrada nasionál husi Laulara-Solerema, munisípiu Aileu nian lansa fatuk dahuluk iha loron 30 fulan- Outubru tinan 2019.

#Media_MOP

 

Read More

MINISTRU MOP ATRIBUI KOMPETÉNSIA BA VISE MOP NO DGAF BA ASINATURA PROJETU FI NO LM

MINISTRU MOP ATRIBUI KOMPETÉNSIA BA VISE MOP NO DGAF BA ASINATURA PROJETU FI NO LM

DILI, 09 AGOSTU 2021: S. Exa, Ministru Obras Públikas (MOP), Arq. Salvador Eugénio Soares dos Reis Pires, atribui kompeténsia ba S. Exa, Vise Ministru Obras Públikas (MOP), Eng. Nicolau Lino Freitas Belo, no Diretór Jerál Administrasaun no Finansas (DJAF), Sr. Januário Aparício Barbosa, kona-ba asinatura projetu sira Fundu Infraestrutura (FI) no Liña Ministériu (LM).

Husi kompeténsia ne’e, Sr. Vise Ministru mak sei asina kontratu no pagamentu ba projetu husi FI ho valor millaun $1 mai kraik, no Sr. DJAF sei asina projetu sira husi LM ho valór rihun $100 mai kraik.

“Iha mudansa polítika ne’ebé mak ha’u hakarak informa iha ita-nia forum ida-ne’e, ba siñor sira hotu katak foin daudauk iha sesta-feira ha’u asina ona delegasaun kompeténsia ba Sr. Vise liuliu ba fundu infraestruturas, projetu on going hotu ne’ebé promovidu iha Governu anteriór Sr. Ministru mak sei asina, extensaun kontratu no mós prosesu pagamentu ne’ebé faktura sira extensaun kontratu husi Diresaun Jerál Obras Públikas, karik empreza sira, ita-boot sira haruka ba Vise Ministru nia gabinete. Agora, projetu sira resentelmentu ne’ebé liga ho projetu impréstimu, projetu foun ne’ebé finansiadu husi fundus infraestruturas, ne’e Sr. Vise Ministru mak sei asina nia akordu no mós pagamentu sira, ne’e ha’u atribui ona ba Sr. Vise Ministru,” Sr. Ministru Obras Públikas, informa bainhira lidera mini komité revizaun orsamentu tinan fiskál 2022, iha loron 09 Agostu tinan 2021, iha JL Villa, Fatuhada, Dili.

Aliende ne’e, “ba projetu kalamidade ne’ebé akontese iha 4 Abril, projetu millaun $1 mai kraik (nia valór kontratu), Sr. Vise mak sei asina nia kontratu no mós nia pagamentu, ida-ne’e mudansa polítika ne’ebé ita halo, ne’ebé ha’u husu ba Siñor sira, ita-boot sira bele asesu (Ha’u la hatene depaxu ne’e publika ona iha jornál da repúblika ka seidauk, maibé kuandu asina iha sesta ne’e nia direitamente efetiva kedas tuir despaxu ministru nian”.

Sr. Ministru akresenta, husi mudansa polítika ne’e fó kompeténsia ba Sr. Vise Ministru atu haree ba pagamentu no kontratu extensaun sira, no exeptu ba projetu impréstu.

“Ohin ha’u hatete projetu sira ne’ebé promovidu iha Governu anteriór Sr. Vise Ministru mak haree pagamentu no mós kontratu, kontratu hanesan extensaun sira, maibé ho exepsaun ba iha projetu impréstimu, impréstimu tanba millaun $5 ba leten ne’e Konsellu Ministru nia kompeténsia apezár de KAFI (Konsellu Administrasaun Fundu Infraestrutura) dalaruma deskuti iha ne’eba entaun ida-ne’e nafatin mantein ho Ministru”.

