PMU-TBP Aprezenta Dezeñu Entrada Portu Tibar ba MOP

PMU-TBP Aprezenta Dezeñu Entrada Portu Tibar ba MOP

Dili, Sexta, 03 Agostu 2018 : Jestór ba Unidade Jestaun Projetu Konstrusaun Portu Tibar (PMU-TBP), Rui Soares, husi Parseiru Públiku no Privadu (PPP) portu Tibar, ho nia ekipa, aprezenta dezeñu entrada no konstrusaun Portu Tibar ba S. Exa, Ministru Obras Públikas (MOP), Arq. Salvador Eugénio Soares Dos Reis Pires.

“Ita mak prepara infra-estrutura bázikas hanesan estrada, husi Lafatik (Rotunda Kumoro) ba to’o iha Portu, entaun iha ne’eba hatete, kuandu portu ne’e atu halo ona operasaun, kondisaun previa sira hanesan estrada no entrada sira ne’e tenke di’ak uluk,” S. Exa, Ministru Obras Públikas hatete, hafoin aprezentasaun iha salaun edifísiu MOP, Kaikoli, Dili.

Durante diskusaun, opsaun tolu mak aprezenta husi PMU mak hanesan, Rotunda (Roundabouts), Entronkamentu ho Ahi Tránzitu (T-Junction With Traffic Lights) no Ponte Elevada (Flying Bridge) kona-ba entrada ba Portu Tibar nian. Tanba ne’e, iha diskusaun deside opsaun rotunda, sai hanesan opsaun ne’ebé viabél hodi fó vantazen di’ak liu ba sirkulasaun tráfiku iha Portu Tibar nian.

“Ohin ami deside katak Rotunda mak di’ak liu, depois governu tenke prevé osan para halo estudu detallu para halo implementasaun iha 2019,” S. Exa, Ministru Obras Públikas hatete.

Tinan ne’e, governu sei tau orsamentu hodi halo estudus detallu ba estrada entrada Portu Tibar nian, ne’ebé tuir estimasaun iha aprezentasaun provolta Milliaun $2 resin ba entrada Portu Tibar nian.

 

Ministériu Obras Públikas

#Media_MOP