DEZEÑU BA ESTRADA LAGA-BAGUIA IHA ONA FAZE FINÁL, HEIN PROSESU TENDERIZASAUN PROJETU KANSELA, NE’E LALOOS
DILI, 05 JULLU 2021: Ministériu Obras Públikas (MOP) hakarak klarifika ba públiku liuliu ba komunidade Laga no Baguia oan munisípiu Baukau nian katak prosesu konstrusaun ba estrada munisipál husi postu administrativu Laga to’o postu administrativu Baguia daudauk ne’e nia dezeñu iha ona faze finál, hein Governu liuhosi Konsellu Administrasaun Fundu Infraestrutura (KAFI) deside, prosesu tenderizasaun iha Komisaun Nasionál Aprovizionamentu (CNA) hodi halo konstrusaun ba estrada refere.
Ministériu Obras Públikas husu ba autoridade lokál inklui komunidade iha área Laga no Baguia nian atu lalika fiar informasaun ne’ebé pessoál ho Identidade (ID) facebook: Cailawa Boramori, fó sai iha nia konta katak Laga ba Baguia kontinua terus tanba projetu estrada Laga-Baguia kansela ona.
Liuhosi pájina ofisiál facebook Ministériu Obras Públikas nian ida-ne’e hakarak informa ba públiku katak nutísia ho títulu “Projetu Estrada Laga-Baguia Kansela” ne’e publika husi Jornál Suara Timor Lorosa’e (STL) iha tinan 2017 no la’os iha tinan 2021.
Projetu ba konstrusaun estrada munisipál husi postu Laga ba to’o Baguia Dezeñu Detalladu Enjinaria (Detail Engineering Design – DED) iha ona faze finál, hein prosesu tenderizasaun hodi halo rekonstrusaun ba estrada Laga-Baguia ne’ebé daudauk ne’e kondisaun grave hela.
Iha oportunidade ida-ne’e hakarak informa mós katak S. Exa, Ministru Obras Públikas (MOP), Arq. Salvador Eugénio Soares dos Reis Pires, tau ona iha ajénda katak iha tempu badak Sr. Ministru sei halo vizita traballu ba munisípiu Baukau liuliu ba haree direita kondisaun estrada diresaun husi Laga ba to’o Baguia.
0 Comments:
Posting Komentar