Sr. Ministru informa tan katak “Mudansa ida fali Liña Ministériu mak, atu hatete ba ita-boot sira katak projetu rihun $100 mai kraik, nia kontratu no prosesu pagamentu no CPV sira ha’u atribui ona ba Sr. Diretór Jerál Administrasaun no Finansas, nia mak sei haree hotu kedas, ne’ebé projetu sira rihun $100 mai karaik ne’e labele mai ona iha ha’u-nia Gabinete, mai iha siñor Administrasaun no Finansas nia fatin, ha’u husu ona, nia estabelese nia gabinete para iha sistema sira hanesan verifikasaun molok aprovasaun kontratu ka pagamentu ne’ebé faktura sira mai hanesan mós siñor Vise, iha ne’eba buat ida klaru mak despaxu ne’e kada pontu ha’u sempre dehan nos termos da lei, nos termos da lei, nos termos da lei, ne’ebé ha’u fó hanoin nafatin ba Sr. Vise ho Sr. Diretór, responsabilidade fó mai mós ho risku hotu ne’ebé ita-boot sira favór ida ezerse tuir ita-nia konstituisaun ka lei, regra sira ne’ebé vigór iha ita-nia rai Timor-Leste, ida-ne’e mak mudansa polítika ne’ebé mak ha’u hakarak informa ba Siñor sira hotu para ita-boot sira hatene mudansa ne’e”.

Husi mudansa ida-ne’e, Sr. Ministru sei foku nia konsentrasaun ba iha lejislasaun sira liuliu liga ba reforma institusionál ba Diresaun Jerál Obras Públikas (DJOP) no Institutu Jestaun Ekipamentus Institutu Públiku (IJE),I.P) no atividade sira liga ho empreza públika sira.

Aliende ne’e, Gabinete Inspesaun no Auditoria (GIA) ne’ebé antes ne’e kompete ba iha Sr. Vise Ministru MOP, dadauk ne’e submete hikas ba iha Sr. Ministru, nune’e relatóriu hotu GIA relata ba iha Sr. Ministru.

Iha fatin hanesan, Sr. Vise Ministru Obras Públikas, afirma katak delegasaun kompeténsia ne’ebé Sr. Ministru fó ne’e hanesan konfiansa ida ne’ebé tenke ezekuta tuir lei no órden.

“S. Exe, Ministru ho boa vontade oinsá servisu hamutuk ho vise Ministru fahe kna’ar, ha’u-nia Diretór Finansas rihun $100 mai kraik, ha’u husi millaun $1 mai kraik, ho tan adisionál lubuk ida hanesan extensaun lubuk ida ne’ebé ita hamutuk para atu tau-matan, primeiru mak KAFI, segundu mak atu akompaña servisu liuliu ba Kalamidade ka inundasaun loron 04 Abril, entaun kalamidade ne’e millaun $1 mai kraik, ha’u mak sei tau tinta mean ba iha karimbu, depois millaun #1 ba leten S. Exa, mak sei responsabiliza ba iha projetu estratéjiku sira ne’ebé liu millaun $1 ba leten, terseiru mak resentelmentu ou kompensasaun sira, ne’ebé iha buat rua mak lei no orden, lei mak S. Exa fó ona mai para ha’u atu la’o tuir, órden mak ohin fó xamada see ladi’ak ha’u foti fila-fali ne’e órden ezekuta ne’ebé ha’u atu ezekuta tuir lei no órden,”Sr. Vise Ministru afirma.

Delegasaun kompeténsia ne’e Sr. Ministru liuhosi depaxu ministeriál ne’ebé fó sai iha loron-Sesta, 06 fulan-Agostu tinan 2021.

