KAK DESIMINA INFORMASAUN LEI 7/2020 KONA-BA MEDIDA PREVENSAUN NO KOMBATE KORUPSAUN BA FUNSIONÁRIU NO AJENTE SIRA IHA MOP

KAK DESIMINA INFORMASAUN LEI 7/2020 KONA-BA MEDIDA PREVENSAUN NO KOMBATE KORUPSAUN BA FUNSIONÁRIU NO AJENTE SIRA IHA MOP

DILI, 07 JUNNU 2021: S. Exa, Ministru Obras Públikas (MOP), Arq. Salvador Eugénio Soares dos Reis Pires, halo abertura ba semináriu desiminasaun informasaun lei 7/2020, 26 Agusto kona-ba “Medidas Prevensaun no Kombate Korupsaun Liga ba Deklarasaun Riku-soin” ba funsionáriu públiku no ajente sira tutela Minist’eriu Obras Públikas nian iha Novu Turizmu, Dili.

Desiminasaun informasaun kona-ba Lei Medida Prevensaun ba Kombate Korupsaun 7/2020 ba funsionáriu públiku no ajente sira iha Ministériu Obras Públikas ne’e hala’o direita husi Komisaun Anti Korupsaun (KAK).

“Semináriu ohin ne’e konvida Komisaun Anti Korupsaun mai halo desiminasaun ba Lei Medida no Kombate Korupsaun ba Funsionáriu Públiku. Ita-boot sira hatene katak lei númeru 7/2020 ne’e ejiji funsionáriu públiku, kargu sefia, xefe gabiente, assesór sira hotu tenke présta deklarasaun riku-soin, atu nune’e labele iha konflitu interese bainhira présta sira-nia kna’ar hanesan funsionáriu públiku ou ajente husi instituisaun Governu nian, iha kazu ida-ne’e Ministériu Obras Públikas nian. Ha’u hanoin katak lei ida-ne’e sei kontribui maka’as ba hasa’e, eleva ita-nia prestasaun servisu liuliu liga ho Obras Públikas, prestasaun servisu bázika, kualidade projetu sira, tanba rigormente ita bele kontrola konflitu interese liuhosi implementasaun lei ida-ne’e,”S. Exa, Ministru Obras Públikas, informa ba jornalista sira hafoin partisipa no halo abertura ba semináriu desiminasaun informasaun lei 7/2020 kona-ba “Medidas Prevensaun no Kombate Korupsaun Liga ba Deklarasaun Riku-soin” iha Novu Turizmu, Dili.

Sr. Ministru hatutan “Ha’u-nia espetativa depois deklarasaun riku-soin ne’e signifika ita-nia servisu prestasaun infraestrutura bázika liuliu husi aspetu administrativa sei efisiente liután, laiha intensaun konflitu interese ne’ebé bele mosu husi jestaun, husi projetu sira ka ezekusaun orsamentál ne’ebé mak iha, ha’u fiar katak ida-ne’e bele kesi ka kontrola liután ita-nia funsionáriu públiku sira ne’ebé mak servisu iha ministériu, présta hela servisu implementasaun husi obra ne’ebé uza osan públiku, ka povu nia osan mak finansia, liuhosi Orsamentu Jerál Estadu”.

Iha intervensaun Sr. Ministru husu funsionáriu públiku no ajente sira tutela ba Ministériu Obras Públikas atu kontribui ba medida prevensaun no kombate korupsaun liga ho deklarasaun riku-soin.

Iha fatin hanesan, Komisáriu KAK, Dr. Sergio Hornai, informa katak iha semináriu ne’e atu fahe informasaun kona-ba Lei Medida Prevensaun ba Kombate Korupsaun nian atu nune’e funsionáriu, ajende, traballadór no kargu sefia no mós sira ne’ebé mak la kaer funsaun maibé iha fatin sira ne’ebé estratéjiku, atu présta deklarasaun ba iha autoridade kompetente.

Sensebilizasaun ne’e atu bele lori besik liu koñesimentu lei ne’e nian ba iha kargu dirijente sira iha Ministériu Obras Públikas, atu nune’e sira komesa tau iha prátika ba iha formuláriu sira ne’ebé mak sei priense no sei kumpri ba iha prazu ne’ebé estabelese tiha ona iha Lei katak sei kumpri sira-nia deklarasaun sira hahú sira kaer posse to’o iha sira husik sira-nia kargu iha komisaun de servisu ka mandatu servisu ne’ebé mak sira halo kargu hanesan iha funsaun estruturál nian no mós iha funsionál nian.

“Ohin halo ejaminasaun ida ba iha lei medida prevensaun ba iha Kombate Korupsaun ne’ebé tama ona entrada em vigór liuliu iha kapítulu segundu ne’ebé ko’alia kona-ba deklarasaun rendimentu bens i intereses, ne’ebé neste momentu funsionáriu ajende, traballadór no kargu sefia no mós sira ne’ebé mak la kaer funsaun maibé iha fatin sira ne’ebé estratéjiku, sira hotu-hotu sei présta deklarasaun ba iha autoridade kompetente no ohin, ita mai sosializasaun atu konfirma ba dúvidas balun ne’ebé karik sei iha hela iha liña ministériu sira liuliu iha ministériu MOP nian, sira sei sujeita sira-nia deklarasaun iha tempu badak ba iha autoridade kompetente,”Komisáriu KAK ne’e esplika.

Komisáriu ne’e hatutan, sensebilizasaun ne’e “atu alerta ba malu katak lei ida-ne’e nia ezisténsia atu bele reuni instituisaun liuliu traballadór, ajente funsionáriu públiku nian para bele buka esforsu hotu-hotu oinsá mak bele ba iha kombate kriminalidade korupsaun nian, oinsá mak ita prevene para atu iha ita-nia boas prátika sira ba iha desizaun sira ne’ebé mak la’os desizaun téknika ne’ebé mak ita toma tenke kontribui ba iha bens estár ba iha interese komum hodi nune’e desizaun ne’e bele fó benefísiu ba ita-nia komunidade, ida-ne’e mak esensiál liu”.

Deklarasaun riku-soin ne’e mós atu hasés tiha posívelmente hahalok sira ne’ebé atu lori ita ba iha hahalok sira kriminalidade korupsaun nian, tanba ne’e sei ariska ba personalidade ida-idak ninian no mós bele fó nia efeitu ba iha imajen públiku i ba iha família ne’e rasik, entaun husi hanoin sira ne’e ita hakarak halo artikulasaun ka asimulasaun ida oinsá mak atu bele fó hanoin ba iha autoridade kompetente iha liña ministeriais direita ka indireita sira para atu bele buka esforsu, halibur esforsu sira atu bele ba kombate kriminalidade liuliu ba korupsaun ninian iha ita-nia rai doben Timor-Leste.

Semináriu ne’e partisipa husi Diretór Jerál Administrasaun no Finansas (DGAF), Sr. Januário Barbosa, Diretór Jerál Obras Públikas (DJOP), Sr. Rui Hernani, Prezidente Konsellu Administrasaun no vogál sira husi EDTL, E.P ho ANE,I.P, BTL,E.P ho ANAS,I.P no IJE,I.P, vogál no kargu sefia sira iha instituisaun sira tutela ba Ministériu Obras Públikas, inklui assesór no tékniku sira.

Semináriu ne’e partisipa mós husi obras públikas munisipál no munisípiu balun desentralizadu iha munisípiu nune’e Ministériu Administrasaun Estatál (MAE) liuhosi administrasaun munisipál liuliu obras públikas munisipál mós sei partisipa halo deklarasaun riku-soin ba iha KAK.

#Media_MOP