MOP OBSERVA ESTRAGUS ESTRADA DILI-BAUKAU NO PONTE BEHEDA NO MANATUTO

 MOP OBSERVA ESTRAGUS ESTRADA DILI-BAUKAU NO PONTE BEHEDA NO MANATUTO

MANATUTO, 31 MAIU 2021: S. Exa, Ministru Obras Públikas (MOP), Arq. Salvador Eugénio Soares dos Reis Pires, iha Segunda-feira ne’e hafoin partisipa reuniaun Konsellu Ministru desloka kedas ba munisípiu Baukau hodi observa estragus iha estrada no ponte diresaun Dili to’o munisípiu Manatuto no husi Manatuto to’o munisípiu Baukau, kauza husi Siklon tropical seroja ne’ebé akontese iha loron 04 fulan-Abril 2021.

Ba dahuluk Sr. Ministru halo observasaun ba estrada monu iha área Subaun boot nian ne’ebé hafoin udan-boot iha 04 Abril kompañia kontratór normaliza hikas. Kontinua halo observasaun ba mota ponte foun iha Beheda no orienta Unidade Manajementu Projetu (PMU) estrada presiza halo intevernsaun hasai sedimentasaun iha ponte okos (mota-laran) no halo koresaun ba mota nune’e bainhira udan-boot labele fó ameasa ba ponte foun nia estrutura.

“Ita-boot sira haree hela ba, mota ne’e presiza hasai sedimentasaun, halo loos de’it nune’e bainhira udan labele fó ameasa ba ponte,”Sr. Ministru orienta.

Ba estrada monu iha área Beheda nian, daudauk ne’e sei iha responsabilidade kompaña kontratór nune’e kompañia hahú daudauk ona halo rehabilitasaun, konstrui hikas moru protesaun hodi asegura estrada iha área refere labele monu.

Halo mós observasaun ba estrutura ponte Manatuto nian liuliu moru protesaun sira ne’ebé hetan estragus husi mota Laklo.

Sr. Ministru husu atu PMU estrada atu tau mós prioridade ba moru protesaun sira iha mota Manatuto no Laleia nian, inklui halo normalizasaun ba mota, nune’e, bainhira udan-boot labele estraga estrutura ponte nian. Nune’e parte PMU estrada sei ko’alia ho komunidade iha área Beheda nian atu kolabora oinsá halo kooresaun ba mota refere.

Atividade observasaun ne’e, Sr. Ministru akompaña husi Diretór Jerál Administrasaun no Finansas (DJAF), Sr. Januário Barbosa, Prezidente Institutu Jestaun Ekipamentus (IJE), Sra. Hermenegilda D. C. Laurentina, Jestór Unidade Manajementu Projetu (PMU) estrada, Sr. Sidónio Amaral Freitas, inklui tékniku sira.

#Media_MOP