#Media_MOP

Read More

MOP AKOMPAÑA PM OBSERVA PROGRESU KONSTRUSAUN EDIFÍSIU TDD ATINJI ONA 27%

MOP AKOMPAÑA PM OBSERVA PROGRESU KONSTRUSAUN EDIFÍSIU TDD ATINJI ONA 27%

DILI, 13 AGOSTU 2021: S. Exa, Ministru Obras Públikas (MOP), Arq. Salvador Eugénio Soares dos Reis Pires, hamutuk ho S. Exa, Prezidente Tribunál Rekursu (TR), Sr. Deolindo dos Santos, S. Exa, Ministru Justisa (MJ), Sr. Manuel Carseres, akompaña S. Exa, Primeiru Ministru (PM), Sr. Taur Matan Ruak, observa progressu konstrusaun edifísiu Tribunál Distritu Dili, iha suku Kaikoli, postu administrative Vera Krus, munisípiu Dili, ne’ebé daudauk ne’e atinji ona pursentu 27 (27%).

“Ne’e S. Exa, Prezidente Tribunál Rekursu konvida ami, ha’u, Sr. Ministru Justisa, Sr. Ministru Obras Públikas ami mai vizita fatin ida-ne’e i iha tinan kotuk (2020) ita lansa, ha’u hakarak hatete katak, ha’u kontente loos haree kontratór nia servisu ho mós konsultan nia servisu, kualidade di’ak tanba ita halo obras balun iha Timor ha’u haree rasik mais ida-ne’e ha’u apresia, ha’u espera tinan oin bele remata,”S. Exa, Sr. Primeiru Ministru informa ba jornalista sira hafoin vizita no observa progressu konstrusaun edifísiu Tribunál Distritu Dili, iha suku Kaikoli.

Iha estadu de direitu demokrátiu, pilar importante boot ida mak setór justisa, tanba ne’e presiza prepara infraestrutura ne’ebé di’ak hodi fasilita servisu setór justisa nian, prepara kuadru sira, prepara teknolojia ne’ebé di’ak nune’e servidór sira servisu ho konfortábel hodi konsentra ba iha servisu atende sidadaun sira.

Sr. Primeiru Ministru hatete, “Ha’u fó parabéns ba sira, ba S. Exa, Prezidente Tribunál Rekursu tanba ekipa tékniku ne’ebé halo akompañamentu ne’e di’ak loos i ha’u espera katak ida-ne’e sai referénsia boot ida ba ita-hotu ninia esforsu ba dezenvolvimentu infraestrutura iha futuru oin mai, kualidade, kualidade, kualidade ne’e importante loos, tanba ita gasta osan mais ita mós hakarak uza, ita gasta osan depois ita gasta de’it, ita la uza ba tempu naruk ne’e dehan ita soe masin ba iha tasi-laran”.

Sr. Primeiru Ministru apresia mós ba kontratór, konsultór, ekipa tékniku no traballadór sira ne’ebé hala’o servisu ho di’ak tebes, no husu kontinua halo servisu ho hodi garante kualidade edifísiu dura ba tinan naruk.

Konstrusaun ba edifísiu TDD ne’e lansa iha loron 25 fulan-Novembru tinan 2020. Obra ne’e konstrui husi kompañia Xineza, China Shandong International Economic & Technical Cooperation Group, R.P. no hetan supervizaun husi kompañia DACREA parseria ho AEC (Archtimor Engineering Consultents), no projetu ne’e nia kustu mai husi Orsamentu Jerál Estadu dollar amerikanu millaun 10,990 resin, no daudauk ne’e atinji ona pursentu 27 (27%).

Enkuantu períodu konstrusaun ba obra refere hamutuk loron 510, sura husi loron 12 fulan-Outubru tinan 2020 to’o loron 6 fulan-Marsu tinan 2022.

#Media_MOP

 

Read More

HAFOIN HETAN BENSAUN HUSI AMU MARQUES, GABIENETE MINISTRU MOP MUDA ONA BA EDIFÍSIU REHABILITADU

HAFOIN HETAN BENSAUN HUSI AMU MARQUES, GABIENETE MINISTRU MOP MUDA ONA BA EDIFÍSIU REHABILITADU

DILI, 13 AGOSTU 2021: Iha Sesta-feira ne’e, Amu Pe. Pascoal Marquês, husi dioseze Maliana fó bensaun ba edifísiu Ministériu Obras Públikas (MOP) ne’ebé rehabilitadu husi kompañia Cefla Unip. Lda, nune’e hahú iha loron-Segunda, 16 fulan-Agostu tinan 2021, Gabinete Ministériu Obras Públikas nian hahú hala’o servisu iha edifísiu refere.

“Husi fatin ida-ne’e imi mós bele halo ema barak hatene moris, bele hatene buka moris iha fatin ida obras públikas”Amu Marquês, hatete hafoin fó bensaun ba edifísiu MOP.

Iha fatin hanesan. S. Exa, Ministru Obras Públikas (MOP0, Arq. Salvador Eugénio Soares dos Reis Pires, informa edifísiu ne’e rehabilita ho hanoin katak bele rai hela memoria ida, no bele fasilita servisu ekipa Gabinete nian, para produtividade liután iha atendimentu públiku. Maske nune’e Parlamentu Nasionál hanesan segundu órgaun soberanu hasai ona rezolusaun katak área refere sai fatin ba futuru instalasaun edifísiu Parlamentu Nasionál nian.

“Ita-nia planu rehabilita edifísiu ida-ne’e, hanoin katak atu husik hela legadu ki’ikoan ruma iha Ministériu Obras Públikas ida-ne’e maibé foin daudauk ita-boot sira rona novidades oituan husi Parlamentu Nasionál katak iha plenária Parlamentu Nasionál deside tiha área ida-ne’e husi Lampu merah ida kraik to’o iha ita-nia EDTL sei sai hanesan fatin ba futuru instalasaun edifísiu Parlamentu Nasionál, tanba ida-ne’e iha prosesu hela diskusaun ho Governu ita hein de’it nia estatutu rai ne’e halo nusa, kuandu orgaun soberanu rua ne’e deside katak fó duni atribui rai ne’e ba edifísiu Parlamentu Nasionál nian, karik aban bainrua uma ida-ne’e baku rahun fali atu bele entrega rai,” Sr. Ministru Obras Públikas, hatete iha nia intervensaun antes edifísiu MOP hetan bensaun.

Maske nune’e, Sr. Ministru hatete, edifísiu rehabilitadu ona Gabinete Ministru utiliza uluk depois hein desizaun husi órgaun soberania sira, Parlamentu Nasionál no Governu nian ba estatutu rai.

Durante ne’e Gabienete Ministériu Obras Públikas okupa de’it edifísiu Eletrisidade Timor-Leste Empreza Públika (EDTL,E.P) nune’e Gabiente utiliza hikas nia edifísiu rehabilitadu hodi serví públiku di’ak liután.

“Ministru ba tiha sorin agora ita mai fali iha ne’e, espera katak ho fatin foun ne’e liuliu ami-nia gabinete sira sei iha liután espíritu atu serví no produtivu liután, bele lori rezultadu di’ak ba ita-nia servisu. Ohin ita hamutuk ho Amu iha ne’e atu inisia ita-nia servisu iha uma ne’ebé rehabilitadu tiha ona. Ha’u hakarak agradese dala ida tan ba Amu,”Sr. Ministru hatete.

Iha oportunidade ne’e, Sr. Ministru Obras Públikas agradese ba Diresaun Jerál Administrasaun no Finansas, Diretór Finansas no Diretór aprovizionamentu ba preparasaun prosesu tomak aprovizionamentu nian hodi hetan manán na’in, kontratór Cefla Unip. Lda hodi halo rehabilitasaun ba edifísiu refere. Agradese mós ba enjinéiru sira hotu husi Gabinete MOP no Kompañia nian ne’ebé dedika-an no kontribui tomak ba prosesu rehabilitasaun to’o remata.

Serimonia bensaun edifísiu ne’e partisipa husi Diretór Jerál Administrasaun no Finansas (DJAF), Sr. Januário A. Barbosa, ho Diretór Nasionál, Xefe Gabinete MOP, Sr. Zeferino Gusmão Rangel Cachola, funsionáriu, Assesór, tékniku no funsionáriu tomak DJAF nian.

#Media_MOP

Read More

KOMUNIDADE SUKU FATISI, BOKOLELO NO TOHUMETA POSTU LAULARA AGRADESE MOP-IJE HALO MELLORAMENTU BA ESTRADA

KOMUNIDADE SUKU FATISI, BOKOLELO NO TOHUMETA POSTU LAULARA AGRADESE MOP-IJE HALO MELLORAMENTU BA ESTRADA

LAULARA, 12 AGOSTU 2021: Komunidade suku Fatisi, Bokolelo no Tohumeta, postu administrativu Laulara, munisípiu Aileu agradese ba S. Exa, Ministru Obras Públikas (MOP), Arq. Salvador Eugénio Soares dos Reis Pires, no Prezidente Institutu Jestaun Ekipamentu (IJE), Eng. Hermenegilda da Costa Laurentina, ho ekipa tomak ne’ebé konsege orienta tékniku sira IJE nian hodi normaliza estrada iha suku sira postu administrativu Laulara nian.

Adminstradór postu administrativu Laulara, Sr. Abilio Alves, hato’o bemvindo ba Sr. Ministru Obras Públikas ho nia ekipa no hato’o geográfikamente lokalizasaun postu administrativu Laulara liuliu suku Fatisi nian. Administradór postu ne’e aksolok no agradese ba MOP liuhosi IJE bele normaliza ona estrada ba suku refere hodi fasilita movimentasaun komunidade nian.

“Ami laran haksolok tebes ba S. Exa ho nia ekipa tomak ne’ebé ohin bele mai haree fatin ida-ne’e i nune’e mós ami laran haksolok tebes, ami-nia halerik dia 4 de Abril nian, inundasaun maka’as, ami agradese tanba iha fatin ida-ne’e ami-nia estrada mós hetan normalizasaun, ida-ne’e ami-nia agradese ba S. Exa ho nia ekipa tomak, ne’ebé orienta ita-nia tékniku sira bele mai servisu iha fatin ida-ne’e ami hetan aksolok. Dala ida tan ami hato’o Bemvindo i obrigadu wa’in ba ita-boot sira bele mai vizita ami-nia postu Laulara, liuliu ba suku tolu ne’ebé agora daudauk ita-boot sira bele mai haree rasik fatin Fatisi, Bokolelo no Tohumeta iha fatin ida-ne’e,” Sr. Administradór postu ne’e inforama bainhira Sr. Ministru ho nia ekipa hala’o vizita ba iha suku Fatisi.

Maske melloramentu estrada husi IJE ne’e hamosu rai-rahun barak maibé bele fasilita netik komunidade iha suku tolu ne’e, postu administrativu Laulara nian.

Administradór postu Laulara mós rekomenda ba Sr. Ministru hodi dada eletrisidade ba komunidade ne’ebé sei tuur nia nakukun laran, liuliu ba suku tolu hanesan suku Tohumeta totalmente ahi oituan mós laiha, suku Bokolelo oituaan de’it, no suku Fatisi totalmente ahi seidauk iha. Iha oportunidade ne’e hato’o mós kona-ba preokupasaun bee-moos ba komunidade, maske nune’e administradór ne’e konsidera eletrisidade mak sai prioridade liu ba komunidade, nune’e bele naroman iha tempu kalan no bele fasilita ona sira estuda.

Nune’e mós Administradór munisípiu Aileu, Sr. Abel da Conceição, mós informa kona-ba prosesu ka esforsu ne’ebé parte autoridade munisípiu halo hodi IJE bele halo melloramentu ba estrada iha área postu administrativu Laulara nian.

“Momentu ne’eba (Kalamidade, 04 Abril) ita-nia situasaun grave oituan nune’e ha’u hatete ligasaun postu ne’e mak sai prioridade mak postu Remexio no Lekidoe, depois normalizasaun estrada parte rua ne’e hotu ona, transporte sira la’o normál fila-fali ita kanaliza kedas mai iha postu Laulara mak ita-nia suku tolu ne’e, Tohumeta, Fatisi no Bokolelo,”Sr. Administradós munisípiu ne’e esplika.

Administradór munisípiu ne’e mós agradese ba IJE ne’ebé fó ona atendimentu hodi normaliza estrada iha postu administrativu Laulara, Remexio no Lekidoe, relasaun ho situasaun kalamidade ka inundasaun ne’ebé akontese iha loron 04 fulan-Abril tinan 2021.

Iha fatin hanesan Prezidente IJE, Eng. Hermenegilda da Costa Laurentina, hatete loos duni ekipa IJE atende duni estrada iha suku refere liga ho kalamidade ne’ebé boot tebes akontese iha loron 04 fulan-Abril tinan 2021.

“Ha’u hetan oriantasaun husi S. Exa, Sr. Ministru rasik i ha’u orienta kedas enjinéiru no tékniku sira mai apoiu fatin sira ne’ebé hetan estragus. Ha’u hetan dadus husi ha’u-nia enjinéiru no mós ekipa ne’ebé servisu iha ne’e, iha fatin tolu mak sira halo normalizasaun no mós hadi’a estrada sira ne’ebé hetan estragus liuliu iha postu Remexio totál Kilometrus ne’ebé mak IJE ateru ou halo melloramentu ba estrada hamutuk 3,8KM mak IJE finaliza ona, iha tan postu Lekidoe nian 3.9KM ne’e IJE finalize ona, ikus liu mak postu Laulara, ida-ne’e 14. 315 ne’ebé mak ohin ami fila husi Aileu tuun mai ami haree katak estrada ida-ne’e maske triste oituan tanba han rai-rahun maibé bele fasilita ona komunidade sira ne’ebé hela iha ne’e atu tuun ba iha sidade Dili,”Sra. Prezidente IJE esplika.

Iha oportunidade ne’e, Sra. Prezidente IJE mós esplika kona-ba prosesu oinsá hatama proposta husi autoridade lokál sira-nian ba melloramentu estrada to’o prosesu rekolla dadus no mobilizasaun ekipamentu pezadu halo atendimentu.

S. Exa, Ministru Obras Públikas (MOP), Arq. Salvador Eugénio Soares dos Reis Pires, informa ba komunidade Laulara, kona-ba prosesu atendimentu ba preokupasaun komunidade nian liuliu hosi IJE, hato’o mós programa no atividade ministériu ne’ebé programadu ona no planu ba oin liuhosi orsamentasaun iha Orsamentu Jerál Estadu (OJE).

“Ohin ha’u mai ho ha’u-nia ekipa mai halo vizita traballu ba obra di’ak ne’ebé ohin Sra, Prezidente IJE ko’alia tiha ona kona-ba atendimentu ita-boot sira-nia preokupasaun. Governu ida-ne’e, VIII Governu nia prioridades mak hanoin atu lori servisu liuliu infraestruturas bázikas ba ita-nia komunidade bele asesu. Ha’u hatene katak ita-nia povu liuliu ama-apa sira iha área rurais nia ezijénsia dala-barak hakarak atu Governu tau-matan. Ita-boot sira hatene katak depois de independénsia ita-nia estrada teritóriu tomak totál rihun 6.500 Kilometrus, husi Governu ida primeiru to’o agora ne’e ita foin halo 2.000 Kilometru resin ho orsamentu billaun $3 resin, ne’e husi estrada nasionál, estrada munisipál no mós estrada rurál, ne’e signifika saida, Ita-nia osan natón, tinan-tinan ita tau oituan ba suku ou aldeia, oituan-oituan maibé tinan-tinan ita tau, ita halo neineik to’o loron ida ita bele halo hotu, maibé hodi hein estrada ne’ebé fixu ba ita-nia komunidade sira, Ministériu Obras Públikas liuhosi IJE hakarak fó uluk atendimentu ne’ebé urjenti ba ita-nia komunidade sira bainhira akontesimentu sira, sira presiza tulun situasaun emerjénsia hanesan foin daudauk kalamidade 04 Abril, ida-ne’e mak ita halo hela, see ita-boot sira haree karik iha suku barak,

Sr. Ministru afirma, IJE nia papél mak atu halo normalizasaun ba mota, melloramentu estrada, loke estrada foun, atendimentu emerjénsia sira hanesan hasai rai sira ne’ebé mak monu satan estrada atu nune’e atividade ka movimentasaun populasaun nian kontinua la’o nafatin.

Iha oportunidade ne’e, Sr. Ministru partilla mós atividade no programa Governu nian ne’ebé daudauk ne’e la’o hela liuliu liga ho postu administrativu Laulara nian hanesan eletrisidade, no bee-moos inklui programa estrada nian ne’ebé tutela direita ba Ministériu Obras Públikas.

Iha sesaun husu no hatán komunidade agradese tanba foin primeira vés Sr. Ministru Obras Públikas hala’o vizita ba suku Fatisi. Komunidade hato’o preokupasaun sira liga ho eletrisidade, bee-moos, estrada liuliu halo drenajen ba estrada ne’ebé IJE normaliza ona, nune’e tempu udan estrada labele hetan estragus.

#Media_MOP

 

Read More

MOP VIZITA NO ENKONTRU HO ADMINISTRADÓR MUNISÍPIU AILEU

MOP VIZITA NO ENKONTRU HO ADMINISTRADÓR MUNISÍPIU AILEU

AILEU, 12 AGOSTU 2021: S. Exa, Ministru Obras Públikas (MOP), Arq. Salvador Eugénio Soares dos Reis Pires, hala’o vizita traballu ba iha edifísiu Administradór munisípiu Aileu, hodi hodi hasoru malu ho administradór munisípiu Aileu nian, Sr. Abel da Conceição, hodi ko’alia liu kona-ba programa atividade iha área infraestruturas bázikas ba munisípiu Aileu hanesan estrada, eletrisidade no bee-moos.

Iha enkontru ne’e, partisipa mós husi Komandante Polísia Nasionál Timor-Leste (PNTL) munisípiu Aileu, Superintendente Polísia, Jorge Monteiro, Prezidente Institutu Jestaun Ekipamentus Institutu Públiku (IJE,I.P), Eng. Hermenegilda da Costa Laurentina, ho nia vogál, Xefe Gabinete MOP, Sr. Zeferino Gusmão Rangel Cachola.

Hafoin enkontru ho autoridade munisípiu Aileu nian, Sr. Ministru ho nia ekipa akompaña husi administradór munisípiu Aileu, Prezidente IJE no tékniku sira kontinua hala’o vizita traballu ba suku Fatisi, postu administrativu Laulara, munisípiu Aileu hodi haree direita servisu ekipa IJE nian ba melloramentu estrada iha área refere.

#Media_MOP

 

Read More

PREZIDENTE ANAS,I.P, ATUALIZA SERVISU BA MOP

 PREZIDENTE ANAS,I.P, ATUALIZA SERVISU BA MOP

DILI, 11 AGOSTU 2021: Prezidente Autoridade Nasionál Água no Saneamentu Institutu Públiku (ANAS,I.P), Eng. Domingos Pinto, atualiza informasaun ba S. Exa, Ministru Obras Públikas (MOP), Arq. Salvador Eugénio Soares dos Reis Pires, liga ho servisu ANAS,I.P nian hanesan autoridade kontrolu liga ho fornesimentu bee-moos ba komunidade.

ANAS hanesan instituisaun reguladora ba fornesimentu bee-moos nian ne’ebé foin harii, nune’e presiza kria baze legál sira hodi fundamenta atuasaun hanesan autoridade reguladór ba bee-moos no saneamentu.

#Media_MOP

Read More

MOP: EMPREZA NASIONÁL LIVRE KOMPETE BA PROJETU KONSTRUSAUN SIVÍL MILLAUN $1 BA LETEN

MOP: EMPREZA NASIONÁL LIVRE KOMPETE BA PROJETU KONSTRUSAUN SIVÍL MILLAUN $1 BA LETEN

DILI, 11 AGOSTU 2021: S. Exa, Ministru Obras Públikas (MOP), Arq. Salvador Eugénio Soares dos Reis Pires, ohin aprezenta ba Konsellu Ministru alterasaun dahuluk ba Dekretu Lei 27/2010, loron 22 fulan-Dezembru kona-ba “Regime Jurídico de Certificação e Inscrição de Empresas de Construção Civil e Consultória Técnica Civil” hodi fó livre ba empreza nasionál sira hodi kompete iha projetu konstrusaun sivíl ho montante millaun $1 ba leten, no hetan ona aprovasaun iha Konsellu Ministrus no sei lori ba S. Exa, Prezidente Repúblika (PR), Sr. Francisco Guterres Lú-Olo, hodi promulga.

“Ohin MOP aprezenta alterasaun dahuluk ba Dekretu Lei 27/2010, ne’e ba klasifikasaun pra kualifikasaun, iha ne’eba, iha artigu 7 (iha Dekretu Lei orijinál, Dekretu Lei 27/2010, loron 22 Dezembru) ne’e limita tiha ita-nia empreza nasionál, ita-nia setór privadu nasionál sira labele kompete (projetu konstrusaun sivíl) millaun $1 ba leten, depois millaun $1 to’o $7.5 ne’e ba de’it empreza internasionál mais agora ita hasai tiha limitasaun ne’e sira bele kompete kualker montante konforme sira, bele partisipa tuir sira-nia kapasidade finanseira, esperiénsia no rekursu umanus ne’ebé iha, tuir ejijénsia kazu a kazu projetu ruma ne’ebé mosu iha dokumentu Bidding ne’e, dokumentu ba tenderizasaun, ne’ebé sira agora iha ona ida-ne’e, depois de aprovasaun ne’e lori ba S. Exa, Prezidente da Repúblika promulga i ita bele implementa ida-ne’e,”Sr. Ministru Obras Públikas informa ba jornalista sira iha Palásiu Governu, Dili hafoin partisipa reuniaun Konsellu Ministru.

Governante ne’e hatutan, husi alterasaun dahuluk ba Dekretu Lei ne’e “Fó biban ba ita-nia setór privadu bele kompete ba projetu ka obra ne’ebé montante mak liu millaun $1, uluk ne’e limita iha konstrusaun sivíl millaun $1 mai karaik, to’o de’it millaun $1, agora sira bele ona, laiha limitasaun”.

Governu halo alterasaun ba Dekretu Lei ne’e tanba haree ba kapasidade empreza nasionál sira ne’ebé kontinua aumenta, haforsa liután emprendedorízmu nasionál iha setór konstrusaun sivíl no rekoñese mós nível espesializasaun no kapasidade ne’ebé empreza nasionál sira hetan iha tinan barak nia-laran.

Instrumentu legál ne’e sei fasilita di’ak liután partisipasaun empreza nasiionál sira nian ein partikular no timoroan sira nian ein jerál iha prosesu dezenvolvimentu nasionál liuhosi obra bo’ot no sofistifikada sira.

Antes ne’e, emprezáriu nasionál sira husu Sr. Ministru hodi hato’o sira-nia prontidaun ba ezekusaun projetu konstrusaun sivíl ne’ebé ho osan montante boot millaun $1 ba leten.

#Media_MOP

Read More